Naghihingoa daw Kamo?

“Kun an siisay man na lalaki naghihingoang maabot an katongdan nin paraataman, sia boot sa marahay na gibo.”—1 TIMOTEO 3:1.

 1. An pag-otob sa anong katuyohan may pangenot na halaga sa mga Saksi ni Jehova?

AN MGA Saksi ni Jehova may tamang mga katuyohan na ginigiyahan asin ginigibo sa diosnon na paagi. Ini bakong makangangalas, ta an saindang Dios may nobleng mga katuyohan asin perming inootob an saiyang mga katuyohan. (Isaias 55:8-11) An mga lingkod ni Jehova maninigo na dai mag-arog sa mga tawo na mayo nin marahay na katuyohan asin daing pagmangnong nabubuhay na mayo nin ginigibo sa ikararahay nin iba apuwera sa saindang sadiri. May pangenot na halaga sa mga Saksi nin Dios an pag-otob sa nobleng katuyohan na ibalangibog an mensahe kan Kahadean asin ihiras sa iba an nagtataong-buhay na kaaraman sa Tataramon nin Dios.—Salmo 119:105; Marcos 13:10; Juan 17:3.

 2. Anong katuyohan para sa mga lalaking Kristiano an sinabi ni Pablo sa 1 Timoteo 3:1?

² Sa organisasyon ni Jehova, igwa man nin iba pang nobleng katuyohan. Sinitar ni apostol Pablo an saro digdi kan sia sumurat: “An tataramon na iyan maimbod. Kun an siisay man na lalaki naghihingoang maabot an katongdan nin paraataman, sia boot sa marahay na gibo.” An siring na lalaki boot na may magibo para sa ikararahay nin iba. Sia nagmamawot nin “marahay na gibo,” bakong nin buhay nin pagpasiramsiram asin kamurawayan. An saro pang traduksion nagsasabi: “Totoo nanggad na sabihon na an lalaki na nagbugtak kan saiyang puso sa pangengenot may maoomaw na ambisyon.”—1 Timoteo 3:1, Phillips.

Mga Peligro sa mga Magurang

3, 4. Taano ta maninigong ingatan nin sarong lalaki na naghihingoang magin paraataman an saiyang puso?

³ Sa anong paagi na an lalaki na nagbugtak kan saiyang puso sa pagigin Kristianong paraataman may “maoomaw na ambisyon”? Bueno, an ambisyon malaad na kamawotan na maotob an sarong partikular na katuyohan. Totoo, igwa nin mga noble asin bakong nobleng ambisyon. Pero kun an sarong lalaki mapakumbabang naghihingoa na maabot an katongdan nin paraataman huli ta gusto niang maglingkod sa iba, an saiyang paglilingkod ginigibo na may matanos na mga motibo asin puwedeng magbunga nin espirituwal na mga bendisyon. Pero kaipuhan na bantayan nia an saiyang puso.—Talinhaga 4:23.

⁴ An ibang ambisyosong tawo naghahanap nin kamurawayan. An iba gustong mamoon sa kapwa. An kapasloan sa kabantugan o kapangyarihan garo lapang gamot na puwedeng magpangyari na mapukan pati an marambong paghelingon na kahoy. An sarong Kristiano puwede man na padara sa siring na ambisyon na sala an motibo. (Talinhaga 16:18) “May isinurat ako sa kongregasyon,” sabi ni apostol Juan, “alagad si Diotrefes, na boot na mangenot sa sainda [“na gustong mamayo sa gabos,” Phillips], dai nag-aako nin ano man hale sa samo na may paggalang. Kaya, pagdatong ko, gigirumdomon ko an saiyang mga gibo na padagos niang ginigibo, na nagtatabil dapit sa samo sa maraot na mga tataramon. Saro pa, mantang dai pa naninigoan kaini, dai man nia inaakong may paggalang an mga tugang, asin an mga boot na umako sa sainda saiyang inoolang asin ilinuluwas sa kongregasyon.” (3 Juan 9, 10) An ambisyon ni Diotrefes bakong sa Kristiano. An pagpaabaw-abaw asin an ambisyosong paghanap nin kapangyarihan sa ibabaw nin iba mayo nin lugar sa tunay na mga parasunod ni Jesus.—Talinhaga 21:4.

 5. May anong kaisipan na maninigong asikasohon nin mga paraataman an saindang mga trabaho?

⁵ An Kristianong paraataman na nag-aasikaso sa saiyang mga trabaho na tama an motibo dai maghihingoang kamtan an paslong mga ambisyon. Ibibilang nia an marahay na gibong ini nin Kristianong pag-ataman na sarong pribilehiyong itinao nin Dios asin papastoran an aripompon nin Dios “bakong sa kapiritan, kundi sa sadiring boot; bakong huli sa pagkamoot sa madayang pakinabang, kundi may kaigotan; ni siring sa naghahade sa mga mana nin Dios, kundi magin . . . halimbawa sa aripompon.” (1 Pedro 5:2, 3) Iyo, an mga paraataman maninigong mag-ingat na dai tubuan nin kapalangkawan asin gamiton an kapangyarihan na may pag-abuso.

 6. Taano an magurang ta dai dapat na maghade-hadean sa banwaan nin Dios?

⁶ An magurang dai maninigong maghade-hadean sa ibang Kristiano, ta sia katabang ninda, bakong ‘kagurangnan sa saindang pagtubod.’ (2 Corinto 1:24) Kan an pirang apostol maghanap nin kabantugan, si Jesus nagsabi: “Naiisihan nindo na an mga poon kan mga nasyon naghahade-hadean sa sainda asin an mga darakulang tawo sainda naggagaramit sainda nin kapangyarihan. Bakong siring kaini dian sa tahaw nindo; kundi an siisay man na boot na magin dakula sa saindo kaipuhan na iyo an mani paralingkod sa saindo, asin an siisay man na boot mangenot sa saindo kaipuhan na iyo an mani oripon nindo. Kun paanong an Aki nin tawo nagdigdi, bakong tanganing paglingkodan, kundi tanganing maglingkod asin magtao kan saiyang kalag bilang pantubos na karibay nin dakol.” (Mateo 20:20-28) An magurang bakong iyo an Poon na Pastor kundi saro sanang katabang na pastor. Kun sia maghahade-hadean sa aripompon, sia nagpapaheling nin espiritu nin kapalangkawan. Nangorognang maraot an ibubunga kun maakit nia an iba na tabangan siang maotob an saiyang maabhaw na mga ambisyon. Sabi kan talinhaga: “An gabos na mapaabaw-abaw sa puso bagay na ikinaoongis ni Jehova. An kamot tibaad kumapot sa kamot, alagad ta an saro dai makalilibre sa padusa.”—Talinhaga 16:5.

7, 8. (a) Taano ta kaipuhan na magpakumbaba an Kristianong mga magurang? (b) Tumao nin sarong halimbawa nin mapakumbabang magurang.

⁷ An Kristianong kamagurangan kun siring maninigong ‘magpakumbaba sa irarom kan mapangyaring kamot nin Dios.’ An kapalangkawan nakaoolang sa pagigin kapakipakinabang sa espirituwal, huli ta an mga mapakumbaba sana an nasa tamang kamugtakan nin puso asin isip na mag-otob kan banal na kabotan. “Tinutumang nin Dios an mga maabhaw, alagad ta tinatawan nia nin dai na kutana maninigong pagkaherak an mga mapakumbaba.” (1 Pedro 5:5, 6) Iyo, binibendisyonan ni Jehova an mga mapakumbaba. Sa tahaw kan mga ini na ninonombrahan an mga lalaking kuwalipikado na maglingkod bilang Kristianong kamagurangan.

⁸ An modernong kasaysayan nin mga Saksi ni Jehova pano nin mga kasaysayan nin mapakumbabang paglilingkod nin diosnon na mga indibiduwal. Halimbawa, helinga an mahoyong si W. J. Thorn, na dati sarong pilgrim, o nagbibiyaheng paraataman, asin haloy na nagtrabaho sa Bethel. Manongod sa saiya, an sarong Kristiano nagsabi: “Noarin man dai ko malilingawan an sarong sinabi ni Tugang na Thorn na nakatabang sa sako sagkod sa aldaw na ini. Sabi nia, asin kinokotar ko iyan, ‘Kun halangkawon na an pagheling ko sa sadiri, garo baga ibinubugtak ko an sakong sadiri sa kanto asin sinasabi ko: “Ikang sadit na tuldok nin talbo. Ano an ipinaghahambog mo?”’” Marahayon nanggad ining kuwalidad na ipaheling nin kamagurangan asin nin iba pa! Girumdoma, “an bunga nin kapakumbabaan asin pagkatakot ki Jehova kayamanan asin kamurawayan patin buhay.”—Talinhaga 22:4.

An Itinao-nin-Dios na Kamawotan na Maglingkod

 9. Taano ta masasabi na an kamawotan na maglingkod bilang paraataman itinao nin Dios?

⁹ Itinao daw nin Dios an kamawotan na maglingkod bilang paraataman? Iyo, huli ta an espiritu ni Jehova nagtatao nin motibasyon, kapusoan, asin kosog na magtao nin banal na paglilingkod sa saiya. Halimbawa, ano an nangyari kan an pinaglalamag na mga parasunod ni Jesus mamibi para sa kapusoan na maghulit? “An lugar na saindang pinagkakatiriponan natanyog; asin sinda gabos napano kan banal na espiritu asin nagtaram kan tataramon nin Dios na may kapusoan.” (Gibo 4:27-31) Mantang an banal na espiritu nagpaluwas nin siring na mga bunga, puwede man kaiyan na pahiroon an saro na maghingoa.

10. (a) Ano an sarong dahelan na tibaad dai naghihingoa an sarong lalaking Kristiano? (b) Kun tinatawan kita nin Dios nin pribilehiyo sa paglilingkod, ano an masisierto niato?

¹⁰ Taano daw ta tibaad dai naghihingoa an sarong maygurang na Kristiano? Tibaad sia espirituwal na tawo pero naghohona na dai nia kaya. (1 Corinto 2:14, 15) Siyempre, kaipuhan na may mapakumbaba kitang pagheling sa satong sadiri, na aram an satong mga limitasyon. (Miqueas 6:8) Imbes na mapangahas na maghona na kita an pinakakuwalipikado para sa sarong paninimbagan, marahay na girumdomon na “yaon sa mga may hababang boot an kadonongan.” (Talinhaga 11:2) Alagad maninigo man niatong marealisar na kun tawan kita nin Dios nin sarong pribilehiyo sa paglilingkod, itatao man nia an kosog na kaipuhan tanganing maotob iyan. Arog kan sabi ni Pablo: “Igwa ako kan kosog para sa gabos na bagay huli sa saiya na nagtatao nin kapangyarihan sa sako.”—Filipos 4:13.

11. Ano an magigibo nin sarong Kristiano na dai naghihingoa huli ta sa paghona nia kulang sia nin kadonongan na tumao nin hatol?

¹¹ An sarong Kristiano tibaad dai maghingoa ta sa paghona nia kulang sia nin kadonongan sa pagtao nin hatol. Bueno, tibaad magkamit sia nin kadonongan paagi sa pagigin mas maigot na estudyante sa Tataramon nin Dios, asin tunay na maninigo siang mag-arang nin kadonongan. Si Santiago nagsurat: “Kun an siisay man saindo kulang nin kadonongan, padagos siang maghagad sa Dios, huli ta sia abundang nagtatao sa gabos na dai nin pagbasol; asin iyan itatao saiya. Alagad sia padagos na maghagad sa pagtubod, na dai nin ano man na pagduwaduwa, huli ta an nagduduwaduwa siring sa alon nin dagat na ipinapadpad nin doros asin iinaapwak minsan saen. Sa katunayan, dai maghona an siring na tawo na sia mag-aako nin ano man hale ki Jehova; sia may duwang pag-isip, bakong marigon sa gabos niang dalan.” (Santiago 1:5-8) Bilang simbag sa pamibi, si Salomon tinawan nin Dios nin “madonong asin mapagsabot na puso” na nagpangyari saiya na mamansayan kun ano an marahay asin maraot kun naghohokom. (1 Hade 3:9-14) Espesyal an kaso ni Salomon, alagad paagi sa maigot na pag-adal asin tabang nin Dios, an mga lalaki na pinaniwalaan nin paninimbagan sa kongregasyon puwedeng makahatol nin matanos sa iba. “Si Jehova nagtatao nin kadonongan; gikan sa saiyang ngoso an kaaraman asin pakamansay.”—Talinhaga 2:6.

12. Kun huli sa kahaditan an sarong lalaki dai naghihingoa, ano an makatatabang saiya?

¹² An kadikit na kahaditan puwedeng makapogol sa sarong lalaki na maghingoa. Tibaad isipon nia na dai nia ikakasaabaga an magabat na paninimbagan nin pagigin magurang. Minsan si Pablo nag-admitir: “Igwa nin minapurisaw sako aroaldaw, an paghadit para sa gabos na kongregasyon.” (2 Corinto 11:28) Alagad aram kan apostol kun ano an gigibohon kun nahahadit, ta sia nagsurat: “Dai kamo maghadit sa ano man na bagay, kundi sa gabos na bagay paagi sa pamibi asin pagngayongayo na may pasalamat ipahayag nindo sa Dios an saindong mga kahagadan; asin an katoninongan nin Dios na minalampas sa gabos na kaisipan mag-iingat kan saindong puso asin kan saindong mga pag-isip sa paagi ni Cristo Jesus.” (Filipos 4:6, 7) Iyo, an pamibi asin pagsarig sa Dios makatatabang na mahale an kahaditan.

13. Paano puwedeng mamibi an sarong lalaki kun sia nag-aalangan na maghingoa?

¹³ Kun igwa pa man giraray nin kahaditan, an lalaki na nag-aalangan na maghingoa puwedeng mamibi kapareho ni David: “Siyasaton mo ako, O Dios, asin midbida an sakong puso. Baloa ako, asin aramon mo an sakuyang mga kaisipan na nakariribok, asin helinga kun baga igwa sa sakuya nin ano man na nakararaot na dalan, asin giyahan mo ako sa dalan na daing katapusan.” (Salmo 139:23, 24) Ano man an satong “nakariribok” o “nahahadit” na kaisipan, matatabangan kita nin Dios na maatubang iyan tangani na kita umoswag sa espirituwal. (Helingon an The New International Version.) Marahay an pagkasabi kaiyan sa saro pang salmo: “Kan ako magsabi: ‘An sakong bitis mapapadalinas nanggad,’ an saimong maboot na pagkamoot, O Jehova, nangataman sa sako. Kan an sakuyang nakariribok na mga kaisipan duminakol sa sakong boot, an saimong mga panranga nakaranga sa sakong kalag.”—Salmo 94:18, 19.

Maogmang Maglingkod Sono sa Kabotan ni Jehova

14. Taano an lalaki na dai naghihingoa ta maninigong mamibi para sa banal na espiritu nin Dios?

¹⁴ Kun huli sa pagkahadit, paghona na dai nia kaya, o kakulangan nin motibasyon an sarong lalaking Kristiano dai maghingoa, tunay na maninigo na mamibi para sa espiritu nin Dios. Si Jesus nagsabi: “Kun kamo, minsan maraot, tataong magtao nin marahay na mga regalo sa saindong mga aki, gurano pa daw an Ama sa langit na dai magtao nin banal na espiritu sa mga naghahagad sa saiya!” (Lucas 11:13) Mantang an katoninongan asin pagpopogol sa sadiri kabilang sa mga bunga kan espiritu, an espiritung ini makatatabang sato na mapangganahan an kahaditan o paghona na dai nindo iyan kaya.—Galacia 5:22, 23.

15. Anong klaseng mga pamibi an makatatabang sa mga kulang nin motibasyon na magpresentar para sa mga pribilehiyo sa paglilingkod?

¹⁵ Kumusta man an kakulangan nin motibasyon? Bilang bautisadong mga Kristiano, kaipuhan na kita mamibi na ipagibo sato nin Dios an ikinaoogma nia. Si David nakimaherak: “Paaraman sa sako an saimong mga dalan, O Jehova . . . Palakawa ako sa saimong katotoohan asin tokdoi ako.” (Salmo 25:4, 5) An mga pamibing arog kaini makatatabang sato na malikayan an salang dalan, asin makapamimibi kita sa kaagid na paagi kun kita kulang nin motibasyon na maghingoa. Puwede niatong arangon ki Jehova na kita logod magustong umako nin mga pribilehiyo sa paglilingkod. An totoo, kun kita mamimibi para sa espiritu nin Dios asin pagigiya dian, daing duwa-duwa na idudusay niato an satong sadiri kun alokan kita nin mga pribilehiyo sa paglilingkod. Total, an mga lingkod nin Dios dai nanggad magmamawot na labanan an saiyang espiritu.—Efeso 4:30.

16. Anong kaisipan an nagtatao nin makosog na motibasyon na maghingoa para sa paninimbagan sa kongregasyon?

¹⁶ Mantang igwa kan “kaisipan ni Cristo,” kita naoogma sa pag-otob sa banal na kabotan. (1 Corinto 2:16) Si Jesus may kaisipan na kapareho kan salmista, na nagsabi: “An paggibo kan boot mo, O Dios ko, iyo an naoogmahan ko, asin an saimong katogonan nasa kairaroman kan sakong sadiri.” (Salmo 40:8) Si Cristo nagsabi: “Uya! nagdatong ako sa paggibo kan boot mo,” asin iyan sagkod sa kagadanan sa hariging pasakitan. (Hebreo 10:9, 10) An pagmawot na gibohon an gabos na mapupuwede sa paglilingkod ki Jehova nagtatao nin makosog na motibasyon na maghingoang kamtan an paninimbagan sa kongregasyon.

Tanawon an Ngapit

17. (a) Taano ta dai maninigong panluyahan nin boot an mga lalaki na ngonyan dai na nakapaglilingkod arog kan dati? (b) Ano an pinakadakulang pribilehiyo?

¹⁷ Huli sa mga problema sa salud o sa iba pang dahelan, an iba na dati may mahahalagang trabaho sa kongregasyon ngonyan mayo na kan mga pribilehiyong iyan. Sinda dai maninigong panluyahan nin boot. Aram niato na an dakol na maimbod na lalaki na dai na nakapaglilingkod nin arog kan dati sagkod ngonyan marigon na naninindogan bilang mga nagdadanay sa integridad. (Salmo 25:21) An totoo, an mapakumbabang gurangan nang kamagurangan puwedeng padagos na ipagamit an saindang kabatidan paagi sa pagdadanay sa grupo nin mga magurang. Minsan ngani naoolang na nin edad o mga diperensia sa lawas, dai man sinda kaipuhan na humale sa katongdan. Mientras tanto, mahalon logod kan lambang Saksi ni Jehova an pribilehiyong pinakamarahay sa gabos, an ‘pagtaram manongod sa kamurawayan kan pagkahade nin Dios’ bilang mga parasuportar sa saiyang banal na ngaran.—Salmo 145:10-13.

18. (a) Kun hinale sa katongdan an sarong magurang o ministeryal na lingkod, ano an tibaad kaipuhan? (b) Anong marahay na kaisipan an ipinaheling nin sarong hinaleng magurang?

¹⁸ Kun kamo dating magurang o ministeryal na lingkod pero ngonyan dai na naglilingkod sa katongdan na iyan, seguradohon na pinagmamakolgan pa man giraray kamo nin Dios, asin seguro tatawan nia kamo nin dai linalaoman na pribilehiyo sa ngapit. (1 Pedro 5:6, 7) Kun kaipuhan na kamo may bakleon, magin andam na admitiron an sala asin pakarhayon iyan sa tabang nin Dios. An iba na hinale bilang magurang nagkaigwa nin kaisipan na bakong sa Kristiano, asin an nagkapira nagin inaktibo o suminiblag sa katotoohan. Alagad ta madonong nanggad na magin arog kan mga nagpaheling nin marahay na espiritu! Halimbawa, kan an sarong magurang na dakol nang taon na naglilingkod sa Central America haleon, sia nagsabi: “Makologon sa boot ko na mawaran kan pribilehiyo na haloyon kong namotan. Pero ako maghihigos sa ano man na paagi na gusto akong gamiton kan mga tugang asin maghihingoa ako na mabawi an sakong mga pribilehiyo sa paglilingkod.” Pag-abot nin panahon, an tugang na ini nagkapribilehiyo na maglingkod liwat bilang magurang.

19. Anong angay na hatol an itinatao sa sarong tugang na hinale bilang magurang o ministeryal na lingkod?

¹⁹ Kun kamo hinale bilang magurang o ministeryal na lingkod, papagdanayon an mapakumbabang espiritu. Likayan an mapait na boot na madiskuwalipikar sa saindo para sa maabot na mga pribilehiyo. An diosnon na espiritu iginagalang. Imbes na panluyahan nin boot, horophoropon kun paano binibendisyonan ni Jehova an saindong ministeryo o an saindong pamilya. Pakosogon sa espirituwal an saindong pamilya, songkoon an mga may helang, asin pakosogon an mga maluya. Orog sa gabos, padangaton an saindong pribilehiyo na mag-omaw sa Dios asin magbalangibog kan maogmang bareta bilang saro sa mga Saksi ni Jehova.—Salmo 145:1, 2; Isaias 43:10-12.

20. Paano puwedeng tabangan nin sarong grupo nin kamagurangan an sarong dating paraataman o ministeryal na lingkod?

²⁰ Maninigong marealisar nin grupo nin mga magurang na an paghale puwedeng magtao nin tension sa dating paraataman o ministeryal na lingkod, dawa kun boluntad niang binayaan an pribilehiyo. Kun dai sia natiwalag, pero maheling kan mga magurang na labi-labi an kamondoan kan tugang, kaipuhan na sinda magtao nin mamomoton na espirituwal na tabang. (1 Tesalonica 5:14) Maninigo na tabangan sia ninda na marealisar na kaipuhan sia sa kongregasyon. Dawa kun kinaipuhan an hatol, tibaad dai man maghaloy bago an sarong mapakumbaba asin nagpapasalamat na lalaki mag-ako liwat nin dugang na mga pribilehiyo sa paglilingkod sa kongregasyon.

21. Sairisay an naghalat para sa mga pribilehiyo sa paglilingkod, asin ano an isinusuherir sa mga naghahalat kaiyan ngonyan?

²¹ Kun kamo naghihingoa, tibaad kaipuhan kamong maghalathalat bago mag-ako nin dugang pang mga pribilehiyo sa paglilingkod. Dai kamo malangkag. Si Moises naghalat nin 40 taon bago sia ginamit nin Dios kan kinakalda an mga Israelitas sa pagkaoripon sa Egipto. (Gibo 7:23-36) Bago manombrahan na kasalihid ni Moises, si Josue haloy na naglingkod bilang saiyang katabang. (Exodo 33:11; Bilang 27:15-23) Si David haloy-haloy na naghalat bago patukawon sa trono nin Israel. (2 Samuel 2:7; 5:3) Si Pedro asin Juan Marcos malinaw na nag-agi sa mga panahon nin pagdalisay. (Mateo 26:69-75; Juan 21:15-19; Gibo 13:13; 15:36-41; Colosas 4:10) Kaya kun mayo kamo ngonyan nin mga paninimbagan sa kongregasyon, tibaad itinotogot ni Jehova na kamo mamolde paagi sa pagkakamit nin dagdag na kabatidan. Ano man an kamugtakan, hagadon an tabang nin Dios mantang kamo naghihingoa, asin tibaad bendisyonan nia kamo nin dugang pang mga pribilehiyo sa paglilingkod. Mientras tanto, magmaigot na makuwalipikar sa paninimbagan sa kongregasyon asin ipaheling an espiritu ni David, na nagsabi: “An kaomawan ni Jehova itataram kan sakong ngoso; asin an gabos na laman mag-omaw logod sa saiyang banal na ngaran sa panahon na daing katapusan, minsan sagkod lamang.”—Salmo 145:21.

Ano an Isisimbag Nindo?

◻ Tumang sa anong mga peligro maninigong mag-ingat an Kristianong mga magurang?

◻ Ano an puwedeng makatabang sa mga huli sa kahaditan o pagsaboot na dai ninda kaya dai naghihingoa?

◻ Ano an makamomotibar sa saro na magpresentar para sa mga paninimbagan sa kongregasyon?

◻ May anong kaisipan na an dating mga magurang asin ministeryal na lingkod maninigong tumanaw sa ngapit?

[Ritrato sa pahina 13]

Si W. J. Thorn nagtao nin marahay na halimbawa bilang mapakumbabang magurang

[Ritrato sa pahina 14]

Kapareho ni Jesus, andam daw kamong gibohon an gabos na mahihimo sa paglilingkod ki Jehova?