Magdanay sa Pagkamoot nin Dios

1, 2. Saen kita makakanompong nin ligtas na pailihan ngonyan?

IMAHINARON na kamo naglalakaw sa sarong tinampo sa sarong mabagyong aldaw. An langit nagdadagom. Nagpopoon na magkitkilat, nag-uurog-udog an dagoldol, dangan buminagsak an makosogon na oran. Naghihidali kamo, na desesperadong naghahanap nin mapapailihan. Duman, sa gilid kan tinampo, may naheling kamong sirongan. Iyan masarig, mara, asin nakakaakit na lugar. Abaang pagpapahalaga nindo sa ligtas na lugar na iyan!

² Nabubuhay kita sa mabagyong mga panahon. An mga kamugtakan sa kinaban nagrururo. Alagad igwa nin tiwasay na sirongan, sarong pailihan na makakasalbar sato sa permanenteng danyos. Ano iyan? Mangnohon an itinotokdo kan Biblia: “Magsasabi ako ki Jehova: ‘Ika an sakuyang pailihan asin an sakuyang kuta, an sakuyang Dios, na sakuyang pagtitiwalaan.’”​—Salmo 91:2.

 3. Paano niato magigibong satong pailihan si Jehova?

³ Isip-isipa na sana iyan! Si Jehova, an Kaglalang asin Soberano kan uniberso, puedeng magin satong nagpoprotehir na pailihan. Kaya nia kitang ingatan na ligtas, huli ta sia mas makapangyarihan nanggad kisa siisay man o ano man na puedeng makadanyar sato. Dawa pa kun kita madanyaran, kayang haleon ni Jehova an gabos na maraot na epekto. Paano niato magigibong satong pailihan si Jehova? Kaipuhan kitang magtiwala sa saiya. Dugang pa, sinasadol kita kan Tataramon nin Dios: “Magdanay kamo sa pagkamoot nin Dios.” (Judas 21) Iyo, kaipuhan na kita magdanay sa pagkamoot nin Dios, na minamantener an sarong mamomoton na pakisumaro sa satong langitnon na Ama. Sa siring makakasierto kita na sia an satong pailihan. Alagad paano kita magkakaigwa kan siring na pakisumaro?

4, 5. Ano an nagkapirang paagi na si Jehova nagpahayag nin pagkamoot para sa sato?

⁴ Tanganing magdanay sa pagkamoot nin Dios, kaipuhan na masabotan niato kun paano ipinaheling ni Jehova an saiyang pagkamoot para sa sato. Isipon an nagkapira sa mga katokdoan kan Biblia na nanodan nindo sa tabang kan librong ini. Bilang an Kaglalang, itinao sa sato ni Jehova an daga bilang nakakaogmang marhay na istaran niato. Pinano nia iyan nin abundang kakanon asin tubig, natural na kayamanan, kawiliwiling mga hayop, asin magagayon na tanawon. Bilang an Autor kan Biblia, ihinayag nin Dios sa sato an saiyang ngaran asin an saiyang mga kualidad. Dugang pa, ihinahayag kan saiyang Tataramon na sinugo nia sa daga an saiyang namomotan na Aki, na itinogot na magdusa asin magadan si Jesus para sa sato. (Juan 3:16) Asin ano an boot sabihon para sa sato kan regalong iyan? Iyan nagtatao sato nin paglaom para sa sarong makangangalas na ngapit.

⁵ An satong paglaom para sa ngapit depende man sa saro pang bagay na ginibo nin Dios. Si Jehova nag-establisar nin sarong langitnon na gobyerno, an Mesiyanikong Kahadean. Sa dai na mahahaloy tataposon kaiyan an gabos na pagdusa asin gigibohon na paraiso an daga. Isip-isipa na sana iyan! Puede kitang mabuhay duman na may katoninongan asin kaogmahan sagkod lamang. (Salmo 37:29) Mientras tanto, an Dios nagtao sato nin paggiya kun paano mamumuhay sa pinakamarahay na paaging posible ngonyan mismo. Itinao man nia sato an regalo nin pamibi, sarong bukas na linya nin komunikasyon sa saiya. Nagkapira sana ini sa mga paagi na si Jehova nagpaheling nin pagkamoot para sa katawohan sa pankagabsan asin para sa saindo bilang indibiduwal.

 6. Paano nindo puedeng balosan an pagkamoot na ipinaheling ni Jehova saindo?

⁶ An mahalagang marhay na hapot na maninigo nindong horophoropon iyo ini: Paano ko babalosan an pagkamoot ni Jehova? An dakol masabi, “Bueno, kaipuhan na kamotan ko man si Jehova.” Iyan daw an pagmate nindo? Sinabi ni Jesus na an pagboot na ini iyo an nakakalabi sa gabos: “Kamotan mo si Jehova na saimong Dios sa bilog mong puso asin sa bilog mong kalag patin sa bilog mong isip.” (Mateo 22:37) Sierto nanggad na dakol kamong dahelan na kamotan si Jehova Dios. Alagad an pagmate daw na igwa kamo kan siring na pagkamoot iyo sanang kalabot sa pagkamoot ki Jehova sa bilog nindong puso, kalag, asin isip?

 7. May mas hararom daw na kahulogan an pagkamoot sa Dios kisa pagkaigwa sana nin sarong pagmate? Ipaliwanag.

⁷ Siring kan ilinadawan sa Biblia, an pagkamoot sa Dios bako sana nanggad na pagmate. Sa katunayan, minsan ngani kaipuhan an pakamate nin pagkamoot para ki Jehova, an pakamateng iyan kapinonan sana kan tunay na pagkamoot sa saiya. An pisog nin mansanas kaipuhan tanganing tumubo an sarong namumungang poon nin mansanas. Minsan siring, kun gusto nindo nin mansanas, makokontento daw kamo kun may magtao sana sa saindo nin pisog nin mansanas? Dai nanggad! Kaagid kaiyan, an pakamate nin pagkamoot para ki Jehova Dios kapinonan sana. Itinotokdo kan Biblia: “Ini iyo an boot sabihon kan pagkamoot sa Dios, na kuyogon niato an saiyang mga togon; pero an saiyang mga togon dai nakakapagabat.” (1 Juan 5:3) Tanganing magin tunay, an pagkamoot sa Dios dapat na magkaigwa nin marahay na bunga. Iyan dapat na ipahayag paagi sa mga aksion.​—Mateo 7:16-20.

8, 9. Paano niato ikakapahayag an satong pagkamoot asin pag-apresyar sa Dios?

⁸ Ipinapaheling niato an satong pagkamoot sa Dios kun inootob niato an saiyang mga togon asin iinaaplikar an saiyang mga prinsipyo. Bako iyan depisilon na gibohon. Imbes na nakakapagabat, an mga ley ni Jehova dinisenyo tanganing tabangan kitang magkaigwa nin marahay, maogma, nakakakontentong buhay. (Isaias 48:17, 18) Paagi sa pamumuhay kaoyon kan paggiya ni Jehova, ipinapaheling niato sa satong langitnon na Ama na talagang inaapresyar niato an gabos na ginibo nia para sa sato. Makamomondo, kakadikit sa kinaban ngonyan an nagpapaheling nin siring na pag-apresyar. Habo niatong magin daing apresasyon, siring kan nagkapirang tawo na nabuhay kan si Jesus yaon pa digdi sa daga. Sampulong daoton an pinaomayan ni Jesus, alagad saro sana an nagbalik tanganing pasalamatan sia. (Lucas 17:12-17) Sierto nanggad na gusto niato na magin siring kan sarong nagpasalamat, bakong kan siyam na ingrato!

⁹ Kun siring, ano an mga togon ni Jehova na kaipuhan niatong otobon? Tinokar niato an dakol sa mga iyan sa librong ini, alagad repasohon niato an nagkapira. An pag-otob kan mga togon nin Dios matabang sato na magdanay sa pagkamoot nin Dios.

10. Ipaliwanag kun taano ta mahalaga na padagos na maglaog sa isip nin kaaraman manongod ki Jehova Dios.

¹⁰ An pag-adal manongod ki Jehova sarong mahalagang marhay na lakdang sa orog pang pagrani sa saiya. Iyan sarong proseso na maninigong nagpapadagos. Kun kamo nasa luwas sa malipoton na banggi na nagpapahimbong sa may kalayo, papabayaan daw nindong lumuya an laad sagkod na maparong? Dai. Padagos nindong dadagdagan an gatong tanganing papagdanayon na naglalaad nin maliwanag asin mainit an kalayo. Buhay mismo nindo an tibaad nakataya! Kun paanong an kahoy nagpapalaad sa kalayo, siring man “an mismong kaaraman nin Dios” nagpapadanay sa satong pagkamoot ki Jehova na magin makosog.​—Talinhaga 2:1-5.

11. Ano an nagin epekto kan pagtotokdo ni Jesus sa saiyang mga parasunod?

¹¹ Gusto ni Jesus na papagdanayon kan saiyang mga parasunod na buhay asin naglalaad nin maliwanag an saindang pagkamoot para ki Jehova asin para sa Saiyang mahalagang marhay na Tataramon nin katotoohan. Pakatapos na sia buhayon liwat, itinokdo ni Jesus sa duwa sa saiyang mga disipulo an manongod sa nagkapira sa mga hula sa Hebreong Kasuratan na naotob sa saiya. Ano an nagin epekto? Kan huri sinabi ninda: “Bakong naglaad an satong puso mantang nagtataram sia sa sato sa dalan, mantang lubos niang binubuksan sa sato an Kasuratan?”​—Lucas 24:32.

12, 13. (a) Sa tahaw kan mayoriya kan katawohan ngonyan, ano an nangyari sa pagkamoot sa Dios asin sa Biblia? (b) Paano niato maeebitaran na lumipot an satong pagkamoot?

¹² Kan enot nindong manodan kun ano man nanggad an itinotokdo kan Biblia, narisa daw nindo na an saindong puso nagpoon na lumaad sa kagayagayahan, kaigotan, asin pagkamoot para sa Dios? Daing duwa-duwa na iyo. Siring man kaiyan an namatean kan dakol. An depisil na gibohon ngonyan iyo na papagdanayon na buhay an malaad na pagkamoot na iyan asin pataluboon iyan. Habo niatong arogon an tendensia kan kinaban ngonyan. Ihinula ni Jesus: “An pagkamoot nin dakol malipot.” (Mateo 24:12) Paano nindo malilikayan na lumipot an saindong pagkamoot ki Jehova asin sa mga katotoohan sa Biblia?

¹³ Padagos na ilaog sa isip an kaaraman dapit ki Jehova Dios asin ki Jesu-Cristo. (Juan 17:3) Horophoropon, o pakaisipon, an manongod sa nanonodan nindo sa Tataramon nin Dios, na hinahapot an saindong sadiri: ‘Ano an itinotokdo kaini sa sako manongod ki Jehova Dios? Anong dagdag pang dahelan an itinatao kaiyan sako tanganing kamotan ko sia sa sakong bilog na puso, isip, asin kalag?’ (1 Timoteo 4:15) An siring na paghorophorop papagdadanayon na naglalaad nin maliwanag an saindong pagkamoot ki Jehova.

14. Paano an pamibi makakatabang sato na papagdanayon na buhay an satong pagkamoot para ki Jehova?

¹⁴ An saro pang paagi tanganing papagdanayon na naglalaad nin maliwanag an saindong pagkamoot ki Jehova iyo an pagpamibi nin regular. (1 Tesalonica 5:17) Sa Kapitulo 17 kan librong ini, nanodan niato na an pamibi sarong mahalagang marhay na regalo na gikan sa Dios. Kun paanong an relasyon nin mga tawo nagtatalubo huli sa regular, bukas na komunikasyon, an sato man na relasyon ki Jehova nagdadanay na mainit asin buhay kun kita regular na namimibi sa saiya. Mahalagang marhay na dai niato pagtogotan noarin man na an satong mga pamibi magin mekanikal​—pinagkatodan na sanang mga tataramon na inoorootro niato na mayo talaga nin tunay na emosyon o kahulogan. Kaipuhan na kita makipag-olay ki Jehova siring sa pakikipag-olay nin sarong aki sa saiyang namomotan na marhay na ama. Siempre, gusto niatong magtaram na may paggalang, alagad prangka, sadiosan, asin gikan sa puso. (Salmo 62:8) Iyo, an personal na pag-adal sa Biblia asin odok sa pusong pamibi mahalagang marhay na mga aspekto kan satong pagsamba, asin iyan nakakatabang sato na magdanay sa pagkamoot nin Dios.

15, 16. Taano ta angay sana na mansayon niato an paghuhulit kan Kahadean bilang sarong pribilehio asin kayamanan?

¹⁵ An personal na pag-adal sa Biblia asin pamibi mga gibo nin pagsamba na puede niatong gibohon sa pribado. Minsan siring, estudyaran niato ngonyan an sarong aspekto nin pagsamba na ginigibo niato sa publiko: an pagtaram sa iba manongod sa satong mga tinutubod. Ipinaabot na daw nindo sa iba an nagkapirang katotoohan sa Biblia? Kun iyo, nagkaigwa kamo nin sarong makangangalas na pribilehio. (Lucas 1:74) Kun ipinapaabot niato an mga katotoohan na nanodan niato manongod ki Jehova Dios, inootob niato an sarong mahalagang marhay na asignasyon na itinao sa gabos na tunay na Kristiano​—an paghuhulit kan maogmang bareta kan Kahadean nin Dios.​—Mateo 24:14; 28:19, 20.

¹⁶ Minansay ni apostol Pablo an saiyang ministeryo bilang bagay na mahalagang marhay, na inaapod iyan na kayamanan. (2 Corinto 4:7) An pakikipag-olay sa mga tawo manongod ki Jehova Dios asin sa saiyang mga katuyohan iyo an pinakamarahay na gibohon na magigibo nindo. Iyan paglilingkod sa pinakamarahay na Kagurangnan, asin iyan nagtatao kan pinakamarahay na mga pakinabang na puedeng kamtan. Paagi sa pakikikabtang sa aktibidad na ini, tinatabangan nindo an mga tawong sadiosan an puso na rumani sa satong langitnon na Ama asin pumoon na lumakaw sa dalan pasiring sa buhay na daing katapusan! May mas nakakakontento pa daw na gibohon kisa dian? Dugang pa, an pagpapatotoo manongod ki Jehova asin sa saiyang Tataramon nakakadagdag sa saindo mismong pagtubod asin nakakapakosog sa saindong pagkamoot sa saiya. Asin inaapresyar ni Jehova an saindong mga paghihingoa. (Hebreo 6:10) An pagdadanay na sibot sa siring na gibohon nakakatabang sa saindo na magdanay sa pagkamoot nin Dios.​—1 Corinto 15:58.

17. Taano ta apretado ngonyan an Kristianong ministeryo?

¹⁷ Mahalagang girumdomon na an paghuhulit kan Kahadean apretado. An Biblia nagsasabi: “Ihulit mo an tataramon, gibohon iyan na may pag-apretar.” (2 Timoteo 4:2) Taano ta apretadong marhay an paggibo kaini ngonyan? An Tataramon nin Dios nagsasabi sato: “An dakulang aldaw ni Jehova harani na. Iyan harani na, asin iyan naghihidaling marhay.” (Sofonias 1:14) Iyo, marikas na madatong an panahon na tataposon ni Jehova an bilog na sistemang ini nin mga bagay. An mga tawo kaipuhan na mapatanidan! Kaipuhan nindang maaraman na ngonyan na an panahon na pilion si Jehova bilang saindang Soberano. An katapusan ‘dai mahuhuri.’​—Habacuc 2:3.

18. Taano ta maninigo niatong sambahon si Jehova sa publiko kaiba kan tunay na mga Kristiano?

¹⁸ Gusto ni Jehova na sambahon niato sia sa publiko kaiba kan tunay na mga Kristiano. Iyan an dahelan na sinasabi kan saiyang Tataramon: “Konsideraron niato an lambang saro tanganing mandagka sa pagkamoot asin sa marahay na mga gibo, na dai pagpabayaan an satong pagtorotiripon, siring kan kaugalean nin nagkapira, kundi na magparinigonan nin boot, asin lalo na ta naheheling nindo na an aldaw harani na.” (Hebreo 10:24, 25) Kun kita nakikitipon sa satong mga kapagtubod sa Kristianong mga pagtiripon, igwa kita nin makangangalas na oportunidad na omawon asin sambahon an satong namomotan na marhay na Dios. Nagpapakinorosogkosogan asin nagpaparinigonan man kita nin boot.

19. Paano kita makakapaghingoang maparigon an bogkos nin pagkamoot sa Kristianong kongregasyon?

¹⁹ Mantang nakikiasosyar kita sa ibang parasamba ki Jehova, pinaparigon niato an bogkos nin pagkamoot asin pagkakatood sa kongregasyon. Mahalaga na hanapon niato an marahay sa lambang saro, kun paanong hinahanap ni Jehova an marahay sa sato. Dai hanapan nin pagkasangkap an saindong mga kapagtubod. Girumdomon na an gabos nasa laen-laen na grado nin espirituwal na pag-oswag asin na an lambang saro sato nakakagibo nin sala. (Colosas 3:13) Maghingoang pataluboon an haraning pakikikatood sa mga biyong namomoot ki Jehova, asin manonompongan nindo na kamo nagtatalubo sa espirituwal. Iyo, an pagsamba ki Jehova kaiba kan saindong espirituwal na mga tugang na lalaki asin babae matabang saindo na magdanay sa pagkamoot nin Dios. Paano binabalosan ni Jehova an mga maimbod na nagsasamba sa saiya asin sa siring nagdadanay sa saiyang pagkamoot?

20, 21. Ano an “tunay na buhay,” asin taano ta iyan sarong makangangalas na paglaom?

²⁰ Binabalosan ni Jehova an saiyang maimbod na mga lingkod nin buhay, alagad anong klaseng buhay? Bueno, buhay daw talaga kamo ngonyan? An kadaklan sato masabi na risang-risa man an simbag. Total, kita naghahangos, nagkakakan, asin nag-iinom. Sierto nanggad na kita buhay. Asin sa mga panahon na kita maogma, tibaad sabihon ta pa ngani, “Ini talaga an buhay!” Minsan siring, ipinaparisa kan Biblia na sa sarong mahalagang sentido, mayo nin tawo ngonyan na talagang buhay.

²¹ Sinasadol kita kan Tataramon nin Dios na ‘mangapot nin marigon sa tunay na buhay.’ (1 Timoteo 6:19) An mga tataramon na iyan nagpaparisa na an “tunay na buhay” sarong bagay na linalaoman niatong kamtan sa ngapit. Iyo, kun kita sangkap na, kita magigin buhay sa pinakalubos na sentido kan termino, huli ta kita mabubuhay siring kan orihinal na intension nin Dios para sa sato. Kun kita nabubuhay na sa sarong paraisong daga na may sangkap na salud, katoninongan, asin kaogmahan, sa katapustapusi makakamtan niato an “tunay na buhay”​—an buhay na daing katapusan. (1 Timoteo 6:12) Bako daw na iyan sarong makangangalas na paglaom?

22. Paano kamo ‘makakapangapot nin marigon sa tunay na buhay’?

²² Paano kita ‘makakapangapot nin marigon sa tunay na buhay’? Sa iyo man sanang konteksto, sinadol ni Pablo an mga Kristiano na “maggibo nin marahay” asin “magin mayaman sa marahay na mga gibo.” (1 Timoteo 6:18) Kun siring, malinaw na iyan dependeng marhay sa kun paano niato iinaaplikar an mga katotoohan na nanodan niato sa Biblia. Alagad an boot sabihon daw ni Pablo inaako niato bilang bayad an “tunay na buhay” huli sa paggibo nin marahay na mga gibo? Dai, huli ta an siring na makangangalas na mga oportunidad depende talaga sa satong pag-ako nin “dai na kutana maninigong kabootan” hale sa Dios. (Roma 5:15) Minsan siring, ikinakaogmang marhay ni Jehova na tawan nin balos an mga maimbod na naglilingkod sa saiya. Gusto niang maheling na kamtan nindo an “tunay na buhay.” An siring na maogma, matoninong, daing katapusan na buhay nakatagama sa ngapit para sa mga nagdadanay sa pagkamoot nin Dios.

23. Taano ta mahalagang marhay na magdanay sa pagkamoot nin Dios?

²³ Marahay na hapoton kan lambang saro sato an saiyang sadiri: ‘Sinasamba ko daw an Dios sa paagi na sinabi nia sa Biblia?’ Kun sineseguro niato, sa aroaldaw, na an simbag iyo, kun siring kita nasa tamang dalan. Magkakaigwa kita kan kompiansa na si Jehova an satong pailihan. Iingatan nia an saiyang maimbod na banwaan sa purisaw na huring mga aldaw kan daan na sistemang ini nin mga bagay. Ililigtas man kita ni Jehova pasiring sa mamuraway na bagong sistema nin mga bagay na harani na ngonyan. Mapapalukso nanggad an satong puso sa pakaheling kan panahon na iyan! Asin ikakaogma nanggad niatong marhay na ginibo niato an tamang mga pagpili durante kan huring mga aldaw na ini! Kun gigibohon nindo an siring na mga pagpili ngonyan, makakamtan nindo an “tunay na buhay,” buhay siring kan katuyohan dian ni Jehova Dios, sa bilog na panahon na daing sagkod!