‘Pagpakosog sa Saindong Sadiri sa Kabanalbanaleng Pagtubod’

1, 2. Anong pagtogdok an ginigibo mo, asin taano ta mahalagang marhay na siertohon mo na makosog ini?

MAHIGOS kang nagtatrabaho sa pagtogdok nin sarong makosog na harong. Haloy-haloy nang nagpoon an pagtogdok asin magpapadagos pa ini. Sagkod sa presente, masakit an trabaho pero nakakakontento. Ano man an mangyari, desidido ka na ipadagos iyan; dai ka mapondo o mapabaya. Sisiertohon mo na magin makosog iyan huli ta apektado kaiyan an saimong buhay, pati an saimong ngapit. Taano? Huli ta an harong na itinotogdok mo na magin makosog iyo mismo an saimong sadiri!

² Idinoon ni disipulo Judas na kaipuhan niatong itogdok nin makosog an satong sadiri. Kan sadolon nia an mga Kristiano na “magdanay kamo sa pagkamoot nin Dios,” ihinayag man nia sa iyo man sanang kotasyon na iyan an pinakaliabe sa paggibo kaiyan: “Paagi sa pagpakosog sa saindong sadiri sa saindong kabanalbanaleng pagtubod.” (Judas 20, 21) Ano an nagkapirang paagi na mapapakosog mo an saimong sadiri, na orog na pinapakosog an saimong pagtubod tanganing magdanay ka sa pagkamoot nin Dios? Magkonsentrar kita sa tolong aspekto kan pagpakosog mo sa saimong pagtubod.

3-5. (a) Gusto ni Satanas na dayaon kamo na mansayon bilang ano an mga kahagadan ni Jehova? (b) Ano an maninigong magin punto de vista niato sa mga kahagadan nin Dios, asin ano an maninigong magin epekto kaiyan sa satong saboot? Iilustrar.

³ Enot sa gabos, kaipuhan na pakosogon niato an satong pagtubod sa ley nin Dios. Mantang pinag-aadalan nindo an librong ini, naestudyaran na nindo an dakol sa matanos na mga kahagadan ni Jehova mapadapit sa paggawe. Ano an pagmansay nindo sa mga iyan? Gusto ni Satanas na dayaon kamo na mansayon na labi-labi kaestrikto, sobra kanakakapagabat pa ngani, an mga ley, prinsipyo, asin pamantayan ni Jehova. Haloy na niang ginagamit an taktikang ini poon pa kan magin epektibo nanggad iyan kaidto sa Eden. (Genesis 3:1-6) Madadaya man daw kamo kan saiyang taktika? Iyan madependeng marhay sa saindong punto de vista.

⁴ Sa pag-ilustrar: Mantang naglalakawlakaw kamo sa sarong magayon na parke, naheling nindo an pusog asin halangkaw na kudal sa sarong kabtang kan parke. Magayon an tanawon na nasa ibong kan kudal. Sa primero, tibaad isipon nindo na an kudal dai kinakaipuhan na olang sa saindo. Pero, kan helingon nindo an nasa ibong kaiyan, nariparo nindo an sarong maisog na leon na sinusundan nin patago an sisibaon kaiyan! Ngonyan nasabotan na nindo kun taano ta yaon an kudal na iyan​—bilang sarong proteksion. Igwa daw nin peligrosong naniniba na patagong nagsusunod sa saindo ngonyan mismo? An Tataramon nin Dios nagpapatanid: “Magmata kamo, magpuka kamo. An saindong kaiwal, an Diablo, naglalakaw na siring sa nagngangarob na leon, na naghahanap nin masisiba.”​—1 Pedro 5:8.

⁵ Si Satanas sarong mabangis na naniniba. Huling habo ni Jehova na sibaon kita ni Satanas, nagtao Sia nin mga ley na maprotehir sa sato sa dakol na “katusohan” kan marigsok na iyan. (Efeso 6:11, nota sa ibaba) Kaya kada hinohorophorop niato an mga ley nin Dios, seguradong maheheling niato dian an pagkamoot kan satong langitnon na Ama. Kun mamansayon niato sa siring na paagi an mga ley nin Dios, iyan nagtatao nin seguridad asin kagayagayahan. Si disipulo Santiago nagsurat: “An nag-aaninaw sa sangkap na ley para sa katalingkasan asin nagdadanay dian . . . maoogma sa paggibo nia kaiyan.”​—Santiago 1:25.

 6. Ano an pinakamarahay na paagi tanganing pakosogon an pagtubod sa matanos na mga ley asin prinsipyo nin Dios? Magtao nin halimbawa.

⁶ An pamumuhay sono sa mga togon nin Dios iyo an pinakamarahay na paagi tanganing pakosogon an satong pagtubod sa Paratao nin Ley asin sa pagigin madonong kan saiyang mga ley. Halimbawa, kaiba sa “ley kan Cristo” an pagboot ni Jesus na itokdo sa iba an “gabos na bagay na ipinagboot [nia].” (Galacia 6:2; Mateo 28:19, 20) Sineseryoso man kan mga Kristiano an pagboot na padagos na magtorotiripon para sa pagsamba asin nakakapakosog na pakikiasosyar. (Hebreo 10:24, 25) Kaiba man sa mga togon nin Dios an sadol na regular asin parateng mamibi ki Jehova gikan sa puso. (Mateo 6:5-8; 1 Tesalonica 5:17) Mantang namumuhay kita sono sa mga pagboot na iyan, orog pa niatong naheheling nin malinaw na iyan talagang mamomoton na giya. An pagkuyog dian nagtatao sa sato kan klase nin kagayagayahan asin satispaksion na dai niato makukua saen man sa maribok na kinaban na ini. Mantang hinohorophorop nindo kun paano kamo personal na nakinabang sa pamumuhay kaoyon kan mga ley nin Dios, bako daw na orog na nagkokosog an saindong pagtubod dian?

7, 8. Paano pinapakosog kan Tataramon nin Dios an boot kan mga nahahadit na tibaad dai ninda mapagdanay an matanos na paggawe sa paglihis nin mga taon?

⁷ May mga nahahadit, kun beses, na sa paglihis nin mga taon magigin masakit na gayo an pagsunod sa mga ley ni Jehova. Natatakot sinda na maski paano tibaad dai ninda masunod iyan. Kun enkaso makamate kamo nin arog kaiyan, tandaan an mga tataramon na ini: “Ako, si Jehova, an saimong Dios, an Saro na nagtotokdo sa saimo na pakinabangon an saimong sadiri, an Saro na nagpapangyari sa saimo na maglakaw sa dalan na maninigo mong lakawan. O kun ika sana kutana totoong matao nin atension sa sakong mga togon! Dangan an saimong katoninongan magigin siring nanggad sa salog, asin an saimong katanosan siring sa mga alon kan dagat.” (Isaias 48:17, 18) Nagpondo daw nguna kamo tanganing horophoropon kun gurano kanakakapakosog sa boot an mga tataramon na iyan?

⁸ Ipinapagirumdom digdi sa sato ni Jehova na nakikinabang kita sa pagkuyog sa saiya. Sia nanunuga nin duwang pakinabang kun makuyog kita. Enot, an satong katoninongan magigin siring sa salog​—kalmado, abunda, asin dagos-dagos. Ikaduwa, an satong katanosan magigin siring sa mga alon kan dagat. Kun nakatindog kamo sa may baybayon asin pinagmamasdan an sunod-sunod na minaabot na mga alon, daing duda na nakakamate kamo nin pagkapermanente kan mga alon. Aram nindo na iyan dagos-dagos na maabot asin maapwak sa baybayon sa laog nin dai mabilang na panahon. Sinasabi ni Jehova na an saindong katanosan​—an paggibo nindo nin tama—​puedeng magin arog kaiyan. Sagkod na naghihingoa kamo na magin maimbod sa saiya, nungka nia kamong papabayaan na masudya! (Salmo 55:22) Bako daw na napapakosog kan siring na nakakaogmang mga panuga an saindong pagtubod ki Jehova asin sa saiyang matanos na mga kahagadan?

9, 10. (a) Taano ta sarong marahayon na pasohan para sa mga Kristiano an pagkamaygurang? (b) Paano nakakatabang sa pagkaigwa nin kagayagayahan an espirituwal na punto de vista?

⁹ An ikaduwang aspekto kan saimong pagpakosog sa pagtubod ihinahayag sa ipinasabong na mga tataramon na ini: “Maghingoa kitang makaabot sa pagkamaygurang.” (Hebreo 6:1) An pagkamaygurang sarong marahayon na pasohan para sa sarong Kristiano. Bakong arog nin pagkasangkap, na sa ngonyan dai pa makakamit nin mga tawo, an pagkamaygurang sarong pasohan na kayang aboton. Dugang pa, an mga Kristiano nagkakaigwa nin orog na kagayagayahan sa paglilingkod ki Jehova mantang sinda nagigin maygurang. Taano ta siring kaiyan?

¹⁰ An maygurang na Kristiano sarong espirituwal na tawo. Minamansay nia an mga bagay-bagay sono sa punto de vista ni Jehova. (Juan 4:23) Si Pablo nagsurat: “An mga oyon sa laman itinuturuhok an saindang isip sa mga bagay kan laman, alagad an mga oyon sa espiritu sa mga bagay kan espiritu.” (Roma 8:5) An makalaman na punto de vista nagbubunga nin kadikiton na kagayagayahan, huling iyan sadiri sana an iniintindi, halipot an pananaw, asin nakasentro sa materyal na mga bagay. An espirituwal na punto de vista nakakagayagaya, huling nakasentro iyan ki Jehova, an “maogmang Dios.” (1 Timoteo 1:11) An espirituwal na tawo gustong-gustong paogmahon si Jehova asin naggagayagaya dawa binabalo. Taano? An mga pagbalo nagtatao nin mga oportunidad na patunayan na putikon si Satanas asin pataluboon an integridad, na ikinakaogmang marhay kan satong langitnon na Ama.​—Talinhaga 27:11; Santiago 1:2, 3.

11, 12. (a) Ano an sinabi ni Pablo manongod sa “kakayahan sa pagrisa” nin sarong Kristiano, asin ano an kahulogan kan termino na trinadusir na “napatuod”? (b) Anong pagpatuod an kaipuhan kan hawak tanganing tumalubo asin magin tuodan iyan?

¹¹ An espirituwalidad asin pagkamaygurang napapatalubo paagi sa pagpatuod. Estudyare an bersikulong ini: “An matagas na kakanon para sa mga maygurang, sa mga huli sa paggamit napatuod an saindang kakayahan sa pagrisa na mamidbid an tama sagkod an sala.” (Hebreo 5:14) Kan sabihon ni Pablo na ‘napapatuod’ an satong kakayahan sa pagrisa, ginamit nia an sarong termino sa Griego na posibleng marhay na parateng ginagamit sa mga dyimnasium sa Grecia kan enot na siglo, huli ta puedeng itradusir iyan na ‘napatuod siring sa sarong parakawat sa dyimnasia.’ Ngonyan isip-isipa kun ano an kalabot sa siring na pagpatuod.

¹² Kan mamundag kita, an satong hawak dai pa napatuod. Halimbawa, dai pa makontrol nin sarong omboy an saiyang mga takyag asin tabay. Huli kaini, an sarong omboy daing direksion na iwinawasiwas an saiyang mga takyag asin natatamaan pa ngani nia an saiyang lalawgon, na nakakapaaburido asin nakakabigla sa omboy. Luway-luway, mantang ginagamit nia an saiyang mga takyag asin tabay, napapatuod na an saiyang hawak. An omboy mapoon nang magkamang, dangan makakalakaw na, asin paghaloyhaloy makakadalagan na.a Pero, paano man an sarong parakawat sa dyimnasia? Kun maheling nindo an siring na atleta na magayonon an hiro saka eksaktong minalukso asin minaitok-itok sa aire, daing duda na maiisip nindo na an hawak nin tawo garo sarong makina na balanse an pagkakondisyon. An abilidad kan parakawat sa dyimnasia dai nagkanorongod sana​—nangaipo iyan nin kadakol na oras sa pagpatuod. Sinasabi kan Biblia na an siring na pagpatuod sa hawak “may kadikit na pakinabang.” Lalo nang mahalaga an pagpatuod sa satong espirituwal na kakayahan sa pagrisa!​—1 Timoteo 4:8.

13. Paano niato mapapatuod an satong kakayahan sa pagrisa?

¹³ Sa librong ini, dakol na kitang napag-olayan na makakatabang sa saimo na patuodon an saimong kakayahan sa pagrisa tanganing makapagdanay kang maimbod ki Jehova bilang espirituwal na tawo. Mapagngayongayong estudyaran an mga prinsipyo asin ley nin Dios kun ika naggigibo nin mga desisyon sa saimong pangaroaldaw na buhay. Sa lambang desisyon na napapaatubang sa saimo, ihapot sa saimong sadiri: ‘Anong mga ley o prinsipyo sa Biblia an may koneksion sa bagay na ini? Paano ko ikakaaplikar iyan? Anong desisyon an makakapaogma sa sakong langitnon na Ama?’ (Talinhaga 3:5, 6; Santiago 1:5) Paagi sa lambang desisyon na ginigibo mo sa paaging iyan, orog na pinapatuod mo an saimong kakayahan sa pagrisa. An siring na pagpatuod makakatabang sa saimo na magin totoong espirituwal na tawo asin magdanay na siring kaiyan.

14. Kaipuhan na magkaigwa kita nin anong klaseng gana tanganing tumalubo sa espirituwal, pero anong patanid an kaipuhan na tandaan niato?

¹⁴ Minsan ngani kayang aboton an pagkamaygurang, pirmeng may oportunidad para sa espirituwal na pagtalubo. An pagtalubo nakadepende sa kakanon. Huli kaini, si Pablo nagkomento: “An matagas na kakanon para sa mga maygurang.” An pinakaliabe sa pagpakosog kan saindong pagtubod iyo an padagos na pagkakan nin matagas na espirituwal na kakanon. Mantang tama nindong iinaaplikar an nanonodan nindo, iyan kadonongan, asin an Biblia nagsasabi: “An kadonongan iyo an pangenot na bagay.” Sa siring, kaipuhan na pataluboon niato an tunay na pagkagutom sa mahalagang marhay na mga katotoohan na itinatao kan satong Ama. (Talinhaga 4:5-7; 1 Pedro 2:2) Siempre, an pagkamit nin kaaraman asin diosnon na kadonongan bakong dahelan na magin mahambog o maabhaw. Kaipuhan na regular niatong siyasaton an satong sadiri tanganing dai makagamot o magtalubo sa satong puso an kapalangkawan o iba pang kaluyahan. Si Pablo nagsurat: “Padagos na baloon kun baga kamo nasa pagtubod, padagos na patunayan kun ano man nanggad kamo.”​—2 Corinto 13:5.

15. Taano ta mahalagang marhay sa espirituwal na pagtalubo an pagkamoot?

¹⁵ An pagtogdok nin harong tibaad tapos na, pero padagos pa man giraray an trabaho. Mahalagang marhay an pagmantenir asin mga paghirahay, asin tibaad may mga kaipuhan na idagdag dian mantang nagbabago an mga kamugtakan. Ano an kaipuhan niato tanganing magin maygurang asin mapagdanay an satong espirituwalidad? Orog sa gabos, pagkamoot. Kaipuhan na padagos kitang tumalubo sa pagkamoot ki Jehova asin sa satong mga kapagtubod. Kun mayo kita nin pagkamoot, an gabos na kaaraman asin ginigibo niato magigin mayong kamanungdanan​—garo sarong nakakauyam na ribok. (1 Corinto 13:1-3) Kun kita may pagkamoot, puede niatong maabot an Kristianong pagkamaygurang asin padagos na tumalubo sa espirituwal.

16. Anong klaseng kaisipan an pinapalakop ni Satanas, asin anong pandepensa an itinatao ni Jehova?

¹⁶ Pag-olayan niato an saro pang aspekto kan saimong pagpakosog sa pagtubod. Tanganing mapakosog an saimong sadiri bilang tunay na parasunod ni Cristo, kaipuhan na magmaan ka sa saimong pag-isip. Si Satanas, an namamahala sa kinaban na ini, eksperto sa pagpangyari na an mga tawo magpadaog sa negatibong kaisipan, pag-isip na pirmeng may maraot na mangyayari, pagdeskompiar, asin pagkadesesperar. (Efeso 2:2) An siring na kaisipan peligroso sa sarong Kristiano, kun paanong an pagkagabok peligroso sa sarong harong na kahoy. Marahay sana ta si Jehova nagtatao nin mahalagang marhay na kasangkapan na pandepensa​—an paglaom.

17. Paano iiniilustrar kan Tataramon nin Dios an importansia nin paglaom?

¹⁷ Sinasabi kan Biblia an laen-laen na kabtang kan espirituwal na pangalasag na kaipuhan niato sa satong pakipaglaban ki Satanas asin sa kinaban na ini. An sarong importanteng kabtang kan pangalasag iyo an helmet, “an paglaom sa kaligtasan.” (1 Tesalonica 5:8) Aram nin sarong soldados kan mga panahon kan Biblia na dai sia magdadanay na buhay sa labanan kun mayo siang helmet. An helmet parateng gibo sa metal asin nakasuknong sa sarong kupya na gibo sa pieltro o anit. Sinisierto kaiyan na an kadaklan na tama sa payo dumaplis sana tanganing daing gayo makadanyar. Kun paanong an helmet proteksion sa payo, an paglaom puede man na magin proteksion sa saindong isip, sa saindong pag-isip.

18, 19. Anong halimbawa sa pagpapadanay nin paglaom an itinao ni Jesus, asin paano niato sia maaarog?

¹⁸ Itinao ni Jesus an pangenot na halimbawa sa pagpapadanay nin paglaom. Girumdomon an tinagalan nia sa ultimong banggi kan saiyang buhay digdi sa daga. Sarong dayupot na katood an nagtraydor sa saiya huli sa kuarta. An saro pa nagpainda pa ngani na midbid sia. An iba binayaan sia asin nagdurulag. An mismong mga kahimanwa nia isinikwal sia, na nagkukururahaw na sia magadan sa kamot kan Romanong mga soldados paagi sa pagpasakit nin grabe. Garo baga angay na sabihon na si Jesus napaatubang sa mas magabat na mga pagbalo kisa sa mapapaatubang sa sato noarin man. Ano an nakatabang sa saiya? An Hebreo 12:2 nagsisimbag: “Huli kan kagayagayahan na ibinugtak sa atubangan nia tinagalan nia an hariging pasakitan, na hinamak an kasupganan, asin nagtukaw sa too kan trono nin Dios.” Dai noarin man liningawan ni Jesus an “kagayagayahan na ibinugtak sa atubangan nia.”

¹⁹ Anong kagayagayahan an ibinugtak sa atubangan ni Jesus? Bueno, aram nia na paagi sa pagtagal, makakakontribwir sia sa pagpakangbanal kan banal na ngaran ni Jehova. Ikakatao nia an pinakadakulang ebidensia na si Satanas putikon. Mayo na nin ibang paglaom na makakapagtao ki Jesus nin orog na kagayagayahan! Aram man nia na igong babalosan ni Jehova an saiyang kaimbodan​—na madali nang umabot an makangangalas na panahon na makakaibanan nia giraray an saiyang Ama. Pinagdanay ni Jesus sa isip nia an siring na magayagayang paglaom durante kan pinakamasakit na mga panahon. Kaipuhan na arog man kaiyan an gibohon niato. Igwa man nin kagayagayahan na ibinugtak sa atubangan niato. Tinatawan ni Jehova nin dignidad an lambang saro sa sato paagi sa pribilehio na tumabang sa pagpakangbanal kan saiyang dakulang ngaran. Puede niatong patunayan na putikon si Satanas paagi sa pagpili ki Jehova bilang satong Soberano asin pagsierto na nagdadanay kita sa pagkamoot kan satong Ama ano man na mga pagbalo asin sugot an tibaad mapaatubang sa sato.

20. Ano an makakatabang sa saindo na magdanay na positibo asin pano nin paglaom an saindong kaisipan?

²⁰ Si Jehova bako sanang andam na magtao nin balos sa saiyang maimbod na mga lingkod​—gustong-gusto man niang gibohon iyan. (Isaias 30:18; Malaquias 3:10) Ikinakaogma niang marhay na itao sa saiyang mga lingkod an matanos na mga pagmawot kan saindang puso. (Salmo 37:4) Kaya papagdanayon an saindong isip na marigon na nakaturuhok sa paglaom na nasa atubangan nindo. Dai noarin man magpadaog sa negatibo, hababaon na klase, asin biribid na kaisipan kan daan na kinaban ni Satanas. Kun naririsa nindo na an espiritu kan kinaban na ini luway-luway na nakakalaog sa saindong isip o puso, odok na mamibi ki Jehova na logod itao sa saindo “an katoninongan nin Dios na minalampas sa gabos na kaisipan.” An katoninongan na iyan na itinatao nin Dios an mag-iingat sa saindong puso asin mga pag-isip.​—Filipos 4:6, 7.

21, 22. (a) Anong mamuraway na paglaom an pinapahalagahan kan mga kabilang sa “dakulang kadaklan”? (b) Anong kabtang kan Kristianong paglaom an pinakamahalaga para sa saimo, asin ano an determinado mong gibohon?

²¹ Nakakapukaw nanggad sa boot an paglaom na maninigo nindong horophoropon! Kun kamo kabtang kan “dakulang kadaklan,” na ‘maluwas sa dakulang kahorasaan,’ isip-isipa an buhay na madali na nindong kamtan. (Kapahayagan 7:9, 14) Kun mayo na si Satanas asin an saiyang mga demonyo, makakamate kamo nin kaginhawahan na tibaad masakit saboton ngonyan. Total, siisay sa sato an nakaeksperyensia kasuarin man nin buhay na mayo kan sakit nin nakakaraot na impluwensia ni Satanas? Kun mayo na an sakit na iyan, kanigoan kagayagaya na magtrabaho sa paggibo kan daga na magin paraiso sa paggiya ni Jesus asin kan saiyang 144,000 na kairibang namamahala sa langit! Napapalukso nanggad an satong puso sa paglaom na maheling an paghale sa gabos na helang asin kamatean, maogmang sabaton an satong mga namomotan hale sa lolobngan, asin mabuhay sono sa katuyohan nin Dios para sa sato! Mantang kita luway-luway na nagigin sangkap, kita parani nang parani sa sarong mas dakula pa nganing balos, an panuga na ihinayag sa Roma 8:21​—an “mamuraway na katalingkasan kan mga aki nin Dios.”

²² Gusto ni Jehova na kamtan mo an orog na katalingkasan na maiimahinar mo noarin man. An pagkamit kan katalingkasan na iyan nakadepende sa pagkuyog. Bako daw na bawi man an gabos na paghihingoa mo ngonyan na kuyogon si Jehova aroaldaw? Tunay nanggad, kun siring, padagos na pakosogon an saimong sadiri sa saimong kabanalbanaleng pagtubod, tanganing magdanay ka sa pagkamoot nin Dios sa bilog na panahon na daing sagkod!