Maghalat na May Pagpapasensia

AN PASTOR na paorootrong nagkurahaw na “May lobo!” mantang mayo man nin lobo nanompongan na an suminunod niang kurahaw sa paghagad nin tabang dai na hinimate. Kaagid ngonyan, dakol an dai nag-iintindi sa kaharanihan kan aldaw ni Jehova huli ta nakadangog na sinda nin dai mabilang na patanid na nagin falsong mga alarma. An mismong katotoohan na kadakol kan dai nakamamansay sa kun arin na patanid an tunay dangan himateon iyan inaaprobetsaran kan dakulang kaiwal nin Dios, si Satanas, an falsong “anghel nin liwanag.”​—2 Corinto 11:14.

An espiritu nin dai pag-intindi peligroso dawa sa mga naglingkod na ki Jehova nin nagkapirang panahon. Taano? Estudyaran nindo an patanid ni apostol Pedro kan enot na siglo.

Pakaisipon nin Malinaw

An ikaduwang ipinasabong na surat ni Pedro sarong pagirumdom sa enot na mga Kristiano, asin siring man sa sato. “Mga namomotan,” an surat nia, “iyo na ini an ikaduwang surat na isinurat ko sa saindo, na dian, arog kan sa enot, pinupukaw ko an saindong malinaw na pag-isip paagi sa pagirumdom.” (2 Pedro 3:1) Ano an basehan ni Pedro sa pagkapurisaw na ini? Itinatampok ni Pedro an presensia kan mga paraolog-olog na an pag-olog-olog nagpapaluya sa kinakaipuhan na pakamate nin pagkaapurado manongod sa panahon na nabubuhayan kan mga lingkod nin Dios. Ngonyan na an panahon na magmaan na dai madaya kan mga paratuya. Sa siring sinasadol ni Pedro an mga nagbabasa kan saiyang surat na ‘girumdomon an mga kasabihan na itinaram kaidto kan banal na mga propeta.’ (2 Pedro 3:2; Gibo 3:​22, 23) Ano an sinabi kan mga propeta?

An fiel na mga lingkod nin Dios sa dakol na okasyon dinara an atension sa kun paano tinapos kan paghokom nin Dios an karatan. Ipinagigirumdom ni Pedro sa mga nagbabasa kan saiyang surat an Baha kan aldaw ni Noe na ginamit nin Dios bilang paagi nin pag-interbenir kan an daga napano nin karatan. An Delubyong idto na hale sa oran epektibong tinapos an kinaban kan panahon na idto. Alagad iningatan nin Dios si Noe asin an saiyang pamilya sa sarong dahong kaiba an nagrerepresentar na nabubuhay na mga linalang na hale sa “lambang klase nin laman.” An lakop na mga leyenda nagpapatunay sa pagigin totoo kan pagkasaysay sa Biblia.a​—Genesis 6:​19; 2 Pedro 3:​5, 6.

An pag-interbenir na iyan nin Dios inapod ni Pedro na ‘katotoohan na dai namamangno’ kan nagkapirang tawo. Dangan an iba napamugtak an boot pasiring sa dai pag-intindi kan mga paraolog-olog kan aldaw na idto. Pero, kita dapat na nungkang malingaw sa ginibo na ni Jehova. Sinasabihan kita ni Pedro: “Sa iyo man sanang tataramon an kalangitan asin an daga na yaon ngonyan itinatagama sa kalayo asin irinereserba sa aldaw nin paghokom asin kalaglagan kan maraot na mga tawo.” (2 Pedro 3:7) Iyo, mangyayari liwat an pag-interbenir nin Dios.

An Dios Bakong Maluway

Dakol na milenyo na nin panahon an nakaagi. Taano an Dios ta naghalat nin halawigon na resolberan an mga problema nin katawohan? Sa giraray, nagkokonsentrar si Pedro sa saro pang katotoohan. Sia nagsasabi: “Dai logod nindo malingawan an sarong katotoohan na ini, mga namomotan, na an sarong aldaw ki Jehova garo sangribong taon asin an sangribong taon garo sarong aldaw.” (2 Pedro 3:8) An pagmansay ni Jehova sa panahon laen kan sa sato. Para sa daing sagkod na Dios, an peryodo poon kan paglalang ki Adan sagkod ngonyan dai pa ngani minaabot sa sarong semana. Alagad ano man an satong pagmansay sa panahon, an kada milenyo asin aldaw na minaagi orog kitang irinarani sa kaotoban kan katuyohan ni Jehova.

“An binabantayan na koron nungkang nagkakalakaga” sarong kasabihan na nangangahulogan na an paghalat sana sa sarong pangyayari garo nagpapaatraso na mangyari iyan. Minsan siring, si Pedro nagrerekomendar na ‘halaton asin papagdanayon na harani sa isip an presensia kan aldaw ni Jehova.’ (2 Pedro 3:12) Paano niato mapatatalubo an pag-iisip na nagpapadanay sa sato na magin alisto sa kaharanihan kan pag-interbenir nin Dios?

Mas Makosog an Impluwensia nin mga Aksion Kisa sa mga Tataramon

Isinentro ni Pedro an atension sa mga gibo asin aksion. Sia nagtataram manongod sa “banal na mga gawe” siring man sa “gibo nin diosnon na debosyon.” (2 Pedro 3:11) Ano an kalabot digdi?

An tunay na lingkod nin Dios naghihiro sa paagi na nakapaoogma sa Saiya. An pagtubod kan siring na tunay na parasamba naheheling sa saiyang gawe-gawe. Ilinalaen sia kaini sa mga nagtataram sana na naniniwala sa Dios asin sa saiyang mga panuga. Tibaad nariparo nindo na an pampublikong ministeryo kan Mga Saksi ni Jehova nagpapamidbid kan saindang kalaenan. Sinda minasongko sa saindong harong asin dinadara an saindong atension sa mga panuga nin Dios na sinabi sa Biblia. Alagad nagpapatotoo man sinda dapit sa saindang mga paglaom asin paniniwala saen man ninda manompongan an mga tawo.

An Saksi na nagmamasibot sa pagbalangibog kan saiyang pagtubod sa iba napasasarig asin napakokosog an saiyang mga paniniwala. An pagpahayag nakaparararom kan epekto sa pagmate asin kadungan kaiyan nagbubunga nin panlaog na kagayagayahan asin pagkakontento. Kun iinaanunsio niato an maogmang bareta kan Kahadean nin Dios, pinaoogma man niato si Jehova. Aram niato na sia ‘bakong biko na malingawan an satong ginibo asin an pagkamoot na satong ipinaheheling para sa saiyang ngaran,’ siring sa ipinahahayag kan kapwa apostol ni Pedro na si Pablo.​—Hebreo 6:10; Roma 10:​9, 10.

Ano an resulta kan pagkasibot na ini sa pagpalakop kan maogmang bareta kan Kahadean durante kan ultimong mga aldaw kan presenteng maraot na palakaw na ini? Ginatos na ribong tawo na sadiosan an puso an nakanonood kun paano magkaigwa nin dayupot na relasyon ki Jehova, makinabang sa saiyang dai na kutana maninigong kabootan asin makanompong nin tunay na kaogmahan sa paglaom na mabuhay na daing sagkod sa sarong paraisong daga.

Patienot na Kaaraman

Minsan ngani aram niato hale sa Biblia na si Jehova Dios mainterbenir sa saiyang itinalaan na panahon, kaipuhan niato na himateon an dugang pang patanid na itinatao ni Pedro. “Mantang kamo igwa na kan kaaraman na ini, mag-ingat kamo na dai kamo madara kaiba ninda paagi sa sala kan mga tawong paratumang sa ley asin maholog kamo sa saindong sadiring karigonan.”​—2 Pedro 3:17.

Siertong patienot nang aram ni Jehova na an nagkapira na daing makosog na pagtubod puedeng manluya an boot huli sa garo baga pagkaatraso kan pag-interbenir nin Dios. Aram man nia na an impluwensia nin maraot na mga tawo puedeng makaraot sa saiyang tunay na mga lingkod o, kisuerra, paluyahon an saindang paniniwala na an pagsantipikar kan ngaran nin Dios harani na. Kanigoan kamakaturotriste na mawaran nin karigonan sa ultimong mga aldaw na ini!

Bako ining panahon na magparaduda o magpabarobago an isip manongod sa gigibohon ni Jehova. (Hebreo 12:1) Imbes, ngonyan na an panahon na magtalubo an pag-apresyar sa nagin bunga kan pagpasensia ni Jehova​—an esperansa na makaligtas an minilyon na nagigin kabtang kan internasyonal na dakulang kadaklan asin naglalaom na matadang buhay sa nagdadangadang na dakulang kahorasaan. (Kapahayagan 7:​9, 14) Si Pedro nagsasadol: “Padagos na magtalubo sa dai na kutana maninigong kabootan asin kaaraman kan satong Kagurangnan asin Paraligtas na si Jesu-Cristo. Mapasaiya logod an kamurawayan ngonyan asin sagkod sa aldaw nin panahon na daing sagkod.”​—2 Pedro 3:18.

“Magdanay Kamo sa Pagkamoot nin Dios”

An pagigin sibot sa paghuhulit kan Kahadean asin regular na pag-atender sa Kristianong mga pagtiripon para sa pagsamba asin pag-adal kan Tataramon nin Dios nagtatao sa sato nin proteksion. Sa siring, kita dai magkakaigwa nin panahon na mapurisaw nin labi-labi manongod sa nagrururong mga kamugtakan sa maraot na palakaw ngonyan. An takot asin kahaditan dai kaipuhan na mangibabaw sa buhay nin tunay na mga Kristiano. (1 Corinto 15:58) Mantang kita mas sibot sa paglilingkod ki Jehova, mas madaling minalihis an panahon.

Si Judas, na katemporanyo ni Pedro asin tugang sa ina ni Jesus, sinasadol kita: “Kamo, mga namomotan, paagi sa pagpakosog sa saindo man sana sa saindong kabanalbanaleng pagtubod, asin pamimibi na igwa kan banal na espiritu, magdanay kamo sa pagkamoot nin Dios, mantang kamo naghahalat sa pagkaherak kan satong Kagurangnan na si Jesu-Cristo na nasa isip an buhay na daing katapusan.” (Judas 20, 21) Mangnoha an halaga kan positibong aktitud na pinaooswag kan pagmamaigot sa pamibi. (1 Tesalonica 5:17) Dangan idinugang ni Judas: “Padagos kamong magpaheling nin pagkaherak sa nagkapira na igwa nin mga pagduwaduwa; iligtas nindo sinda paagi sa pag-agaw sa sainda hale sa kalayo. Alagad padagos na magpaheling nin pagkaherak sa iba, na ginigibo iyan na may takot, mantang ikinaoongis nindo minsan an panlaog na gubing na namantsahan kan laman.” (Judas 22, 23) Kanigoan kahalagang marhay na magpakinorosogkosogan sa masakit na mga panahon na ini! Asin kanigoan kaimportante na dai maholog sa sugot, na ginagamit na sarahotan an pinalawig na “aldaw nin kaligtasan” na ini sa “malaswang gawe-gawe,” na lakop na marhay sa kinaban ngonyan na marigsok sa moral.​—Judas 4; 2 Corinto 6:​1, 2.

Paagi sa paghimate sa mamomoton na hatol ni Pedro, Pablo, asin Judas asin paagi sa pagigin sibot asin aktibo sa paglilingkod sa Dios, kamo makahahalat na may pagpapasensia sa pag-interbenir ni Jehova. Alagad kaya daw nindo?

Dai mag-alangan na makikomunikar sa mga Saksi sa saindong lugar para sa tabang na parigonon an saindong pagtubod sa panuga kan Kaglalang na buhay na daing katapusan. Aramon nindo kun ano an hinahagad tanganing makualipikar na makikabtang sa dai na maootrong panglobong pagpatotoo na ini na matatapos sa nagdadangadang na dakulang kahorasaan. (Marcos 13:10) Kun siring kamo magkakaigwa nin esperansa na mabuhay sa bagong kinaban na may katanosan na ipinanunuga ni Jehova. (2 Pedro 3:13) Himateon an saiyang mga pagirumdom! Maghalat na may pagpapasensia! Magin sibot!

[Nota sa ibaba]

[Kapsion sa pahina 7]

Aramon ngonyan an manongod sa panuga nin Dios na Paraiso

[Pasasalamat para sa pinagkuanan kan retrato sa pahina 5]

Lobo: Animals/Jim Harter/Dover Publications, Inc.; hoben na pastor: Children: A Pictorial Archive from Nineteenth-Century Sources/Grafton/Dover Publications, Inc.