Maghinanyog sa Sinasabi kan Espiritu!

“An igwa nin talinga magdangog sa sinasabi kan espiritu sa mga kongregasyon.”—KAPAHAYAGAN 3:22.

1, 2. Anong hatol an inotro may labot sa mga mensahe ni Jesus sa pitong kongregasyon na nginaranan sa Kapahayagan?

AN MGA lingkod ni Jehova dapat na magtao nin atension sa ipinasabong nin espiritung mga tataramon ni Jesu-Cristo sa pitong kongregasyon na nginaranan sa libro kan Biblia na Kapahayagan. Tunay nanggad, an lambang saro kan mga mensaheng ini igwa kan hatol na ini: “An igwa nin talinga magdangog sa sinasabi kan espiritu sa mga kongregasyon.”—Kapahayagan 2:7, 11, 17, 29; 3:​6, 13, 22.

² Pinag-olayan na niato an mga mensahe ni Jesus sa mga anghel, o paraataman, sa Efeso, Smirna, asin Pergamo. Paano daw kita makikinabang sa sinabi nia paagi sa banal na espiritu sa apat pang kongregasyon?

Sa Anghel sa Tiatira

 3. Yaon saen an Tiatira, asin sa anong produkto iyan nangorognang midbid?

³ An “Aki nin Dios” nagtao nin komendasyon sagkod pagsagwe sa kongregasyon sa Tiatira. (Basahon an Kapahayagan 2:18-29.) An Tiatira (ngonyan Akhisar) yaon sa may sanga kan Salog nin Gediz (suanoy na Hermo) sa solnopan na Asia Minor. Bantog an siudad sa kadakol na produktong gibo nin kamot. An mga paragibo nin tugma duman naggagamit nin gamot kan tanom na madder bilang pinagkukuanan kan saindang midbid na marhay na eskarlata, o purpura. Si Lidia, na nagin Kristiana durante kan pagsongko ni Pablo sa Filipos sa Grecia, sarong “paratinda nin purpura, taga siudad nin Tiatira.”​—Gibo 16:12-15.

 4. Huli sa ano tinawan nin komendasyon an kongregasyon sa Tiatira?

⁴ Tinawan ni Jesus nin komendasyon an kongregasyon sa Tiatira huli sa marahay na mga gibo, pagkamoot, pagtubod, pakatagal, asin gibo sa ministeryo kaiyan. Sa katunayan, ‘an mga gibo nindang nahuri orog kisa kan enot.’ Minsan siring, dawa kun igwa kita nin marahay na rekord, dapat na nungka kitang magin pabaya sa satong moral na gawe-gawe.

5-7. (a) Siisay “an babaeng si Jezabel,” asin ano an dapat na gibohon manongod sa saiyang impluwensia? (b) An mensahe ni Cristo sa kongregasyon sa Tiatira nakatatabang sa diosnon na mga babae na gibohon an ano?

⁵ Pinababayaan kan kongregasyon sa Tiatira an idolatriya, falsong katokdoan, asin seksuwal na inmoralidad. Yaon sa tahaw ninda “an babaeng si Jezabel”—tibaad sarong grupo nin mga babae na an mga ugale kapareho kan maraot na si Reyna Jezabel kan sampulong tribong Kahadean nin Israel. May mga intelektuwal na nagsusuherir na an mga “propetisa” sa Tiatira naghingoang tentaran an mga Kristiano na sambahon an mga dios asin diosa kan asosasyon nin mga negosyante asin na magpartisipar sa mga kapiestahan na may kaibang mga kakanon na iinatang sa mga idolo. Mayo logod nin nagpapakang-propetisa na maghingoang kontrolon an iba sa Kristianong kongregasyon sa presenteng panahon!

⁶ ‘Madali nang itapok ni Cristo an babaeng si Jezabel sa higdaan nin helang, asin sa dakulang kahorasaan an mga nakikisambay sa saiya, apuera sana kun pagsolsolan ninda an saiyang mga gibo.’ An mga paraataman maninigo na nungkang magpadara sa siring na maraot na katokdoan asin impluwensia, asin mayo nin Kristiano na kaipuhan na gumibo nin espirituwal asin pisikal na pakikisaro o gumibo nin idolatriya tangani sanang marealisar na biyong maraot an “hararom na mga bagay ni Satanas.” Kun hihimateon niato an patanid ni Jesus, ‘pangangaptan niato nin higot an nasa sato na,’ asin dai kita dodominaron nin kasalan. Huling isinikwal ninda an maraot na mga gibo, makosog na mga pagmawot, asin mga obheto, an binuhay liwat na mga linahidan maako nin “autoridad sa mga nasyon” asin maiba ki Cristo sa pagronot sa sainda. An mga kongregasyon sa presenteng panahon igwa nin simbolikong mga bitoon, asin an mga linahidan tatawan kan “maliwanag na bitoon sa makaaga,” an Nobyo, si Jesu-Cristo, kun sinda binuhay na liwat sa langit.—Kapahayagan 22:16.

⁷ Pinatanidan an kongregasyon sa Tiatira na dai pabayaan an maraot na impluwensia kan nag-apostatar na mga babae. An ipinasabong nin espiritung mensahe ni Cristo sa kongregasyon nakatatabang sa diosnon na mga babae na magdanay sa iinasignar nin Dios na lugar ninda ngonyan. Dai ninda hinihingoang magkapot nin autoridad sa mga lalaki asin dai ninda inaakit an siisay man na tugang na lalaki na gumibo nin espirituwal o pisikal na pakikisaro. (1 Timoteo 2:12) Imbes, an siring na mga babae nagpapaheling nin halimbawa sa marahayon na mga gibo asin paglilingkod sa kaomawan nin Dios. (Salmo 68:11; 1 Pedro 3:1-6) Kun iniingatan kan kongregasyon an nasa sainda na—dalisay na doktrina asin gawe-gawe saka pinahahalagahan na marhay na paglilingkod sa Kahadean—si Cristo madatong na may maogmang mga balos, bakong paggadan.

Sa Anghel sa Sardis

 8. (a) Yaon saen an Sardis, asin ano an nagkapirang detalye manongod dian? (b) Taano ta kaipuhan kan kongregasyon sa Sardis an tabang?

⁸ An kongregasyon sa Sardis nangaipo nin apretadong tabang huli ta iyan gadan sa espirituwal. (Basahon an Kapahayagan 3:1-6.) Mga 50 kilometros sa timog nin Tiatira, an Sardis sarong maoswag na siudad. An komersio, an kabalunbonan kan lugar, asin an produksion nin tela asin alpombra na gibo sa lana nakatabang na iyan magin mayaman na siudad na kaidto igwa nin mga 50,000 na residente. Segun sa historyador na si Josefo, an Sardis igwa nin dakulang komunidad nin mga Judio kan enot na siglo B.C.E. Kabale sa mga kagabaan kan siudad an sarong sinagoga asin sarong templo kan diosa sa Efeso na si Artemis.

 9. Ano an maninigong gibohon kun an satong mga aktibidad sa paglilingkod mekanikal sana?

⁹ Sinabihan ni Cristo an anghel sa kongregasyon sa Sardis: “Aram ko an saimong mga gibo, na ika igwa kan ngaran na ika buhay, alagad ta ika gadan.” Paano kun kita igwa nin reputasyon na puka sa espirituwal alagad sa kadaklan torog kita sa Kristianong mga pribilehio asin an satong mga aktibidad nin paglilingkod mekanikal sana patin “madali nang magadan” sa espirituwal? Kun siring, kaipuhan niatong ‘girumdomon kun paano niato inako asin nadangog’ an mensahe kan Kahadean, asin maninigo niatong buhayon giraray an satong mga paghihingoa sa sagradong paglilingkod. Kaipuhan nanggad kitang pumoon na makikabtang nin bilog na puso sa Kristianong mga pagtiripon. (Hebreo 10:24, 25) Pinatanidan ni Cristo an kongregasyon sa Sardis: “Kun ika dai magmamata, ako madatong na siring sa parahabon, asin dai mo maaaraman kun anong oras ako madatong sa saimo.” Kumusta man sa satong kaaldawan? Sa dai na mahahaloy kita maninimbag.

10. Dawa sa sarong situwasyon na arog kan sa Sardis, ano an tibaad totoo sa nagkapirang Kristiano?

¹⁰ Dawa sa sarong situwasyon na arog kan sa Sardis, tibaad igwa nin nagkapira na ‘dai dinidigtaan an saindang pan-ibabaw na mga gubing asin nakalalakaw sa kaibahan ni Cristo na nakaputi huli ta sinda maninigo.’ Pinapagdadanay ninda an saindang Kristianong karakter, na nagdadanay na daing digta, moral asin relihioso, kan kinaban na ini. (Santiago 1:27) Huli kaini, ‘dai nanggad paparaon ni Jesus an saindang ngaran sa libro nin buhay, kundi mimidbidon nia sinda sa atubangan kan saiyang Ama asin kan mga anghel.’ Ipinahayag na maninigong maglakaw sa kaibahan ni Cristo, an saiyang grupong nobya nin mga linahidan gugubingan nin makintab, malinig, pinong lino na nagsisimbolisar sa matanos na mga gibo kan mga banal nin Dios. (Kapahayagan 19:8) An makangangalas na mga pribilehio nin paglilingkod na naghahalat sa sainda sa langit nagpapahiro sa sainda na daogon an kinaban na ini. May nakatagama man na mga bendisyon para sa mga tatawan nin daganon na buhay na daing sagkod. An saindang ngaran nakasurat man sa libro nin buhay.

11. Ano an maninigo niatong gibohon kun kita nagtutungka sa espirituwal?

¹¹ Mayo sa sato na gustong mapasa mamondong espirituwal na kamugtakan kan kongregasyon sa Sardis. Alagad kumusta kun mamansayan niato na kita nagtutungka na sa espirituwal? Maninigo na kita listong humiro para sa sato mismong ikararahay. Halimbawa baga kita naaakit sa maraot na mga gibo-gibo o nagigin pabaya sa pag-atender sa mga pagtiripon o sa satong ministeryo. Hagadon niato an tabang ni Jehova paagi sa odok na pamibi. (Filipos 4:6, 7, 13) An aroaldaw na pagbasa sa Biblia asin pag-adal sa Kasuratan asin mga publikasyon kan “fiel na mayordomo” makatatabang sa satong pagigin puka sa espirituwal. (Lucas 12:42-44) Sa siring kita magigin arog kan mga taga Sardis na nag-ako kan pag-oyon ni Cristo, asin kita magigin bendisyon sa mga kapagtubod.

Sa Anghel sa Filadelfia

12. Paano nindo ilaladawan an relihiosong kamugtakan sa suanoy na Filadelfia?

¹² Tinawan ni Jesus nin komendasyon an kongregasyon sa Filadelfia. (Basahon an Kapahayagan 3:7-13.) An Filadelfia (ngonyan Alasehir) iyo an asensadong sentro nin sarong rehion na gibohan nin arak sa solnopan na Asia Minor. Sa katunayan, an pangenot na dios kaiyan iyo si Dioniso, an dios nin arak. Minalataw na an mga Judio sa Filadelfia dai nagin mapanggana sa paghingoang kombensiron an mga Kristianong Judio duman na papagdanayon an nagkapirang kaugalean sa Ley ni Moises o balikan iyan.

13. Paano ginamit ni Cristo an “liabe ni David”?

¹³ Si Cristo “igwa kan liabe ni David,” asin sa siring ipinaniwala sa saiya an gabos na intereses kan Kahadean asin an pag-administrar sa kapamilya sa pagtubod. (Isaias 22:22; Lucas 1:32) Ginamit ni Jesus an liabeng iyan sa pagbukas nin mga oportunidad asin pribilehio sa Kahadean para sa mga Kristiano sa suanoy na Filadelfia asin sa iba pang lugar. Poon kan 1919 ibinugtak nia sa atubangan kan “fiel na mayordomo” “an sarong dakulang pinto” na pasiring sa paghuhulit kan Kahadean na mayong nagtutumang na makakasera. (1 Corinto 16:9; Colosas 4:2-4) Siempre, an pinto pasiring sa mga pribilehio sa Kahadean serado sa mga taga “sinagoga ni Satanas,” huli ta sinda bakong espirituwal na mga Israelita.

14. (a) Ano an ipinanuga ni Jesus sa kongregasyon sa Filadelfia? (b) Paano kita maiingatan na dai mapukan durante kan “oras nin pagbalo”?

¹⁴ Pinanugaan ni Jesus an mga Kristiano sa suanoy na Filadelfia nin arog kaini: “Huli ta ika nag-otob kan tataramon dapit sa sakong pakatagal, iingatan taka man sa oras nin pagbalo, na madatong sa bilog na ineerokan na daga.” Kaipuhan sa paghuhulit an klase nin pakatagal na ipinaheling ni Jesus. Nungka siang nagpadaog sa kaiwal kundi padagos niang ginibo an kabotan kan saiyang Ama. Kun siring, si Cristo binuhay liwat sa inmortal na buhay sa langit. Kun pinangangaptan niato nin higot an satong desisyon na sambahon si Jehova asin sinusuportaran niato an Kahadean paagi sa paghuhulit kan maogmang bareta, iingatan kitang dai mapukan durante kan presenteng panahon nin pagbalo, an “oras nin pagbalo.” ‘Padagos niatong pangangaptan nin higot an nasa sato na’ na hale ki Cristo paagi sa pagmamaigot na dugangan an intereses na iyan kan Kahadean. An paggibo kaini magbubunga nin sarong daing kaagid sa halaga na langitnon na korona para sa mga linahidan asin nin daganon na buhay na daing katapusan para sa maimbod na kairiba ninda.

15. Ano an hinahagad sa mga magigin ‘harigi sa templo nin Dios’?

¹⁵ Sinabi pa ni Cristo: “An makadaog—gigibohon ko siang harigi sa templo kan sakong Dios, . . . asin isusurat ko sa saiya an ngaran kan sakong Dios asin an ngaran kan siudad nin sakong Dios, an bagong Jerusalem na naghihilig hale sa langit hale sa sakong Dios, asin an sakong bagong ngaran.” An linahidan na mga paraataman dapat na suportaran an tunay na pagsamba. Dapat sindang magdanay na kualipikadong magin miembro kan “bagong Jerusalem” paagi sa paghuhulit manongod sa Kahadean nin Dios asin pagdadanay na malinig sa espirituwal. Kaipuhan ini kun boot nindang magin mga harigi sa pinamuraway na langitnon na templo asin tanganing magkaigwa sinda kan ngaran kan siudad nin Dios bilang langitnon na mga siudadano kaiyan asin magkaigwa man kan ngaran ni Cristo bilang saiyang nobya. Asin, siempre, dapat sindang magkaigwa nin mga talinga na ‘nagdadangog sa sinasabi kan espiritu sa mga kongregasyon.’

Sa Anghel sa Laodicea

16. Ano an nagkapirang impormasyon manongod sa Laodicea?

¹⁶ Sinagwe ni Cristo an kontento na sa sadiring kongregasyon sa Laodicea. (Basahon an Kapahayagan 3:14-22.) Mga 150 kilometros sa sirangan nin Efeso asin yaon sa pinagkasangahan kan mayor na mga ruta nin negosyo sa balunbon na kababan kan Salog nin Lico, an Laodicea sarong asensadong marhay na siudad sa pagmanupaktura asin sentro pinansial. Midbid na marhay an mga gubing na gibo sa itom na lana sa rehion na iyan. Bilang an lugar nin sarong bantog na eskuelahan sa medisina, an Laodicea an posibleng nagprodusir kan bolong sa mata na inaapod polbos hale sa Frigia. Si Asclepio, sarong dios nin medisina, saro sa pangenot na mga dios kan siudad. An Laodicea garo baga igwa nin darudakulang populasyon nin mga Judio, na an nagkapira minalataw na medyo mayaman.

17. Taano ta sinagwe an mga taga Laodicea?

¹⁷ Kinakaolay an kongregasyon sa Laodicea paagi sa “anghel” kaiyan, si Jesus nagtataram na may autoridad bilang “an fiel asin totoong saksi, an kapinonan kan paglalang nin Dios.” (Colosas 1:13-16) An mga taga Laodicea sinagwe huli sa pagigin “bakong malipot ni mainit” sa espirituwal. Huling sinda gabinhod, itutupga sinda ni Cristo sa saiyang ngoso. Dai kutana sinda maninigong madepisilan na saboton iyan. An kaharaning Hierapolis igwa nin mainit na mga burabod, asin an Colosas igwa nin malipot na tubig. Minsan siring, huling an tubig kaipuhan na paagihon sa mga tubo nin medyo haroharayo pasiring sa Laodicea, posibleng marhay na gabinhod na iyan pag-abot sa siudad. Sa sarong kabtang, pinapabolos iyan sa sarong pasulogan nin tubig. Mas harani pa sa Laodicea, iyan nagbobolos sa linabot na mga bloke nin gapo na sinemento tanganing magkasurugpon.

18, 19. Paano daw matatabangan an mga Kristiano sa presenteng panahon na arog kan mga taga Laodicea?

¹⁸ An mga indibiduwal ngonyan na kapareho kan mga taga Laodicea mayo nin init na nakaaanimar ni lipot na nakakapapresko. Siring sa gabinhod na tubig, sinda itutupga! Habo ni Jesus na sinda magin saiyang representante sa pagtaram, bilang linahidan na “mga embahador na karibay ni Cristo.” (2 Corinto 5:20) Kun dai sinda magsolsol, mawawara ninda an saindang pribilehio bilang mga parabalangibog kan Kahadean. An mga taga Laodicea naghanap nin daganon na mga kayamanan asin ‘dai nakaaram na sinda nasasakitan, kaherakherak, dukha, buta, asin huba.’ Tanganing mahale an saindang espirituwal na kadukhaan, pagkabuta, asin kahubaan, an siisay man na arog ninda ngonyan kaipuhan na bumakal ki Cristo nin ‘dinalisay na bulawan’ nin nabalong pagtubod, “maputing pan-ibabaw na mga gubing” nin katanosan, asin “bolong sa mata” na nagpapalinaw sa espirituwal na pagheling. An Kristianong mga paraataman naoogmang tabangan sinda na mamatean an saindang espirituwal na pangangaipo tangani na sinda magin “mayaman sa pagtubod.” (Santiago 2:5; Mateo 5:3) Dugang pa, kaipuhan sindang tabangan kan mga paraataman na ilahid an espirituwal na “bolong sa mata”​—na akoon asin sunodon an katokdoan, hatol, halimbawa, asin nasa isip na aktitud ni Jesus. Ini an bolong kontra sa ‘mawot kan laman asin mawot kan mga mata asin pagpaabaw-abaw kan kaya sa buhay.’​—1 Juan 2:15-17.

¹⁹ Sinasagwe asin dinidisiplina ni Jesus an gabos na padangat nia. An mga paraataman na sakop nia dapat man na gibohon iyan na may kapadangatan. (Gibo 20:28, 29) An mga taga Laodicea kaipuhan na ‘magmaigot asin magsolsol,’ na binabago an saindang kaisipan asin pamumuhay. Bueno, igwa daw sa sato na natuod na sa sarong estilo nin pamumuhay na kun saen an satong sagradong paglilingkod sa Dios nagigin bako nang gayong mahalaga sa buhay? Kun siring ‘bumakal kita ki Jesus nin bolong sa mata’ tanganing maheling niato an kahalagahan nin maigot na paghanap nguna kan Kahadean.​—Mateo 6:33.

20, 21. Sairisay an naghihimate nin tama sa ‘pagtuktok’ ni Jesus ngonyan, asin ano an mga tinatanaw ninda?

²⁰ “Uya!” sabi ni Cristo, “ako nagtitindog sa may pinto asin nagtutuktok. Kun an siisay man magdangog sa sakong tingog asin bukasan an pinto, malaog ako sa saiyang harong asin mamamanggi kaiba nia asin sia kaiba ko.” Si Jesus parateng nagtatao kaidto nin espirituwal na pagtotokdo mantang sia nagkakakan. (Lucas 5:29-39; 7:36-50; 14:1-24) Nagtutuktok sia ngonyan sa pinto nin kongregasyon na arog kan sa Laodicea. An mga miembro daw kaiyan mahimate sa pagtuktok nia, ibabalik an saindang kapadangatan sa saiya, maogmang aakoon sia sa tahaw ninda, asin totogotan siang tokdoan sinda? Kun iyo, si Cristo makikibangkete sa sainda para sa saindang dakulang espirituwal na kapakinabangan.

²¹ An “ibang karnero” ngonyan piguratibong pinadadagos si Jesus, asin an siring na paghiro minagiya pasiring sa buhay na daing katapusan. (Juan 10:16; Mateo 25:34-40, 46) Sa lambang nakadaog na linahidan, itatao ni Cristo an pribilehio na ‘tumukaw sa kaibanan nia sa saiyang trono, kun paanong sia nakadaog asin tuminukaw sa kaibanan kan saiyang Ama sa Saiyang trono.’ Iyo, sa linahidan na mga nakadaog, ipinanunuga ni Jesus an dakulang balos na trono sa kaibanan nia sa too kan saiyang Ama sa langit. Asin an nakadaog na ibang karnero inaantisipar an makangangalas na lugar sa daga sa irarom kan pamamahala kan Kahadean.

Mga Leksion Para sa Sato Gabos

22, 23. (a) Paano makikinabang an gabos na Kristiano sa mga tataramon ni Jesus sa pitong kongregasyon? (b) Ano an maninigo na magin determinasyon niato?

²² Daing duda na an gabos na Kristiano puedeng makinabang nin dakula sa mga tataramon ni Jesus sa pitong kongregasyon sa Asia Minor. Halimbawa, sa pakarisa na si Cristo nagtao nin angay na komendasyon, an mamomoton na Kristianong kamagurangan napahihiro na tumao nin komendasyon sa mga indibiduwal asin kongregasyon na marahay an kamugtakan sa espirituwal. Kun saen igwa nin mga kaluyahan, tinatabangan kan kamagurangan an mga kapagtubod na iaplikar an mga remedyo sono sa Kasuratan. Kita gabos puedeng padagos na makinabang sa laen-laen na aspekto kan hatol na itinao ni Cristo sa pitong kongregasyon, sagkod na iinaaplikar niato iyan na may pagngayongayo asin mayo nin pag-atraso.a

²³ An huring mga aldaw na ini bakong panahon nin pagigin kontento na sa sadiri, materyalismo, o ano man na iba pang bagay na puedeng magin dahelan na kita magtao nin paramas na sanang paglilingkod sa Dios. Kun siring, an gabos na kongregasyon logod na padagos na lumiwanag na marhay bilang mga kandelero na pinapagdadanay ni Jesus sa saindang namumugtakan. Bilang fiel na mga Kristiano, logod na kita pirmeng magin determinado na tumao nin atension kun si Cristo nagtataram asin maghinanyog sa sinasabi kan espiritu. Kun siring, mapapasatuya an nagdadanay na kagayagayahan bilang mga paradara nin liwanag sa ikamumuraway ni Jehova.

[Nota sa Ibaba]

Ano an Isisimbag Nindo?

• Siisay an “babaeng si Jezabel,” asin taano ta dai sia dapat arogon kan diosnon na mga babae?

• Ano an nagin kamugtakan sa kongregasyon sa Sardis, asin ano an puede niatong gibohon tangani na makalikay na dai magin arog kan dakol na Kristianong nag-eerok duman?

• Ano an mga ipinanuga ni Jesus sa kongregasyon sa Filadelfia, asin paano iyan minaaplikar ngonyan?

• Taano ta sinagwe an mga taga Laodicea, alagad anong mga tinatanaw an ibinugtak sa atubangan kan maigot na mga Kristiano?

[Ritrato sa pahina 16]

Dapat na likayan an maraot na ugale kan “babaeng si Jezabel”

[Mga Ritrato sa pahina 18]

Ibinugtak ni Jesus sa atubangan kan saiyang mga parasunod “an sarong dakulang pinto” pasiring sa mga pribilehio sa Kahadean

[Ritrato sa pahina 20]

Maogma daw nindong inaako si Jesus asin naghihinanyog kamo sa saiya?