“Ini Iyo an Boot Sabihon kan Pagkamoot sa Dios”

1, 2. Ano an nagmomotibar sa saindo na mamotan si Jehova Dios?

NAMOMOTAN daw nindo an Dios? Kun kamo personal nang nagdusay kan saindong buhay ki Jehova Dios, siertong madoon na “iyo” an simbag nindo​—asin tama sana iyan! Natural sana na mamotan niato si Jehova. An pagkamoot niato sa Dios talagang bilang balos sa pagkamoot nia sa sato. Siring kaini an pagkasabi kan Biblia: “Kun para sa sato, kita namomoot, huli ta sia [si Jehova] an enot na namoot sa sato.”​—1 Juan 4:19.

² Si Jehova na an nag-enot na ipahayag an saiyang pagkamoot sa sato. Tinawan nia kita nin magayon na istaran na daga. Inaasikaso nia an satong pisikal asin materyal na mga pangangaipo. (Mateo 5:43-48) Mas mahalaga, inaasikaso nia an satong espirituwal na mga pangangaipo. Itinao nia sa sato an saiyang Tataramon, an Biblia. Dugang pa, inaagda nia kita na mamibi sa saiya, na inaasegurar kita na dadangogon kita patin itatao sa sato an saiyang banal na espiritu tanganing tumabang sa sato. (Salmo 65:2; Lucas 11:13) Orog sa gabos, isinugo nia an saiyang pinakamamahal na Aki na magin Paratubos niato tanganing makalda kita sa kasalan asin kagadanan. Dakulaon nanggad na pagkamoot an ipinaheling ni Jehova sa sato!​—Juan 3:16; Roma 5:8.

 3. (a) Tanganing magdanay sa pagkamoot nin Dios, ano an kaipuhan na gibohon niato? (b) Anong mahalagang hapot an kaipuhan niatong pag-isipan, asin saen makukua an simbag?

³ Gusto ni Jehova na makinabang kita sa saiyang pagkamoot sagkod lamang. Minsan siring, talagang depende na sa sato kun baga makikinabang kita o dai. Sinasadol kita kan Tataramon nin Dios: “Magdanay kamo sa pagkamoot nin Dios . . . na nasa isip an buhay na daing katapusan.” (Judas 21) An pananaram na “magdanay kamo” nagsusuherir na may paghiro na kaipuhan niatong gibohon tanganing magdanay sa pagkamoot nin Dios. Kaipuhan na balosan niato sa espesipikong mga paagi an saiyang pagkamoot. Kun siring, an mahalagang hapot na dapat niatong pag-isipan iyo ini, ‘Paano ko mapapatunayan an sakong pagkamoot sa Dios?’ Makukua an simbag sa ipinasabong na mga tataramon ni apostol Juan: “Ini iyo an boot sabihon kan pagkamoot sa Dios, na kuyogon niato an saiyang mga togon; alagad ta an saiyang mga togon dai nakakapagabat.” (1 Juan 5:3) Marahay na maingat niatong siyasaton an kahulogan kan mga tataramon na ini, huli ta gusto niatong ipaheling sa satong Dios kun gurano niato sia kanamomotan.

4, 5. (a) Sa ano nanonongod an pananaram na “pagkamoot sa Dios”? (b) Iladawan kun paano nagpoon na tumalubo sa saindong puso an pagkamoot ki Jehova.

⁴ “Pagkamoot sa Dios”​—ano an nasa isip ni apostol Juan kan isurat nia an mga tataramon na iyan? An pananaram na ini nanonongod, bakong sa pagkamoot nin Dios sa sato, kundi sa pagkamoot niato sa saiya. Nagigirumdoman daw nindo kun kasuarin nagpoon na tumalubo sa saindong puso an pagkamoot ki Jehova?

⁵ Girumdoma nguna nindo kan enot nindong maaraman an katotoohan manongod ki Jehova saka sa saiyang mga katuyohan asin nagpoon kamong magtubod. Nasabotan nindo na minsan ngani namundag kamong makasalan asin siblag sa Dios, binuksan ni Jehova paagi ki Cristo an dalan tanganing makamtan nindo an pagkasangkap na iwinara ni Adan asin manahon nindo an buhay na daing katapusan. (Mateo 20:28; Roma 5:12, 18) Nagpoon na masabotan nindo kun gurano kadakula kan sakripisyong ginibo ni Jehova sa pagsugo sa pinakamamahal niang Aki tanganing magadan para sa saindo. Napahiro an saindong puso, asin nagpoon na kamong makamate nin pagkamoot sa Dios na nagpaheling nin siring kadakulang pagkamoot sa saindo.​—1 Juan 4:9, 10.

 6. Paano ipinapahayag an tunay na pagkamoot, asin an pagkamoot sa Dios nagpahiro sa saindo na gibohon an ano?

⁶ Minsan siring, an pakamate na iyan kapinonan sana kan tunay na pagkamoot ki Jehova. An pagkamoot bako sanang pakamate; bako man iyan sa tataramon sana. An tunay na pagkamoot sa Dios bako sanang basta pagsabing, “Namomotan ko si Jehova.” Arog kan pagtubod, an tunay na pagkamoot nahahayag paagi sa mga gibo na minomotibar kaiyan. (Santiago 2:26) Sa espesipikong paagi, an pagkamoot nahahayag sa mga gibo na nakakapaogma sa saro na namomotan niato. Huli kaini, kan an pagkamoot ki Jehova makagamot na sa puso nindo, napahiro kamo na magmawot na mamuhay sa paagi na nakakapaogma sa saindong langitnon na Ama. Kamo daw sarong bautisadong Saksi? Kun iyo, an hararom na kapadangatan asin debosyon na ini an nagpahiro sa saindo na gibohon an pinakaimportanteng desisyon sa saindong buhay. Idinusay nindo an saindong sadiri ki Jehova tanganing gibohon an saiyang kabotan, asin sinimbolisaran nindo an saindong pagdusay paagi sa pagpabautismo. (Roma 14:7, 8) An pag-otob sa seryosong panuga na ini ki Jehova konektado sa sunod na nasambitan ni apostol Juan.

 7. Ano an nagkapira sa mga togon nin Dios, asin nangangahulogan nin ano an pag-otob sa mga ini?

⁷ Ipinaliwanag ni Juan an boot sabihon kan pagkamoot sa Dios: ‘Kinukuyog niato an saiyang mga togon.’ Ano an mga togon nin Dios? Tinawan kita ni Jehova nin dakol na espesipikong pagboot paagi sa saiyang Tataramon, an Biblia. Halimbawa, ipinagbabawal nia an mga gibo na siring kan pagbuburat, pakikisaro, idolatriya, paghabon, asin pagputik. (1 Corinto 5:11; 6:18; 10:14; Efeso 4:28; Colosas 3:9) An pag-otob sa mga togon nin Dios nangangahulogan nin pamumuhay kaoyon kan malinaw na mga pamantayan kan Biblia dapit sa moral.

8, 9. Paano niato maaaraman kun ano an nakakapaogma ki Jehova dawa sa mga situwasyon na mayo nin direktang ley na sinasabi sa Biblia? Magtao nin halimbawa.

⁸ Minsan siring, tanganing mapaogma si Jehova, bako sanang pagkuyog sa direktang mga pagboot nia an kaipuhan niatong gibohon. Dai kita pinupugolan ni Jehova paagi sa mga ley na nagkokontrol sa gabos na aspekto kan satong pangaroaldaw na buhay. Huli kaini, durante kan kada aldaw, tibaad mapaatubang kita sa dakol na situwasyon na mayo nin sinasabing espesipikong mga pagboot sa Biblia. Sa siring na mga kamugtakan, paano niato maaaraman kun ano an makakapaogma ki Jehova? An Biblia igwa nin malinaw na mga indikasyon kun ano an kaisipan nin Dios. Mantang pinag-aadalan niato an Biblia, naaaraman niato kun ano an gusto ni Jehova asin kun ano an ikinakaongis nia. (Salmo 97:10; Talinhaga 6:16-19) Nababatid niato an mga saboot asin paghiro na pinapahalagahan nia. Mientras na orog niatong nanonodan an manongod sa personalidad asin mga paagi ni Jehova, orog man niatong nagigibo na an kaisipan nia an makaimpluwensia sa satong mga desisyon asin paghiro. Huli kaini, dawa sa mga situwasyon na mayo nin sinasabing espesipikong ley sa Biblia, parate niatong masasabotan “kun ano an kabotan ni Jehova.”​—Efeso 5:17.

⁹ Halimbawa, an Biblia mayo nin direktang pagboot na nagsasabi sa sato na dai kita magheling nin mga pelikula o programa sa TV na nagtatampok nin grabeng kadahasan o seksuwal na imoralidad. Alagad talaga daw na kaipuhan niato nin espesipikong ley na dai magheling nin siring na mga bagay? Aram niato kun ano an pagmansay ni Jehova sa mga bagay na ini. Malinaw na sinasabi sa sato kan saiyang Tataramon: ‘An siisay man na namomoot sa kadahasan ikinakaongis nanggad kan kalag ni Jehova.’ (Salmo 11:5) Sinasabi man kaiyan: “Hohokoman nin Dios an mga parapakisaro asin parasambay.” (Hebreo 13:4) Paagi sa paghorophorop sa ipinasabong na mga tataramon na iyan, malinaw niatong masasabotan kun ano an kabotan ni Jehova. Kun siring, habo niatong malibang paagi sa pagheling nin klarong mga paglaladawan kan klase nin mga gibo na ikinakaongis kan satong Dios. Aram niato na naoogma si Jehova kun linilikayan niato an ati sa moral na pinagmamaigotan kan kinaban na ini na palatawon bilang dai nakakaraot na aling-alingan.a

10, 11. Taano ta pinipili niato na magin makinuyog ki Jehova, asin anong klase nin pagkuyog an itinatao niato sa saiya?

¹⁰ Ano an pangenot na dahelan kaya sinusunod niato an mga togon nin Dios? Taano ta gusto niato na kada aldaw mamuhay kita kaoyon kan aram niato na kaisipan nin Dios? Dai niato pinipili na gibohon iyan tangani sanang makadulag sa padusa o makalikay sa maraot na mga resulta na nangyayari sa mga dai nag-iintindi sa kabotan nin Dios. (Galacia 6:7) Imbes, minamansay niato an pagkuyog ki Jehova bilang mahalagang marhay na oportunidad na ipaheling an satong pagkamoot sa saiya. Kun paanong gustong-gusto nin sarong aki na makua an kapahayagan nin pag-oyon kan saiyang ama, gusto man niatong makua an pag-oyon ni Jehova. (Salmo 5:12) Sia an satong Ama, asin namomotan niato sia. Mayo na nin makakatao sa sato nin orog na kagayagayahan o mas hararom na satispaksion kisa sa pakaaram na namumuhay kita sa paagi na ‘inaako niato an pag-oyon ni Jehova.’​—Talinhaga 12:2.

¹¹ Kun siring, an satong pagkuyog bakong huli ta napipiritan sana kita; ni na iyan may pinipili o may kondisyon.b Dai kita namimili kun arin an gusto o habo niatong kuyogon, na nagkukuyog sana kita kun kombenyente o kun iyan bakong depisil. Sa kabaliktaran, kita “makinuyog gikan sa puso.” (Roma 6:17) An namamatean niato kapareho kan salmista sa Biblia na nagsurat: “Magpapaheling ako nin pagkagusto sa saimong mga togon na namotan ko.” (Salmo 119:47) Iyo, gustong-gusto niatong kuyogon si Jehova. Minimidbid niato na sia maninigong tawan​—asin naghahagad—​nin lubos asin daing kondisyon na pagkuyog niato. (Deuteronomio 12:32) Gusto niatong sabihon ni Jehova dapit sa sato an sinasabi kan saiyang Tataramon manongod ki Noe. Mapadapit sa maimbod na patriarkang iyan, na nagpaheling nin pagkamoot sa Dios paagi sa pagigin makinuyog sa laog nin dakol na dekada, an Biblia nagsasabi: “Ginibo ni Noe an segun sa gabos na ipinagboot sa saiya nin Dios. Siring nanggad an ginibo nia.”​—Genesis 6:22.

12. Noarin nagtatao nin kagayagayahan sa puso ni Jehova an satong pagkuyog?

¹² Ano an namamatean ni Jehova manongod sa satong gikan sa boot na pagkuyog? An saiyang Tataramon nagsasabi na paagi kaiyan ‘pinapagayagaya niato an saiyang puso.’ (Talinhaga 27:11) An pagkuyog daw niato talagang nakakapagayagaya sa puso kan Soberanong Kagurangnan kan uniberso? Iyo nanggad—asin may marahay na dahelan iyan! Linalang kita ni Jehova na may sadiring boot. Nangangahulogan ini na may katalingkasan kitang pumili; puede niatong pilion na kumuyog sa Dios, o puede niatong pilion na makisuway sa saiya. (Deuteronomio 30:15, 16, 19, 20) Kun gikan sa boot niatong pinipili na kuyogon si Jehova asin kun an nagmomotibar sa desisyon na iyan iyo an puso na pano nin pagkamoot sa Dios, nagtatao kita nin dakulang kaogmahan asin kagayagayahan sa satong langitnon na Ama. (Talinhaga 11:20) Pinipili man niato an pinakamarahay na klase nin pamumuhay.

13, 14. Taano ta masasabi na an ‘mga togon nin Dios dai nakakapagabat,’ asin paano ini ikakailustrar?

¹³ May sinasabi sa sato si apostol Juan na nakakapakosog na marhay sa boot manongod sa mga kahagadan ni Jehova: “An saiyang mga togon dai nakakapagabat.” An termino sa Griego na trinadusir na “nakakapagabat” sa 1 Juan 5:3 literal na nangangahulogan na “magabat.”c An saro pang traduksion kan Biblia arog kaini an sinasabi: “An saiyang mga togon bako man masakit na pag-otobon.” (Marahay na Bareta Biblia) An mga kahagadan ni Jehova rasonable asin bakong mapang-api. An saiyang mga ley bako man na dai kayang kuyogon nin bakong sangkap na mga tawo.

¹⁴ Ikakailustrar ta iyan nin arog kaini. Sarong dayupot na katood an nagpapatabang sa saimo sa pagbalyo nia sa ibang istaran. Dakol na kahon an hahakoton. An nagkapira kaiyan magian na kayang alsahon nin sarong tawo, alagad an iba magabat asin kaipuhan na duwang tawo an mag-alsa. An katood mo an nagpili nin mga kahon na gusto niang ipaalsa sa saimo. Ipapaalsa daw nia sa saimo an mga kahon na aram niang magabaton para sa saimo? Dai. Habo niang makolgan ka sa pagmamaigot mo na alsahon iyan nin solo. Kaagid kaiyan, dai hahagadon kan satong mamomoton asin maboot na Dios na sunodon niato an mga togon na masakiton na otobon. (Deuteronomio 30:11-14) Nungka niang hahagadon sa sato na pasanon an siring kagabat na pasan. Nasasabotan ni Jehova an satong mga limitasyon, huli ta “sia mismo nakakaaram na gayo kan pagkaporma sa sato, na ginigirumdom na kita kabokabo.”​—Salmo 103:14.

15. Taano ta makakasarig kita na para sa pinakaikakarahay niato an mga togon ni Jehova?

¹⁵ An mga togon ni Jehova dai nanggad nakakapagabat, an mga iyan para sa satong pinakaikakarahay. (Isaias 48:17) Sa siring, si Moises makakasabi sa suanoy na Israel: “Pinagbotan kami ni Jehova na otobon an gabos na pagkukuyogon na ini, tanganing matakot ki Jehova na samong Dios para sa samong ikakarahay sa gabos na panahon, tanganing kami magdanay na buhay arog ngonyan.” (Deuteronomio 6:24) Kita makakasarig man na sa pagtao sa sato ni Jehova kan saiyang mga ley, an nasa puso nia iyo an satong pinakaikakarahay​—an satong panghaloyan asin daing katapusan na kapakanan. An totoo, paanong dai magigin arog kaiyan? Si Jehova sarong Dios na igwa nin dai marorop na kadonongan. (Roma 11:33) Kun siring, aram nia kun ano an pinakaikakarahay niato. Si Jehova man an personipikasyon nin pagkamoot. (1 Juan 4:8) An pagkamoot, an pinakanaturalesa nia, iyo an nakakaimpluwensia sa gabos na sinasabi asin ginigibo nia. Iyan an basehan kan gabos na togon na ipinapaotob nia sa saiyang mga lingkod.

16. Sa ibong kan mga impluwensia kan maraot na kinaban na ini asin kan mga tendensia kan bakong sangkap na laman, taano ta puede kitang magin makinuyog?

¹⁶ Dai man boot sabihon kaini na madali an pagkuyog sa Dios. Dapat na labanan niato an mga impluwensia kan maraot na kinaban na ini, na “namumugtak sa kapangyarihan kan saro na marigsok.” (1 Juan 5:19) Dapat man na labanan niato an bakong sangkap na laman, na nagtutulod sa sato na lapason an mga ley nin Dios. (Roma 7:21-25) Alagad puedeng mangibabaw an pagkamoot niato sa Dios. Binebendisyonan ni Jehova an mga gustong patunayan an saindang pagkamoot sa saiya paagi sa saindang pagkuyog. Itinatao nia an saiyang banal na espiritu “sa mga nagkukuyog sa saiya bilang namamahala.” (Gibo 5:32) An espiritung iyan nagkakaigwa nin magayon na bunga sa sato​—mahalagang marhay na mga kualidad na makakatabang sa sato na magin makinuyog.​—Galacia 5:22, 23.

17, 18. (a) Ano an sisiyasaton niato sa librong ini, asin mantang ginigibo niato iyan, ano an maninigong isaisip niato? (b) Ano an pag-oolayan sa sunod na kapitulo?

¹⁷ Sa librong ini, sisiyasaton niato an mga prinsipyo ni Jehova asin an saiyang mga pamantayan sa moral saka an dakol na iba pang indikasyon kun ano an saiyang kabotan. Mantang sinisiyasat niato iyan, kaipuhan na isaisip niato an dakol na importanteng bagay. Girumdomon niato na dai kita pinipirit ni Jehova na kumuyog sa saiyang mga ley asin prinsipyo; an gusto nia iyo an gikan sa boot na pagkuyog hale sa satong puso. Dai niato paglingawan na an hinahagad sa sato ni Jehova iyo na mamuhay kita sa paagi na maresulta sa nagsosopay na mga bendisyon ngonyan asin buhay na daing katapusan sa ngapit. Asin ibilang niato na an satong bilog na pusong pagkuyog sarong mahalagang marhay na oportunidad na ipaheling ki Jehova kun gurano niato sia kanamomotan.

¹⁸ Tanganing tabangan kita na mabatid an tama asin sala, mamomoton na tinawan kita ni Jehova nin konsensia. Pero, tanganing magin masasarigan na giya an satong konsensia, kaipuhan na sanayon iyan, siring kan ipapaliwanag sa sunod na kapitulo.