Ano an Mangyayari sa Aldaw nin Paghukom?

Arog kan ilinaladawan kan ritrato na nasa tuo, iniisip kan dakul na tawo na sa Aldaw nin Paghukom binilyon na kalag an dadarahon sa atubangan kan trono nin Diyos para hukuman, o husgaran, basado sa mga nakaagi nindang ginibo—an iba babalusan nin buhay sa langit, an iba man papasakitan sa impiyerno. Pero, ipinapahiling kan Bibliya na an katuyuhan kan Aldaw nin Paghukom iyo na iligtas an katawuhan sa inhustisya. (Salmo 96:13) Ninombrahan kan Diyos si Jesus na iyo an magin Hukom na mabalik nin hustisya sa katawuhan.—Basahon an Isaias 11:1-5; Gibo 17:31.

Kan an inot na tawo, si Adan, tuyong magrebelde sa Diyos, nagin uripon nin kasalan, pagsakit, asin kagadanan an gabos niyang gikan dahil sa ginibo niya. (Roma 5:12) Para maitama an inhustisyang iyan, bubuhayon liwat ni Jesus an binilyon na tawong gadan. Ihinahayag kan libro nin Kapahayagan na mangyayari iyan sa sangribong taon na pamamahala ni Cristo Jesus.—Basahon an Kapahayagan 20:4, 11, 12.

An mga bubuhayon liwat dai huhusgaran basado sa mga ginibo ninda bago sinda nagadan kundi basado sa kun ano an gigibuhon ninda pag binuksan na an “mga rolyo” na sinambit sa Kapahayagan kapitulo 20. (Roma 6:7) Kaiba sa mga mabubuhay liwat asin magkakaigwa nin oportunidad na makanuod manungod sa Diyos iyo “an mga matanos pati an mga bakong matanos,” an sabi ni apostol Pablo.—Basahon an Gibo 24:15.

An mga nagadan na dai lamang nakamidbid sa Diyos na Jehova asin nakapaglingkod sa saiya magkakaigwa nin oportunidad na magbago asin gumibo nin marahay. Kun gigibuhon ninda iyan, an saindang pagkabuhay liwat magigin “pagkabuhay liwat para sa buhay.” Pero an iba sa mga bubuhayon liwat dai gugustuhon na sunudon an mga dalan ni Jehova. Kaya an saindang pagkabuhay liwat magigin “pagkabuhay liwat para sa paghukom.”—Basahon an Juan 5:28, 29; Isaias 26:10; 65:20.

Pagkatapos kan sangribong taon na Aldaw nin Paghukom, naibalik na ni Jehova an masinunod na katawuhan sa orihinal na perpektong kamugtakan. (1 Corinto 15:24-28) Magayunon nanggad na paglaom iyan para sa masinunod na mga tawo! Sa pangultimong pagbalo, papaluwason kan Diyos si Satanas na Diyablo hali sa kairaruman, na sa panahon na iyan sangribong taon nang nalalaom diyan. Pagmamaigutan giraray ni Satanas na patalikudon ki Jehova an mga tawo, pero an mga dai masunod ki Satanas magkakaigwa nin buhay na daing sagkod digdi sa daga.—Basahon an Isaias 25:8; Kapahayagan 20:7-9.

Ginagamit man kan Bibliya an ekspresyon na “aldaw nin paghukom” para ipanungod sa pangyayari na matapos sa presenteng sistemang ini nin mga bagay. An aldaw na ini nin paghukom magigin biglaan an pag-abot kapareho kan Baha kan panahon ni Noe, na puminara sa sarong enterong maraot na henerasyon. Nakakaugma ta an madali nang mangyaring pagpara sa “mga bakong diyosnon na tawo” maresulta sa pagkaigwa nin bagong sosyedad sa daga kun sain “magdadanay an katanusan.”—Basahon an 2 Pedro 3:6, 7, 13.