Dugangan an Saindong Katoninongan Paagi sa Tamang Kaaraman

“Padakolon logod sa saindo an dai na kutana maninigong pagkaherak asin katoninongan paagi sa tamang kaaraman sa Dios asin ki Jesus na satong Kagurangnan.”—2 PEDRO 1:2.

 1, 2. (a) Taano ta ikababaing sa pag-agom an matoninong na relasyon sa Dios? (b) Paano niato mapakokosog an satong pakipagkatoninongan sa Dios?

AN MATONINONG na relasyon na naestablisar ki Jehova Dios kan kamo bautismohan garo pag-agom sa nagkapirang paagi. Minsan ngani maogmahon an kasal, iyan kapinonan sana nin sarong mahalagang relasyon. Paagi sa paghihingoa, panahon, asin kabatidan, an relasyon nin mag-agom orog na magigin mas nagkakaminootan, na nagigin pailihan sa panahon nin kasakitan. Siring man, paagi sa kahigosan asin sa tabang ni Jehova, puwede nindong dugangan an saindong pakipagkatoninongan sa saiya.

² Ipinaliwanag ni apostol Pedro kun paano na an mga “nagkamit nin pagtubod” puwedeng pakosogon an saindang pakipagkatoninongan sa Dios. Sia nagsurat: “Padakolon logod sa saindo an dai na kutana maninigong pagkaherak asin katoninongan paagi sa tamang kaaraman sa Dios asin ki Jesus na satong Kagurangnan.”—2 Pedro 1:1, 2.

“Tamang Kaaraman sa Dios”

 3. An pagkaigwa nin tamang kaaraman ki Jehova asin Jesus nangangahulogan nin ano?

³ An termino sa Griego para sa “tamang kaaraman” (e·piʹgno·sis) na ginamit sa kontekstong ini nangangahulogan nin mas hararom, mas dayupot na kaaraman. An pormang berbo puwedeng mangahulogan nin kaaraman na nakamtan paagi sa personal na eksperyensia asin isinalin na “lubos na maaraman” sa Lucas 1:4. An Griegong iskolar na si Culverwel nagpapaliwanag na para sa saiya an termino igwa kan ideya nin “orog na pakamidbid sa bagay na dati kong aram; mas eksaktong pakaheling sa sarong bagay na naheling ko kaidto sa harayo.” An pagkakamit nin siring na “tamang kaaraman” kalabot an pakamidbid ki Jehova asin ki Jesus nin mas dayupot bilang persona, na orog na namimidbid an saindang mga kuwalidad.

 4. Paano niato madudugangan an satong kaaraman sa Dios, asin taano ta pinaooswag kaini an satong pakipagkatoninongan sa saiya?

⁴ An duwang paagi na kamtan an kaaraman na ini iyo an marahay na ugale sa personal na pag-adal asin regular na pag-atender sa mga pagtiripon kan banwaan nin Dios. Sa mga paaging ini mas malinaw nindong maaaraman kun ano an iginagawe nin Dios asin kun ano an saiyang kaisipan. Magkakaigwa kamo nin mas malinaw na pagkaladawan sa saiyang personalidad sa saindong isip. Alagad an dayupot na pakamidbid sa Dios nangangahulogan nin pag-arog asin pagpaheling kan ladawan na ini. Halimbawa, ilinadawan ni Jehova an tawo na nagpaheling nin makadios na pagkamatinao, dangan Sia nagsabi: “Bako daw na iyan pakamidbid sa sako?” (Jeremias 22:15, 16; Efeso 5:1) An orog na pag-arog sa Dios dinudugangan an saindong pakipagkatoninongan sa saiya huli ta nag-ooswag kamo sa pagsolog kan bagong pagkatawo, “na binabago paagi sa tamang kaaraman oyon sa ladawan kan Saro na naglalang kaiyan.” Orog kamong nakapaooyon sa Dios.—Colosas 3:10.

 5. (a) Paano an tamang kaaraman nakatabang sa sarong Kristiana? (b) Sa anong mga paagi na orog niatong dayupot na maaarog si Jehova?

⁵ An sarong Kristiana na an ngaran Lynn nadepisilan na magpatawad huli sa dai ninda pagkasinabotan nin sarong kapwa Kristiana. Alagad an maingat na personal na pag-adal ni Lynn nagpangyari saiya na siyasaton an saiyang gawe. “Nagirumdoman ko kun anong klaseng Dios si Jehova, kun paano na sia dai nagtatanom nin maraot na boot,” inadmitir nia. “Naisip ko an gabos na saradit na bagay na ginigibo niato ki Jehova aroaldaw, pero dai nia iyan ilinilista. An bagay na ini sa sakong tugang na Kristiana saditon sana kun ikokomparar. Kaya kun naheheling ko sia, sinasabi ko sa sakong sadiri, ‘Namomotan sia ni Jehova siring sa pagkamoot nia sa sako.’ Ini nakatabang sako na maresolberan an problema.” May naheheling daw kamong mga lugar na dian kaipuhan man nindong orog na arogon si Jehova?—Salmo 18:35; 103:8, 9; Lucas 6:36; Gibo 10:34, 35; 1 Pedro 1:15, 16.

Tamang Kaaraman ki Cristo

 6. Paano ipinaheling ni Jesu-Cristo na an paghuhulit pinakaimportante sa saiya?

⁶ An pagkaigwa nin tamang kaaraman ki Jesus nagkakaipo nin pagkaigwa kan “kaisipan ni Cristo” asin pag-arog sa saiya. (1 Corinto 2:16) Si Jesus entusiastikong parabalangibog kan katotoohan. (Juan 18:37) An saiyang mainiton na espiritu sa pag-ebanghelyo dai napogolan nin mga salang paghona kan komunidad. Minsan ngani an mga Judio naoongis sa mga Samaritano, sia nagpatotoo sa sarong Samaritana sa may bobon. Tara, minsan an haloy na pakipag-olay sa siisay man na babae sa publiko tibaad dai inooyonan!a Alagad ta dai tinogotan ni Jesus na an mga saboot kan komunidad makaolang sa saiya sa pagtao nin patotoo. An gibohon nin Dios nakagiginhawa. Sia nagsabi: “An sakong kakanon iyo an sakong paggibo kan kabotan nia na nagsugo sako asin pagtapos kan saiyang gibohon.” An kaogmahan sa pakaheling sa pag-ako kan mga tawo, arog kan Samaritana asin kan dakol na tagaduman, nagpakosog ki Jesus na garo kakanon.—Juan 4:4-42; 8:48.

 7. (a) An kaaraman ki Jesus maninigong magmotibar sato na gibohon an ano? (b) Linalaoman daw nin Dios an gabos niang lingkod na makagibo nin parareho sa paghuhulit? Ipaliwanag.

⁷ An saindo daw na saboot arog ki Jesus? Totoo, an pagpoon nin pakipag-olay sa sarong estranghero manongod sa Biblia depisil para sa dakol asin parateng tinatatsaran nin iba sa komunidad. Pero, tanganing magkaigwa kan kaisipan na kapareho kan ki Jesus, dai kita makadudulag sa bagay na ini: Kaipuhan kitang magpatotoo. Siyempre, bakong parareho an magigibong paghuhulit nin gabos. Ini nagkakalaenlaen sono sa satong mga abilidad asin kamugtakan. Kaya dai nindo isipon na an Dios noarin man dai nakokontento sa saindong banal na paglilingkod. Alagad an satong kaaraman ki Jesus maninigong magtulod sato na gibohon an pinakamakakaya niato. Inomaw ni Jesus an bilog na kalag na paglilingkod.—Mateo 13:18-23; 22:37.

An Pangangaipong Ikaongis an Karatan

 8, 9. Ano an pirang bagay na ikinaoongis nin Dios, asin paano niato ikapaheheling an kaparehong pagkaongis?

⁸ An tamang kaaraman nakatatabang man sato na masabotan kun anong mga bagay an ikinaoongis ni Jesus asin ni Jehova. (Hebreo 1:9; Isaias 61:8) “Anom na bagay an ikinaoongis ni Jehova; iyo, pito an mga bagay na makababalde sa saiyang kalag: an mapaabaw-abaw na mga mata, an putikon na dila, asin an mga kamot na nagpapabolos nin dugo kan mga daing sala, an puso na nagpapakana nin maraot, mga bitis na maliksi sa pagdalagan pasiring sa karatan, an putikon na saksi na nagtataram nin mga kaputikan, asin an siisay man na nagpapangyari nin iriwal sa tahaw nin magturugang.” (Talinhaga 6:16-19) An mga kaisipan asin gaweng ini “makababalde sa saiyang kalag.” An termino sa Hebreo na isinalin digding “makababalde” gikan sa sarong termino na an kahulogan “maongis, masurang,” “maghabo, arog sa bagay na maraot sa gabos na sentido; mabalde, maongis na may kaanggotan.” Kaya tanganing makipagkatoninongan sa Dios, kaipuhan na magkaigwa man kita kan kaparehong paghabo.

⁹ Halimbawa, isikwal an “mapaabaw-abaw na mga mata” o ano man na pagpaheling nin kapalangkawan. Pakapabautismo an iba naghona na dai na ninda kaipuhan an regular na tabang kan mga nagtokdo sa sainda. Alagad ta an bagong mga Kristiano maninigong mapakumbabang umako nin tabang mantang sinda nagigin marigon sa katotoohan. (Galacia 6:6) Likayan man an pagtabil, na madaling gikanan nin “iriwal sa tahaw nin magturugang.” Sa pagpalakop nin maringis na mga dangog-dangog, daing katanosan na pagtatsar, o mga kaputikan, tibaad dai kita “nagpapabolos nin dugo kan mga daing sala,” pero tunay na puwede niatong raoton an marahay na dangog nin iba. Dai kita puwedeng makipagkatoninongan sa Dios kun kita mayo nin pakipagkatoninongan sa satong mga tugang. (Talinhaga 17:9; Mateo 5:23, 24) Sinasabi man nin Dios sa saiyang Tataramon na “saiyang ikinaongis an pagdidiborsio.” (Malaquias 2:14, 16) Kun siring, kamo daw naghihingoang papagdanayon na makosog an saindong relasyon mag-agom, kun kamo may agom? An pakigitilan daw asin pag-aprobetsar sa agom nin iba ikinababalde nindo? Kamo daw, kapareho ni Jehova, ikinaoongis an seksuwal na inmoralidad? (Deuteronomio 23:17, 18) An pagkaongis sa siring na mga gibo bakong pasil, ta tibaad ini gusto kan satong makasalan na laman, asin iyan kinokonsinte kan kinaban.

10. Paano niato mapatatalubo an pagkaongis sa karatan?

¹⁰ Bilang pantabang sa pagpatalubo sa pagkaongis sa karatan, likayan an maaling sa mga pelikula, programa sa TV, o babasahon na nagtatampok nin espiritismo, inmoralidad, o kadahasan. (Deuteronomio 18:10-12; Salmo 11:5) Paagi sa paggibo sa salang gawe na garo baga ‘bako man na gayong maraot’ o makangingisi pa ngani, an siring na mga aling-alingan rinaraot an mga paghihingoa na mapatalubo an makadios na pagkaongis dian. Sa ibong na kampi, an odok na pamibi makatatabang, ta si Jesus nagsabi: “Padagos na mamibi, tanganing dai kamo makalaog sa sugot. Siyempre, an espiritu nagmamawot na gayo, alagad an laman maluya.” (Mateo 26:41) Mapadapit sa pagkaatubang sa makosog na horot nin laman, an sarong Kristiano nagsabi: “Pinipirit kong mamibi. Kun beses namamatean ko na dai na ako maninigong dumolok ki Jehova, pero paagi sa pagpirit ko sa sakong sadiri, paagi sa pagdolok sa saiya, nakakamtan ko an kosog na kaipuhan ko.” Orog nindong masasabotan kun taano ta ikinababalde ni Jehova an salang gibo kun rerepasohon nindo sa saindong isip an makolog na mga resulta kaiyan.—2 Pedro 2:12, 13.

11. Anong mga bagay an tibaad may beses na makaribok sa sato?

¹¹ Sa ibong nin pagkaigwa nin pakipagkatoninongan sa Dios, kun beses kamo mariribok nin pan-aroaldaw na mga problema asin sugot patin kan saindo ngani mismong mga kaluyahan. Girumdoma, ginibo nindo an saindong sadiri na espesyal na punteriya ni Satanas. Kalaban nia an mga nag-ootob sa mga pagboot nin Dios asin mga Saksi ni Jehova! (Kapahayagan 12:17) Kun siring, paano mapagdadanay an saindong panlaog na katoninongan?

Pag-atubang sa Nakariribok na mga Kalamidad

12. (a) Ano an kasaysayan sa likod kan Salmo 34? (b) Paano ilinaladawan kan Kasuratan an pagmate ni David sa panahon kan eksperyensiang ini?

¹² “Dakol nanggayod an mga kalamidad kan matanos,” an isinurat ni David sa Salmo 34:19. Sono sa nota sa itaas kan salmong ini, isinurat iyan ni David pakalihis nin haraning pagkaatubang sa kagadanan. Sa pagdulag ki Hadeng Saul, si David nagpaili ki Aquis, an Filisteong hade sa Gat. Si David namidbid kan mga oripon kan hade asin, sa pakagirumdom sa saiyang nakaaging mga pakikipaglaban para sa Israel, nagreklamo ki Aquis. Kan madangog ni David an orolay, saiyang “ilinaog an mga tataramon na ini sa saiyang puso, asin natakot sia nin makuri huli ki Aquis na hade sa Gat.” (1 Samuel 21:10-12) Total, ini an banwaan ni Goliat, asin ginadan ni David an saindang eroe—dara pa ngani nia an minasbad kan higante! Gagamiton daw ninda ngonyan an dakulang minasbad na ini tanganing pugoton an saiyang payo? Ano daw an magigibo ni David?—1 Samuel 17:4; 21:9.

13. Ano an ginibo ni David sa panahon kan kalamidad na ini, asin paano niato maaarog an saiyang halimbawa?

¹³ Si David nagngayongayo sa Dios na may makosog na mga kurahaw sa paghagad nin tabang. “An nasasakitan na ini nag-apod, asin si Jehova mismo nagdangog. Asin sa gabos niang kasakitan sia ilinigtas Nia,” an sabi ni David. Sabi man nia: “Ilinigtas nia ako sa gabos kong katakotan.” (Salmo 34:4, 6, 15, 17) Kamo man daw nakanood nang magngayongayo ki Jehova, na ipinahahayag an laog kan saindong puso sa mga panahon nin kahaditan? (Efeso 6:18; Salmo 62:8) Minsan ngani an saindong kasakitan bakong arog kadramatiko kan ki David, maheheling pa man giraray nindo na tatawan kamo nin tabang nin Dios sa tamang panahon. (Hebreo 4:16) Alagad ta bako sanang pamibi an ginibo ni David.

14. Paano ginamit ni David an “kaisipan,” asin ano an itinao nin Dios tanganing tabangan kita na gumibo man kaiyan?

¹⁴ “Nagbalat-kayo sia [si David] sa saiyang toltol na kaisipan sa irarom kan saindang mga mata asin nagsagin narurungaw. . . . Sa katapustapusi si Aquis nagsabi sa saiyang mga lingkod: ‘Uya naheheling nindo an sarong lalaki na rungaw. Taano ta dinara sia nindo sa sakuya?’” (1 Samuel 21:13-15) Inisip ni David an estratehiya na sia makadulag. Binendisyonan ni Jehova an saiyang mga paghihingoa. Siring man, kun kita napapaatubang sa depisil na mga problema, linalaoman ni Jehova na gamiton niato an satong isip asin bako sanang maglaom na sia an maresolber kaiyan para sa sato. Itinao nia sato an saiyang ipinasabong na Tataramon, na ‘magtatao nin kadonongan sa mga daing kabatidan, nin kaaraman asin kaisipan.’ (Talinhaga 1:4; 2 Timoteo 3:16, 17) An Dios nagtao man nin kamagurangan sa kongregasyon, na makatatabang satong maaraman kun paano papagdadanayon an mga pamantayan nin Dios. (1 Tesalonica 4:1, 2) Sa parate, an mga lalaking ini makatatabang saindo sa pagsiyasat sa mga publikasyon kan Watch Tower Society para sa tabang sa paggibo nin tamang desisyon o pag-atubang sa problema.

15. Taano ta nakararanga an Salmo 34:18?

¹⁵ Dawa kun nagkokolog an satong puso huli sa sato mismong mga kaluyahan o pagkukulang, kun tama an satong kaisipan, puwede niatong papagdanayon an satong pakipagkatoninongan sa Dios. Si David nagsurat sa Salmo 34:18: “Si Jehova harani sa mga nababaak an puso; asin an mga malodok sa espiritu saiyang ililigtas.” Kun kita mahagad nin kapatawadan asin gibohon an ano man na kinakaipuhan tanganing itanos an mga bagay (nangorogna sa mga kaso nin magabat na kasalan), si Jehova magdadanay na harani sa sato, na sinusuportaran kita sa emosyonal.—Talinhaga 28:13; Isaias 55:7; 2 Corinto 7:9-11.

An Personal na Kaaraman Nagtatao nin Katoninongan

16. (a) Ano pa an ibang paagi na kita magkamit nin tamang kaaraman sa Dios? (b) Ipaliwanag an isinabi ni David: “Namitan nindo asin helingon nindo na si Jehova marahay.”

¹⁶ An saro pang paagi na kita nagkakamit nin tamang kaaraman sa Dios, apuwera sa pag-ako nin espirituwal na impormasyon, iyo an satong personal na pakaeksperyensia sa saiyang mamomoton na tabang. (Salmo 41:10, 11) An pagkaligtas sa kasakitan dai perming nangangahulogan kan tolos-tolos o lubos na pagkatapos kan problema; tibaad kaipuhan na padagos nindong tagalan iyan. (1 Corinto 10:13) Minsan ngani an buhay ni David naligtas sa Gat, sia nagdanay na dulag sa laog nin pirang taon, na napapaatubang sa sunod-sunod na peligro. Sa gabos na iyan, namatean ni David an pangataman asin pagsuportar ni Jehova. Saiyang hiningoang kamtan asin nakamtan an pakipagkatoninongan sa Dios, asin naaraman nia na an mga naggigibo kaiyan “dai magkukulang nin ano man na marahay.” Sa pakarealisar paagi sa personal na eksperyensia kun paano sia tinabangan ni Jehova sa panahon nin kalamidad, nakapagsabi si David: “Namitan nindo asin helingon nindo na si Jehova marahay, O banwaan; maogma an makosog na tawo na nagpapaili sa saiya.”—Salmo 34:8-10, 14, 15.

17. Sa panahon nin kalamidad, ano an nagin epekto sa sarong pamilya kan pagpaili ki Jehova?

¹⁷ An pagpaili ki Jehova sa panahon nin mga kasakitan magpapangyari man saindo na ‘namitan asin helingon na si Jehova marahay.’ Huli sa aksidente, an sarong Kristiano sa parteng solnopan nin Estados Unidos nawaran kan trabaho nia na halangkaw an suweldo sa nakaaging 14 taon. Huling mayo na sinda nin hanapbuhay, sia asin an saiyang pamilya nagngayongayo sa Dios. Pero, kadungan kaiyan, ininaan ninda an saindang gastos, nakigutol sa hararaning oma, asin nagdakop nin sira. Sa tabang kan nagkapira sa kongregasyon asin paglaog sa trabahong por ora kun igwa, nabuhay an pamilyang ini nin apat. Sarong taon poon kan aksidente, an ina nagsabi: “Puwede niatong dayaon an satong sadiri sa paghona na kita nagsasarig ki Jehova, mantang an totoo kita nagsasarig sa satong abilidad, sa satong agom, o sa satong trabaho. Pero kami talagang nakanood na magsarig sa Saiya sana. An ibang mga bagay na ini puwedeng mawara, pero si Jehova noarin man dai kami binayaan—ni sarong segundo. Minsan ngani an yaon sana sa samo an pinakakaipuhan, mas dayupot an samong relasyon ki Jehova bilang pamilya.”

18. Ano an magpapangyari saindo na matagalan minsan an dai nahahaleng problema?

¹⁸ Iyo, an kasakitan sa pinansial puwedeng magpadagos. O tibaad an saro nasasakitan sa dai nahahaleng helang sa pisikal; sa pagkakatumang nin personalidad sa iba; sa emosyonal na kamatean, arog baga kan labi-labing kamondoan; o sa saro sa kadakoldakol na ibang problema. Pero, paagi sa talagang pakamidbid sa Dios, kamo magkakaigwa nin pagtubod sa saiyang tabang. (Isaias 43:10) An dai mababaring pagsarig na ini matabang saindo na magtagal asin magkaigwa kan “katoninongan nin Dios na minalampas sa gabos na kaisipan.”—Filipos 4:7.

19. Paano niato naaaraman na dai ipinagpapalimanliman sana ni Jehova an satong mga kasakitan?

¹⁹ Kun nag-aagi sa masakit na eksperyensia, noarin man dai lingawan na aram ni Jehova kun ano an inaagihan nindong sakit. Sa sarong salmo na ginibo kan hinohorophorop nia an saiyang inagihan sa Gat, si David nakimaherak ki Jehova: “Bugtakan an sakuyang mga luha sa saimong supot na anit. Bako daw na iyan yaon sa saimong libro?” (Salmo 56:8) Tunay na dinangog nin Dios an kahagadan ni David. Nakararangang maaraman na titiponon nin Dios an mga luhang iyan na gikan sa kasakitan asin kahaditan asin garo baga ibubugtak iyan sa saiyang supot na anit, kun paanong ititigis nin saro sa lalagan na iyan an mamahalon na arak o inomon na tubig! An mga luhang iyan perming gigirumdomon, iyo, nasusurat sa libro nin Dios. Mabooton nanggad an pangataman ni Jehova!

20. Paano niato madudugangan an satong pakipagkatoninongan sa Dios?

²⁰ Kaya an saindong bautismo kapinonan sana nin matoninong na relasyon sa Dios. Paagi sa orog na pakamidbid sa personal na mga kuwalidad nin Dios asin ni Jesus, asin personal na pakaeksperyensia sa pagtabang ni Jehova sa panahon nin mga pagbalo, dudugangan nindo an saindong pakipagkatoninongan sa Dios. Bako sana na kamo magkakaigwa nin relasyon ki Jehova na nagigin pailihan nin katiwasayan ngonyan kundi magkakaigwa man kamo kan mahalagang paglaom na mabuhay sagkod lamang sa Paraiso, na duman kamo “magkakararanga nin labi-labi sa nagsosopay na katoninongan.”—Salmo 37:11, 29.

[Nota sa Ibaba]

Nagigirumdoman Daw Nindo?

◻ Sa anong mga paagi na kita magkakamit nin tamang kaaraman sa Dios asin ki Jesus?

◻ An pag-arog sa Dios asin ki Jesus magpapangyari sato na gibohon an ano?

◻ Paano niato inaarog an pagkaongis nin Dios sa maraot?

◻ Paano niato mapagdadanay an katoninongan sa ibong nin mga kasakitan?

[Ritrato sa pahina 15]

Dai itinogot ni Jesus na an salang mga paghona kan komunidad makaolang sa saiyang pagpatotoo. Inaarog daw nindo an saiyang kaigotan sa paghuhulit?

[Mga ritrato sa pahina 16]

Kan mapaatubang sa magabat na problema, si David nagngayongayo ki Jehova . . .

. . . asin nagsagin narurungaw tanganing makapagplanong makadulag. Dinangog ni Jehova an mga pamibi ni David