Magmaan sa mga Paraolog-olog!

Ngonyan, kadakol kan prediksion, asin nag-aasenso an negosyong pag-adal sa mga posibilidad sa ngapit. “Mantang nagdadangadang an taon 2000,” an komento kan The Daily Telegraph sa Londres, “igwa nin pambihira pero bako man biyong dai linalaoman na pangyayari. Rinibong tawo sa bilog na kinaban an nakaeeksperyensia nin pambihira asin sa parate makatatakot na mga bisyon manongod sa ngapit.” Para sa dakol na nagmamasid an makosogon na interes na ini dapit sa ngapit pag-otro sana kan linalaoman na mga pagbabago kaidto na dai nangyari.

MANTANG an mga lunadan na guyod nin kabayo nagdakol kan ika-19 siglo, an sarong lalaki nagprediktar na an mga siudad sa Europa sa katapustapusi mapapano nin odo. Siempre, dai nagkatotoo an saiyang prediksion. Sa siring, kun idinodoon an parateng pagkasudya nin mga prediksion, an The Times sa Londres nagsabi: “An ngapit saro sanang tompok nin odo nin kabayo.”

An iba pinag-oolog-olog an mga nakaheheling nin peligro sa enotan. Halimbawa, an sarong propesor sa negosyo sa sarong unibersidad sa E.U. inangat nin pustahan an mga nagpapatanid manongod sa pagraot kan palibot kun baga maruro an kamugtakan. Siring sa irineport sa magasin na New Scientist, sia naghihingako na “an satong kualidad nin buhay nagrarahay asin magpapadagos na siring na daing talaan na panahon.”

Sa tahaw nin karibarawan manongod sa mga paghingako asin mga kontra-hingako, an dakol naniniwala na an gabos sa pundamental magdadanay na dai nagbabago. Inoolog-olog an ano man na ideya nin pag-interbenir nin Dios sa mga gibo-gibo nin tawo, ipinaheheling ninda an aktitud na arog sa mga paraolog-olog kaidtong enot na siglo C.E.

An Gabos daw Iyo Pa Man Giraray?

An ikaduwang ipinasabong na surat kan Kristianong apostol na si Pedro, na isinurat mga 64 C.E., nagpatanid: “Sa huring mga aldaw an mga paraolog-olog madatong na may pag-olog-olog, na naglalakaw sono sa saindang sadiring mga mawot.”​—2 Pedro 3:3.

An mga paraolog-olog hinihingoang paluwason na makangingisi an saindang pinag-oolog-olog. An tawo na nagpapadara sa pag-olog-olog tibaad nahoholog sa paslong silo huli ta an paraolog-olog sa parate gustong akoon kan mga naghihinanyog sa saiya an saiyang punto de vista. Tibaad arog kaini an nagkapira sa mga paraolog-olog na dapit sa sainda si Pedro nagpatanid, “naglalakaw sono sa saindang sadiring mga mawot.” Sa pagpatanid sa saiyang mga parabasa, an apostol naggamit nin nagdodoon na porma nin pananaram. Sia nagpatanid manongod sa pagdatong kan ‘mga paraolog-olog na may pag-olog-olog.’

An mga paraolog-olog na idto kan enot na siglo kinustion an pagigin totoo kan “ipinanugang presensia” ni Cristo, na nagsasabi: “Haen man ining ipinanugang presensia nia? Tara, poon kan aldaw na an satong mga apoon magtorog sa kagadanan, an gabos na bagay pareho man sana poon kan kapinonan nin paglalang.” (2 Pedro 3:4) Arog kaiyan an pagheling ninda dian. Pero, kaidtong taon nin 33 C.E., ihinula ni Jesus an grabeng kapahamakan sa siudad nin Jerusalem. “Madatong sa saimo an mga aldaw,” an ipinahayag nia, “na an saimong mga kaiwal matogdok sa palibot mo nin kuta na may matarom na mga taldok asin lalaomon ka patin pasasakitan ka sa gabos na lado, asin ika asin an saimong mga aki dian sa saimo papasubsobon ninda sa daga, asin dai ka ninda tatadaan nin gapo sa ibabaw nin gapo.” Kanigoan kanapasala an mga nag-olog-olog na idto sa patanid na iyan! Kan 70 C.E., sinalikopan kan Romanong mga hukbo an Jerusalem asin linaglag an siudad, na kadakol kan nagkagaradan na nag-eerok dian. Taano an mayoriya sa mga nag-eerok sa siudad ta bakong andam sa kalamidad na ini? Huli ta dai ninda namansayan na siniyasat sinda nin Dios paagi sa saiyang Aki, si Jesus.​—Lucas 19:​43, 44.

Si apostol Pedro nagtaram manongod sa maabot na pag-interbenir kan Dios na Makakamhan sa gabos. “An aldaw ni Jehova madatong siring sa parahabon,” an patanid ni Pedro. (2 Pedro 3:10) Sa panahon na iyan hahaleon nin Dios an mga maraot sa enterong globo asin itatada idtong mga hinokoman bilang matanos. Siring sa parateng ipinaliliwanag kan magasin na ini, an “presensia” ni Cristo Jesus nagpoon kan 1914. Alagad an saiyang paghiro bilang Parakastigo nin Dios tanganing haleon an karatan sa ngapit pa. Bilang resulta, an patanid kan apostol na magmaan sa mga paraolog-olog aplikado ngonyan na may orog na pagkaapurado.

Tibaad haloy na kamong naghahalat sa pag-interbenir nin Dios sa mga gibo-gibo nin tawo. Ano an makatatabang sa saindo na padagos na mapasensiang maghalat na dai nagigin biktima kan mga paraolog-olog? Tabi ipadagos an saindong pagbasa.

[Blurb sa pahina 4]

“Madatong sa saimo an mga aldaw na an saimong mga kaiwal . . . lalaomon ka patin pasasakitan ka sa gabos na lado, . . . asin dai ka ninda tatadaan nin gapo sa ibabaw nin gapo.” Iyan bakong patanid na maninigong pag-olog-ologon. An Romanong mga hukbo linaglag an Jerusalem, na kadakol kan nagkagaradan.