Mga Salog nin mga Bendisyon na Hali ki Jehova

JOEL 3:18 Ipinapahiling sa propesiyang ini an sarong burabod na hali sa santuwaryo kan templo. Nagbubulos iyan para patubigan an marang “Kababan nin mga Puon nin Akasya.” Kaya parehong nakahiling si Joel saka si Ezekiel nin salog na nagtataong-buhay sa sarong daing buhay na lugar. Sa duwang propesiyang iyan, an salog parehong nagbubulos hali sa harong ni Jehova, o templo.

ZACARIAS 14:8 Nakahiling si propeta Zacarias nin “tubig na buhay” na nagbubulos hali sa siyudad nin Jerusalem. An kabanga kan tubig nagbubulos pasiring sa dagat sa sirangan, o Gadan na Dagat, asin an kabanga, nagbubulos pasiring sa dagat sa sulnupan, o Dagat Mediteraneo. An Jerusalem iyo “an siyudad kan makapangyarihan na Hadi,” an Diyos na Jehova. (Mat. 5:35) Kaya an pagsambit ni Zacarias sa siyudad na iyan nagpapagirumdom sa sato sa pamamahala ni Jehova sa bilog na daga sa maabot na panahon. Haloy ta nang nasasabutan na an tubig sa propesiyang ini nagpaparisa na bebendisyunan ni Jehova an duwang grupo nin maimbod na mga tawo sa Paraiso—an mga makakaligtas sa dakulang kasakitan asin an mga bubuhayon liwat pagkatapos kaiyan.

KAPAHAYAGAN 22:1, 2 Nakahiling si apostol Juan nin simbolikong salog na haros kapareho kan nahiling ni Ezekiel. Pero, hali iyan sa trono ni Jehova, bako sa templo. Kaya arog kan bisyon ni Zacarias, minalataw na ipinapahiling kan bisyon na ini an mga bendisyon kan pamamahala nin Diyos sa panahon kan Milenyo.

Siyempre, may dikit na pagkakaiba an mga bendisyon na dara kan pamamahala ni Jehova sa mga bendisyon na ilinaladawan kan salog na nahiling ni Ezekiel sa bisyon. Pero an gabos na bendisyon na iyan hali ki Jehova asin nagbubulos sa gabos na maimbod na tawo.

SALMO 46:4 Minalataw na mahihiling sa tekstong ini an duwang aspekto—an pagsamba asin pamamahala. May mahihiling kita digding salog na nagpapaugma sa “siyudad nin Diyos,” na nanunungod sa Kahadian saka pamamahala, pati man sa “banal na tabernakulo kan Kahuruhalangkawi,” na nanunungod sa dalisay na pagsamba.

Sa kabilugan, inaasigurar kita kan mga tekstong ini na bebendisyunan ni Jehova an maimbod na mga tawo sa duwang paagi. Makikinabang kita sagkod lamang, inot, paagi sa saiyang pamamahala, asin ikaduwa, paagi sa saiyang areglo para sa dalisay na pagsamba. Kaya magin determinado lugod kita na padagos na mag-inom sa itinatao kan Diyos na Jehova asin kan saiyang Aki na “tubig na buhay”—an saindang mamumuton na probisyon para mag-ako kita nin buhay na daing katapusan!—Jer. 2:13; Juan 4:10.