Sa mga Kristianong Hebreo kan enot na siglo, si apostol Pablo nagsurat: “Igwa pang natatada na pagpahingalo sa sabbath para sa banwaan nin Dios. Huli ta an luminaog na sa kapahingaloan nin Dios nagpahingalo na man sa saiyang sadiring mga gibo, arog kan ginibo nin Dios. Kun siring gibohon niato an satong pinakamakakaya na makalaog sa kapahingaloan na iyan.”​—Hebreo 4:9-11.

Kan magtaram si Pablo dapit sa pagpahingalo nin Dios sa Saiyang mga gibo, minalataw na an sinasambit nia iyo an sinasabi sa Genesis 2:​2, na dian satong mababasa: “Kan ikapitong aldaw natapos nin Dios an saiyang gibo na saiyang ginibo, asin sia nagpoon na magpahingalo sa ikapitong aldaw sa gabos niang gibo na saiyang ginibo.” Taano ta pinonan ni Jehova na “magpahingalo sa ikapitong aldaw”? Segurado na bakong huli ta kaipuhan niang makabawi nin kosog “sa gabos niang gibo na saiyang ginibo.” An sunod na bersikulo nagtatao nin giya: “Binendisyonan nin Dios an ikapitong aldaw asin pinagin sagrado iyan, huli ta dian sia nagpapahingalo sa gabos niang gibo na linalang nin Dios sa katuyohan na gibohon.”​—Genesis 2:3; Isaias 40:​26, 28.

An “ikapitong aldaw” laen sa arin man kan naenot na anom na aldaw huli ta iyan aldaw na binendisyonan asin pinagin sagrado nin Dios, an boot sabihon, sarong aldaw na itinagama para sa, o idinusay sa, sarong espesyal na katuyohan. Ano an katuyohan na iyan? Bago kaidto, ihinayag nin Dios an saiyang katuyohan mapadapit sa katawohan asin sa daga. Sa enot na lalaki asin sa saiyang agom, an Dios nagsabi: “Pangagbunga asin pangagdakol kamo asin panoa nindo an daga patin sakopa nindo iyan, asin sakopon nindo an mga sira sa dagat asin an mga gamgam sa kalangitan patin an lambang nabubuhay na hayop na naghihiro sa ibabaw kan daga.” (Genesis 1:28) Minsan ngani tinawan nin Dios an katawohan asin an daga nin sangkap na kapinonan, magkakaipo nin panahon tanganing an bilog na daga masakop asin magibong sarong paraiso na pano nin sangkap na pamilya nin tawo, na iyong katuyohan nin Dios. Sa siring, sa “ikapitong aldaw,” an Dios nagpahingalo, o nag-ontok, sa dugang pang mga gibo nin paglalang sa daga tanganing pangyarihon an mga nalalang na nia na mahaman oyon sa saiyang kabotan. Sa katapusan kan “aldaw” na iyan, an gabos na katuyohan nin Dios maootob na. Magigin gurano kalawig an pagpahingalo na iyan?

Nasa isip an makangangalas na oportunidad na iyan, ipinaliwanag ni Pablo kun paano an saro makalalaog sa kapahingaloan nin Dios. Sia nagsurat: “An luminaog na sa kapahingaloan nin Dios nagpahingalo na man sa saiyang sadiring mga gibo.” Sinasabi kaini sa sato na minsan ngani igwa nin sangkap na kapinonan, an katawohan sa kabilogan dai naglaog sa kapahingaloan nin Dios. Ini huli ta si Adan asin Eva dai sinunod nin haloy na panahon an pagpahingalo nin Dios sa “ikapitong aldaw” paagi sa pag-ako sa saiyang areglo para sa sainda. Imbes, sinda nagrebelde asin gustong magin indipendiente sa Dios. Sa katunayan, uminayon sinda sa mga pakana ni Satanas imbes na akoon an mamomoton na pagdirehir nin Dios. (Genesis 2:15-17) Bilang resulta, nawara ninda an oportunidad na mabuhay sagkod lamang sa sarong paraisong daga. Poon kaidto, an bilog na katawohan napaoripon sa kasalan asin kagadanan. ​—Roma 5:​12, 14.

An pagrebelde nin katawohan dai nakaolang sa katuyohan nin Dios. An saiyang aldaw nin kapahingaloan nagpapadagos. Minsan siring, naggibo si Jehova nin mamomoton na probisyon​—an pantubos​—paagi sa saiyang Aki, si Jesu-Cristo, tanganing an gabos na maako kaiyan basado sa pagtubod makaantisipar sa pakabutas asin pakapahingalo sa pagabat na kasalan asin kagadanan. (Roma 6:23) Iyan an dahelan kaya sinadol ni Pablo an mga kapwa nia Kristiano na ‘magpahingalo sa saindang sadiring mga gibo.’ Kinaipuhan nindang akoon an probisyon nin Dios para sa kaligtasan asin dai magprobar na muknaon an sadiri nindang ngapit sa sadiri nindang paagi, siring kan ginibo ni Adan asin Eva. Kinaipuhan man nindang likayan an pag-aaabot sa sadiri nindang mga gibo nin pagtataong katanosan sa sadiri.

An pagpagilid sa paslo o kinabanon na mga pinag-aaabot nin saro tanganing gibohon an kabotan nin Dios tunay nanggad na nakakarepresko asin nakakapaginhawa. Isinabi ni Jesus an pangagdang ini: “Madia kamo sa sako, kamo gabos na nagpapagal asin nagagabatan, asin pagiginhawahon ko kamo. Pasana nindo an sakong sakal asin makanood kamo sa sako, huli ta ako mahoyo asin may kababaan an puso, asin makakukua kamo nin kaginhawahan para sa saindong kalag. Huli ta an sakong sakal maboot asin an sakong pasan magian.”​—Mateo 11:28-30.

An pagtokar ni Pablo kan kapahingaloan nin Dios asin kun paano an saro makalalaog dian sierto nanggad na sarong pamparigon sa boot para sa mga Kristianong Hebreo sa Jerusalem, na nagtagal nin dakol na paglamag asin pag-olog-olog huli sa saindang pagtubod. (Gibo 8:1; 12:1-5) Kaagid kaiyan, an mga tataramon ni Pablo puedeng magparigon sa boot kan mga Kristiano ngonyan. Huling nakaaaram na haranihon na an kaotoban kan panuga nin Dios na pangyarihon an sarong paraisong daga sakop kan saiyang matanos na Kahadean, kita maninigo man na magpahingalo sa satong sadiring mga gibo asin gibohon an satong pinakamakakaya na makalaog sa kapahingaloan na iyan.​—Mateo 6:​10, 33; 2 Pedro 3:13.