Kapitulo 1

Kapahayagan—An Maogmang Kulminasyon Kaiyan!

 1. Paano niato naaaraman na boot nin Dios na kita magin maogma?

SARONG KAPAHAYAGAN KI JUAN—an nakakapukaw sa boot na librong ini kan Biblia dinadara sa maogmang kulminasyon an kasuratan nin Dios. Taano ta sinasabi niatong “maogma”? Bueno, an Autor kan Biblia inaapod na “an maogmang Dios,” na ipinapaniwala an “mamuraway na maogmang bareta” sa mga namomoot sa saiya. Boot nia na kita magin maogma man. Sa siring, sa kapinonan pa sana inaasegurar kita kan Kapahayagan: “Maogma an nagbabasa . . . sa mga tataramon kan propesiyang ini.” Sa ultimong kapitulo kaiyan sinasabi sa sato: “Maogma an siisay man na nag-ootob kan mga tataramon kan propesiya sa rolyong ini.”—1 Timoteo 1:11; Kapahayagan 1:3; 22:7.

 2. Ano an dapat niatong gibohon tanganing makanompong nin kaogmahan paagi sa libro nin Kapahayagan?

² Paano kita makakanompong nin kaogmahan paagi sa libro nin Kapahayagan? Magigibo niato iyan paagi sa pagsiyasat sa kahulogan kan buhay na mga tanda, o simbolo, kaiyan asin paghiro kaoyon kaiyan. An maribok na kasaysayan kan katawohan madali nang umabot sa kapahapahamak na kulminasyon, kun hokoman na nin Dios asin ni Jesu-Cristo an marigsok na sistema ngonyan, na sinasalidahan iyan nin “sarong bagong langit asin sarong bagong daga,” na duman “dai na magkakaigwa nin kagadanan.” (Kapahayagan 21:1, 4) Bako daw na kita gabos boot na mabuhay sa siring na bagong kinaban, na may tunay na katoninongan asin katiwasayan? Iyan puede kun papakosogon niato an satong pagtubod paagi sa pag-adal sa Tataramon nin Dios, kaiba an nakakapukaw sa boot na propesiya sa Kapahayagan.

Apocalipsis—Ano Iyan?

 3. Ano an hinohona nin dakol na kahulogan kan Apocalipsis asin Armagedon?

³ Bako daw na an Kapahayagan inaapod man na Apocalipsis? Iyo, ta an “kapahayagan” iyo an pagtradusir sa Bicol kan a·po·kaʹly·psis sa tekstong Griego. An Apocalipsis ikinokonektar nin dakol na tawo sa pagkalaglag kan kinaban paagi sa guerra nuklear. Sa sarong siudad sa Texas, E.U.A., na duman ginibo an dakol na bomba nuklear, an relihiosong mga tawo nagpaparasarabi kaidto, “Kita an maeenot na magadan.” An mga klerigo sa lugar na iyan nabareta na “kombensido na an Armagedon bako sanang dai malilikayan kundi harani na man, asin na an ultimong ralaban sa pag-oltanan kan mga puersa nin karahayan asin karatan, nin Dios asin ni Satanas, mangyayari bilang nuklear na pagkatunaw nin biyo.”a

 4. Ano an talagang kahulogan kan terminong “apocalipsis,” asin taano an ultimong libro sa Biblia ta tama sanang tawan kan titulong “Sarong Kapahayagan”?

⁴ Alagad ano man nanggad an apocalipsis? Minsan ngani tinatawan iyan nin kahulogan nin mga diksionaryo paagi sa paggamit nin mga termino na arog baga kan “sarong nagdadangadang na dakulaon na kalamidad,” an Griegong a·po·kaʹly·psis sa pundamental nangangahulogan “paghale kan tahob” o “paghahayag.” Sa siring, an ultimong libro kan Biblia tama sanang tawan kan titulong “Sarong Kapahayagan.” An manonompongan niato digdi, bakong mensahe sana nin kalaglagan kan kinaban na manongod dian mayo man kita nin magigibo, kundi paghahayag kan mga katotoohan nin Dios na maninigong magpatalubo sa satong puso nin mamuraway na paglaom asin marigon na pagtubod.

 5. (a) Sairisay an lalaglagon sa Armagedon, asin sairisay an makakaligtas? (b) Anong mamuraway na ngapit an naghahalat sa mga makakaligtas sa Armagedon?

⁵ Totoo, an Armagedon inaapod sa ultimong libro kan Biblia na “guerra kan dakulang aldaw nin Dios na Makakamhan sa Gabos.” (Kapahayagan 16:14, 16) Alagad ta iyan magigin laen nanggad sa sarong nuklear na pagkatunaw nin biyo! An siring na pagkatunaw nin biyo posibleng mangahulogan kan pagkapara nin gabos na buhay sa ibabaw kan daga. Al kontraryo, an Tataramon nin Dios nagtatao kan maogmang garantiya na an marigsok na mga paratumang sana sa Dios an lalaglagon—nin mga puersa na nasa pamomogol nin Dios. (Salmo 37:9, 10; 145:20) An sarong dakulang kadaklan nin mga tawo, hale sa gabos na nasyon, makakaligtas sa kulminasyon kan paghokom nin Dios sa Armagedon. Dangan an mga ini papastoran asin gigiyahan ni Cristo Jesus pasiring sa buhay na daing katapusan sa sarong paraisong daga. Boot daw nindong mapabilang sa sainda? Makaoogma, ipinapaheling kan Kapahayagan na iyan puede nanggad!—Kapahayagan 7:9, 14, 17.

Pagsiyasat sa mga Hilom nin Dios

 6. Sa nag-aging mga taon, anong mga libro an ipinublikar kan Mga Saksi ni Jehova tanganing tawan nin liwanag an Kapahayagan?

⁶ Kaidto pang 1917, ipinublikar kan Watch Tower Society an librong The Finished Mystery. Ini bersikulo-por-bersikulong komentaryo sa mga libro sa Biblia na Ezequiel asin Kapahayagan. Dangan, mantang naheheling an mga pangyayari sa kinaban bilang kaotoban kan propesiya sa Biblia, ginibo an napapanahon, duwang-tomong libro na may titulong Light, na ilinuwas kan 1930. Ini nagtao nin isinunod sa panahon na pag-analisar sa Kapahayagan. An liwanag nagpadagos na “kuminilyab para sa matanos,” kaya kan 1963 ipinublikar kan Mga Saksi ni Jehova an 704-pahinas na librong “Babylon the Great Has Fallen!” God’s Kingdom Rules! Itinao kaini nin detalyadong marhay an kasaysayan kan pagkosog sa kapangyarihan asin pagbagsak kan Dakulang Babilonya, an pankinaban na imperyo nin falsong relihion, asin iyan tinapos nin pagtokar sa huring siyam na kapitulo kan Kapahayagan. Mantang ‘an dana kan mga matanos orog na nagliliwanag,’ partikularmente mapadapit sa aktibidad sa kongregasyon, suminunod kan 1969 an 384-pahinas na libro, “Then Is Finished the Mystery of God,” na nagtokar kan enot na 13 kapitulo nin Kapahayagan.—Salmo 97:11; Talinhaga 4:18.

 7. (a) Taano ta ginibo kan Mga Saksi ni Jehova an librong ini manongod sa Kapahayagan? (b) Anong mga pantabang sa pagtotokdo an itinao sa librong ini para sa kapakinabangan kan mga nagbabasa?

⁷ Taano ta nagpublikar nin saro pang libro manongod sa Kapahayagan asin inimprenta iyan ngonyan sa Bicol? An kadaklan na impormasyon na nagluwas na detalyadong marhay, asin dai nahimo na iyan tradusiron asin ipublikar sa bilog na kinaban sa dakol na lenguahe. Kaya, pinagmarahay na gumibo nin sarong libro manongod sa Kapahayagan na nasa saro sanang tomo asin nasa porma na pasil na gibohon sa dakol na lenguahe. Saro pa, inaprobetsaran an oportunidad sa tomong ini na tumao nin mga pantabang sa pagtotokdo, kaiba na an mga ilustrasyon, tsart, asin sumaryo, na makakatabang sa mga nagbabasa na malinaw na masabotan an nakakapukaw sa boot na kahulogan kan makangangalas na propesiyang ini.

 8. Ano an mas makosog pang dahelan sa pagpublikar kan librong ini?

⁸ An mas makosog pang dahelan sa pagpublikar kan librong ini iyo an pangangaipo na makisabay sa presenteng katotoohan. Si Jehova padagos na nagtatao nin orog na liwanag sa kahulogan kan saiyang Tataramon, asin makakalaom kita na an pakasabot niato sa Kapahayagan, kaiba an iba pang propesiya, dudugangan mantang kita parani nang parani sa dakulang kahorasaan. (Mateo 24:21; Kapahayagan 7:14) Mahalaga na aram niato an nangyayari. Arog kan isinurat ni apostol Pedro manongod sa propesiya nin Dios: “Marahay an saindong ginigibo sa pagtao nin atension dian na siring sa sarong ilawan na nagliliwanag sa madiklom na lugar, sagkod na mamanaag an aldaw asin an bitoon sa aga sumirang na, sa saindong puso.”—2 Pedro 1:19.

 9. (a) Kaiba nin ibang propesiya, ano an ipinapaheling kan Kapahayagan na lalalangon nin Dios? (b) Ano an bagong kinaban, asin paano kamo puedeng makaligtas pasiring dian?

⁹ Idinudugang kan Kapahayagan an patotoo kaiyan sa dakol na ibang propesiya sa Biblia, na ipinapaheling na katuyohan ni Jehova Dios na lumalang nin bagong kalangitan asin sarong bagong daga. (Isaias 65:17; 66:22; 2 Pedro 3:13; Kapahayagan 21:1-5) Sa pangenot, an mensahe kaiyan ipinapanongod sa linahidan na mga Kristiano, na binakal ni Jesus kan saiyang dugo tanganing magin mga hade kaiba nia sa bagong kalangitan. (Kapahayagan 5:9, 10) Minsan siring, an maogmang baretang ini maparigon man sa pagtubod kan minilyon na naglalaom sa buhay na daing katapusan sakop kan Kahadean ni Cristo. Saro daw kamo sa mga ini? Kun siring papakosogon kan Kapahayagan an saindong paglaom na mabuhay sa Paraiso, bilang kabtang kan bagong daga, na magkakamit nin abundang katoninongan, mabagsik na salud, asin naglilipwas na mga probisyon nin Dios na dai noarin man matatapos. (Salmo 37:11, 29, 34; 72:1, 7, 8, 16) Kun boot nindo na makaligtas pasiring sa bagong kinaban na iyan, importante, iyo, kaipuhan, na kamo magtao nin atension sa buhay na pagkaladawan kan Kapahayagan sa importanteng marhay na kulminasyon na harani na ngonyan.—Sofonias 2:3; Juan 13:17.

[Nota sa Ibaba]

[Bilog na pahinang ritrato sa pahina 7]