Pagdadanay na Marigon Kun an Aki Magrebelde

AN SARONG Kristiana na aapodon niatong Joy naghingoang padakulaon an saiyang aking lalaki na kamotan si Jehova Dios. Pero, kan ini nasa huring taon na kan saiyang pagkatinedyer, an aki nagrebelde asin naglayas. “Iyan an pinakagrabeng kolog nin boot na namatean ko kasuarin man,” an sabi ni Joy. “An pagmate ko ako trinaydor, nalugadan an puso, asin desganado. Pinangibabawan ako nin negatibong mga kaisipan.”

Tibaad kamo man naghingoang padakulaon an saindong mga aki na kamotan asin paglingkodan an Dios—tangani sanang maheling an saro o labi pa sa sainda na tumalikod sa saiya. Paano nindo kakayanon an siring na makuring pagkadesganar? Ano an makakatabang sa saindo na magdanay na marigon sa saindong paglilingkod ki Jehova?

Kan Magrebelde an mga Aki ni Jehova

An enot na paagi iyo an pakarealisar na naaaraman nin lubos ni Jehova an saindong namamatean. Sa Isaias 49:15, mababasa niato: “Malilingaw daw an agom na babae sa saiyang pinasususo tanganing dai sia maherak sa aki kan saiyang tulak? Minsan makalingaw an mga babaeng ini, pero ako mismo dai malilingaw sa saimo.” Iyo, namamatean ni Jehova an mga saboot na komun sa mga ama asin ina. Kun siring, imahinara an kaogmahan na siertong namatean nia kan an gabos na anghel na aki nia nag-oomaw asin naglilingkod sa saiya. Mantang sinisimbag an patriarkang si Job “hale sa bagyo nin doros,” ginirumdom ni Jehova an maogmang mga panahon kaiba an saiyang nagkakasararong espiritung pamilya, na nagsasabi: “Haen ka kan lalangon ko an daga? . . . Kan an mga bitoon nin kaagahan iribang nagkururahaw na may kagayagayahan, asin an gabos na aki nin Dios nagkururahaw sa pag-omaw?”—Job 38:1, 4, 7.

Pag-abot nin panahon, naheling kan tunay na Dios an sarong sangkap na anghel na aki na nagrebelde tumang sa saiya asin nagin Satanas, an boot sabihon “Paratumang.” Naheling man ni Jehova an saiyang enot na tawong aki, si Adan, asin an saiyang sangkap na agom, si Eva, na uminayon sa pagrebelde. (Genesis 3:1-6; Kapahayagan 12:9) Kan huri, an iba pang anghel na mga aki “nagbaya sa saindang sadiring tamang erokan” asin nagrebelde tumang sa Dios.—Judas 6.

Dai sinasabi sato kan Kasuratan kun ano an nagin saboot ni Jehova kan an nagkapira sa saiyang sangkap na mga aki magrebelde. Minsan siring, malinaw na sinasabi kan Biblia: “Naheling ni Jehova na an karatan nin tawo abunda na sa daga asin an gabos na tendensia kan mga kaisipan kan saiyang puso danay na maraot na sana. Asin si Jehova nagbasol na saiyang ginibo an mga tawo sa daga, asin ta nakolgan an saiyang puso.” (Genesis 6:5, 6) An pagrebelde kan piniling banwaan ni Jehova, an Israel, ‘ikinasentir’ asin ‘ikinakolog man kan boot’ nia.—Salmo 78:40, 41.

Daing duda na si Jehova may empatiya sa mga magurang na nakokolgan an boot asin nagsesentir bilang resulta kan paggawe kan rebeldeng mga aki. Sa saiyang Tataramon, an Biblia, sia nagtao nin marahay na sadol asin pamparigon sa boot tanganing tabangan an siring na mga magurang na makaya an saindang kamugtakan. Sinasadol sinda nin Dios na ibugtak ninda sa saiya an saindang kahaditan, magpakumbaba sinda, asin tumangon si Satanas na Diablo. Helingon niato kun paanong an pagsunod sa konsehong ini makakatabang sa saindo na magdanay na marigon kun magrebelde an saindong aki.

Ibugtak Nindo an Saindong Kahaditan ki Jehova

Aram ni Jehova na an mga magurang biyong nahahadit kun an saindang mga aki namemeligrong danyaran an saindang sadiri o danyaran nin iba. Ipinaheling ni apostol Pedro an sarong paagi tanganing makaya ini asin an iba pang mga kahaditan. Sia nagsurat: ‘Ibugtak nindo an gabos nindong kahaditan ki Jehova, huli ta sia may pagmakolog sa saindo.’ (1 Pedro 5:7) Taano an imbitasyon asin pag-asegurar giraray na ini ta partikularmenteng angay sa mga magurang nin rebeldeng aki?

Kan sadit pa an saindong aki, kamo nagin alerto sa pagprotehir sa saiya tumang sa mga peligro, asin tibaad naghimate sia sa saindong mamomoton na paggiya. Minsan siring, mantang sia nagdadakula, tibaad naiinaan na an saindong impluwensia sa saiya, alagad an saindong makosog na pagmawot na protehiran sia tumang sa peligro dai nainaan. An totoo, nadagdagan pa gayod iyan.

Bilang resulta, kun an saindong aki magrebelde asin mapahamak sa espirituwal, emosyonal, o pisikal, tibaad magsaboot kamo na kamo an dapat basolon. Si Joy, na nasambitan sa enotan, arog kaini an nagin saboot. Sinabi nia: “Aroaldaw, mantang pinapasakitan nin pakamate nin pagkukulang, binabalikbalikan ko sa sakong isip an nakaaging mga pangyayari tanganing maheling kun saen ako nagkulang.” Nangorogna sa siring na mga panahon na gusto ni Jehova na ‘ibugtak nindo sa saiya an gabos nindong kahaditan.’ Kun gigibohon nindo iyan, tatabangan nia kamo. “Tawan ki Jehova mismo an pagabat sa saimo,” an sabi kan salmista, “asin sia mismo matabang sa saimo. Noarin man dai nia totogotan na matanyog an matanos.” (Salmo 55:22) Naeksperyensiahan ni Joy an siring na karangahan. Sia nagpapaliwanag: “Ipinakipag-olay ko nin odok ki Jehova an manongod sa gabos na bagay na nasa kairairaromi kan sakong boot. Pinabayaan ko an sakong mga saboot na lumuwas, asin iyan nagtao nin pinakadakulang kaginhawahan.”

Bilang bakong sangkap na magurang, tibaad may nagibo kamong mga sala mantang pinapadakula nindo an saindong aki. Alagad taano ta iyan an pagpaparaisipon nindo? Si Jehova malinaw na bakong arog kaiyan, huling an pinasabngan na salmista nag-awit: “Kun mga sala an saimong binabantayan, O Jah, O Jehova, siisay an makakatindog?” (Salmo 130:3) Dawa kun kamo nagin daing depektong magurang, tibaad nagrebelde pa man giraray an saindong aki. Kaya ipahayag nindo sa pamibi an saindong mga saboot ki Jehova, asin tatabangan nia kamong makayanan an problema. Minsan siring, tanganing kamo mismo magdanay na marigon sa paglilingkod ki Jehova asin makalikay na magin biktima ni Satanas, labi pa dian an dapat nindong gibohon.

Magpakumbaba Kamo

“Magpakumbaba kamo sa irarom kan poderosong kamot nin Dios,” an isinurat ni Pedro, “tanganing ilangkaw nia kamo sa itinalaan na panahon.” (1 Pedro 5:6) Taano ta kaipuhan an kapakumbabaan kun magrebelde an aki nindo? Apuera sa pagtao sa saindo nin pakamate nin sala asin kolog nin boot, an pagkaigwa nin rebeldeng aki puedeng magin dahelan nin pagkapasupog nindo. Tibaad mahadit kamo na an gawe-gawe kan saindong aki nakaraot sa reputasyon kan saindong pamilya, nangorogna kun sia kinaipuhan na itiwalag sa Kristianong kongregasyon. An mga pakamate nin katuyawan sa sadiri asin pagkapasupog tibaad magkasabay na magpadesganar sa saindo na umatender sa Kristianong mga pagtiripon.

Sa pag-atubang sa siring na situwasyon, kaipuhan nindong gamiton an praktikal na kadonongan. An Talinhaga 18:1 nagpapatanid: “An isinusuway an sadiri mahanap kan maimot niang kamawotan; sasarongaton nia an gabos na praktikal na kadonongan.” Paagi sa pag-atender nin regular sa Kristianong mga pagtiripon sa ibong kan saindong kamondoan, makikinabang kamo sa mahalagang marhay na ginigikanan nin pagtotokdo asin pamparigon nin boot. “Kan primero, habo ko sanang humampang dawa kiisay,” an inadmitir ni Joy. “Alagad ginirumdom ko an kahalagahan kan sakuyang espirituwal na kaugalean. Apuera kaiyan, kun nagdanay ako sa harong, mga problema ko sana kuta an pinagparaisip ko. An mga pagtiripon nakatabang sa sako na magkonsentrar sa mga bagay na nakakaparigon sa espirituwal. Nagpapasalamat nanggad ako na dai ko isinuway an sakong sadiri asin sa siring dai ko kutana nakamtan an mamomoton na suporta kan sakong mga tugang na lalaki asin babae.”—Hebreo 10:24, 25.

Girumdomon man na an lambang indibiduwal sa sarong pamilya dapat na ‘magpasan kan saiyang sadiring pasan’ na Kristianong paninimbagan. (Galacia 6:5) Linalaoman ni Jehova an mga magurang na kamotan asin disiplinahon an saindang mga aki. Linalaoman man nia an mga aki na kuyogon asin tawan nin onra an saindang mga magurang. Kun ginigibo kan mga magurang an saindang pinakamakakaya tanganing padakulaon an saindang mga aki “sa disiplina asin pagtatanos nin isip ni Jehova,” an mga magurang mismo magkakaigwa nin marahay na reputasyon sa Dios. (Efeso 6:1-4) Kun an aki magrebelde tumang sa mamomoton na disiplina kan magurang, an reputasyon kan aki an mararaot. “Minsan paagi sa saiyang mga gawe an sarong aki nagpapamidbid kan saiyang sadiri kun baga an saiyang mga gibo dalisay asin tanos,” an sabi kan Talinhaga 20:11. An pagrebelde ni Satanas dai nanggad nakaraot sa reputasyon ni Jehova sa tahaw kan mga nakakaaram kan mga katunayan.

Tumangon Nindo an Diablo

“Magmata kamo, magpuka kamo,” an patanid ni Pedro. “An saindong kaiwal, an Diablo, naglalakaw na siring sa nagngangarob na leon, na naghahanap nin masisiba.” (1 Pedro 5:8) Arog nin sarong leon, parateng pinupunteriya kan Diablo an mga aki asin daing kabatidan. Kan suanoy na mga panahon, an mga leon naglagawlagaw sa Israel asin peligro iyan kaidto sa ataman na mga hayop. Kun an sarong sadang na kordero maparayo sa aripompon, iyan madaling masisiba. Tibaad dara nin naturalesa na isapeligro nin sarong babaeng karnero an mismong buhay kaini tanganing protehiran an saiyang ogbon na kordero. Minsan siring, dawa an sarong dakula nang karnero daing kalabanlaban sa sarong leon. Kun siring, kaipuhan an makosog an boot na mga pastor tanganing protehiran an aripompon.—1 Samuel 17:34, 35.

Tanganing protehiran an saiyang piguratibong karnero tumang sa “nagngangarob na leon,” iinareglo ni Jehova na atamanon kan espirituwal na mga pastor an aripompon na nasa irarom kan “poon na pastor,” si Jesu-Cristo. (1 Pedro 5:4) Tinatawan ni Pedro an siring na nombradong mga lalaki kan sadol na ini: “Pastoran nindo an aripompon nin Dios na nasa saindong pangataman, bakong sa kapiritan, kundi gikan sa boot; ni huli sa pagkamoot sa madayang pakinabang, kundi may pagkagalaga.” (1 Pedro 5:1, 2) Paagi sa saindong kooperasyon bilang mga magurang, tibaad mahimong tabangan kan mga pastor na ini an sarong hoben na itanos an saiyang dalan sa espirituwal na paagi.

Kun kaipuhan na hatolan kan Kristianong mga pastor an saindong rebeldeng aki, tibaad makamate kamo na gusto nindong irayo sia sa disiplina. Minsan siring, salang marhay na gibohon nindo iyan. Si Pedro nagsasabi: ‘Tumangon nindo an Diablo’—bakong an espirituwal na mga pastor.—1 Pedro 5:9.

Kun Magabat an Disiplina

Kun an saindong aki habong magsolsol asin sia bautisadong Kristiano, tibaad tawan sia kan pinakamagabat na disiplina—an pagkatiwalag sa kongregasyon. Kun sagkod saen an pakikiiba nindo sa saiya pakatapos kaiyan madepende sa saiyang edad asin sa iba pang kamugtakan.

Kun an aki menor de edad asin nakaistar sa harong, natural sanang padagos nindong aasikasohon an saiyang pisikal na mga pangangaipo. Kaipuhan man nia an moral na pagsasanay asin disiplina, asin may paninimbagan kamo na itao ini. (Talinhaga 1:8-18; 6:20-22; 29:17) Tibaad bobooton nindong adalan sia sa Biblia, na kalabot an direktang partisipasyon nia. Puede nindong darahon sa saiyang atension an manlaenlaen na teksto asin publikasyon na itinatao kan “maimbod asin mapagmansay na oripon.” (Mateo 24:45) Puede man nindong iiba an aki sa Kristianong mga pagtiripon asin patukawon sinda sa kataed nindo. Ini gabos puedeng gibohon sa paglaom na isasapuso nia an konseho na sono sa Kasuratan.

Iba man an situwasyon kun an natiwalag bakong menor de edad asin dai nakaistar sa harong. Sinadol ni apostol Pablo an mga Kristiano sa suanoy na Corinto: “Umontok sa pakikiiba sa siisay man na inaapod na tugang na parapakisaro o tawong mahanab o parasamba sa idolo o paramuda o paraburat o parakikil, na dai ngani magkakan kaiba nin siring na tawo.” (1 Corinto 5:11) Minsan ngani an pag-asikaso sa kinakaipuhan na pampamilyang mga bagay tibaad mangaipo nin pakikiiba sa natiwalag, maninigong hingoahon nin sarong Kristianong magurang na likayan an dai kaipuhan na pakikiasosyar.

Kun disiplinahon kan Kristianong mga pastor an napapasalang aki, bakong madonong kun sasayumahan o memenoson nindo an saindang aksion na basado sa Biblia. An pagkampi nindo sa saindong rebeldeng aki dai matao nin ano man na tunay na proteksion tumang sa Diablo. An totoo, isasapeligro nindo an saindo mismong espirituwal na salud. Sa ibong na lado, paagi sa pagsuportar sa mga paghihingoa kan mga pastor, kamo magdadanay na “marigon sa pagtubod” asin makakatao kan pinakamarahay na tabang sa saindong aki.—1 Pedro 5:9.

Sususteniran Kamo ni Jehova

Kun magrebelde an saindong aki, girumdomon na dai kamo nagsosolo. An ibang Kristianong mga magurang nagkaigwa man nin kaagid na mga eksperyensia. Ano man na pagbalo an agihan niato, kaya kitang susteniran ni Jehova.—Salmo 68:19.

Manarig ki Jehova sa pamibi. Regular na makiasosyar sa Kristianong kongregasyon. Suportaran an disiplina kan nombradong mga pastor. Paagi sa paggibo kaiyan, makakapagdanay kamong marigon. Asin an saindong marahay na halimbawa tibaad makatabang sa saindong aki na maghimate sa mamomoton na imbitasyon hale ki Jehova na bumalik sa saiya.—Malaquias 3:6, 7.

[Mga Ritrato sa pahina 18]

Kumua kamo nin kosog gikan sa pamibi asin sa Kristianong kongregasyon