Magin Maogmang mga Nagbabasa kan Libro nin Kapahayagan

“Maogma an nagbabasa nin makosog asin an mga nagdadangog sa mga tataramon kan hulang ini, asin nag-ootob kan mga bagay na nasusurat dian.”—KAPAHAYAGAN 1:3.

 1. Nasa anong mga kamugtakan si apostol Juan kan isurat nia an Kapahayagan, asin sa anong katuyohan isinurat an mga bisyon na ini?

“AKO si Juan . . . namugtak sa isla na inaapod Patmos huli sa pagtaram dapit sa Dios asin pagpatotoo ki Jesus.” (Kapahayagan 1:9) Sa siring na mga kamugtakan isinurat ni apostol Juan an libro nin Apocalipsis, o Kapahayagan. Pinaghohona na sia nadistiero sa Patmos durante kan pamamahala ni Emperador Domiciano nin Roma (81-96 C.E.), na nagpaotob kan pagsamba sa emperador asin nagin paralamag sa mga Kristiano. Mantang yaon sa Patmos, nag-ako si Juan nin sunod-sunod na bisyon na saiyang isinurat. Isinaysay nia iyan, bakong tanganing patakoton an enot na mga Kristiano, kundi tanganing pakosogon, rangahon, asin parigonon an boot ninda huli sa mga pagbalo na inaagihan ninda asin nasa ngapit pa.—Gibo 28:22; Kapahayagan 1:4; 2:3, 9, 10, 13.

 2. Taano an nagin kamugtakan ni Juan asin kan mga kapwa nia Kristiano ta interesante sa mga Kristianong nabubuhay ngonyan?

² An mga kamugtakan na dian isinurat an librong ini sa Biblia makahulogan na marhay para sa mga Kristianong nabubuhay ngonyan. Pinaglalamag kaidto si Juan huli ta sia saksi para ki Jehova asin sa Saiyang Aki, si Cristo Jesus. Sia asin an saiyang mga kapwa Kristiano nabubuhay sa kamugtakan na may lakop na oposisyon huli ta, minsan ngani nagmamaigot na magin marahay na mga siudadano, dai ninda magibo an pagsamba sa emperador. (Lucas 4:8) Sa nagkapirang nasyon, an tunay na mga Kristiano ngonyan nasa kaagid na kamugtakan, kun saen kinakaptan kan Estado an diretso na magdeterminar kun ano an “tama daa kun dapit sa relihion.” Abaa kanakararanga, kun siring, kan mga tataramon na yaon sa introduksion sa libro nin Kapahayagan: “Maogma an nagbabasa nin makosog asin an mga nagdadangog sa mga tataramon kan hulang ini, asin nag-ootob kan mga bagay na nasusurat dian; huli ta harani na an itinalaan na panahon.” (Kapahayagan 1:3) Iyo, an atento asin makinuyog na mga nagbabasa kan Kapahayagan makanonompong nin tunay na kaogmahan asin dakol na bendisyon.

 3. Siisay an Ginikanan kan Kapahayagan na itinao ki Juan?

³ Siisay an ultimong Ginikanan kan Kapahayagan, asin anong pinakapaagihan an ginagamit sa pagpaabot kaiyan? Sinasabi sato kan enot na bersikulo: “Sarong kapahayagan ni Jesu-Cristo, na itinao sa saiya nin Dios, tanganing ipaheling sa saiyang mga oripon an mga bagay na kaipuhan na mangyari sa dai na mahahaloy. Asin isinugo nia an saiyang anghel asin itinao iyan sa mga tanda paagi sa saiya sa saiyang oripon na si Juan.” (Kapahayagan 1:1) Sa simpleng pagtaram, an aktuwal na Ginikanan kan Kapahayagan iyo si Jehova Dios, na iyong nagtao kaiyan ki Jesus, asin paagi sa sarong anghel, sinabi iyan ni Jesus ki Juan. An kadikit pang pagsiyasat naghahayag na ginamit man ni Jesus an banal na espiritu sa pagpaabot nin mga mensahe sa mga kongregasyon asin sa pagtao nin mga bisyon ki Juan.—Kapahayagan 2:7, 11, 17, 29; 3:6, 13, 22; 4:2; 17:3; 21:10; ikomparar an Gibo 2:33.

 4. Anong mga paagi an ginagamit ni Jehova sagkod ngonyan sa paggiya sa saiyang banwaan digdi sa daga?

⁴ Sagkod ngonyan ginagamit ni Jehova an saiyang Aki, an “payo kan kongregasyon,” sa pagtokdo sa saiyang mga lingkod digdi sa daga. (Efeso 5:23; Isaias 54:13; Juan 6:45) Ginagamit man ni Jehova an saiyang espiritu sa pagtokdo sa saiyang banwaan. (Juan 15:26; 1 Corinto 2:10) Asin kun paanong ginamit ni Jesus an “saiyang oripon na si Juan” sa pagpaabot nin nakasusustenir na espirituwal na kakanon sa mga kongregasyon kan enot na siglo, ngonyan man ginagamit nia “an fiel asin madonong na oripon,” na kompuesto kan saiyang linahidan na “mga tugang” digdi sa daga, sa pagtao sa saiyang mga domestiko saka sa saindang kairiba nin espirituwal na “kakanon sa igong panahon.” (Mateo 24:45-47; 25:40) Maogma an mga rinerekonoser an Ginikanan kan ‘marahay na mga balaog’ na inaako niato kun dapit sa espirituwal na kakanon asin an pinakapaagihan na Saiyang ginagamit.—Santiago 1:17.

Mga Kongregasyon na Ginigiyahan ni Cristo

 5. (a) Sa ano ibinabaing an Kristianong mga kongregasyon asin an saindang mga paraataman? (b) Sa ibong kan pagkabakong sangkap nin tawo, ano an makakokontribwir sa satong kaogmahan?

⁵ Sa enot na mga kapitulo kan Kapahayagan, an Kristianong mga kongregasyon ibinabaing sa mga kandelero. An saindang mga paraataman ibinabaing sa mga anghel (mensahero) saka bitoon. (Kapahayagan 1:20)a Sa pagtaram manongod sa saiya man sana, ipinasurat ni Cristo ki Juan: “Ini an mga bagay na isinabi kaidtong nagkakapot kan pitong bitoon sa saiyang toong kamot, an naglalakaw sa tahaw kan pitong kandelerong bulawan.” (Kapahayagan 2:1) Ipinaheheling kan pitong mensahe na ipinadara sa pitong kongregasyon sa Asia na kan enot na siglo C.E., an mga kongregasyon saka an saindang kamagurangan may mga kakosogan asin kaluyahan. Totoo man iyan ngonyan. Kun siring, mas magigin maogma kita kun dai niato noarin man lingawan an bagay na si Cristo, an satong Payo, yaon sa tahaw kan mga kongregasyon. Aram nia nin eksakto kun ano an nangyayari. An mga paraataman nasa “saiyang toong kamot” sa simbolikong paagi, an boot sabihon, nasa irarom kan saiyang kontrol saka paggiya asin maninimbag sa saiya sa paagi kan saindang pagpastor sa mga kongregasyon.—Gibo 20:28; Hebreo 13:17.

 6. Ano an nagpapaheling na an mga paraataman bako sanang iyo an maninimbag ki Cristo?

⁶ Minsan siring, dadayaon niato an satong sadiri kun hohonaon niato na an mga paraataman sana an maninimbag ki Cristo para sa saindang mga gibo. Sa saro sa saiyang mga mensahe, sinabi ni Cristo: “Maaaraman kan gabos na kongregasyon na ako iyo an nagsisiyasat kan mga bato asin puso, asin ako matao sa lambang saro sa saindo nin segun sa saindong mga gibo.” (Kapahayagan 2:23) Ini magkadungan na patanid asin pagparigon sa boot—patanid na aram ni Cristo an satong nasa kairairaroming mga motibo, pagparigon sa boot ta inaasegurar kaiyan sa sato na aram ni Cristo an satong mga paghihingoa asin bebendisyonan nia kita kun gigibohon niato an kaya niato.—Marcos 14:6-9; Lucas 21:3, 4.

 7. Paano an mga Kristiano sa Filadelfia ‘nag-otob kan tataramon dapit sa pakatagal ni Jesus’?

⁷ An mensahe ni Cristo sa kongregasyon sa siudad nin Filadelfia sa Lidia mayo nin pagsagwe, alagad iyan may panuga na maninigo na magin pinakainteresante para sa sato. “Huli ta ika nag-otob kan tataramon dapit sa sakong pakatagal, iingatan taka man sa oras nin pagbalo, na madatong sa bilog na ineerokan na daga, tanganing baloon an mga nag-eerok sa ibabaw kan daga.” (Kapahayagan 3:10) An Griego para sa “nag-otob kan tataramon dapit sa sakong pakatagal” puede man na mangahulogan nin “nag-otob kan sinabi ko dapit sa pakatagal.” Isinusuherir kan bersikulo 8 na an mga Kristiano sa Filadelfia bako sanang nagkuyog kan mga pagboot ni Cristo kundi sinunod man an hatol nia na fiel na magtagal mismo.—Mateo 10:22; Lucas 21:19.

 8. (a) Ano an ipinanuga ni Jesus sa mga Kristianong taga Filadelfia? (b) Sairisay ngonyan an apektado kan “oras nin pagbalo”?

⁸ Idinagdag ni Jesus na sinda saiyang iingatan sa “oras nin pagbalo.” Kun ano an talagang nagin kahulogan kaiyan para sa mga Kristianong idto kaidto, dai niato aram. Minsan ngani nagkaigwa nin kadikit na pahingalo sa paglamag pagkagadan ni Domiciano kan 96 C.E., nagpoon an bagong biglang abot nin paglamag sa pagsakop ni Trajan (98-117 C.E.), na daing duda na nagtao nin orog pang mga pagbalo. Alagad an dakulang “oras nin pagbalo” mangyayari sa “aldaw kan Kagurangnan” durante kan “panahon kan katapusan,” na namumugtakan niato ngonyan. (Kapahayagan 1:10; Daniel 12:4) An linahidan nin espiritu na mga Kristiano nag-agi sa partikular na panahon nin pagbalo durante asin pagkatapos tolos kan Guerra Mundial I. Pero, nagpapadagos pa an “oras nin pagbalo.” Apektado kaiyan an “bilog na ineerokan na daga,” pati an minilyon na minakompuesto sa dakulang kadaklan, na naglalaom na makaligtas sa dakulang kahorasaan. (Kapahayagan 3:10; 7:9, 14) Magigin maogma kita kun ‘ootobon niato an sinabi ni Jesus dapit sa pakatagal,’ arin na baga: “An nakatagal sagkod sa katapusan iyo an maliligtas.”—Mateo 24:13.

Maogmang Pagpasakop sa Soberaniya ni Jehova

9, 10. (a) Sa anong mga paagi maninigong makaapektar sa sato an bisyon sa trono ni Jehova? (b) Paano makakokontribwir sa satong kaogmahan an pagbasa niato kan Kapahayagan?

⁹ An bisyon sa trono ni Jehova asin sa saiyang langitnon na korte na itinao sa kapitulo 4 asin 5 kan Kapahayagan maninigo na makapano sa sato nin hararom na paggalang. Maninigo kitang maapektaran kan odok sa pusong mga kapahayagan nin pag-omaw na itinaram kan makapangyarihan na mga linalang sa langit mantang sinda magayagayang nagpapasakop sa matanos na soberaniya ni Jehova. (Kapahayagan 4:8-11) Maninigong madangog an satong tingog kaiba kan mga nagsasabi: “Mapasa Saro na nagtutukaw sa trono asin sa Kordero an kaomawan asin an onra asin an kamurawayan patin an kakosogan sagkod noarin pa man.”—Kapahayagan 5:13.

¹⁰ Sa praktikal na paagi, ini nangangahulogan kan satong pagigin mapagpasakop na may kagayagayahan sa kabotan ni Jehova sa gabos na bagay. Isinurat ni apostol Pablo: “Ano man an gibohon nindo sa tataramon o sa gibo, gibohon nindo an gabos na bagay sa ngaran kan Kagurangnan na Jesus, na pinasasalamatan an Dios na Ama paagi sa saiya.” (Colosas 3:17) An satong pagbasa kan Kapahayagan totoong mapaogma sa sato kun satong rerekonoseron sa kalaoglaogi kan satong isip saka puso an soberaniya ni Jehova asin kokonsideraron an saiyang kabotan sa lambang aspekto kan satong buhay.

11, 12. (a) Paano an daganon na sistema ni Satanas tatanyogon asin lalaglagon? (b) Segun sa Kapahayagan kapitulo 7, siisay an “makatatagal” sa panahon na iyan?

¹¹ An magayagayang pagpasakop sa soberaniya ni Jehova iyo an basehan para sa kaogmahan sa personal na punto de vista asin sa unibersal na punto de vista. Dai na mahahaloy tatanyogon nin sarong simbolikong linog na makosog an pambilog na kinaban na sistema ni Satanas sagkod sa mismong mga pundasyon kaiyan asin lalaglagon iyan. Mayo nin mapagpapailihan an mga tawo na habong pumasakop sa langitnon na gobyernong Kahadean ni Cristo, na nagrerepresentar sa lehitimong pagdominar nin Dios. Sinasabi kan hula: “An mga hade sa daga asin an mga halangkaw an ranggo asin an mga komandante militar asin an mayayaman asin an makokosog patin an lambang oripon saka lambang hiwas itinago an saindang sadiri sa mga lungib asin sa darakulang gapo kan kabukidan. Asin sinda nagsasarabi sa mga bukid asin sa darakulang gapo: ‘Rumpagi kami nindo asin tagoa kami nindo sa lalauogon kan Saro na nagtutukaw sa trono asin sa grabeng kaanggotan kan Kordero, huli ta an dakulang aldaw kan saindang grabeng kaanggotan nagdatong na, asin siisay an makatatagal?’”—Kapahayagan 6:12, 15-17.

¹² Mapadapit sa hapot na iyan, sa kasunod na kapitulo, ilinaladawan ni apostol Juan an mga minakompuesto sa dakulang kadaklan, na nagluwas sa dakulang kahorasaan, na “nagtitindog sa atubangan kan trono asin sa atubangan kan Kordero.” (Kapahayagan 7:9, 14, 15) An pagtindog ninda sa atubangan kan trono nin Dios nagpapaheling na rinerekonoser ninda an tronong iyan asin lubos sindang nagpapasakop sa soberaniya ni Jehova. Kun siring, aprobado sinda.

13. (a) Ano an sinasamba kan mayoriya sa mga nag-eerok sa daga, asin ano an isinisimbolisar kan tanda sa saindang angog o sa saindang kamot? (b) Kaya taano ta kakaipuhanon an pakatagal?

¹³ Sa ibong na lado, ilinaladawan kan kapitulo 13 an natatada pa sa mga nag-eerok sa daga na nagsasamba sa sistema politikal ni Satanas, na isinisimbolisar nin sarong mabangis na hayop. Tinatawan sinda nin tanda sa saindang “angog” o sa saindang “kamot,” na nagpapaheling kan saindang mental saka pisikal na pagsuportar sa sistemang iyan. (Kapahayagan 13:1-8, 16, 17) Dangan, idinudugang kan kapitulo 14: “Kun an siisay man nagsasamba sa mabangis na hayop asin sa ladawan kaiyan, asin nag-aako nin tanda sa saiyang angog o sa saiyang kamot, sia man mainom sa arak kan kaanggotan nin Dios na ibububo nin daing kasalak sa kopa kan saiyang grabeng kaanggotan . . . Digdi nangangaipo nin pakatagal para sa mga banal, an mga nag-ootob kan mga togon nin Dios asin kan pagtubod ni Jesus.” (Kapahayagan 14:9, 10, 12) Sa pag-agi nin panahon, paorog nang paorog na an magigin hapot: Siisay an sinusuportaran nindo? Si Jehova saka an saiyang soberaniya o an maraot na sistema politikal na sinisimbolisaran kan mabangis na hayop? Magigin maogma an mga naglilikay na mag-ako kan tanda kan hayop asin fiel na nagtatagal na sakop kan soberaniya ni Jehova.

14, 15. Anong mensahe an minasaliot sa paglaladawan kan Kapahayagan sa Armagedon, na may anong kahulogan para sa sato?

¹⁴ An mga namamahala sa “bilog na ineerokan na daga” nasa direksion na may makakabangga, pasiring sa pakikienkuentro ki Jehova sa isyu nin soberaniya. An magigin ultimong labanan iyo an Armagedon, an “ralaban kan dakulang aldaw nin Dios na Makakamhan sa gabos.” (Kapahayagan 16:14, 16) May minalataw na nakapupukaw nin interes na komentong garo luminukso sa tahaw mismo kan paglaladawan sa pagtipon sa mga namamahala sa daga para sa pakikilaban ki Jehova. Pinondo mismo ni Jesus an bisyon tanganing sabihon: “Uya! Ako madatong siring sa parahabon. Maogma an saro na nagpupuka asin iniingatan an saiyang pan-ibabaw na mga gubing, tanganing dai sia maglakaw na huba asin maheling nin mga tawo an saiyang kasopganan.” (Kapahayagan 16:15) Tibaad nananabihan kaini an mga Levitang bantay sa templo na hinuhubaan kan saindang gubing asin sinosopog sa publiko kun sinda manompongan na natotorog sa panahon na sinda nagbabantay.

¹⁵ Malinaw an mensahe: Kun gusto niatong makaligtas sa Armagedon, dapat na kita magdanay na mapagbantay sa espirituwal asin ingatan an simbolikong mga gubing na nagpapamidbid sa sato bilang fiel na mga Saksi ni Jehova Dios. Magigin kitang maogma kun lilikayan niato an espirituwal na pananamlay asin magpapadagos kita na daing pagluya, na maigot na nakikakabtang sa pagpalakop kan “daing katapusan na maogmang bareta” kan napatindog nang Kahadean nin Dios.—Kapahayagan 14:6.

‘Maogma an Siisay Man na Nag-ootob kan mga Tataramon na Ini’

16. Taano an pantapos na mga kapitulo kan Kapahayagan ta partikularmenteng dahelan nin kaogmahan?

¹⁶ An maogmang mga nagbabasa kan libro nin Kapahayagan daing ibang maginibo kundi lumukso an puso sa kagayagayahan mantang binabasa ninda an pantapos na mga kapitulo na naglaladawan kan satong mamuraway na paglaom—sarong bagong langit asin sarong bagong daga, an boot sabihon, sarong matanos na langitnon na gobyernong Kahadean na namamahala sa sarong bago, lininig na sosyedad nin tawo, gabos sa kaomawan ni “Jehova Dios na Makakamhan sa gabos.” (Kapahayagan 21:22) Mantang natatapos an makangangalas na serye nin mga bisyon, an mensaherong anghel nagsabi ki Juan: “An mga tataramon na ini fiel asin totoo; iyo, isinugo ni Jehova na Dios kan ipinasabong na mga tataramon kan mga propeta an saiyang anghel tanganing ipaheling sa saiyang mga oripon an mga bagay na kaipuhan na mangyari sa madali. Asin, uya! Ako madatong sa madali. Maogma an siisay man na nag-ootob kan mga tataramon kan hula kan balumbon na ini.”—Kapahayagan 22:6, 7.

17. (a) Anong garantiya an itinatao sa Kapahayagan 22:6? (b) Maninigo na kita magin mapagbantay na likayan an ano?

¹⁷ Magigirumdoman kan maogmang mga nagbabasa kan Kapahayagan na may mga tataramon na kaagid kaini sa kapinonan kan “balumbon.” (Kapahayagan 1:1, 3) Sinisierto sa sato kan mga tataramon na ini na an gabos na “bagay” na ihinula sa pangultimong librong ini kan Biblia ‘mangyayari sa dai na mahahaloy.’ Kita nasa poro nang marhay kan panahon kan katapusan kaya an may koneksion na mga pangyayari na ihinula sa Kapahayagan segurado na madali nang mangyari nin sunod-sunod. Kun siring, dai kita maninigong patorogon nin ano man na garo baga karigonan sa sistema ni Satanas. Gigirumdomon nin mapagbantay na nagbabasa an mga patanid na itinao sa mga mensaheng ipinadara sa pitong kongregasyon sa Asia asin lilikayan an mga silo nin materyalismo, idolatriya, inmoralidad, pagigin gabinhod, asin apostatang sektaryanismo.

18, 19. (a) Taano ta kaipuhan pang dumatong si Jesus, asin sa anong paglaom na ipinahayag ni Juan kita naglalaom man? (b) Sa anong katuyohan na si Jehova “madatong” pa?

¹⁸ Sa libro nin Kapahayagan, ipinaiisi nin makapira ni Jesus: “Ako madatong sa madali.” (Kapahayagan 2:16; 3:11; 22:7, 20a) Sia kaipuhan pang dumatong sa paghokom sa Dakulang Babilonya, sa sistema politikal ni Satanas, asin sa gabos na tawo na habong pumasakop sa soberaniya ni Jehova, na irinerepresentar ngonyan kan Mesiyanikong Kahadean. Idinudungan niato an satong tingog ki apostol Juan, na nagkagsing: “Amen! Madia, Kagurangnan na Jesus.”—Kapahayagan 22:20b.

¹⁹ Sinasabi mismo ni Jehova: “Uya! Ako madatong sa madali, asin dara ko an balos na sakong itatao, tanganing balosan an lambang saro oyon sa saiyang gibo.” (Kapahayagan 22:12) Mantang hinahalat an mamuraway na balos na buhay na daing katapusan bilang kabtang magsalang kan ipinanugang “bagong langit” o “bagong daga,” kita logod maigot na umiba sa pangagda sa gabos na tawong sadiosan an puso: “‘Madia!’ Asin an siisay man na napapaha dumolok; an siisay man na boot kumua kan tubig nin buhay na daing bayad.” (Kapahayagan 22:17) Sinda logod magin man maogmang mga nagbabasa kan ipinasabong saka nakamomotibar na libro nin Kapahayagan!

[Nota sa ibaba]

Mga Punto Para sa Pagrepaso

◻ Anong pinakapaagihan an ginamit ni Jehova sa pagpaabot kan Kapahayagan, asin ano an manonodan niato digdi?

◻ Taano ta maninigo kitang maogma na basahon an mga mensahe na ipinadara sa pitong kongregasyon sa Asia?

◻ Paano kita maiingatan durante kan “oras nin pagbalo”?

◻ Anong kaogmahan an mapapasatuya kun ootobon niato an mga tataramon kan balumbon na igwa kan Kapahayagan?

[Retrato sa pahina 15]

Maogma an mga rinerekonoser an Ginikanan kan nakaoogmang notisya

[Retrato sa pahina 18]

Maogma an saro na nagpupuka