Nagigirumdoman daw Nindo?

Tinawan daw nindo nin maingat na paghorophorop an dai pa sana nahahaloy na mga luwas kan An Torrengbantayan asin The Watchtower? Kun iyo, magigin interesante sa saindo na girumdomon an minasunod:

◻ Taano an doktrina nin patienot na pagtalaga ta bakong makatanosan?

Kun dati nang aram asin iminanda nin Dios an pagkaholog ni Adan sa kasalan, kun siring si Jehova an nagin autor nin kasalan kan lalangon nia an tawo asin sia an may paninimbagan sa gabos na karatan asin pagdusa nin tawo. Ini dai puedeng ioyon sa katunayan na si Jehova Dios nin pagkamoot na naoongis sa karatan. (Salmo 33:5; Talinhaga 15:9; 1 Juan 4:8)​—w-BI 4/15, pahina 7, 8.

◻ Bilang kaotoban kan Isaias 2:​2-4, ano an ginigibo nin mga tawo hale sa dakol na nasyon?

Mantang sinda pasiring sa harong nin pagsamba ki Jehova, sinda man dai ‘nag-aadal sa pakilaban’ huli ta an saindang kompiansa yaon sa pagprotehir kan langitnon na mga hukbo nin Dios, na andam nang laglagon an gabos na kaiwal nin katoninongan.​—w-BI 4/15, pahina 30.

◻ Sairisay an makokosog nin Dios na nasambitan sa Joel 3:​10, 11?

Mga 280 beses sa Biblia, an tunay na Dios inaapod na “Jehova nin mga hukbo.” (2 Hade 3:14) An mga hukbong ini iyo an makapangyarihan na mga anghel sa langit, na andam na gibohon an ipagboot sa sainda ni Jehova.​—w-BI 5/1, pahina 23.

◻ Anong leksion an satong manonodan sa paghagad ni Jehova ki Job na ipamibi an mga nagkasala tumang sa saiya? (Job 42:8)

Bago ibalik sa marahay na kamugtakan si Job, hinagad ni Jehova na sia mamibi para sa mga nagkasala tumang sa saiya. Ipinaheheling kaini na hinahagad ni Jehova na patawadon niato an mga nagkasala tumang sa sato bago patawadon an satong mga kasalan. (Mateo 6:12; Efeso 4:32)​—w-E 5/1, pahina 31.

◻ Ano an boot sabihon ni Santiago kan sabihon nia: “Togotan nindo na malubos kan pakatagal an gibo kaiyan”? (Santiago 1:4)

May trabaho an pakatagal, sarong “gibo.” An asignasyon kaiyan gibohon kitang lubos sa gabos na bagay. Huli kaini, paagi sa pagtogot na matapos an mga pagbalo na dai naggagamit nin mga paaging bakong sono sa Kasuratan tanganing taposon tolos iyan, an satong pagtubod nababalo asin nadadalisay.​—w-BI 5/15, pahina 16.

◻ Taano an Dios ta naghalat nin halawigon sa pagresolber sa mga problema nin katawohan?

An pagmansay ni Jehova sa panahon laen kan sa sato. Para sa daing sagkod na Dios, an peryodo poon kan paglalang ki Adan sagkod ngonyan dai pa ngani masarong semana. (2 Pedro 3:8) Alagad ano man an satong pagmansay sa panahon, an kada aldaw na minaagi orog kitang irinarani sa aldaw nin pagbindikar ki Jehova.​—w-BI 6/1, pahina 5, 6.

◻ Ano an nagmomotibar sa Mga Saksi ni Jehova?

An pagtotokdo ni Jehova nagpaluwas nin sarong banwaan na daing kapareho, na tinokdoan na kamotan an lambang saro asin an saindang kataed nin siring sa sainda man sana. (Isaias 54:13) An pagkamoot an nagmomotibar sa Mga Saksi ni Jehova na padagos na maghulit sa ibong nin pagkaindiperente asin oposisyon kan publiko. (Mateo 22:​36-40; 1 Corinto 13:​1-8)​—w-BI 6/15, pahina 20.

◻ Ano an ipinasesentido kan mga tataramon ni Jesus na: “Maghingoa kamo nin maigot na makalaog sa piot na tata”? (Lucas 13:24)

An mga tataramon ni Jesus nagpapasentido nin paglapigot, na iinuubos an makakaya niato. An saiyang mga tataramon nagpaparisa man na may nagkapira na tibaad maghingoang ‘makalaog sa tata’ sa paaging kombenyente sana sa sainda, sa pinili nindang pasil na dalagan. Kaya an kada saro sa sato puedeng maghapot, ‘Ako daw utitok asin mahigos?’​—w-E 6/15, pahina 31.

◻ Paano an mga binuhay liwat ‘hohokoman sono sa mga bagay na nasusurat sa mga balumbon oyon sa saindang mga gibo’? (Kapahayagan 20:12)

An mga balumbon na ini bakong rekord kan saindang nakaaging mga gibo; kan sinda magadan, sinda inabsuelto sa mga kasalan na nakomiter ninda kan sinda buhay pa. (Roma 6:​7, 23) Minsan siring, an binuhay liwat na mga tawo nasa irarom pa man giraray kan Adanikong kasalan. Kun siring, sierto na itatao kan mga balumbon na ini an mga instruksion nin Dios na dapat sunodon kan gabos tanganing lubos na makinabang sa atang ni Jesu-Cristo.​—w-BI 7/1, pahina 22.

◻ Anong mga leksion an makukua niato sa parabola ni Jesus manongod sa Samaritanong tataong makipagkapwa-tawo? (Lucas 10:​30-37)

Ipinaheheling kan parabola ni Jesus na an tunay na tanos na tawo saro na bako sanang nagkukuyog sa mga ley nin Dios kundi inaarog man an saiyang mga kualidad. (Efeso 5:1) Ipinaheheling man kaiyan na an pakikipagkapwa-tawo maninigong lihis sa gabos na olang huli sa nasyon, kultura, asin relihion. (Galacia 6:10)​—w-E 7/1, pahina 31.

◻ Ano an tolong langtad na dian puede nindong mamidbid an saindong mga aki asin itao an paggiya nin mga magurang?

(1) Tabangan an saindong mga aki na pumili nin tamang klase nin sekular na trabaho; (2) andamon sinda na makaya an emosyonal na tension sa eskuelahan asin sa pinagtatrabawohan; (3) itokdo sa sainda kun paano mapaninigoan an saindang espirituwal na mga pangangaipo.​—w-BI 7/15, pahina 4.

◻ Sa anong katuyohan na an Dios nagpahingalo sa “ikapitong aldaw”? (Genesis 2:​1-3)

An Dios dai nagpahingalo huli sa kapagalan. Imbes, sia nagpondo sa gibohon digdi sa daga tanganing pabayaan na magprogreso an saiyang mga ginibo asin makaabot sa lubos na kamurawayan, para sa saiyang kaomawan asin onra.​—w-BI 7/15, pahina 18.

◻ Ano an tolong paagi na puede niatong gibohon an hustisya?

Enot, kaipuhan kitang sumunod sa mga pamantayan nin Dios sa moral. (Isaias 1:17) Ikaduwa, naggigibo kita nin hustisya kun an pagtratar niato sa iba kapareho kan boot niatong magin pagtratar sa sato ni Jehova. (Salmo 130:​3, 4) Ikatolo, kita nagpapaheling nin diosnon na hustisya kun kita mahigos na nakikikabtang sa paghuhulit. (Talinhaga 3:27)​—w-BI 8/1, pahina 14, 15.