An mga Anghel—Nakakaapektar daw Sinda sa Saindong Buhay?

TALAGA daw na may mga anghel? O sinda daw bunga sana nin imahinasyon? Kun talagang yaon sinda, nakakaapektar daw sinda sa saindong buhay?

Sasaro sana an masasarigan na gikanan para sa mga simbag sa siring na mga hapot. Iyan an ipinasabong na Rekord na itinao nin Dios sa katawohan—an saiyang Tataramon, an Banal na Biblia. Manongod dian si apostol Pablo nagsurat: “An gabos na Kasuratan ipinasabong nin Dios asin kapakipakinabang . . . sa paghusay kan mga bagay.”—2 Timoteo 3:16.

Kaya, makasasarig kita na an Biblia magtatao sato nin prangkang simbag manongod sa pag-eksister nin mga anghel asin kun baga sinda nakakaapektar sa sato. Tunay na masasabi sato kan Kaglalang sa uniberso kun baga kabilang an mga anghel sa saiyang mga linalang.

Tunay daw an mga Anghel?

An Biblia malinaw na nagsasabi: “Ginigibo niang [nin Dios] mga espiritu an saiyang mga anghel.” (Hebreo 1:7) Kaya an Kaglalang igwa nin espiritung mga linalang sa kalangitan. An mga ini dai niato naheheling, asin sinda makapangyarihan.—Salmo 104:4; 2 Pedro 2:11.

An katuyohan daw nin Dios an mga anghel magin sanang impersonal, malibog na mga bagay? Kun siring an kamugtakan, taano ta ilinaladawan kan Biblia an mga anghel bilang may pagmate? Halimbawa, sinasabi kaiyan sa sato na kan ibugtak an pundasyon kan daga, an mga anghel “maogmang nagkururahaw, asin an gabos na aki nin Dios [an mga anghel] nagkururahaw sa pag-omaw.”—Job 38:4-7.

Minalataw na, kapareho kan intelihenteng mga linalang nin Dios digdi sa daga, an intelihenteng mga espiritung linalang, an mga anghel, may sadiring personalidad. Minsan ngani an sinasabi sana kan Biblia ngaran nin duduwa sanang anghel (si Miguel asin Gabriel), an bagay na an mga anghel may ngaran nakadudugang sa saindang pagigin indibiduwal. (Lucas 1:11, 19, 26; Judas 9) Mapuwersang kinokondenar kan Biblia an pagsamba sa mga anghel, asin kaiba dian an pamimibi sa sainda. Imbes na kita mamibi sa mga anghel, hinahatolan kita ni apostol Pablo: “Sa gabos na bagay paagi sa pamibi asin pagngayongayo na may pasalamat ipahayag nindo sa Dios an saindong mga kahagadan.”—Filipos 4:6; Kapahayagan 19:10; 22:8, 9.

Alagad an mga anghel daw ginibo na mayo kan kapangyarihan nin personal na pagpili sa tama asin sala arog nin mga robot na daing isip? Bako, an mga anghel may sadiring boot, kapareho nin mga tawo. Halimbawa, kan an nagkapirang anghel maglapas sa mga pagboot nin Dios kan mga kaaldawan ni Noe, isinikwal sinda nin Dios, asin pinaluwas sinda sa langitnon na mga korte nin Dios. An saindang pakisuway risang kapahayagan kan pagigin indibiduwal nin mga anghel.—Genesis 6:1, 2; 2 Pedro 2:4; Mateo 25:41.

Kun siring, an Biblia nagtatao sato nin nakatatabang na impormasyon manongod sa ginikanan, pag-eksister, asin naturalesa nin mga anghel. An paglihis pa sa sinasabi kan Tataramon nin Dios manongod sa sainda puwedeng magin dahelan na an saro maghorophorop nin daing kamanungdanan sa mga hapot na dai sinisimbag kan Biblia. Iyan puwede pa nganing magbunga nin pagtao nin sobrang atension o pagsamba sa mga anghel. (Colosas 2:18) Pinagigirumdom kita kan Biblia na ‘siertohon an orog na mahalagang mga bagay’ asin dai ‘lumihis sa ipinahayag nang maogmang bareta.’—Filipos 1:10; Galacia 1:8.

An mga Anghel sa Katuyohan nin Dios

Minsan ngani tibaad umoyon an dakol sa ginikanan asin karakteristiko nin mga anghel, pipira sana an talagang nakaaaram kan dahelan kan saindang pag-eksister asin kun paano nakakaapektar sa satong buhay ngonyan an mga anghel.

Sa Biblia, an duwang termino na ginagamit para sa “anghel” mal·’akhʹ (Hebreo) asin agʹge·los (Griego). Ini pareho nangangahulogan “mensahero.” Iyan may sinasabi sato manongod sa saro sa mga trabaho nin mga anghel. An mga anghel nagseserbing mensahero, o paradara nin bareta, sa pag-oltanan nin Dios asin nin tawo.

Halimbawa, isinugo an sarong anghel na magdara nin mensahe ki Abraham manongod sa saiyang aking si Isaac asin sa bendisyon na maabot paagi sa saiya, bendisyon na puwede niatong akoon. (Genesis 22:11-17) May isinugong sarong anghel tanganing makipag-olay ki Moises. (Gibo 7:37, 38) An Dios nagsugo man nin sarong anghel ki propeta Elias na may darang mga instruksion. (2 Hade 1:3) Asin may sarong anghel na nagpaheling ki Jose, an ama-amahan ni Jesus, na may darang espesyal na mga instruksion manongod sa omboy.—Mateo 2:13.

Isinugo man an mga anghel sa pagprotehir sa banwaan nin Dios: “An anghel ni Jehova nagkakampo sa palibot kan mga natatakot sa saiya, asin sinda saiyang iliniligtas.” (Salmo 34:7) Halimbawa, ilinuwas nin sarong anghel sa bilanggoan si apostol Pedro. (Gibo 12:6-11) Tinabangan nin duwang anghel si Lot asin an saiyang mga aking babae na makaligtas sa kalaglagan nin Sodoma asin Gomorra paagi sa pag-iba sa sainda sa pagluwas sa lugar na idto. Alagad an agom ni Lot dai guminawe nin lubos na kaoyon sa mga anghel, kaya nalaglag sia kaiba kan mga siudad na idto.—Genesis 19:1-26.

An Biblia nagsasabi nin dakol pang pangyayari nin pagtabang nin mga anghel, na pinatutunayan an sinasabi kan Hebreo 1:7 asin 14: “Manongod sa mga anghel sia nagsasabi: ‘Asin ginigibo niang mga espiritu an saiyang mga anghel, asin sarong laad nin kalayo an saiyang mga lingkod sa publiko.’ Bako daw na sinda gabos espiritu para sa paglingkod, na isinugo tanganing maglingkod sa mga magmamana kan kaligtasan?”

An sarong anghel nagdara nin dakulang karangahan ki Jesus. Kan banggi bago sia magadan, aram ni Jesus kun ano an naghahalat sa saiya—na sia pasasaloiban, hahampakon, asin maringis na gagadanon. Kaipuhan nia an kosog tanganing matagalan an pagbalong ini sa saiyang integridad. Sa delikadong oras na idto, may anghel na nagpaheling sa saiya ‘sa pagpakosog sa saiya.’ Kanigoan na bendisyon para ki Jesus an pagrangang idto nin anghel! Bilang resulta, minsan ngani sia nag-agi nin labi-labing kasakitan na “an saiyang ganot nagin siring sa mga toro nin dugo na nagdadalahay sagkod sa daga,” sia nakatagal na maimbod sagkod sa kagadanan.—Lucas 22:43, 44.

Ginamit man nin Dios an mga anghel sa pagpara sa mga kaiwal kan saiyang banwaan. Kan isapeligro kan Kapangyarihan Pankinaban nin Asiria an suanoy na mga parasamba sa Dios, nangyari an minasunod: “Nangyari kan bangging idto na luminuwas an anghel ni Jehova asin linugad an sanggatos may walong polo may limang ribo sa kampo kan mga Asirio. Kan magbarangon sinda pagkaaga, tara, sinda gabos bangkay na.” (2 Hade 19:35) Maheheling nindo an dakulaon na kapangyarihan nin mga anghel—saro sanang anghel an kinaipuhan sa paggadan sa 185,000 na mga paratumang sa Dios asin sa saiyang banwaan!

An mapaglanghad na si Herodes napaatubang man sa kapangyarihan nin sarong anghel. Kan paghonaon ni Herodes na sia garo na dios, “tolos na hinampak sia kan anghel ni Jehova, huli ta dai nia itinao an kamurawayan sa Dios; asin kinakan sia nin mga ulod asin nautsan.”—Gibo 12:21-23.

Sinasabi sato na sa dai na mahahaloy, kun tapuson na nin Dios an bilog na maraot na palakaw na ini nin mga bagay, gagamiton liwat an mga anghel bilang mga parapadusa. “Isusugo kan Aki nin tawo an saiyang mga anghel, asin hahaleon ninda sa saiyang kahadean an gabos na bagay na nagpapasingkog asin an mga tawo na naggigibo nin katampalasanan, asin iaapon ninda sinda sa naglalaad na horno.”—Mateo 13:41, 42.

Kun siring, an mga anghel harayoon sa tibaad iniimahinar nin dakol na tawo. An Aleman na autor sa relihiyon na si Dr. Manfred Barthel nagsabi: “Kun boot niatong imahinaron an mga anghel kan Kagurangnan na kapareho sa pakamansay sa sainda kan mga autor kan Daan na Tipan, enot kaipuhan na lingawan niato an may lusot na mga kerubin . . . na dekorasyon sa satong mga card.”—What the Bible Really Says.

Paano Kamo Naaapektaran nin mga Anghel?

Minsan siring, yaon pa man giraray an hapot: Ano an ginigibo ngonyan kan mga anghel? Naaapektaran daw kita ninda ngonyan? Iyo nanggad!

Girumdomon na sa saiyang hula manongod sa “pagtatapos kan palakaw nin mga bagay” ihinula ni Jesus: “Kun an Aki nin tawo magdatong na sa saiyang kamurawayan [na kinakapotan na an kapangyarihan sa Kahadean], asin an gabos na anghel kaibanan nia, dangan sia matukaw sa saiyang mamurawayon na trono. Asin an gabos na nasyon titiponon sa atubang nia, asin pagbubulagbulagon nia an mga tawo.”—Mateo 24:3; 25:31, 32.

Paano gigibohon an pagbubulagbulag na ini sa mga tawo? Ihinula ni Jesus: “An maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon; dangan madatong an katapusan.” (Mateo 24:14) Iyo, ginagamit nin Dios an saiyang banwaan digdi sa daga sa paggibo kan lakop sa globong paghuhulit na ini.

An Kahadean nin Dios iyo an gobyerno na magtatao kan solamenteng solusyon sa mga problema nin katawohan. Ngonyan, an mensahe manongod dian ibinabalangibog sa bilog na kinaban kan labing tolong milyon na Saksi ni Jehova, na suportado nin mga anghel. “Siring an mangyayari sa pagtatapos kan palakaw nin mga bagay: an mga anghel maruluwas asin ibubulag an mga maraot sa mga matanos.”—Mateo 13:49.

An ginigiyahan nin anghel na paghuhulit na ini ngonyan nagkakamit nin laen-laen na reaksion sa mga tawo. An iba nagsasabi na sibot-sibot sinda tanganing maghinanyog o nagsasayumang maghinanyog. An iba nag-aalangan o nag-uurong-sulong. Pero, an dakol na may sadiosan na puso, na nagmamakolog sa saindang ngapit, boluntad na nagkuyog. Paano?

Sa 208 kadagaan, an mga Saksi ni Jehova nakikipag-adal sa Biblia sa minilyon na tawo na “nakamamate kan saindang espirituwal na pangangaipo” asin ‘nagugutom sa katanosan.’ (Mateo 5:3, 6) Ipinaheheling nin dakol na eksperyensia na parateng ginigiyahan nin mga anghel an mga lingkod nin Dios na madarahan an siring na mga may sadiosan na puso kan mensahe nin kaligtasan. Simbolikong ilinaladawan kan Kapahayagan 14:6 an sarong “anghel na naglalayog sa tahaw kan langit” na igwa nin “daing katapusan na maogmang bareta na ipahahayag sa mga nag-eerok sa daga.” Tunay na iyan nangyayari mismo ngonyan! Paano ini makakaapektar sa saindong ngapit?

An mga Anghel sa Saindong Ngapit

Maliwanag na sinasabi kan Biblia na an satong panahon iyo an “huring mga aldaw” kan presenteng palakaw na ini. (2 Timoteo 3:1-5) Sinasabi man sato kan Biblia na an mga anghel ngonyan “nagtitindog sa apat na kanto kan daga, na nagpopogol sa apat na doros kan daga.” (Kapahayagan 7:1) Ano an kahulogan kan simbolismong ini?

Huling nasa “kanto” kan daga, an mga anghel nasa kamugtakan na butasan an mapanlaglag na “doros” hale sa gabos na direksion. Mayong lugar sa daga na makaliligtas, na mangangahulogan nin ‘pagratak,’ o kalaglagan, para sa maraot na palakaw na ini asin sa gabos na nagsusuportar dian. Kaya an mga anghel nin Dios ilinaladawan na andam nang humiro kun itao na an senyal!—Kapahayagan 7:3; 19:11-21.

Alagad an ‘pagratak’ para sana sa mga dai naghihinanyog sa suportado nin anghel na mensahe na ihinuhulit ngonyan sa bilog na daga. Dai kaiyan aanohon an mga naghahanap sa Dios asin naghihinanyog sa mensahe kan Kahadean. Sinda iingatan, arog kan sinasabi kan Tataramon nin Dios: “Hanapa nindo si Jehova, kamo gabos na mahoyo sa daga . . . Hanapa nindo an katanosan, hanapa nindo an kahoyoan. Tibaad kamo matago sa aldaw kan kaanggotan ni Jehova.”—Sofonias 2:3.

Dangan ano an magigin kamugtakan kan mga “mahoyong” iyan? An Salmo 37:11 nagsasabi: “An mga mahoyo mismo magmamana kan daga, asin sinda nanggad magkakararanga nin labi-labi sa nagsosopay na katoninongan.” Gurano kahaloy? “An mga matanos mismo magmamana kan daga, asin sinda mag-eerok dian sagkod lamang.” (Salmo 37:29) Iyan nangangahulogan na an buhay na daing katapusan magigin posible sa daga na gigibohon na paraiso, arog kan sinabi ni Jesus.—Lucas 23:43.

Kun siring, an kaipuhan na ihapot nindo iyo ini: ‘Ano daw an magigin ngapit ko?’ An simbag depende sa kun ano an reaksion nindo sa paggiya nin mga anghel. Kamo daw maghihinanyog asin makuyog kun iinaatubang sa saindo an mensahe na suportado ninda? Kun iyo, makakabilang kamo sa puwedeng tumanaw na may kompiansa sa ngapit, na igwa kan seguradong panuga nin Dios: “An kinaban maagi sana asin an horot kaiyan, alagad an naggigibo kan kabotan nin Dios magdadanay sagkod lamang.”—1 Juan 2:17.

[Ritrato sa pahina 7]

An mga anghel ngonyan ‘pinopogolan an apat na doros.’ Taano?