KAPITULO 35

Paano Ako Magigin Amigo nin Diyos?

Pagkatapos mag-agi nin trahedya, narealisar ni Jeremy na mahalagang marhay an magin amigo nin Diyos. “Kan 12 anyos ako, binayaan kami ni Papa,” an sabi niya. “Sarong banggi sa higdaan, namibi ako sa Diyos. Nakimahirak ako ki Jehova na papulion niya na si Papa.”

Grabe an kamunduan ni Jeremy kaya nagbasa siya nin Bibliya. Kan mabasa niya an Salmo 10:14, na-touch siyang marhay kaiyan. Sinasabi kaiyan manungod ki Jehova: “Sa saimo minadulok an kahirak-hirak na biktima; ika an paratabang sa aki na mayo nang ama.” Sinabi ni Jeremy: “Pagmati ko kinakaulay ako ni Jehova tapos sinasabi niya sako na siya an matabang sako asin na siya an Ama ko. Para sako, siya an pinakamarahay na puwede tang magin Ama.”

MAGKAPAREHO man kamo nin sitwasyon ni Jeremy o bako, sinasabi kan Bibliya na gusto ni Jehova na magin amigo ka niya. Sa katunayan, sinasabi kan Bibliya: “Rumani kamo sa Diyos, asin marani siya sa saindo.” (Santiago 4:8) Isipon mo iyan: Dawa dai mo siya nahihiling—saka dawa nakakalabing marhay siya saimo sa gabos na bagay—inaagda ka kan Diyos na Jehova na magin amigo niya!

Pero igwa kang dapat gibuhon para magin amigo nin Diyos. Kapareho iyan kun may masitas ka sa harong, aram mo na dai iyan matalubo sa sadiri sana kaiyan. Kaipuhan mong regular iyan na baribian saka ilaag sa lugar na makakatabang sa pagtalubo kaiyan. Arog man kaiyan sa pakikiamigo sa Diyos. Paano mo mapapatalubo o mapapakusog an pakikiamigo mo sa Diyos?

An Kahalagahan kan Pag-adal

Sa mag-amigo, mahalaga an komunikasyon. Kaipuhan tang magdangog asin makipag-ulay sa satong amigo. Arog man kaiyan sa pakikiamigo sa Diyos. Pag nagbabasa saka nag-aadal kita nin Bibliya, dinadangog ta an sinasabi sato nin Diyos.—Salmo 1:2, 3.

Iyo, puwedeng bako kang mainadal. Dakul sa mga hoben an mas gustong mag-TV, magkawat, o makiiba-iba sa mga barkada. Pero kun gusto mong magin amigo nin Diyos, mayo ’yan nin shortcut. Kaipuhan mong magdangog saiya paagi sa pag-adal sa saiyang Tataramon.

Pero dai ka mahadit. Dai mo pag-isipon na masakit an pag-adal nin Bibliya. May magigibo ka para ikaugma mo iyan dawa bako kang mainadal. An inot na kaipuhan mong gibuhon iyo na magtagama nin oras para sa pag-adal nin Bibliya. “May iskedyul ako,” an sabi nin sarong hoben na babayi na si Lais. “An inot kong ginigibo pagkaaga, nagbabasa ako nin sarong kapitulo sa Bibliya.” May ibang iskedyul man an 15 anyos na si Maria. “Nagbabasa ako nin dikit sa Bibliya bago magturog,” an sabi niya.

Para mapunan an saimong programa nin pag-adal sa Bibliya, hilingon an kahon na “Siyasaton an Saimong Bibliya.” Dangan, isurat sa ibaba an oras kun nuarin ka puwedeng maggamit nin dawa 30 minutos o labi pa para pag-adalan an Tataramon nin Diyos.

․․․․․

An pag-iskedyul kapinunan pa sana. Pag napunan mo na an pag-adal, mahihiling mo na bako pirming pasil basahon an Bibliya. Prangkang sinabi kan 11 anyos na si Jezreel, “Masakit sabuton an ibang parte kan Bibliya saka dai ka gayong mag-e-enjoy.” Kun arog man kaiyan an namamatian mo, dai magsuko. Pirming isipon na pag nag-aadal ka nin Bibliya, panahon iyan na nagdadangog ka sa saimong amigo, an Diyos na Jehova. Pag abot nin panahon, pag hininguwa mong makinabang sa pag-adal nin Bibliya, magigin exciting iyan para saimo saka mae-enjoy mo iyan!

Mahalagang Marhay an Pamibi

Kinakaulay ta an Diyos paagi sa pamibi. Isipa na sana kun gurano kagayon na regalo an pamibi! Puwede kang makaapod sa Diyos na Jehova ano man na oras, aldaw man o banggi. Handa siya pirmi na magdangog. Saka bako lang iyan, gusto niyang madangog an sasabihon mo. Kaya sinasabi sato kan Bibliya: “Sa gabos na bagay paagi sa pamibi asin pagngayo-ngayo na may kaibang pasasalamat, ipaaram nindo sa Diyos an saindong mga kahagadan.”—Filipos 4:6.

Arog kan ipinapahiling kan teksto, dakulon kang puwedeng ipakipag-ulay ki Jehova. Puwedeng kaiba diyan an mga problema saka mga ikinakahadit mo. Puwede mo man sambiton an mga bagay na ipinagpapasalamat mo. Kun sa bagay, nagpapasalamat ka ngani sa marahay na mga bagay na ginibo kan mga amigo mo para saimo, bako? Magayon kun papasalamatan mo man si Jehova, na mas dakul nanggad an nagibo para saimo kisa sa siisay man na amigo mo.—Salmo 106:1.

Isurat sa ibaba an nagkapirang bagay na ipinagpapasalamat mo ki Jehova.

․․․․․

Siguradong kun minsan, may mga ikinakatakot o ikinakahadit ka. Sinasabi kan Salmo 55:22: “Ipasa mo ki Jehova an saimong pasan, asin aalalayan ka niya. Dai niya nuarin man tutugutan na matumba an saro na matanos.”

Isurat sa ibaba an ano man na mga ikinakahadit mo na gusto mong ipamibi.

․․․․․

Personal na Eksperyensiya

May saro pang aspekto an pakikiamigo mo sa Diyos na dapat mong tawan nin atensiyon. An salmistang si David nagsurat: “Namitan nindo asin hilingon na marahay si Jehova.” (Salmo 34:8) Kan isinurat ni David an ika-34 nin Salmo, nag-agi pa sana siya nin nakakatakot na sitwasyon. Nagdulag siya ta pighahanting siya ni Hading Saul—sarong dipisilon na sitwasyon. Pero an nakakatakot pa ta sa teritoryo kan kaiwal niyang mga Filisteo siya kinaipuhan magtago. Kan garo baga mayo nang madudulagan si David, nagsagin-sagin siyang bua-bua kaya nakadulag siya.—1 Samuel 21:10-15.

Dai inisip ni David na huli sa pagigin mapamaagi niya kaya siya nakaligtas sa peligrosong sitwasyon na idto. Imbes, sinabi niya na huli idto ki Jehova. Isinurat niya: “Naghapot ako ki Jehova, asin sinimbag niya ako. Ilinigtas niya ako sa gabos na kinakatakutan ko.” (Salmo 34:4) Kaya an personal na eksperyensiya ni David an nagpahiro saiya na sadulon an iba na ‘namitan asin hilingon na marahay si Jehova.’a

May nagigirumduman ka daw na eksperyensiya mo na nagpapahiling na nagmamalasakit saimo si Jehova? Kun igwa, isurat iyan sa ibaba. Dai man kaipuhan na madramang marhay iyan. Isipon an simpleng mga bendisyon na inaako mo sa aroaldaw, na an iba kaiyan tibaad napapasipara mo lang.

․․․․․

Tibaad mga magurang mo an nagtukdo saimo nin Bibliya. Kun iyo, bendisyon iyan. Pero, kaipuhan mo man giraray na magkaigwa nin personal na pakikiamigo sa Diyos. Kun dai mo pa iyan nagibo, puwede mong gamiton an impormasyon sa kapitulong ini para magibo iyan. Bebendisyunan ni Jehova an mga paghihinguwa mo. Sinasabi kan Bibliya: “Padagos na maghagad, asin itatao iyan sa saindo; padagos na maghanap, asin makakakua kamo.”—Mateo 7:7.

[Nota sa Ibaba]

PANGINOT NA TEKSTO

“Maugma an mga nakakamating kaipuhan ninda nin espirituwal na mga bagay.”—Mateo 5:3.

TIP

Magbasa nin maski apat sanang pahina kan Bibliya kada aldaw. Sa laog nin sarong taon, matatapos mo an bilog na Bibliya.

ARAM MO DAW . . . ?

An pagbasa mo kan librong ini saka an pagsunod sa mga sadol na hali sa Bibliya patunay na personal na nagmamalasakit si Jehova sa saimo.—Juan 6:44.

AN PLANO KONG GIBUHON!

Para mas makinabang ako sa personal na pag-adal ko nin Bibliya, an gigibuhon ko ․․․․․

Para lalong magin regular an pagpamibi ko, an gigibuhon ko ․․․․․

Uni an mga ihahapot ko sa (mga) magurang ko manungod diyan ․․․․․

ANO SA HILING MO?

● Ano an puwede mong gibuhon para mas mag-enjoy ka sa personal na pag-adal mo nin Bibliya?

● Taano ta gusto ni Jehova na dangugon an mga pamibi nin bakong perpektong mga tawo?

● Ano an puwede mong gibuhon para magin mas makahulugan an saimong mga pamibi?

[Blurb]

“Kan aki-aki pa ako, pauruutro an mga pamibi ko. Ngunyan hinihinguwa kong sabihon sa pamibi an magayon saka bakong magayon na nangyari sa maghapon. Dahil mayo man talagang aldaw na eksaktong magkapareho, nakakatabang iyan na dai magin pauruutro an mga pamibi ko.”—Eve

[Kahon/Ritrato]

Siyasaton an Saimong Bibliya

 1. Magpili nin sarong istorya sa Bibliya na gusto mong basahon. Hagadon sa pamibi na lugod masabutan mo an babasahon mo.

 2. Basahon na marhay an istorya. Dai maghidali. Gamiton an saimong imahinasyon mantang nagbabasa. Isipon na yaon ka duman asin na nahihiling mo an mga nangyayari, nadadangog an mga boses kan mga karakter sa istorya, napaparong an duros, nananamitan an kakanon, asin iba pa. Gibuhon na buhay na buhay sa isip mo an istorya!

 3. Pag-isipan an saimong binasa. Haputon an sadiri nin arog kaining mga hapot:

● Ta’no ta iiniba ni Jehova an istoryang ini sa saiyang Tataramon?

● Siisay an mga dapat arugon, saka siisay an nagseserbing nagpapatanid na mga halimbawa?

● Anong praktikal na mga leksiyon an manunudan ko sa istoryang ini?

● Ano an itinutukdo kaiyan sako manungod ki Jehova asin sa mga pamamaagi niya?

 4. Mamibi nin halipot ki Jehova. Sabihon saiya an mga nanudan mo sa pag-adal mo nin Bibliya saka kun paano mo gustong isabuhay iyan. Pirming pasalamatan si Jehova sa regalong itinao niya saimo—an saiyang Tataramon, an Banal na Bibliya!

[Ritrato]

“An saimong tataramon lampara sa bitis ko, asin liwanag para sa dalan ko.”—Salmo 119:105.

[Kahon/Ritrato]

Inuton an Dapat na Inuton

Sibot kang marhay para mamibi? Mayo kang oras para mag-adal nin Bibliya? Sa parati, nakadepende iyan sa kun ano an iniinot mo.

Purbaran an eksperimentong ini: Magkua ka nin balde, tapos laugan mo iyan nin nagkapirang darakulang gapo. Dangan laugan mo iyan nin baybay sagkod na mapano. Igwa ka na ngunyan nin sarong balde na pano nin gapo saka baybay.

Ngunyan halian mo nin laog an balde. Dangan ibalik mo giraray diyan su dating laog kaiyan na baybay saka mga gapo, pero baliktadon mo an proseso. Inuton mong ilaog su baybay, tapos sunod mong ilaog su gabos na gapo. Kulang nang espasyo? Su baybay kaya an pig-inot mong ilaog.

Ano an punto? Sinasabi kan Bibliya: “[Siyertuhon] nindo kun ano an mas importanteng mga bagay.” (Filipos 1:10) Kun iinuton mo an saradit na bagay arog kan paglilibang, posibleng mawaran ka na nin lugar para sa darakulang mga bagay—mga bagay o aktibidad na para sa Diyos. Pero kun susunudon mo an sinasabi kan Bibliya, mahihiling mo na may panahon ka para sa mga bagay na may koneksiyon sa paglilingkod sa Diyos pati na sa paglilibang. Nakadepende iyan sa kun ano an iniinot mo!

[Ritrato]

Arog nin masitas sa harong, an pakikiamigo sa Diyos kaipuhan atamanon para tumalubo