LEKSIYON 40
Paano Kita Magigin Malinig sa Paghiling nin Diyos?
Isipon an sarong mapagpadabang ina na inaasikaso an saiyang aki na malaog sa eskuwelahan. Sinisigurado niya na nakakarigos na ini saka pakarhay asin malinig an bado. Makakatabang iyan na dai magkahilang an aki saka mahihiling kan iba na dai siya pinapabayaan kan mga magurang niya. Gusto man kan satong mamumuton na Ama na si Jehova na magin malinig kita sa pisikal asin sa moral. Nakikinabang kita pag malinig kita, saka natatawan ta nin onra si Jehova.
1. Paano kita magigin malinig sa pisikal?
Sinasabi sa sato ni Jehova: “Magpakabanal kamo.” (1 Pedro 1:16) Tanganing magin banal, dapat na malinig kita sa pisikal asin sa moral. Magigin malinig kita sa pisikal paagi sa pagkarigos aroaldaw asin paagi sa paghihinguwa na pirming malinig saka pakarhay an satong bado, harong, asin lunadan. Puwede man kitang magtabang sa paglinig kan satong Kingdom Hall. Pag hinihinguwa tang pirming magin malinig sa pisikal, natatawan ta nin onra si Jehova.—2 Corinto 6:3, 4.
2. Ano an mga dapat tang likayan para magin malinig?
Sinasabi sa sato kan Bibliya na “linigon niyato an satuyang mga sadiri sa lambang bagay na nakakaramog sa laman asin espiritu.” (2 Corinto 7:1) Kaya hinihinguwa ta na likayan an ano man na makakaraot sa satong hawak o isip. An satong mga iniisip dapat na nakakapaugma ki Jehova, kaya ginigibo ta an satong pinakamakakaya na isikwal an salang mga kaisipan. (Salmo 104:34) Hinihinguwa ta man na magin malinig o positibo sa satong pagtaram.—Basahon an Colosas 3:8.
Ano pa an puwedeng makapaati sa sato sa pisikal asin sa moral? May mga substansiya na puwedeng makaati o makaraot sa satong hawak. Kaya dai kita nagsisigarilyo, nagmamama, asin nagdodroga o nag-aabuso sa paggamit nin bulong. Sa paggibo kaiyan, nagkakaigwa kita nin mas marahay na salud asin ipinapahiling niyato na iginagalang ta an regalong buhay. Hinihinguwa ta man na magin malinig sa moral paagi sa paglikay sa maating mga gibo-gibo arog kan masturbasyon asin paghiling nin pornograpiya. (Salmo 119:37; Efeso 5:5) Puwedeng magin masakit na halion an mga gibo-gibong iyan, pero matatabangan kita ni Jehova na magibo iyan.—Basahon an Isaias 41:13.
ARAMON PA
Aramon kun taano ta natatawan ta nin onra si Jehova pag malinig kita sa pisikal. Aramon man kun paano mahahali an maating mga gibo-gibo.
3. An pisikal na kalinigan nagtataong onra ki Jehova
Pag binasa ta an mga pagbuot ni Jehova sa suanoy na Israel, maaaraman ta kun gurano kahalaga saiya na magin malinig an saiyang mga lingkod. Basahon an Exodo 19:10 asin 30:17-19, dangan pag-ulayan an mga hapot na ini:
Ano an itinutukdo sa sato kan mga bersikulong ini manungod sa paghiling ni Jehova sa pisikal na kalinigan?
Ano an mga dapat mong gibuhon para pirming magin malinig sa pisikal?
Kaipuhan nin panahon asin paghihinguwa para magin malinig sa pisikal. Pero magigibo ta iyan sain man kita nakaistar, mayaman man kita o pobre. I-play an VIDEO, dangan pag-ulayan an hapot.
Pag naghuhulit, taano ta mas igagalang kita kan mga tawo pag nahihiling ninda na malinig asin pakarhay an satong mga gamit saka mga pagsadiri?
4. Ipundo an mga bisyo
Matatabangan kita ni Jehova na maipundo an ano man na bisyo
Kun nagsisigarilyo ka o nagdodroga, posibleng aram mo kun gurano kasakit na halion an mga bisyong iyan. Ano an makakatabang? Pag-isipan kun paano ka naaapektaran kan mga bisyong iyan. Basahon an Mateo 22:37-39, dangan pag-ulayan kun paano an pagsigarilyo o pagdroga nin sarong tawo nakakaapektar . . .
sa relasyon niya ki Jehova.
sa pamilya niya asin sa ibang tawo.
Gumibo nin plano para maipundo an bisyo.a I-play an VIDEO.
Basahon an Filipos 4:13, dangan pag-ulayan an hapot na ini:
Paano makakatabang sa sarong tawo an regular na pamibi, pag-adal nin Bibliya, asin pag-atender sa mga pagtiripon para magkaigwa siya nin determinasyon na maipundo an saiyang bisyo?
5. Isikwal an maating mga kaisipan asin gibo-gibo
Basahon an Colosas 3:5, dangan pag-ulayan an mga hapot na ini:
Paano ta naaraman na an pornograpiya, sexting, asin masturbasyon maati sa paghiling ni Jehova?
Sa hiling mo, tama sana daw na asahan sa sato ni Jehova na magin malinig kita sa moral? Taano?
Aramon kun paano malalabanan an maating mga kaisipan. I-play an VIDEO.
Paagi sa sarong ilustrasyon, ipinahiling ni Jesus na dapat kitang magin determinado na gibuhon an kinakaipuhan tanganing pirming magin malinig sa moral. Basahon an Mateo 5:29, 30, dangan pag-ulayan an hapot.
Dai sinasabi ni Jesus na kulgan ta an satong sadiri. An buot niyang sabihon iyo na dapat na gumibo kita nin kinakaipuhan na aksiyon. Anong desididong paghiro an dapat na gibuhon nin sarong tawo para malikayan an maating mga kaisipan?b
Kun pinagmamaigutan mong halion sa isip mo an maating mga kaisipan, siguradong pinapahalagahan ni Jehova an mga paghihinguwa mo. Basahon an Salmo 103:13, 14, dangan pag-ulayan an hapot na ini:
Kun nasasakitan kang ipundo an sarong maating gibo-gibo, paano ka mapapakusog kan tekstong ini na dai magsuko?
Dai magsuko!
Pag nagibo ta giraray an sarong bagay na hinihinguwa tang ipundo, tibaad maisip ta, ‘Garo dai ko na talaga ini kayang halion.’ Pero pag-isipan ini: Pag an sarong paradalagan nadapla, dai buot sabihon na daog na siya sa karera o na kaipuhan niya giraray magpuon sa puon. Arog man kaiyan pag hinihinguwa mong ipundo an sarong maraot na gibo-gibo. Pag nautro mo na naman iyan, dai buot sabihon na mayo ka nang pag-asa o na mayo nang saysay an ginibo mong mga paghihinguwa. Normal sana iyan mantang pinaglalabanan mo an sarong maraot na gibo-gibo. Kaya dai magsuko! Sa tabang ni Jehova, makakaya mong daugon iyan.
MAY MGA NAGSASABI: “Adik na ako diyan. Dai ko na talaga iyan kayang ipundo.”
Anong teksto an gagamiton mo para ipahiling sa sarong tawo na kaya niyang ipundo an sarong maraot na gibo-gibo paagi sa tabang ni Jehova?
SUMARYO
Napapaugma ta si Jehova pag hinihinguwa tang pirming magin malinig an satong hawak, isip, asin paggawi.
Rebyu
Taano ta mahalagang marhay na magin malinig?
Paano ka magigin malinig sa pisikal?
Ano an magigibo mo tanganing magdanay na malinig an saimong kaisipan asin paggawi?
HILINGON MAN
Anong simpleng mga bagay an puwede mong gibuhon para magin malinig sa pisikal dawa kapos ka sa buhay?
Aramon an praktikal na mga paagi na magigibo mo para maipundo an pagsigarilyo.
“Kung Paano Maihihinto ang Paninigarilyo” (Gumising!, Mayo 2010)
Aramon an mga epekto kan pornograpiya.
“Pornograpiya—Nakakaraot o Dai Nakakaraot?” (An Torrengbantayan, Setyembre-Oktubre 2013)
Aramon kun paano napundo nin sarong lalaki an saiyang adiksiyon sa pornograpiya.
“Pirang Beses Kong Pinurbaran Bago Ko Napundo” (An Torrengbantayan Num. 4 2016)
a An “Kung Paano Maihihinto ang Paninigarilyo,” na nasa seksiyon na Hilingon Man kan leksiyon na ini, nagtatao nin praktikal na mga paagi para mapundo an pagsigarilyo.
b Para maipundo an masturbasyon, makakatabang an “Paano Ko Madadaig ang Masturbasyon?” sa librong Ang mga Tanong ng mga Kabataan—Mga Sagot na Lumulutas, Tomo 1, kapitulo 25.