Mga Leksiyon na Manunudan Ta sa Duwang Surat ni Pedro

 1. Kan madali nang magadan si apostol Pedro, ano an ipinasabong sa saiya na gibuhon?

ARAM ni apostol Pedro na madali na siyang magadan. Sa dakul na taon nin maimbod na paglilingkod niya, nakaiba-iba niya si Jesus sa paghuhulit, pinunan niya an paghuhulit sa mga bakong Judio, asin naglingkod siya bilang miyembro kan namamahalang grupo. Pero dai pa tapos an paglilingkod ni Pedro. Kan mga 62-64 C.E., pinasabngan siyang gumibo nin duwang surat—an mga libro sa Bibliya na 1 asin 2 Pedro. Naglaom siya na an duwang surat na ini makakatabang sa mga Kristiyano pagkagadan niya.​—2 Ped. 1:​12-15.

 2. Taano ta napapanahon na marhay an mga surat ni Pedro?

² Ginibo ni Pedro an ipinasabong na mga surat niya kan panahon na an saiyang mga kapagtubod ‘nagtitios nin lain-lain na kasakitan.’ (1 Ped. 1:6) An maraot na mga tawo nagpurbar na iintrodusir sa laog kan kongregasyon an palsong mga katukduan asin maating mga gibo. (2 Ped. 2:​1, 2, 14) An mga Kristiyanong nakaistar sa Jerusalem madali nang mapaatubang sa “katapusan kan gabos na bagay”—an paglaglag kan hukbo nin Roma sa siyudad na iyan asin sa Judiong mga sistema nin mga bagay. (1 Ped. 4:7) Daing duda na an mga surat ni Pedro nakatabang sa mga Kristiyano na maaraman kun ano an puwede nindang gibuhon tanganing matagalan an presenteng mga pagbalo asin makapag-andam para sa maabot na mga pagbalo.b

 3. Taano ta dapat niyatong siyasaton an ipinasabong na mga surat ni Pedro?

³ Dawa ngani para sa inot na siglong mga Kristiyano an mga surat ni Pedro, iiniba iyan ni Jehova sa Saiyang Tataramon. Kaya makikinabang kita ngunyan sa mga surat na iyan. (Roma 15:4) Huling nabubuhay kita sa sarong kinaban na lakop an maating mga gibo, napapaatubang man kita sa mga pagbalo na puwedeng magpadipisil na paglingkudan si Jehova. Dugang pa, madali ta nang maeksperyensiyahan an kasakitan na mas grabe pa kisa sa kasakitan na nagresulta sa pagtatapos kan Judiong mga sistema. Makakakua kita nin nagkapirang mahalagang marhay na mga pagirumdom sa duwang surat ni Pedro. Makakatabang an mga iyan sa sato na padagos na halaton an aldaw ni Jehova, labanan an pagkatakot sa tawo, asin kultibaron an makusog na pagkamuot sa lambang saro. An siring na mga pagirumdom makakatabang man sa mga elder na maaraman kun paano mapangganang aasikasuhon an mga pangangaipo kan aripumpon.

 4. Arog kan sinasabi sa 2 Pedro 3:​3, 4, ano an puwedeng makapaluya sa satong pagtubod?

⁴ Napapalibutan kita nin mga tawo na dai nagtutubod sa propesiya sa Bibliya. An mga parakontra tibaad tuya-tuyaon kita huling dakul na taon ta nang sinasabi na maabot na an katapusan. May mga kritiko na nagsasabi na nungka iyan na maabot. (Basahon an 2 Pedro 3:​3, 4.) Pag nadadangog ta iyan sa sarong kagharong, katrabaho, o kapamilya, puwedeng lumuya an satong pagtubod. Ipinaliwanag ni Pedro kun ano an makakatabang sa sato.

 5. Ano an makakatabang sa sato na mapagdanay an tamang pagmansay manungod sa katapusan kan sistemang ini? (2 Pedro 3:​8, 9)

⁵ Para sa nagkapira garo baga nag-aatraso si Jehova sa pagtapos kan presenteng maraot na sistema. An mga tataramon ni Pedro makakatabang sa sato na mapagdanay an tamang pagmansay, na ipinapagirumdom sa sato na an pagmansay ni Jehova sa panahon ibang-iba kisa kan sa mga tawo. (Basahon an 2 Pedro 3:​8, 9.) Para ki Jehova an sangribong taon garo sarong aldaw. Mapasensiya si Jehova, asin habo niya na an siisay man malaglag. Alagad, pag nag-abot na an aldaw niya, an sistemang ini matatapos. Sarong pribilehiyo nanggad na gamiton ta an panahon na natatada para mapatotoohan an mga tawo sa gabos na nasyon.

 6. Paano niyato ‘pirming isasaisip’ an aldaw ni Jehova? (2 Pedro 3:​11, 12)

⁶ Dinadagka kita ni Pedro na ‘pirming isaisip’ an aldaw ni Jehova. (Basahon an 2 Pedro 3:​11, 12.) Paano? Marahay na hurop-hurupon niyato—kun posible aroaldaw—an mga bendisyon sa bagong kinaban. Imahinara an sadiri mo na naghahangos nin malinigon na duros, nagkakakan nin masustansiyang kakanon, sinasabat an mga mahal sa buhay na binuhay liwat, saka tinutukduan an mga tawong nabuhay kaidtong mga pirang siglo na an nakaagi manungod sa kautuban kan mga propesiya sa Bibliya. An siring na paghurop-hurop makakatabang sa saimo na padagos na maghalat asin magin sigurado na nabubuhay na kita sa huring mga aldaw. Kaya “mantang patiinot na [niyatong] aram” an manungod sa mangyayari sa maabot na panahon, ‘dai kita mailalagalag’ kan mga bakong tunay na paratukdo.​—2 Ped. 3:17.

 7. Paano puwedeng makaapektar sa sato an pagkatakot sa tawo?

⁷ Mantang padagos tang isinasaisip an aldaw ni Jehova, napapahiro kita na sabihon sa iba an maugmang bareta. Pero, may mga pagkakataon na tibaad mag-alangan kitang magtaram. Taano? Huling puwedeng temporaryo kitang madaog nin pagkatakot sa tawo. Nangyari iyan ki Pedro. Kan banggi nin pagbista ki Jesus, natakot si Pedro na magpabisto na saro siya sa mga disipulo ni Jesus asin pauruutro niyang pignigaran na bisto niya ini. (Mat. 26:​69-75) Minsan siring, an apostol man sanang ini, may kumbiksiyon na nagsabi kan huri: “Dai nindo katakutan an saindang kinakatakutan, asin dai man kamo mapurisaw.” (1 Ped. 3:14) Inaasigurar kita kan mga tataramon ni Pedro na kaya tang labanan an pagkatakot sa tawo.

 8. Ano an makakatabang sato na labanan an pagkatakot sa tawo? (1 Pedro 3:15)

⁸ Ano an makakatabang sato na labanan an pagkatakot sa tawo? Sinasabi sa sato ni Pedro: “Sa saindong puso pabanalon nindo an Cristo bilang Kagurangnan.” (Basahon an 1 Pedro 3:15.) Kaiba digdi an paghurop-hurop sa katungdan asin kapangyarihan kan satong Kagurangnan asin Hadi, si Cristo Jesus. Kun nakakamati ka nin nerbiyos o takot pag nagkaigwa ka nin pagkakataon na sabihon sa iba an maugmang bareta, girumdumon an satong Hadi. Imahinara na naghahadi siya sa langit asin napapalibutan nin dai mabilang na mga anghel. Girumduma na yaon sa saiya “an gabos na awtoridad sa langit asin sa daga” asin siya magigin “kaibanan [mo] sa gabos na aldaw sagkod sa pagtatapos kan sistema nin mga bagay.” (Mat. 28:​18-20) Sinasadol kita ni Pedro na “pirming [magin] handang” idepensa an satong pagtubod. Gusto mo daw na magpatotoo sa trabaho, sa eskuwelahan, o sa iba pang impormal na paagi? Patiinot na pag-isipan kun nuarin mo iyan puwedeng gibuhon, dangan mag-andam sa kun ano an sasabihon mo. Mamibi para sa kusog nin buot, na nagtitiwala na tatabangan ka ni Jehova na labanan an pagkatakot sa tawo.​—Gibo 4:29.

 9. Sa sarong pagkakataon, paano si Pedro dai nakapahiling nin pagkamuot? (Hilingon man an ritrato.)

⁹ Nanudan ni Pedro kun paano magpahiling nin pagkamuot. Yaon siya kan sabihon ni Jesus: “Tinatawan ko kamo nin sarong bagong tugon, na kamutan nindo an lambang saro; kamutan nindo an lambang saro arog kan pagkamuot ko sa saindo.” (Juan 13:34) Sa ibong kaiyan, kan huri nagpadaog si Pedro sa panggigipit asin nagsayumang kumakan kaiba kan saiyang mga tugang na Hentil. Inapod ni apostol Pablo an ginibo ni Pedro na sarong “pagsagin-sagin.” (Gal. 2:​11-14) Inako ni Pedro an pagtatanos na iyan asin nakanuod siya diyan. Sa duwang surat niya, idinuon niya na dai ta lang dapat mamatian an pagkamuot sa satong mga tugang kundi ipahiling ta man an pagkamuot na iyan.

10. An “daing pagsagin-sagin na pagkamuot na sa-magturugang” resulta nin ano? Ipaliwanag. (1 Pedro 1:22)

¹⁰ Sinasabi ni Pedro na dapat igwa kita nin “daing pagsagin-sagin na pagkamuot na sa-magturugang” sa satong mga kapagtubod. (Basahon an 1 Pedro 1:22.) An siring na pagmati resulta kan “pagsunod sa katotoohan.” Kaiba sa katotoohan na ini an katukduan na “an Diyos mayong pinapalain.” (Gibo 10:​34, 35) Dai ta nasusunod an pagbuot ni Jesus manungod sa pagkamuot kun nagpapahiling kita nin pagkamuot sa nagkapira sa kongregasyon pero dai sa iba. Siyempre, tibaad mas dayupot kita sa nagkapira kisa sa iba, arog ni Jesus. (Juan 13:23; 20:2) Pero ipinapagirumdom sa sato ni Pedro na dapat hinguwahon tang magkaigwa nin “pagkamuot na sa-magturugang”—na siring sa kadayuputan nin magkakapamilya—sa gabos niyatong tugang.​—1 Ped. 2:17.

11. Ano an buot sabihon kan kamutan an iba nin “udok . . . gikan sa puso”?

¹¹ Sinasadol kita ni Pedro na “kamutan . . . nin udok an lambang saro nin gikan sa puso.” Sa kontekstong ini, an buot sabihon kan kamutan an iba nin “udok” iyo na mamutan an saro dawa kun masakit na magpahiling nin pagkamuot sa saiya. Halimbawa, paano kun makulgan kita nin sarong tugang? Tibaad an inot na reaksiyon ta iyo na magbalos imbes na magpahiling nin pagkamuot. Alagad, nanudan ni Pedro ki Jesus na an pagbalos dai nakakapaugma sa Diyos. (Juan 18:​10, 11) Si Pedro nagsurat: “Dai magbalos nin maraot sa maraot o nin insulto sa insulto. Imbes, magbalos nin mabuot na mga tataramon.” (1 Ped. 3:9) Tugutan an udok na pagkamuot na pahiruon ka na magin mabuot asin makonsiderasyon dawa sa mga tibaad nakakulog sa saimo.

12. (a) Papahiruon kita kan udok na pagkamuot na gibuhon pa an ano? (b) Ano an gusto mong hinguwahon na gibuhon, arog kan ipinapahiling sa video na Ingatan an Mahalagang Marhay na Regalong Pagkasararo?

¹² Sa inot na surat ni Pedro, ginamit niya an ekspresyon na “makusog na pagkamuot.” An siring na pagkamuot nagtatahob, bako sana sa pirang kasalan, kundi sa “dakul na kasalan.” (1 Ped. 4:8) Posibleng nagirumduman ni Pedro an leksiyon manungod sa pagpapatawad na itinukdo sa saiya ni Jesus mga pirang taon na an nakaagi. Kaidto, posibleng marhay na nagtutubod si Pedro na saro siyang marahayon na tawo kan sabihon niya na papatawadon niya an saiyang tugang nin sagkod sa “pitong beses.” Pero tinukduan siya ni Jesus—pati kita—na magpatawad “sagkod sa 77 beses,” an buot sabihon daing limitasyon. (Mat. 18:​21, 22) Kun nasasakitan kang iaplikar an sadol na ini, dai ka madisganar! An gabos na bakong perpektong lingkod ni Jehova nasasakitan kun minsan na magpatawad. An mahalaga ngunyan iyo na gumibo ka nin ano man na kinakaipuhan na mga lakdang para patawadon an saimong tugang asin makipagkatuninungan sa saiya.c

13. Ano an nakakapadipisil sa mga elder sa pagpastor ninda sa mga tugang?

¹³ Siguradong nungkang nalingawan ni Pedro an sinabi sa saiya ni Jesus pagkatapos Siyang buhayon liwat: “Pasturan mo an sakuyang saradit na karnero.” (Juan 21:16) Kun saro kang elder, aram mo na aplikado man sa saimo an instruksiyon na iyan. Alagad, puwedeng makapadipisil sa sarong elder an pagtao nin panahon para asikasuhon an importanteng asignasyon na ini. Dapat na inot na asikasuhon kan mga elder an pangangaipo sa pisikal, emosyonal, asin espirituwal kan sainda mismong pamilya. Nanginginot man sinda sa gibuhon na paghuhulit pati na sa pag-andam saka paggibo nin mga kabtang sa mga pagtiripon, asembleya, asin kumbensiyon. An iba man may mga paninimbagan bilang miyembro kan Hospital Liaison Committee o may mga asignasyon sa Local Design/Construction Department. Talagang sibot-sibot an mga elder!

14. Ano an puwedeng makamotibar sa mga elder na pasturan an aripumpon? (1 Pedro 5:​1-4)

¹⁴ “Pasturan nindo an aripumpon nin Diyos,” an sadol ni Pedro sa kapwa niya mga elder. (Basahon an 1 Pedro 5:​1-4.) Kun saro kang elder, aram niyamo na namumutan mo an saimong mga tugang asin gusto mong pasturan sinda. Minsan siring, tibaad kun minsan pagmati mo sibot-sibot o pagalon ka nang marhay kaya dai mo na kayang gibuhon an asignasyon na iyan. Ano an puwede mong gibuhon? Sabihon mo ki Jehova an gabos na ikinakahadit mo. Si Pedro nagsurat: “Kun an saro naglilingkod sa iba, gibuhon niya iyan na nagsasarig sa kusog na itinatao nin Diyos.” (1 Ped. 4:11) Tibaad an saimong mga tugang napapaatubang sa mga problema na dai lubos na masosolusyunan sa sistemang ini nin mga bagay. Pero tandaan na “an panginot na pastor,” si Jesu-Cristo, makakatabang sa sainda nin labi pa sa kaya mong gibuhon. Magigibo niya iyan sa ngunyan asin sa bagong kinaban. An gusto man sana nin Diyos na gibuhon kan mga elder iyo na kamutan an saindang mga tugang, pasturan an saindang mga tugang, asin na magin “mga halimbawa sa aripumpon.”

15. Paano pinasturan nin sarong elder an aripumpon? (Hilingon man an ritrato.)

¹⁵ Si William, na haloy nang elder, nasasabutan an kahalagahan nin pagpapastor. Kan magpuon an COVID-19 na pandemya, ginibo niya saka kan kapwa niya mga elder na priyoridad na kontakon kada semana an lambang indibidwal sa iinasignar sa sainda na grupo. Ipinaliwanag niya kun taano: “Dakul sa mga tugang an nagsosolo sa saindang harong, asin madalion sanang magin negatibo an mga iniisip ninda.” Pag may mga problema an sarong kapagtubod, nagdadangog na marhay si William para maaraman niya an mga kinakaipuhan asin ikinakahadit kaini. Dangan naghahanap siya nin espesipikong mga publikasyon, na sa parati mga video hali sa satong website, para matabangan an tugang na iyan. Sinabi niya: “Mas kaipuhan na marhay ngunyan an pagpapastor. Naghihinguwa kitang marhay na tabangan an mga tawo na makanuod manungod ki Jehova; kapareho man na paghihinguwa an kaipuhan mi para mapasturan an aripumpon, na tinatabangan an mga karnero ni Jehova na magdanay sa katotoohan.”

16. Sa anong mga paagi puwede tang iaplikar an mga leksiyon na nanudan ta sa mga surat ni Pedro?

¹⁶ Pira sanang mga leksiyon an napag-ulayan ta sa duwang ipinasabong na surat ni Pedro. Tibaad igwa kang nahiling na sarong bagay na gusto mong pauswagon. Halimbawa, gusto mo daw na mas parating maghurop-hurop manungod sa mga bendisyon na makakamtan mo sa bagong kinaban? Ginibo mo daw na pasuhan an pagpapatotoo sa trabaho, sa eskuwelahan, o sa iba pang impormal na paagi? May naiisip ka daw na mga paagi na puwede mong mas lubos na maipahiling an makusog na pagkamuot sa saimong mga tugang? Mga elder, determinado daw kamong pasturan nin gikan sa buot asin may kaigutan an mga karnero ni Jehova? Kun gigibuhon nindo an onestong pagsiyasat sa sadiri, tibaad mahiling nindo an nagkapirang kaluyahan nindo, pero dai kamo madisganar. ‘Mabuot an Kagurangnan,’ asin tatabangan niya kamong umuswag. (1 Ped. 2:3) Inaasigurar kita ni Pedro: “An Diyos . . . iyo mismo an makumpleto kan saindong pagsasanay. Paparigunon niya kamo, papakusugon niya kamo, ibubugtak niya kamo sa masarig na pundasyon.”​—1 Ped. 5:10.

17. Kun dai kita masuko asin kun tutugutan niyato na sanayon kita ni Jehova, ano an magigin resulta?

¹⁷ Namatian kaidto ni Pedro na bako siyang maninigo na makaibanan kan Aki nin Diyos. (Luc. 5:8) Pero huli sa mamumuton na suporta ni Jehova asin ni Jesus, dai suminuko si Pedro bilang parasunod ni Cristo. Sa siring, itinugot ki Pedro an “paglaog sa daing sagkod na Kahadian kan satuyang Kagurangnan asin Paraligtas na si Jesu-Cristo.” (2 Ped. 1:11) Magayunon nanggad na balos! Kun dai ka masuko arog kan ginibo ni Pedro asin tutugutan mong sanayon ka ni Jehova, makakamtan mo man an balos na buhay na daing katapusan. Magigibo mong ‘abuton an pasuhan kan saimong pagtubod, an saimong kaligtasan.’—1 Ped. 1:9.