“Makipaglaban nin Maigot Para sa Pagtubod”!

“Makipaglaban nin maigot para sa pagtubod na itinao sa mga banal nin makasaro para sa gabos na panahon.”—JUDAS 3.

 1. Sa anong sentido nakikilaban an tunay na mga Kristiano ngonyan?

PIRMENG masakit an buhay nin mga soldados na nasa guerra. Imahinara an pagsolog nin kompletong ekipahe sa pakilaban asin pagmartsa nin dai mabilang na kilometro sa gabos na klaseng kamugtakan nin panahon, labi-labi kamapagal na pagsasanay sa paggamit nin mga armas, o pagdepensa kan saimong sadiri tumang sa gabos na klase nin madahas na peligro na puedeng ikagadan o magtao nin grabeng danyos. Minsan siring, an tunay na mga Kristiano dai nakikikabtang sa ralaban kan mga nasyon. (Isaias 2:​2-4; Juan 17:14) Pero, nungka niatong paglingawan na sa sarong sentido kita gabos nakikilaban. Grabe an pagkaongis ni Satanas ki Jesu-Cristo asin sa saiyang mga parasunod digdi sa daga. (Kapahayagan 12:17) An gabos na minadesisyon na maglingkod ki Jehova Dios garo man sana minalaog sa pagsoldados tanganing makilaban sa espirituwal.​—2 Corinto 10:4.

 2. Paano ilinaladawan ni Judas an Kristianong pakikilaban, asin paano kita matatabangan kan saiyang surat na makatagal dian?

² Angay nanggad, an tugang ni Jesus sa ina na si Judas nagsurat: “Mga namomotan, minsan ngani ako nagmamaigot na gayo na suratan kamo dapit sa kaligtasan na pinangangaptan niato gabos, naheling ko na kaipuhan na suratan ko kamo tanganing pakasadolon kamo na makipaglaban nin maigot para sa pagtubod na itinao sa mga banal nin makasaro para sa gabos na panahon.” (Judas 3) Kun sinasadol ni Judas an mga Kristiano na “makipaglaban nin maigot,” ginagamit nia an termino na konektado sa tataramon para sa “labi-labing kasakitan.” Iyo, an pakilaban na ini puedeng magin masakit, labi-labi pa ngani kasakit! Masakit daw para sa saindo kun beses na makatagal sa pakikilaban na ini? Matatabangan kita kan halipot alagad mapuersang surat ni Judas. Sinasadol kita kaiyan na labanan an inmoralidad, igalang an autoridad na ninombrahan nin Dios, asin magdanay kita sa pagkamoot nin Dios. Helingon ta kun paano iaaplikar an hatol na ini.

Labanan an Inmoralidad

 3. Sa anong emerhensia namugtak an Kristianong kongregasyon kaidtong kaaldawan ni Judas?

³ Nasasabotan ni Judas na bakong gabos na kapwa nia Kristiano nanggagana sa pakikilaban tumang ki Satanas. Namugtak kaidto sa emerhensia an aripompon. May marigsok na mga tawong “nakalaog sa hilom,” an isinurat ni Judas. An mga tawong ini tusong nagpapalakop nin inmoralidad. Asin may katusohan nindang ipinangatanosan an saindang mga gibo-gibo, na “ginigibo an dai na kutana maninigong kabootan kan satong Dios na magin sarahotan para sa malaswang gawe-gawe.” (Judas 4) Arog kan nagkapirang suanoy na Gnostico, tibaad ipinangatanosan ninda na mientras na orog na nagkakasala an saro, orog man na aakoon nin saro an biyaya nin Dios​—kaya garo man sana mas marahay na magkasala nin orog pa! O tibaad nagkonklusyon sinda na nungka sindang padudusahan nin sarong maboot na Dios. Sa arin man na kaso, sala sinda.​—1 Corinto 3:​19.

 4. Anong tolong Makakasuratan na halimbawa nin nakaaging mga paghokom ni Jehova an sinambit ni Judas?

⁴ Pinatunayan ni Judas na falso an saindang maraot na mga pangangatanosan paagi sa pagsambit nin tolong halimbawa nin paghokom ni Jehova sa mga panahon na nakaagi: tumang sa mga Israelita na ‘dai nagpaheling nin pagtubod’; tumang sa “mga anghel na . . . nagbaya sa saindang sadiring tamang erokan” tanganing magkasala sa kaibanan nin mga babae; asin tumang sa mga nag-eerok sa Sodoma asin Gomorra, na “naggibo nin labi-labing pakikisaro asin nagsunod sa laman para sa kagamitan na bakong natural.” (Judas 5-7; Genesis 6:​2-4; 19:​4-​25; Bilang 14:35) Sa kada kamugtakan, si Jehova naggibo nin dai mapagdududahan na paghokom tumang sa mga parakasala.

 5. Kiisay na suanoy na propeta nagkotar si Judas, asin paano ipinahayag kan hula na iyan an absolutong kasiertohan kan kaotoban kaiyan?

⁵ Sa huri, si Judas nagtataram manongod sa sarong paghokom na mas mahiwas pa ngani. Kinokotar nia an sarong hula ni Enoc​—sarong halipot na kotasyon na mayo sa arin man na iba pang ipinasabong na Kasuratan.a (Judas 14, 15) Ihinula ni Enoc an sarong panahon na si Jehova maghohokom sa gabos na maraot asin sa saindang maraot na mga gibo. Interesante nanggad, si Enoc nagtaram sa paaging tiempo pasado, huli ta an mga paghokom nin Dios segurado na garo baga iyan nangyari na. Puedeng tinuya kan mga tawo si Enoc asin kan huri si Noe, alagad an gabos na nag-oolog-olog na idto nalamos sa lakop sa globong Delubyo.

 6. (a) Ano an kaipuhan na ipagirumdom sa mga Kristiano kan kaaldawan ni Judas? (b) Taano ta maninigong isapuso niato an mga pagirumdom ni Judas?

⁶ Taano ta isinurat ni Judas an mga paghokom na ini nin Dios? Huli ta aram nia na an nagkapira na asosyado sa Kristianong mga kongregasyon kaidtong saiya mismong kaaldawan naggigibo nin mga kasalan na kapareho karigsok asin kakulpable kan mga kasalan na nagin dahelan kan nakaaging mga paghokom na idto. Sa siring, isinusurat ni Judas na an mga kongregasyon kaipuhan na pagirumdomon kan nagkapirang pundamental na espirituwal na katotoohan. (Judas 5) Malinaw na nalingawan ninda na naheheling ni Jehova Dios an saindang ginigibo. Iyo, kun an saiyang mga lingkod tuyong linalapas an saiyang mga ley, na pinaririgsok an saindang sadiri asin an iba, naheheling nia iyan. (Talinhaga 15:3) Nakokolgan na marhay an saiyang boot kan siring na mga gibo. (Genesis 6:6; Salmo 78:40) Makangingirhat na isipon na kita na mga tawo sana puedeng makaapektar sa mga pagmate kan Soberanong Kagurangnan kan uniberso. Pinagmamasdan nia kita aroaldaw, asin kun ginigibo ta an satong pinakamakakaya na sunodon an mga lakad kan saiyang Aki, si Jesu-Cristo, kun siring an satong gawe-gawe nagpapagayagaya sa saiyang puso. Kun siring, nungka niatong ikaanggot an mga pagirumdom na siring kan itinatao ni Judas kundi isapuso iyan.​—Talinhaga 27:11; 1 Pedro 2:21.

 7. (a) Taano ta importante para sa mga imbuelto sa magabat na kasalan na patabang tolos? (b) Paano kita gabos makalilikay sa inmoralidad?

⁷ Dai sana nanggad nagheheling si Jehova kundi minahiro man sia. Bilang Dios nin hustisya, kinakastigo nia an mga paragibo nin maraot​—pag-abot nin panahon. (1 Timoteo 5:​24) An mga nangangatanosan na an saiyang mga paghokom suanoy sanang kasaysayan asin na dai sia nakikiaram sa karatan na ginigibo ninda dinadaya sana an saindang sadiri. Importante nanggad para sa siisay man ngonyan na imbuelto sa inmoralidad na patabang tolos sa Kristianong kamagurangan! (Santiago 5:​14, 15) Kita gabos tibaad magpensar huli sa peligrong itinatao kan inmoralidad sa satong espirituwal na pakikilaban. May mga nadadanyaran kada taon​—mga indibiduwal na hinahale sa tahaw niato, na an mayoriya sa sainda huli sa pakakomiter nin inmoral na mga gibo na dai nagsosolsol. Dapat kitang marigon na magdesisyon na labanan an ano man na mga sugot na minapoon nganing gumiya sa sato sa siring na direksion.​—Ikomparar an Mateo 26:​41.

Igalang an Autoridad na Ninombrahan nin Dios

 8. Sairisay an “mga mamuraway” na nasambitan sa Judas 8?

⁸ An saro pang problema na tinatawan nin atension ni Judas iyo an kadaihan nin paggalang sa autoridad na ninombrahan nin Dios. Halimbawa, sa bersikulo 8 inaakusar nia an iyo man sanang marigsok na mga tawong ini nin ‘pagtaram na may panlilibak sa mga mamuraway.’ Sairisay an “mga mamuraway” na idto? Sinda bakong sangkap na mga tawo, alagad igwa sinda nin mga paninimbagan na itinao sa sainda kan banal na espiritu ni Jehova. Halimbawa, an mga kongregasyon igwa nin kamagurangan, na tinawan kan paninimbagan na magpastor sa aripompon nin Dios. (1 Pedro 5:2) Yaon man an nagbibiaheng mga paraataman, arog ki apostol Pablo. Asin an grupo nin kamagurangan sa Jerusalem nagpunsionar bilang namamahalang grupo, na naggigibo nin mga desisyon na nakakaapektar sa Kristianong kongregasyon sa kabilogan. (Gibo 15:6) Nahadit na marhay si Judas na may nagkapira sa mga kongregasyon na nagtataram na may panlilibak, o naglalanghad, sa siring na mga lalaki.

 9. Anong mga halimbawa dapit sa dai paggalang sa autoridad an sinasabi ni Judas?

⁹ Tanganing idenunsiar an siring na daing galang na pagtaram, sa bersikulo 11, sinasabi ni Judas an tolo pang halimbawa bilang pagirumdom: si Cain, Balaam, asin Core. Inignoro ni Cain an mamomoton na hatol ni Jehova asin tuyong ipinadagos an saiyang sadiring dalan nin mapangadan na pagkaongis. (Genesis 4:​4-8) Si Balaam nag-ako nin paorootrong patanid na daing duda na lihis sa natural an ginikanan​—pati an saiyang sadiring babaeng asno nagtaram sa saiya! Alagad may kapasloan na nagpadagos si Balaam sa pagpakana tumang sa banwaan nin Dios. (Bilang 22:​28, 32-​34; Deuteronomio 23:5) Si Core igwa nin sadiring katongdan nin paninimbagan, alagad dai nanigoan. Sia nagsutsut nin rebelyon tumang sa pinakamahoyong tawo digdi sa daga, si Moises.​—Bilang 12:3; 16:​1-3, 32.

10. Paano an nagkapira ngonyan puedeng maholog sa siod nin ‘pagtaram na may panlilibak sa mga mamuraway,’ asin taano ta maninigong likayan an siring na pagtaram?

¹⁰ Kanigoan kalinaw na tinotokdoan kita kan mga halimbawang ini na maghinanyog sa hatol asin igalang an mga ginagamit ni Jehova sa mga katongdan nin paninimbagan! (Hebreo 13:17) Pasil na gayong mahelingan nin sala an nombradong kamagurangan, huli ta sinda bakong sangkap, kun paanong kita gabos bakong sangkap. Alagad kun an mga sala ninda an pagpaparaisipon niato asin paluluyahon an paggalang sa sainda, dai daw kita “nagtataram na may panlilibak sa mga mamuraway”? Sa bersikulo 10, nasasambitan ni Judas an mga “nagtataram na may panlilibak sa gabos na bagay na talagang dai ninda aram.” May nagkapira, kun beses, na tatatsaran an desisyon nin grupo nin kamagurangan o komite hudisyal. Pero, dai ninda aram an gabos na detalye na inestudyaran kan kamagurangan tanganing makaabot sa sarong desisyon. Kaya taano ta magtataram na may panlilibak manongod sa mga bagay na talagang dai ninda aram? (Talinhaga 18:13) An mga nagpapadagos sa siring na negatibong pagtaram puedeng paggikanan nin pagkabaranga sa kongregasyon asin tibaad ikaagid pa ngani sa peligrosong “mga gapo na natatago sa irarom kan tubig” sa mga pagtorotiripon kan mga magkapagtubod. (Judas 12, 16, 19) Nungka na bobooton tang magtao nin espirituwal na peligro sa iba. Imbes, an kada saro sa sato magdesisyon na apresyaron an responsableng mga lalaki huli sa saindang pagpapagal asin debosyon sa aripompon nin Dios.​—1 Timoteo 5:​17.

11. Taano ta nagpogol si Miguel na maghokom sa mapanlibak na mga pananaram tumang ki Satanas?

¹¹ Sinasabi ni Judas an halimbawa nin saro na iginalang an nombradong autoridad. Sia nagsurat: “Kan si Miguel na arkanghel may dai pagkasinabotan asin an Diablo asin nakikidiskutiran dapit sa hawak ni Moises, dai sia nangahas na maghokom tumang sa saiya sa mapanlibak na mga pananaram, kundi nagsabi: ‘Sagweon ka logod ni Jehova.’” (Judas 9) An interesanteng pagkasaysay na ini, na si Judas sana an nagsurat sa ipinasabong na Kasuratan, nagtotokdo nin duwang napapalaen na leksion. Sa sarong lado, tinotokdoan kita kaiyan na ipabaya ki Jehova an paghokom. Malinaw na gustong gamiton ni Satanas sa salang paagi an hawak kan fiel na tawong si Moises tanganing palakopon an falsong pagsamba. Abaa karaot! Pero, si Miguel mapakumbabang nagpogol na maghokom, ta si Jehova sana an may autoridad kaiyan. Kun siring, gurano pa daw kaorog na kita maninigong magpogol sa paghusgar sa fiel na mga lalaki na naghihingoang paglingkodan si Jehova.

12. Ano an puedeng manodan kan mga may responsableng mga katongdan sa Kristianong kongregasyon sa halimbawa ni Miguel?

¹² Sa ibong na lado, an mga igwa nin autoridad sa kongregasyon makakanood man nin leksion ki Miguel. Total, minsan ngani si Miguel an “arkanghel,” an prinsipe kan gabos na anghel, dai nia inabuso an saiyang katongdan nin kapangyarihan, dawa pinoprobokar. Sinusunod na gayo kan fiel na kamagurangan an halimbawang iyan, na minimidbid na an pag-abuso sa saindang autoridad nagpapaheling nin dai paggalang sa soberaniya ni Jehova. Dakol na sinasabi an surat ni Judas manongod sa mga lalaki na igwa nin iginagalang na mga katongdan sa mga kongregasyon alagad inabuso ninda an saindang kapangyarihan. Halimbawa, sa bersikulo 12 sagkod 14, si Judas nagsurat nin makolog na pagdenunsiar sa “mga pastor na nagpapakabasog sa sainda man sana na dai nin takot.” (Ikomparar an Ezequiel 34:7-​10.) Sa ibang pagtaram, an enot na interes ninda nasa pagpakinabang kan saindang sadiri, bakong kan aripompon ni Jehova. Dakol an manonodan kan kamagurangan ngonyan sa siring na negatibong mga halimbawa. Tunay nanggad, an mga tataramon digdi ni Judas malinaw na ilinaladawan an habo niatong mangyari sa sato. Kun mapadara kita sa kapasloan, dai kita puedeng magin mga soldados ni Cristo; sibot-sibot kita sa pakikilaban para sa personal na interes. Imbes, kuyogon ta an mga tataramon ni Jesus: “Igwang orog na kaogmahan sa pagtao kisa sa pag-ako.”​—Gibo 20:35.

“Magdanay Kamo sa Pagkamoot nin Dios”

13. Taano ta maninigo na kita gabos odok na magmawot na magdanay sa pagkamoot nin Dios?

¹³ Sa pagtatapos kan saiyang surat, itinatao ni Judas an nakaoogmang hatol na ini: “Magdanay kamo sa pagkamoot nin Dios.” (Judas 21) Dai nang orog na makatatabang sa sato sa Kristianong pakikilaban kisa sa sarong bagay na ini, an pagdadanay na namomotan ni Jehova Dios. Total, an pagkamoot an nangingibabaw na kualidad ni Jehova. (1 Juan 4:8) Sinuratan ni Pablo an mga Kristiano sa Roma: “Ako kombensido na ni an kagadanan ni an buhay ni an mga anghel ni an mga gobyerno ni an mga bagay na yaon na digdi ngonyan ni an mga bagay na madatong pa ni an mga kapangyarihan ni an kalangkawan ni an kararoman ni an arin man na ibang linalang makapasusuhay sa sato hale sa pagkamoot nin Dios na yaon dian ki Cristo Jesus na satong Kagurangnan.” (Roma 8:​38, 39) Pero, paano kita nagdadanay sa pagkamoot na iyan? Mangnoha an tolo sa mga paagi na magigibo niato, oyon ki Judas.

14, 15. (a) Ano an boot sabihon kan pagpakosog kan satong sadiri sa satong “kabanalbanaleng pagtubod”? (b) Paano niato puedeng siyasaton an kamugtakan kan satong espirituwal na pangalasag?

¹⁴ Enot, sinasabihan kita ni Judas na padagos na pakosogon an satong sadiri sa satong “kabanalbanaleng pagtubod.” (Judas 20) Siring kan naheling ta sa sinusundan na artikulo, ini dagos-dagos na proseso. Kapareho kita nin mga edipisyo na nangangaipo nin padagos pang pagpapasarig tumang sa pagraot nin panahon. (Ikomparar an Mateo 7:​24, 25.) Kaya nungka kitang magin sobra kakompiado. Imbes, riparohon ta kun saen ta puedeng pakosogon an satong sadiri sa pundasyon kan satong pagtubod, na nagigin mas makosog, mas fiel na mga soldados ni Cristo. Halimbawa, puede tang estudyaran an mga kabtang kan espirituwal na pangalasag na ilinadawan sa Efeso 6:​11-​18.

¹⁵ Ano an kamugtakan kan sato mismong espirituwal na pangalasag? An sato daw na “dakulang kalasag nin pagtubod” siring kakosog kan kaipuhan na magin kamugtakan kaiyan? Mantang sinasalingoy ta an nakaagi pa sanang mga taon, may naheheling daw kitang senyales nin pagpabaya, arog baga nin bihira nang pag-atender sa pagtiripon, pagkawara nin kaigotan sa ministeryo, o nawawarang entusiasmo sa personal na pag-adal? Seryoso an senyales na iyan! Kaipuhan kitang humiro ngonyan tanganing pakosogon asin pasarigon an satong sadiri sa katotoohan.​—1 Timoteo 4:​15; 2 Timoteo 4:2; Hebreo 10:​24, 25.

16. Ano an boot sabihon kan pamimibi na igwa kan banal na espiritu, asin ano an sarong bagay na maninigo niatong hagadon nin regular ki Jehova?

¹⁶ An ikaduwang paagi na magdanay sa pagkamoot nin Dios iyo an padagos na “pamimibi na igwa kan banal na espiritu.” (Judas 20) Iyan nangangahulogan nin pamimibi na may paggiya kan espiritu ni Jehova asin kaoyon kan saiyang Tataramon na ipinasabong kan espiritu. An pamibi sarong mahalagang marhay na paagi nin personal na pagdolok ki Jehova asin pagpahayag kan satong debosyon sa saiya. Nungka niatong paglimanlimanan an makangangalas na pribilehiong ini! Asin kun kita namimibi, puede kitang humagad​—sa katunayan, padagos na humagad—​nin banal na espiritu. (Lucas 11:13) Iyan an pinakamakosog na puersang makukua niato. Paagi sa tabang na iyan, pirme kitang makapagdadanay sa pagkamoot nin Dios asin makatatagal bilang mga soldados ni Cristo.

17. (a) Taano ta pambihirang marhay an halimbawa ni Judas kun dapit sa pagkaherak? (b) Paano an kada saro sa sato makapapadagos sa pagpaheling nin pagkaherak?

¹⁷ Ikatolo, sinasadol kita ni Judas na padagos na magpaheling nin pagkaherak. (Judas 22) Pambihira an mismong halimbawa nia sa bagay na ini. Total, tama sanang ikapurisaw nia an karatan, inmoralidad, asin apostasiya na nakalalaog sa Kristianong kongregasyon. Minsan siring, dai sia nagpakubhan, na nag-iisip na maski paano peligroso nang marhay kaidto na magpaheling nin “suabeng” kualidad na arog kan pagkaherak. Dai, sinadol nia an saiyang mga tugang na padagos na magpaheling nin pagkaherak kun posible, na maboot na nakikipangatanosan sa mga may pagduda asin ‘inaagaw pa ngani hale sa kalayo’ an mga naggagatigati nang maholog sa magabat na kasalan. (Judas 23; Galacia 6:1) Kanigoan karahay na sadol para sa kamagurangan sa mapurisaw na mga panahon na ini! Sinda naghihingoa man na magpaheling nin pagkaherak kun saen igwa nin basehan para kaiyan, mantang marigon pa man giraray kun kaipuhan. Kita gabos boot man na magpaheling nin pagkaherak sa lambang saro. Halimbawa, imbes na magtanom nin raot nin boot huli sa saradit na bagay, puede niatong bukahon an satong palad sa pagpapatawad.​—Colosas 3:13.

18. Paano ta maseseguro an kapangganahan sa satong espirituwal na pakikilaban?

¹⁸ Bakong pasil an satong pakikilaban. Siring kan sabi ni Judas, iyan ‘maigot na pakikilaban.’ (Judas 3) Mapuersa an satong mga kaiwal. Bako sanang si Satanas kundi pati an saiyang maraot na kinaban asin an sato mismong mga pagkabakong sangkap gabos nakaumang sa sato. Pero, puede kitang lubos na magkompiar sa kapangganahan! Taano? Huli ta nasa kampi kita ni Jehova? Tinatapos ni Judas an saiyang surat paagi sa pagirumdom na si Jehova tama sanang tawan kan “kamurawayan, kamahalan, kapangyarihan asin autoridad sa bilog na nakaaging panahon na daing sagkod asin ngonyan patin sa bilog na panahon na daing sagkod na maabot.” (Judas 25) Bako daw na iyan nakapupukaw nin hararom na paggalang? Kun siring, mapagdududahan daw na an Dios man sanang ini “makakaingat sa saindo sa pagkasingkog”? (Judas 24) Tunay nanggad na dai! Logod na an lambang saro sa sato magin determinado na padagos na labanan an inmoralidad, igalang an autoridad na ninombrahan nin Dios, asin magdanay kita sa pagkamoot nin Dios. Sa paaging iyan, iriba kitang magkakamit nin mamuraway na kapangganahan.

[Nota sa ibaba]

Mga Hapot Para sa Repaso

◻ Paano kita tinotokdoan kan surat ni Judas na labanan an inmoralidad?

◻ Taano ta mahalagang marhay na igalang an autoridad na ninombrahan nin Dios?

◻ Ano an seryosong marhay manongod sa salang paggamit kan autoridad sa kongregasyon?

◻ Paano niato mahihimong magdanay sa pagkamoot nin Dios?

[Retrato sa pahina 15]

Bakong arog kan mga soldados na Romano, an mga Kristiano espirituwal an pakikilaban

[Retrato sa pahina 18]

An Kristianong mga pastor naglilingkod, bakong huli sa kapasloan, kundi huli sa pagkamoot