“Papagdanayon Nindo an Tultol na Pag-iisip, Magin Mapagbantay!”

1. Ano an sinabi ni Jesus sa saiyang mga disipulo manungod sa kun nuarin maabot an katapusan, asin anong patanid an itinao niya?

MGA pirang aldaw bago magadan si Jesus, apat sa saiyang mga disipulo an naghapot sa saiya: “Ano an magigin tanda . . . kan pagtatapos kan sistema nin mga bagay?” (Mat. 24:3) Posibleng marhay na iniisip kan mga disipulong idto kun paano ninda maaaraman kun nuarin matatapos an Judiong sistema nin mga bagay. Sa simbag ni Jesus, sinambit niya bako lang an manungod sa katapusan kan Judiong sistema kundi pati man an manungod sa “pagtatapos kan sistema nin mga bagay” na kinabubuhayan niyato ngunyan. Manungod sa kun nuarin maabot an katapusan, sinabi ni Jesus: “Mapadapit sa aldaw o sa oras na iyan, daing siisay man na nakakaaram, maski an mga anghel sa langit o maski an aki, kundi an Ama.” Dangan pinatanidan niya an gabos niyang disipulo na “magdanay [na] mata” asin na “padagos [na] magbantay.”—Mar. 13:32-37.

2. Taano ta mahalaga para sa mga nabubuhay kaidto sa Judiong sistema nin mga bagay na padagos na magbantay?

² Kaipuhan kan mga Kristiyanong Judio kan inot na siglo na padagos na magin mapagbantay. Nakadepende diyan an saindang buhay. Sinabihan ni Jesus an saiyang mga parasunod kun anong tanda an dapat nindang bantayan tanganing maaraman ninda kun baga patapos na an Judiong sistema nin mga bagay. Sinabi niya: “Pag nahiling nindo an Jerusalem na napapalibutan nin nagkakampong mga hukbo, isipon nindong madali na an saiyang pagkagaba.” Sa puntong iyan, kaipuhan nindang sunudon an patanid ni Jesus na “dumulag na pasiring sa kabukidan.” (Luc. 21:20, 21) Idtong mga naghimati sa patanid na iyan, nakaligtas kan laglagon kan mga Romano an Jerusalem.

3. Ano an pag-uulayan ta sa artikulong ini?

³ Sa ngunyan, nabubuhay kita sa panahon kan katapusan kan maraot na sistemang ini nin mga bagay. Kaya kaipuhan ta man na papagdanayon na tultol an satong pag-iisip asin padagos na magbantay. Sa artikulong ini, pag-uulayan ta kun paano kita magigin balanse mantang padagos na nagbabantay sa mga nangyayari sa kinaban, kun paano ta mababantayan an satong sadiri, asin kun paano ta magagamit sa pinakamarahay an natatadang panahon.

4. Taano ta dapat na magin interesado kita na mahiling kun paano inuutob kan mga pangyayari sa kinaban an mga propesiya sa Bibliya?

⁴ May marahay na mga dahilan kaya interesado kita na mahiling kun paano inuutob kan mga pangyayari sa kinaban an mga propesiya sa Bibliya. Halimbawa, sinambit ni Jesus an espesipikong mga pangyayari para matabangan kita na maaraman pag paparani na an katapusan kan sistema ni Satanas. (Mat. 24:3-14) Dinagka kita ni apostol Pedro na tawan nin atensiyon an kautuban kan mga propesiya tanganing magdanay na makusog an satong pagtubod. (2 Ped. 1:19-21) An huring libro kan Bibliya nagpupuon sa mga tataramon na: “Sarong kapahayagan ni Jesu-Cristo, na itinao nin Diyos sa saiya, tanganing ipahiling sa mga uripon niya an mga bagay na madali nang mangyari.” (Kap. 1:1) Kaya interesado kitang marhay sa mga nangyayari ngunyan sa kinaban asin sa pagdeterminar kun baga inuutob kaiyan an mga propesiya sa Bibliya. Asin tibaad gustong-gusto tang ipakipag-ulay sa satong mga kapagtubod an siring na mga pangyayari.

5. Ano an dapat tang likayan, alagad ano an dapat tang gibuhon? (Hilingon man an mga ritrato.)

⁵ Minsan siring, pag pinag-uulayan an mga propesiya sa Bibliya, dapat tang likayan an pagbana-bana. Taano? Huling habo niyato na makataram nin ano man na puwedeng magkawsa nin pagkabaranga sa kongregasyon. Halimbawa, tibaad may madangog kitang mga lider sa kinaban na nagtataram kun paano ninda makakayang resolberan an sarong partikular na problema saka magdara nin katuninungan asin katiwasayan. Imbes na magbana-bana na an siring na mga deklarasyon kautuban kan propesiya sa 1 Tesalonica 5:3, kaipuhan tang padagos na magin up-to-date sa pinakabagong ipinublikar na impormasyon. Kun ibinabase ta an satong pag-uulay sa ipinublikar kan organisasyon ni Jehova, tinatabangan ta an kongregasyon na magdanay na sararo “sa dalagan nin kaisipan.”—1 Cor. 1:10; 4:6.

6. Ano an mga manunudan ta sa 2 Pedro 3:11-13?

⁶ Basahon an 2 Pedro 3:11-13. Tinatabangan kita ni apostol Pedro na mapagdanay na balanse an satong pagmansay pag pinag-iisipan an mga propesiya sa Bibliya. Sinasadol niya kita na ‘pirming isaisip an pag-abot kan aldaw ni Jehova.’ Taano? Bako dahil gusto tang pagmaigutan na aramon an “aldaw asin oras” kun nuarin ipapaabot ni Jehova an Armagedon, kundi dahil gusto tang gamiton an natatadang panahon tanganing gumibo nin mga bagay na nagpapahiling nin “banal [na] paggawi asin . . . nin mga gibong nagpapahiling nin debosyon sa Diyos.” (Mat. 24:36; Luc. 12:40) Sa ibang pagtaram, gusto niyatong papagdanayon na matanos an satong paggawi asin siguraduhon na an mga paghihinguwa ta sa paglilingkod ki Jehova nagpapahiling kan satong hararom na pagkamuot sa saiya. Para magibo iyan, kaipuhan tang bantayan an satong sadiri.

7. Paano ta ipinapahiling na binabantayan ta an satong sadiri? (Lucas 21:34)

⁷ Sinabihan ni Jesus an saiyang mga disipulo na bantayan bako sana an mga nangyayari sa kinaban kundi pati man an saindang sadiri. Lininaw iyan sa patanid na mababasa sa Lucas 21:34. (Basahon.) Mangnuhon an sinabi ni Jesus: “Bantayan nindo an saindong sadiri.” An saro na binabantayan an saiyang sadiri, alerto sa ano man na peligro na makakaraot kan saiyang relasyon ki Jehova asin naggigibo nin paagi para likayan iyan. Paagi kaiyan, pinagdadanay niya an saiyang sadiri sa pagkamuot nin Diyos.—Tal. 22:3; Jud. 20, 21.

8. Anong mga sadol an itinao ni apostol Pablo sa mga Kristiyano?

⁸ Sinadol ni apostol Pablo an mga Kristiyano na bantayan an saindang sadiri. Halimbawa, sinabihan niya an mga Kristiyano sa Efeso: “Padagos nindong bantayan nin istrikto an saindong paglakaw na dai iyan magin siring sa mga bakong madunong kundi siring sa mga tawong madunong.” (Efe. 5:15, 16) Pirming may peligro na puwedeng makaapektar sa satong espirituwalidad. Kaya sinasadol kita kan Bibliya na “padagos [niyatong] sabuton kun ano an kabutan ni Jehova” tanganing maprotektaran ta an satong sadiri sa ano man na klase nin peligro.—Efe. 5:17.

9. Ano an kaipuhan tang gibuhon para maaraman an kabutan ni Jehova para sa sato?

⁹ Dai sinasabi sa sato kan Bibliya an lambang peligro na puwedeng makaapektar sa satong pakikiamigo ki Jehova. Sa parati, kaipuhan tang gumibo nin mga desisyon sa mga bagay na dai man direktang ipinapaliwanag sa Kasuratan. Tanganing makagibo nin madunong na mga desisyon, kaipuhan tang aramon “an kabutan ni Jehova.” Magigibo ta ini paagi sa regular na pag-adal kan Tataramon nin Diyos asin paghurop-hurop kaiyan. Mantang mas nasasabutan ta an kabutan ni Jehova asin hinihinguwang magkaigwa kan “pag-iisip ni Cristo,” mas posibleng marhay na an paglakaw ta magin “siring sa mga tawong madunong,” dawa pag mayong espesipikong mga susundon na magiya sa paggawi ta. (1 Cor. 2:14-16) May mga peligro na madaling marisa, pero an iba dai gayong risa.

10. Ano an nagkapirang peligro na dapat tang likayan?

¹⁰ Kaiba sa mga peligro na dapat tang likayan iyo an pakikipag-flirt, sobrang pag-inom, sobrang pagkakan, pagtaram nin makulog na mga tataramon, pati man an paghiling nin bayolenteng mga libangan, pornograpiya, asin mga kaagid kaiyan. (Sal. 101:3) An satong kaiwal, an Diyablo, daing pundo sa paghanap nin mga oportunidad na rauton an satong pakikiamigo ki Jehova. (1 Ped. 5:8) Kun dai kita magigin mapagbantay, puwedeng itanom ni Satanas sa satong isip asin puso an mga banhi nin pagkauri, pagkabakong sadiyosan, kahanaban, pagkaungis, kapalangkawan, asin paghinanakit. (Gal. 5:19-21) Sa primero, an mga tendensiyang iyan tibaad bako man grabe kakusog. Pero kun dai kita tulos magibo nin mga paagi para halion iyan, padagos iyan na matalubo siring sa nakakahilong tinanom asin magkakawsa nin problema.—Sant. 1:14, 15.

11. Ano an sarong dai risang peligro na dapat tang likayan, asin taano?

¹¹ An sarong dai risang peligro iyo an maraot na pag-iriba. Pag-isipan an senaryong ini. May katrabaho ka na bakong kapagtubod. Gusto mo na magin marahay an impresyon niya sa Mga Saksi ni Jehova, kaya mabuot saka matinabang ka. Tibaad nagtutugot ka man na magpangudto kaiba niya paminsan-minsan. Dai nahaloy, nagigin regular na iyan. Kun minsan, nagigin imoral an pag-uulay, na kan inot pigbabaliwala mo lang. Sa paglihis nin panahon, natuod ka nang marhay sa siring na mga pag-uulay kaya dai ka na nasusuya diyan. Dangan sarong aldaw, inimbitaran ka kan katrabaho mo na mag-inom-inom pagkatapos kan trabaho, asin inako mo iyan. Kan huri, nagigin arog ka na kan katrabaho mo mag-isip. Sa puntong iyan, gurano daw kahaloy bago magin arog na man saiya an paggawi mo? Siyempre, mabuot saka magalang kita sa gabos, pero dapat tang tandaan na dakula an magigin impluwensiya sa sato kan mga pinipili tang makaiba-iba. (1 Cor. 15:33) Kun babantayan ta an satong sadiri, arog kan sadol sa sato ni Jesus, lilikayan ta an dai kinakaipuhan na pakikiiba-iba sa mga dai namumuhay kauyon kan mga pamantayan ni Jehova. (2 Cor. 6:15) Mahihiling ta an peligro asin lilikayan iyan.

12. Ano an dapat na gibuhon kan mga disipulo ni Jesus kaidto mantang hinahalat an katapusan kan sistema nin mga bagay?

¹² An mga disipulo ni Jesus kaidto dapat na magin sibot mantang hinahalat an katapusan kan sistema nin mga bagay. Tinawan sinda ni Jesus nin gibuhon. Ipinagbuot niya sa sainda na ihulit an maugmang bareta “sa Jerusalem, sa bilog na Judea saka Samaria, asin sagkod sa pinakaharayong parte kan daga.” (Gibo 1:6-8) Dakulaon na asignasyon nanggad iyan! Paagi sa paggibo kan saindang pinakamakakaya sa asignasyon na iyan, ginamit ninda sa pinakamarahay an saindang panahon.

13. Taano ta kaipuhan tang gamiton sa pinakamarahay an satong panahon? (Colosas 4:5)

¹³ Basahon an Colosas 4:5. Tanganing mabantayan ta an satong sadiri, kaipuhan tang pag-isipan kun paano ta ginagamit an satong panahon. Puwedeng mag-abot sa siisay man sa sato an “dai linalauman na mga pangyayari.” (Ecl. 9:11) Dai ta inaasahan, puwedeng bigla na lang kitang magadan.

14-15. Paano ta magagamit sa pinakamarahay an satong panahon? (Hebreo 6:11, 12) (Hilingon man an ritrato.)

¹⁴ Magagamit ta sa pinakamarahay an satong panahon paagi sa paggibo kan kabutan ni Jehova asin pagpakusog kan satong pakikiamigo sa saiya. (Juan 14:21) Kaipuhan na “magin marigon [kita], dai natatanyog, asin pirming dakul an ginigibo sa gibuhon kan Kagurangnan.” (1 Cor. 15:58) Dangan pag uminabot an katapusan—iyan man katapusan kan satong buhay o katapusan kan maraot na sistemang ini—mayo kitang pagbabasulan.—Mat. 24:13; Roma 14:8.

¹⁵ Sa ngunyan, padagos na ginigiyahan ni Jesus an saiyang mga disipulo mantang ihinuhulit ninda an manungod sa Kahadian nin Diyos sa bilog na daga. Ginibo niya an saiyang kabtang. Paagi sa organisasyon ni Jehova, sinasanay kita ni Jesus kun paano maghulit asin tinatawan niya kita nin mga pantabang na kaipuhan ta para maipalakop an maugmang bareta. (Mat. 28:18-20) Ginigibo ta an satong kabtang paagi sa pagigin mahigos sa gibuhon na paghuhulit asin pagtutukdo saka paagi sa padagos na pagigin mapagbantay mantang hinahalat ta si Jehova na tapuson an sistemang ini nin mga bagay. Paagi sa pag-aplikar kan sadol na nasa Hebreo 6: 11, 12, mapapangaptan ta nin higot an satong paglaom “sagkod sa katapusan.”—Basahon.

16. Ano an determinado tang gibuhon?

¹⁶ Igwa si Jehova nin itinalaan na aldaw asin oras kun nuarin niya tatapuson an sistema ni Satanas. Pag uminabot an aldaw na iyan, siguradong uutubon ni Jehova an mga propesiya na ipinasurat niya sa saiyang Tataramon. Pero kun minsan, tibaad garo baga naaatraso an katapusan kan sistemang ini. Minsan siring, an aldaw ni Jehova “dai . . . mahuhuri!” (Hab. 2:3) Kaya lugod na magin determinado kita na ‘padagos na maghalat ki Jehova,’ na ‘mapasensiyang naghahalat sa Diyos na satuyang Paraligtas.’—Mik. 7:7.