Sarong Dakulang Kadaklan na Nagtatao nin Banal na Paglilingkod
“Sinda nagtatao sa saiya nin banal na paglilingkod aldaw asin banggi sa saiyang templo.”—KAPAHAYAGAN 7:15.
1. Anong makahulogan na pangyayari sa espirituwal na pakasabot an naabot kan 1935?
KAN Mayo 31, 1935, nagkaigwa nin dakulang kagayagayahan sa tahaw kan mga delegado sa sarong kombension kan mga Saksi ni Jehova sa Washington, D.C. Duman, sa enot na pangyayari, an dakulang kaburonyogan (o, dakulang kadaklan) sa Kapahayagan 7:9 malinaw na ipinamidbid kaoyon kan iba pang kabtang kan Biblia asin sono sa mga pangyayari na nagpoon nang maotob.
2. Ano an nagpaheling na an sarong nagdadakol na bilang nakasabot na dai sinda inapod nin Dios pasiring sa langitnon na buhay?
2 Mga anom na semana bago kaini, sa selebrasyon kan Pamanggihan kan Kagurangnan sa mga kongregasyon kan mga Saksi ni Jehova, 10,681 kan mga presente (mga 1 sa 6) an dai nakikabtang sa emblemang tinapay asin arak, asin an 3,688 kaini aktibong mga parabalangibog kan Kahadean nin Dios. Taano ta dai sinda nakikabtang sa mga emblema? Huli ta basado sa saindang nanodan sa Biblia, nasabotan ninda na dai sinda inapod nin Dios sa langitnon na buhay pero puwede sindang magkaigwa nin kabtang sa mamomoton na mga probisyon ni Jehova sa ibang paagi. Kaya sa kombension na idto, kan hagadon kan espiker: “Puwede daw tabi na tumindog an gabos na igwa kan paglaom na mabuhay sagkod lamang digdi sa daga,” ano an nangyari? Rinibo an nagtirindog, na sinundan nin halawig na pag-urupakan kan mga nagdadangog.
3. Taano an pakamidbid sa dakulang kaburonyogan ta nagtao nin bagong pampakosog sa ministeryo sa langtad, asin ano an nagin saboot kan mga Saksi manongod kaini?
3 An nanodan kan mga delegado sa kombension na idto nagtao nin bagong pampakosog sa saindang ministeryo. Saindang nasabotan na ngonyan, bago an katapusan kan daan na palakaw, bako sanang nagkapirang ribo kundi dakulang kaburonyogan nin mga tawo an tatawan nin oportunidad na lumaog sa areglo ni Jehova para sa ikaliligtas nin buhay, na may paglaom na mabuhay sagkod lamang sa sarong paraisong daga. Nakaoogma nanggad sa pusong mensahe an iinatubang duman sa mga mamomoton sa katotoohan! Narealisar kan mga Saksi ni Jehova na igwang dakulang gibohon na dapat hamanon—sarong magayagayang gibohon. Pakalihis nin mga taon, nagirumdoman ni John Booth, na nagin miembro kan Namamahalang Grupo: “An asambleang idto nagtao samo nin dakulang ikapaggagayagaya.”
4. (a) Sagkod saen aktuwal na nagkaigwa nin pagtipon sa dakulang kadaklan poon kan 1935? (b) Sa anong paagi nagtatao nin ebidensia an mga kabilang sa dakulang kadaklan na igwa sinda nin buhay na pagtubod?
4 Durante kan suminunod na mga taon, an bilang kan mga Saksi ni Jehova biglang nagdakol. Sa ibong kan parateng madahas na paglamag sa sainda durante kan Guerra Mundial II, an saindang bilang haros natriple sa laog nin sarong dekada. Asin an 56,153 na parahayag na nagpapatotoo sa publiko kan 1935 luminangkaw, kan 1994, sa labing 4,900,000 na parabalangibog kan Kahadean na nasa labing 230 kadagaan. An dakulang mayoriya kan mga ini naglaom na may galagang pag-antisipar na makabilang sa mga bibiyayaan ni Jehova nin sangkap na buhay sa sarong paraisong daga. Kun ikokomparar sa sadangoton na aripompon, sinda tunay na nagin dakulang kadaklan. Bako sindang mga tawo na nagsasabi na sinda nagtutubod pero dai ipinaheheling iyan. (Santiago 1:22; 2:14-17) Sinda gabos naghihiras sa iba kan maogmang bareta manongod sa Kahadean nin Dios. Saro daw kamo sa maogmang kaburonyogan na iyan? An pagigin aktibong Saksi sarong importanteng nagpapamidbid na tanda, pero labi pa dian an kalabot.
“Nagtitindog sa Atubangan kan Trono”
5. Ano an ipinaririsa kan bagay na an dakulang kadaklan “nagtitindog sa atubangan kan trono”?
5 Sa bisyon na itinao ki apostol Juan, naheling nia sinda na “nagtitindog sa atubangan kan trono asin sa atubangan kan Kordero.” (Kapahayagan 7:9) An saindang pagtindog sa atubangan kan trono nin Dios, na sinasabi sa kontekstong ini, nagpaparisa na sinda nagtatao nin lubos na pagmidbid sa soberaniya ni Jehova. Dakol an kabale dian. Halimbawa: (1) Minimidbid ninda an diretso ni Jehova na magdesisyon para sa saiyang mga lingkod sa kun ano an marahay asin maraot. (Genesis 2:16, 17; Isaias 5:20, 21) (2) Naghihinanyog sinda ki Jehova kun sia nagtataram sainda paagi sa saiyang Tataramon. (Deuteronomio 6:1-3; 2 Pedro 1:19-21) (3) Pinahahalagahan ninda an importansia kan pagpapasakop sa mga pinaniwalaan ni Jehova nin pangangataman. (1 Corinto 11:3; Efeso 5:22, 23; 6:1-3; Hebreo 13:17) (4) Minsan ngani bakong sangkap, maigot nindang hinihingoa na sumunod sa teokratikong paggiya, bakong may maraot na boot, kundi boluntad, gikan sa puso. (Talinhaga 3:1; Santiago 3:17, 18) Sinda nasa atubangan kan trono sa pagtao nin banal na paglilingkod ki Jehova, na saindang odok na iginagalang asin namomotan na marhay. Sa kaso kan dakulang kadaklan na ini, an saindang ‘pagtindog’ sa atubangan kan trono nagpapaheling kan pag-oyon kan Saro na nakatukaw sa trono. (Ikomparar an Kapahayagan 6:16, 17.) Pag-oyon basado sa ano?
“Nagugubingan nin Maputing mga Gubing”
6. (a) Ano an boot sabihon kan pagigin “nagugubingan nin maputing mga gubing” kan dakulang kadaklan? (b) Paano an dakulang kadaklan nagkakamit nin matanos na kamugtakan sa atubangan ni Jehova? (c) Sagkod saen nakaiimpluwensia sa buhay kan dakulang kadaklan an pagtubod sa pinabolos na dugo ni Cristo?
6 An paglaladawan ni apostol Juan sa saiyang naheling nagsasabi na an mga miembro kan dakulang kadaklan na ini “nagugubingan nin maputing mga gubing.” An maputing mga gubing na iyan nagsisimbolo sa saindang malinig, matanos na kamugtakan sa atubangan ni Jehova. Paano ninda nakamit an siring na kamugtakan? Namasdan na niato na sa bisyon ni Juan sinda nagtitindog “sa atubangan kan Kordero.” Minimidbid ninda si Jesu-Cristo bilang “an Kordero nin Dios na naghahale kan kasalan kan kinaban.” (Juan 1:29) Nadangog ni Juan na nagpaliwanag an saro sa mga magurang na, sa bisyon, presente sa trono nin Dios: “Hinugasan ninda an saindang mga gubing asin pinaputi iyan sa dugo kan Kordero. Kaya ngani sinda yaon sa atubangan kan trono nin Dios.” (Kapahayagan 7:14, 15) Sa piguratibong paagi, hinugasan ninda an saindang mga gubing paagi sa paggibo nin pagtubod sa nakababalukat na dugo ni Cristo. Bako sanang sa isip an saindang pag-oyon sa katokdoan kan Biblia manongod sa pantubos. An pag-apresyar kaiyan nakakaapektar sa kun anong klaseng tawo sinda sa laog; kaya, “paagi sa puso” na sinda naggigibo nin pagtubod. (Roma 10:9, 10) Ini igwa nin halawig na epekto sa kun ano an ginigibo ninda sa saindang buhay. May pagtubod, idinudusay ninda an saindang sadiri ki Jehova basado sa atang ni Cristo, sinisimbolisaran an pagdusay na iyan paagi sa bautismo sa tubig, tunay na namumuhay kaoyon sa saindang pagdusay, asin sa siring nagkakamit nin inooyonan na relasyon sa Dios. Kanigoan karahay na pribilehiyo—saro na dapat na ingatan nin marhay!—2 Corinto 5:14, 15.
7, 8. Paano an organisasyon ni Jehova nakatabang sa dakulang kadaklan na mapagdanay na daing digta an saindang mga gubing?
7 May mamomoton na pagmakolog para sa nagdadanay na ikararahay ninda, an organisasyon ni Jehova paorootrong idinoon an kaisipan asin paggawe na puwedeng makadigta, o makaramog, sa midbidan na mga gubing nin saro kaya, apesar kan panluwas na mga paghihingako, an saro dai nanggad makakasono sa makahulang paglaladawan sa Kapahayagan 7:9, 10. (1 Pedro 1:15, 16) Sinusuportaran an naenot nang ipinublikar, paorootrong ipinaheling kan The Watchtower, kan 1941 asin pakalihis kaiyan, na salang marhay na maghulit sa iba dangan, sa ibang oras, mapalabot sa mga paggawe na arog baga nin pakikisaro asin pagsambay. (1 Tesalonica 4:3; Hebreo 13:4) Kan 1947 idinoon na an mga pamantayan ni Jehova sa Kristianong pag-agom minaaplikar sa gabos na kadagaan; ano man an tibaad inooyonan sa lokal na kaugalean, an mga nagpapadagos sa gibo nin poligamya dai puwedeng magin Saksi ni Jehova.—Mateo 19:4-6; Tito 1:5, 6.
8 Kan 1973, ipinaheling sa mga Saksi ni Jehova sa bilog na kinaban na sinda gabos dapat na lumikay sa ano man na dai mapagdududahan na nakararamog na mga bisyo, arog baga kan salang paggamit nin tabako, maski saen man sinda—bako sanang sa Kingdom Hall o sa paglilingkod sa langtad kundi sa sekular man na trabaho o sa sarong tagong lugar na dai naheheling nin mga tawo. (2 Corinto 7:1) Kan 1987 sa pandistritong mga kombension kan mga Saksi ni Jehova, an Kristianong mga hobenes makosog na hinatolan na tanganing makapagpadanay nin malinig na kamugtakan sa atubangan nin Dios, dapat sindang magmaan tumang sa duwang klaseng buhay. (Salmo 26:1, 4) Paorootro, an The Watchtower nagpatanid tumang sa manlaenlaen na kabtang kan espiritu nin kinaban huli ta “an porma nin pagsamba na malinig asin daing digta sa pagheling kan satong Dios asin Ama” kabale an pagpapadanay sa sadiri na “daing digta kan kinaban.”—Santiago 1:27.
9. Siisay an aktuwal na matindog na may pag-oyon sa atubangan kan trono nin Dios pakatapos kan dakulang kahorasaan?
9 An mga pinahihiro kan saindang pagtubod na mamuhay sa paagi na makapagdanay na malinig sa espirituwal asin moral iyo an magdadanay na nagtitindog sa “atubangan kan trono” bilang inooyonan na mga lingkod nin Dios pakatapos kan maabot na dakulang kahorasaan. Sinda mga tawo na bako sanang minapoon sa Kristianong pamumuhay kundi maimbod na nagpapadagos dian.—Efeso 4:24.
“Mga Palma sa Saindang mga Kamot”
10. Ano an kahulogan kan mga palma na naheling ni Juan sa mga kamot kan dakulang kadaklan?
10 Kaiba sa lataw na mga bagay manongod sa dakulang kadaklan, siring kan naobserbaran ni apostol Juan, iyo na “igwa nin mga palma sa saindang mga kamot.” Ano an kahulogan kaiyan? Mayong duda na an mga palmang idto nagpagirumdom ki Juan dapit sa Judiong kapiyestahan nin mga tabernakulo, an pinakamagayagayang kapiyestahan sa Hebreong kalendaryo, na ginigibo kasunod kan pag-ani kun tig-init. Sono sa Pagboot, an mga dahon nin palma, na may kaibang mga sanga nin iba pang kahoy, ginamit sa paggibo nin mga payag-payag na iistaran durante kan kapiyestahan. (Levitico 23:39-40; Nehemias 8:14-18) Iwinawayway man iyan kan mga nagsasamba sa templo durante kan pag-awit nin Halel (Salmo 113-118). An pagwayway nin mga palma kan dakulang kadaklan posibleng nagpagirumdom man ki Juan kan okasyon na si Jesus suminakay pasiring sa Jerusalem mantang an sarong kadaklan nin mga parasamba magayagayang nagwawayway nin mga palma asin nagkukurahaw: “Omawon an minadatong sa ngaran ni Jehova, an hade nin Israel!” (Juan 12:12, 13) Kaya an pagwayway nin mga palma nagpaparisa na magayagayang pinapamuraway kan dakulang kadaklan an Kahadean ni Jehova asin an saiyang linahidan na Hade.
11. Taano an mga lingkod nin Dios ta tunay na nakanonompong nin kagayagayahan sa paglilingkod ki Jehova?
11 An siring na espiritu nin kagayagayahan an ipinaheheling kan dakulang kadaklan maski ngonyan mantang naglilingkod sinda ki Jehova. Dai ini nangangahulogan na dai na sinda napapaatubang sa mga kasakitan o na dai na sinda nakakaeksperyensia nin kamondoan o kolog. Alagad an satispaksion na minagikan sa paglilingkod asin pagpaogma ki Jehova nakakatabang na gumian an mga bagay na iyan. Kaya, an sarong misyonera na naglingkod kaiba kan saiyang agom sa laog nin 45 taon sa Guatemala nag-estorya dapit sa sagugurang na mga kamugtakan na inagihan ninda, mapagal na trabaho asin peligrosong pagbiyahe na kabtang nin buhay mantang hinihingoa ninda na ikapaabot an mensahe kan Kahadean sa mga baryo kan mga Indian. Sia nagkonklusyon: “Idto an panahon sa samong buhay na kami maogmahon na marhay.” Minsan ngani namamatean nia an mga epekto nin paggurang asin paghelang, kaiba sa huring mga isinurat sa saiyang dayari an mga tataramon na: “Idto maogmang buhay, nakakokontentong marhay.” Sa bilog na daga, iyan man an namamatean kan mga Saksi ni Jehova manongod sa saindang ministeryo.
“Banal na Paglilingkod Aldaw Asin Banggi”
12. Baga man durante nin aldaw o sa banggi, ano an namamasdan ni Jehova digdi sa daga?
12 An magayagayang mga parasambang ini nagtatao ki Jehova nin “banal na paglilingkod aldaw asin banggi sa saiyang templo.” (Kapahayagan 7:15) Sa bilog na globo, minilyon an nakikikabtang sa banal na paglilingkod na ini. Kun banggi sa ibang kadagaan asin tororog an mga tawo duman, sa ibang kadagaan aldaw asin an mga Saksi ni Jehova sibot na nagpapatotoo. Mantang nag-iitok an globo, sinda danay, aldaw asin banggi, na nag-aawit nin mga pag-omaw ki Jehova. (Salmo 86:9) Pero an aldaw-bangging paglilingkod na nasambitan sa Kapahayagan 7:15 orog pa nganing personal.
13. Paano ipinaririsa kan Kasuratan an kahulogan kan paglilingkod “aldaw asin banggi”?
13 An mga indibiduwal na minakompuwesto sa dakulang kadaklan nagtatao nin banal na paglilingkod aldaw asin banggi. Boot sabihon daw kaini na an gabos nindang ginigibo ibinibilang na banal na paglilingkod? Totoo na ano man an saindang ginigibo, pinag-aadalan nindang gibohon iyan sa paaging nagtatao nin onra ki Jehova. (1 Corinto 10:31; Colosas 3:23) Minsan siring, an “banal na paglilingkod” aplikado sana sa bagay na direktang kalabot an pagsamba nin saro sa Dios. An “aldaw asin banggi” na pakikikabtang sa sarong aktibidad nagpaparisa nin pagkaregular o pagigin dayaday saka odok na paghihingoa.—Ikomparar an Josue 1:8; Lucas 2:37; Gibo 20:31; 2 Tesalonica 3:8.
14. Ano an magpapangyari sa satong personal na paglilingkod sa langtad na makasono sa paglaladawan na “aldaw asin bangging” paglilingkod?
14 Mantang sinda naglilingkod sa daganon na patyo kan dakulang espirituwal na templo ni Jehova, an mga minakompuwesto sa dakulang kadaklan naghihingoa na regular asin dayaday na makikabtang sa ministeryo sa langtad. An iba ginibong pasohan ninda na makikabtang sa ministeryo sa langtad serosemana. An iba nagmamaigot bilang mga regular payunir o auxiliary payunir. Parate na an mga ini sibot na nagpapatotoo sa mga tinampo asin sa mga tindahan sa amay na aga. Tanganing matawan nin panahon an mga interesado, an ibang mga Saksi nagkokondukta nin mga pag-adal sa Biblia sa kamatangaan nin banggi. Sinda nagpapatotoo kun nananaod, kun nagbibiyahe, sa oras nin pangodto, asin paagi sa telepono.
15. Apuwera sa ministeryo sa langtad, ano an kabale sa satong banal na paglilingkod?
15 An pakikikabtang sa mga pagtiripon sa kongregasyon kabtang man kan satong banal na paglilingkod; siring man an gibohon na kalabot sa pagtotogdok asin pag-asikaso sa mga lugar nin Kristianong pagtiripon. Kabale an mga paghihingoa na pakosogon asin tabangan an Kristianong mga tugang na lalaki asin babae, sa espirituwal asin materyal na paagi, na magdanay na aktibo sa paglilingkod ki Jehova. Kabale digdi an gibohon kan satong mga Hospital Liaison Committee. An paglilingkod sa Bethel sa gabos na manlaenlaen na kabtang kaiyan, saka an paglilingkod bilang boluntaryo sa satong mga kombension, gabos banal na paglilingkod. Tunay nanggad, kun an buhay niato nasesentro sa satong relasyon ki Jehova, iyan pano nin banal na paglilingkod. Siring kan sinasabi sa teksto, an banwaan ni Jehova nagtatao nin “banal na paglilingkod aldaw asin banggi,” asin nakanonompong sinda nin dakulang kagayagayahan sa paggibo kaiyan.—Gibo 20:35; 1 Timoteo 1:11.
‘Hale sa Gabos na Nasyon, Tribo, Banwaan, Asin Tataramon’
16. Paano napapatunayan na totoo na an dakulang kadaklan “hale sa gabos na nasyon”?
16 Hale sa gabos na nasyon, an mga kabilang sa dakulang kadaklan minaarabot. An Dios dai nagpapalaen, asin an probisyon na pantubos na ginibo paagi ki Jesu-Cristo igo tanganing makinabang sinda gabos. Kan an dakulang kadaklan enot na mamidbid sa Makakasuratan na paagi kan 1935, an mga Saksi ni Jehova aktibo sa 115 kadagaan. Pag-abot kan mga taon nin 1990, an paghanap sa mga arog-karnero nakaabot sa labing doble an kabilangan na kadagaan.—Marcos 13:10.
17. Ano an ginigibo tanganing tabangan an mga tawo sa gabos na ‘tribo, banwaan, asin tataramon’ na makabilang sa dakulang kadaklan?
17 Sa paghanap sa may paglaom na magin mga miembro kan dakulang kadaklan, an mga Saksi ni Jehova nagtao nin atension bako sanang sa mga nasyon kundi pati sa mga tribo asin banwaan patin mga grupong magkakapareho an tataramon sa laog kan mga nasyon na iyan. Tanganing maabot an mga tawong ini, an mga Saksi nagpupublikar nin mga literatura sa Biblia sa labing 300 na tataramon. Kalabot digdi an pagsasanay sa asin pagkaigwa nin mga grupo nin kuwalipikadong mga paratradusir, pagtao nin mga komputer na nagagamit sa gabos na tataramon na ini, siring man an aktuwal na pag-imprenta. Durante sana kan nakaaging limang taon, 36 na tataramon, na ginagamit nin mga 98,000,000 katawo, an idinagdag sa lista. Dugang pa, an mga Saksi naghihingoa na personal na songkoon an mga tawong ini tanganing tabangan sinda na masabotan an Tataramon nin Dios.—Mateo 28:19, 20.
“Nagluwas sa Dakulang Kahorasaan”
18. (a) Kun magpoon na an dakulang kahorasaan, sairisay an iingatan? (b) Anong maogmang mga kapahayagan an gigibohon sa panahon na iyan?
18 Kun butasan na kan mga anghel an mga doros nin kalaglagan na nasasambitan sa Kapahayagan 7:1, bako sana na an linahidan na “mga oripon kan satong Dios” makakaeksperyensia kan mamomoton na pagprotehir ni Jehova kundi pati an dakulang kadaklan na uminiba sa sainda sa tunay na pagsamba. Siring kan pagkasabi ki apostol Juan, an mga kabilang sa dakulang kadaklan ‘maluwas sa dakulang kahorasaan’ bilang mga nakaligtas. Kanigoan na kurahaw nin pagpasalamat asin pag-omaw an itatao ninda sa panahon na iyan mantang sinda nagpapahayag: “Utang niato an kaligtasan sa satong Dios, na nagtutukaw sa trono, asin sa Kordero”! Asin an gabos na maimbod na lingkod nin Dios sa kalangitan madagdag kan saindang tingog sa pagpahayag: “Amen! An kaomawan asin an kamurawayan asin an kadonongan asin an pagpasalamat asin an dangog asin an kapangyarihan patin an kakosogan mapasa satong Dios sagkod lamang. Amen.”—Kapahayagan 7:10-14.
19. Sa anong magayagayang aktibidad galagang makikikabtang an mga makakaligtas?
19 Kanigoan kaogmang panahon iyan! An gabos na nabubuhay mga lingkod kan iyo sanang tunay na Dios! An pinakadakulang kagayagayahan kan gabos na ini yaon sa paglilingkod ki Jehova. Kadakol kan gigibohon—magayagayang gibohon! An daga gigibohon na Paraiso. Rinibong milyon na gadan an bubuhayon liwat dangan totokdoan sa mga dalan ni Jehova. Kanigoan kagayagayang pribilehiyo na makikabtang dian!
Ano an Saindong Komento?
◻ Ano an nagin epekto kan mga pangyayari kan 1935 sa ministeryo sa langtad kan mga Saksi ni Jehova?
◻ Ano an ipinaririsa kan bagay na an dakulang kadaklan ipinaheheling na “nagtitindog sa atubangan kan trono”?
◻ Paano maninigong makaapektar sa buhay an pagpahalaga sa dugo kan Kordero?
◻ Ano an kahulogan kan saindang pagwayway nin mga palma?
◻ Paano an dakulang kadaklan nagtatao nin banal na paglilingkod aldaw asin banggi?
[Mga retrato sa pahina 16, 17]
An saindang banal na paglilingkod nagpapaheling nin pagkaregular, kahigosan, asin odok na paghihingoa