LEKSIYON 51
Paano Ta Mapapaugma si Jehova sa Satong Pagtaram?
Kan lalangon kita ni Jehova, tinawan niya kita nin sarong magayunon na regalo—an kakayahan na magtaram. Mahalaga daw saiya kun paano ta ginagamit an regalong iyan? Siyempre iyo! (Basahon an Santiago 1:26.) Kaya paano ta magagamit an satong kakayahan na magtaram sa paaging nakakapaugma ki Jehova?
1. Paano ta magagamit sa marahay na paagi an regalo ni Jehova?
Sinasabi sa sato kan Bibliya: “Padagos na pakusugon asin parigunon an lambang saro.” (1 Tesalonica 5:11) May mga naiisip ka daw na kaipuhan nin pampakusog nin buot? Ano an puwede mong gibuhon? Sabihon sa sainda na nagmamalasakit ka. Puwede mong sabihon sa sainda kun ano an mga naaapresyar mo sa sainda. May naiisip ka daw na teksto na makakapakusog sa sainda? Kadakul ka nin mapagpipilian. Tandaan man na may dakulang epekto bako lang kun ano an sinasabi mo kundi pati man kun paano mo iyan sinasabi. Kaya pirming hinguwahon na magin mabuot asin mahuyo sa pagtaram.—Talinhaga 15:1.
2. Anong klase nin mga tataramon an dapat tang likayan?
Sinasabi kan Bibliya: “Dai pabayaan na magluwas sa nguso nindo an lapang mga tataramon.” (Basahon an Efeso 4:29.) Nangangahulugan iyan na dai kita magamit nin maraot o mapangmenos saka daing modong mga tataramon para tuyong kulgan an buot kan iba. Dapat ta man likayan an tsismis asin pagpakaraot.—Basahon an Talinhaga 16:28.
3. Ano an makakatabang sa sato para magin nakakapakusog an satong pagtaram?
Sa parati, mahihiling sa sinasabi ta kun ano talaga an namamati asin iniisip ta. (Lucas 6:45) Kaya kaipuhan tang sanayon an satong sadiri na magpokus sa positibong mga bagay—mga bagay na matanos, malinig, kawili-wili, asin kaumaw-umaw. (Filipos 4:8) Para magibo iyan, dapat na magin maingat kita sa pagpili kan satong libangan asin mga amigo. (Talinhaga 13:20) Makakatabang man kun maisip nguna kita bago kita magtaram. Isipon kun ano an puwedeng magin epekto sa iba kan sasabihon mo. Sinasabi kan Bibliya: “An dai pinag-isipan na mga tataramon siring sa mga saksak nin espada, pero an dila kan mga madunong nakakapaumay.”—Talinhaga 12:18.
ARAMON PA
Aramon kun paano magigin nakakaugma ki Jehova asin nakakapakusog sa iba an saimong pagtaram.
4. Magin maingat sa pagtaram
Gabos kita may mga nasasabi kun minsan na pinagbabasulan ta sa huri. (Santiago 3:2) Basahon an Galacia 5:22, 23, dangan pag-ulayan an mga hapot na ini:
Arin sa mga kuwalidad na iyan an puwede mong ipamibi para magin maingat ka sa pagtaram? Paano makakatabang saimo an mga kuwalidad na iyan?
Basahon an 1 Corinto 15:33, dangan pag-ulayan an hapot na ini:
Ano an puwedeng magin epekto sa saimong mga sinasabi kan pinipili mong mga amigo asin libangan?
Ano an mga puwedeng makaimpluwensiya sa saimong pagtaram?
Basahon an Eclesiastes 3:1, 7, dangan pag-ulayan an hapot na ini:
Sa anong mga sitwasyon mas marahay na magsilensiyo o maghalat nin mas marahay na pagkakataon para sabihon an sarong bagay?
5. Magin positibo sa saimong mga sinasabi manungod sa iba
Paano ta malilikayan na magtaram nin nakakakulog na mga tataramon o negatibong mga bagay manungod sa iba? I-play an VIDEO, dangan pag-ulayan an mga hapot.
Sa video, taano ta gusto kan brother na baguhon an saiyang mga sinasabi manungod sa iba?
Ano an ginibo niya para mabago iyan?
Basahon an Eclesiastes 7:16, dangan pag-ulayan an hapot na ini:
Ano an dapat tang tandaan kun natetentaran kitang magtaram nin negatibong mga bagay manungod sa iba?
Basahon an Eclesiastes 7:21, 22, dangan pag-ulayan an hapot na ini:
Paano makakatabang sa saimo an mga bersikulong ini pag may nagtaram nin negatibong bagay manungod saimo?
6. Magin mabuot sa pakikipag-ulay sa saimong pamilya
Gusto ni Jehova na magin mabuot asin mamumuton kita pag nakikipag-ulay sa satong pamilya. I-play an VIDEO, dangan pag-ulayan an hapot.
Ano an makakatabang para magin mabuot ka pag nakikipag-ulay sa saimong kapamilya?
Basahon an Efeso 4:31, 32, dangan pag-ulayan an hapot na ini:
Anong klase nin mga tataramon an nakakapakusog sa relasyon nin sarong pamilya?
Sinabi ni Jehova an namamatian niya manungod sa saiyang Aki na si Jesus. Basahon an Mateo 17:5, dangan pag-ulayan an hapot na ini:
Paano mo maaarog si Jehova sa paagi mo nin pakikipag-ulay sa saimong mga kapamilya?
Maghanap nin mga oportunidad para komendaran an iba
MAY MGA NAGSASABI: “Sinasabi ko man lang kun ano an nasa isip ko. Problema na ’yan kan iba kun dai ninda magustuhan an sinabi ko.”
Uyon ka daw diyan? Taano?
SUMARYO
Dakula an epekto kan satong mga sinasabi. Kaipuhan tang pag-isipan na marhay kun ano an satong sasabihon, asin kun nuarin saka kun paano ta iyan sasabihon.
Rebyu
Ano an nagkapirang paagi na mapapakusog mo an iba paagi sa saimong tataramon?
Anong klase nin mga tataramon an gusto mong likayan?
Ano an makakatabang sa sato tanganing pirming magin mabuot saka nakakapakusog an satong pagtaram?
HILINGON MAN
Ano an makakatabang sa sato para magin nakakapakusog sa iba an satong mga sinasabi?
Aramon kun ano an makakatabang sa saimo para malikayan an pagmuda.
Aramon kun paano mo malilikayan an pagtsismis.
Aramon kun paano tinabangan ni Jehova an sarong lalaki na nasasakitan ipundo an pagmuda.
“Seryoso Kong Pinag-isipan Kung Saan Patungo ang Aking Buhay” (Ang Bantayan, Agosto 1, 2013)