Pagdatong ni Jesus na May Kamurawayan sa Kahadean

“[An] nagkapira sa mga uya digdi . . . dai magnanamit nin kagadanan sagkod na dai nguna ninda maheling an Aki nin tawo na minadatong sa saiyang kahadean.”​—MATEO 16:28.

1, 2. Ano an nangyari dai nahaloy pakalihis kan Pentecostes 32 C.E., asin ano an katuyohan kan pangyayari?

DAI nahaloy pakalihis kan Pentecostes 32 C.E., an tolo sa mga apostol ni Jesu-Cristo nakaheling nin dai malilingawan na bisyon. Sono sa ipinasabong na rekord, “ipinag-iba ni Jesus si Pedro asin si Santiago patin si Juan na tugang nia asin dinara sinda sa sarong halangkaw na bukid na sinda sana. Asin sia natranspigurar sa atubangan ninda.”​—Mateo 17:​1, 2.

² An bisyon nin transpigurasyon nagdatong sa sarong kritikal na panahon. Pinonan nang sabihon ni Jesus sa saiyang mga parasunod na sia magsasakit asin magagadan sa Jerusalem, alagad nadepisilan sindang saboton an saiyang mga tataramon. (Mateo 16:​21-23) Pinakosog kan bisyon an pagtubod kan tolong apostol ni Jesus bilang preparasyon sa saiyang maabot na kagadanan asin siring man sa kasunod na dakol na taon nin masakit na gibohon asin pagbalo sa Kristianong kongregasyon. May manonodan daw kita ngonyan sa bisyon? Iyo, huli ta an ipinanganino kaiyan totoong nangyayari sa satong panahon.

3, 4. (a) Ano an sinabi ni Jesus anom na aldaw bago kan transpigurasyon? (b) Iladawan an nangyari durante kan transpigurasyon.

³ Anom na aldaw bago kan transpigurasyon, sinabi ni Jesus sa saiyang mga parasunod: “An Aki nin tawo nakatalagang dumatong sa kamurawayan kan saiyang Ama kaiba an saiyang mga anghel, dangan babayadan nia an lambang saro sono sa saiyang gawe-gawe.” An mga tataramon na ini maootob sa “pagtatapos kan palakaw nin mga bagay.” Sinabi pa ni Jesus: “Sa katotoohan ako nagsasabi sa saindo na igwa nin nagkapira sa mga uya digdi na sa ano man na paagi dai magnanamit nin kagadanan sagkod na dai nguna ninda maheling an Aki nin tawo na minadatong sa saiyang kahadean.” (Mateo 16:​27, 28; 24:3; 25:​31-34, 41; Daniel 12:4) An transpigurasyon nangyari bilang kaotoban kan huring mga tataramon na ini.

⁴ Ano man nanggad an naheling kan tolong apostol? An minasunod iyo an paglaladawan ni Lucas sa nangyari: “Mantang [si Jesus] namimibi naliwat an itsura kan saiyang lalauogon asin an saiyang gubing nagin maputi na nagkikilyab. Siring man, uya! may duwang lalaki na nakikipag-olay sa saiya, na sinda Moises asin Elias. An mga ini nagpaheling na may kamurawayan asin nagpoon na magtaram manongod sa saiyang paghale na nakatalagang otobon nia sa Jerusalem.” Dangan, “an sarong panganoron naporma asin nagpoon na lumindong sa [mga apostol]. Kan sinda makalaog sa panganoron, nagkatarakot sinda. Asin may tingog na nagluwas sa panganoron, na sinasabi: ‘Iyo ini an sakong Aki, an sarong pinili. Maghinanyog kamo sa saiya.’”​—Lucas 9:​29-31, 34, 35.

Napakokosog an Pagtubod

 5. Ano an nagin epekto ki apostol Pedro kan transpigurasyon?

⁵ Ipinamidbid na ni apostol Pedro si Jesus bilang “an Cristo, an Aki kan nabubuhay na Dios.” (Mateo 16:16) An mga tataramon ni Jehova hale sa langit nagpatunay sa pagpamidbid na iyan, asin an bisyon ki Jesus na natranspigurar sarong panamit kan pagdatong ni Cristo na may kapangyarihan asin kamurawayan sa Kahadean, na sa katapustapusi mahokom sa katawohan. Labing 30 taon pakalihis kan transpigurasyon, si Pedro nagsurat: “Bakong paagi sa pagsunod sa mga putik na osipon na tinugdas sa katusohan na ipinamidbid mi sa saindo an kapangyarihan asin presensia kan satong Kagurangnan na Jesu-Cristo, kundi paagi sa pagigin mga saksing nakaheling sa saiyang kamurawayan. Huli ta sia nag-ako gikan sa Dios na Ama nin onra asin kamurawayan, kan an mga tataramon na siring kaini nagpatotoo sa saiya paagi sa makangangalas na kamurawayan: ‘Ini an sakong aki, na namomotan, na sako mismong inooyonan.’ Iyo, an mga tataramon na ini nadangog niamo na gikan sa langit mantang kami kaibanan nia sa banal na bukid.”​—2 Pedro 1:​16-18; 1 Pedro 4:​17.

 6. Ano an mga nangyari pakatapos kan transpigurasyon?

⁶ Ngonyan, an satong pagtubod napakokosog man kan naheling kan tolong apostol. Siempre, nagpadagos an mga pangyayari poon kan 32 C.E. Kan sumunod na taon, si Jesus nagadan asin binuhay liwat, na nagsakat pasiring sa too kan saiyang Ama. (Gibo 2:​29-36) Kan Pentecostes kan taon na idto, namundag an bagong “Israel nin Dios,” asin nagpoon an kampanya nin paghuhulit, na nagpoon sa Jerusalem asin kan huri naglakop sagkod sa kaporoporohi kan daga. (Galacia 6:16; Gibo 1:8) Haros tolos-tolos na nabalo an pagtubod kan mga parasunod ni Jesus. An mga apostol inarestar asin binurugbog huli ta nagsayuma sindang umontok sa paghuhulit. Paghaloyhaloy ginadan si Esteban. Dangan ginadan si Santiago, na nakaheling mismo kan transpigurasyon. (Gibo 5:​17-40; 6:8–7:​60; 12:​1, 2) Minsan siring, si Pedro asin Juan nagdanay na buhay tanganing fiel na maglingkod ki Jehova sa laog nin dakol pang taon. Sa katunayan, sa paghinanapos kan enot na siglo C.E., si Juan nagsurat nin dugang pang mga patanaw na bisyon ki Jesus na may langitnon na kamurawayan.​—Kapahayagan 1:​12-20; 14:14; 19:​11-16.

 7. (a) Kasuarin nagpoon na maotob an bisyon na transpigurasyon? (b) Kasuarin binayadan ni Jesus an nagkapira sono sa saindang gawe-gawe?

⁷ Poon sa kapinonan kan “aldaw kan Kagurangnan” kan 1914, naotob na an dakol sa bisyon na naheling ni Juan. (Kapahayagan 1:10) Kumusta an ‘pagdatong ni Jesus sa kamurawayan kan saiyang Ama,’ na ipinanganino kan transpigurasyon? An bisyon na ini nagpoon na maotob kan mamundag an langitnon na Kahadean nin Dios kan 1914. Kan si Jesus, arog sa sarong bitoon nin makaaaga, sumirang sa uniberso bilang bagong patukawon na Hade, idto garo baga pagpoon nin sarong bagong aldaw. (2 Pedro 1:​19; Kapahayagan 11:15; 22:16) May mga binayadan daw si Jesus kan panahon na idto sono sa saindang gawe-gawe? Iyo. Igwa nin makosog na ebidensia na dai nahaloy pakatapos kaiyan, nagpoon an langitnon na pagkabuhay liwat kan linahidan na mga Kristiano.​—2 Timoteo 4:8; Kapahayagan 14:13.

 8. Anong mga pangyayari an magigin kulminasyon kan kaotoban kan bisyon na transpigurasyon?

⁸ Pero, sa dai na mahahaloy si Jesus maabot “sa saiyang kamurawayan, asin an gabos na anghel kaibanan nia” tanganing hokoman an katawohan sa kabilogan. (Mateo 25:31) Sa panahon na iyan, ihahayag nia an saiyang sadiri sa bilog niang kahangahangang kamurawayan asin tatawan an “kada saro” nin matanos na bayad sa saiyang gawe-gawe. An mga arog-karnero magmamana nin buhay na daing katapusan sa Kahadean na inandam para sa sainda, asin an mga arog-kanding mapasiring sa “pagkaparang daing katapusan.” Kanigoan karahay na pagtatapos iyan kan kaotoban kan bisyon na transpigurasyon!​—Mateo 25:​34, 41, 46; Marcos 8:38; 2 Tesalonica 1:​6-10.

An Pinamuraway na Kairiba ni Jesus

 9. Maninigo daw niatong laoman na si Moises asin Elias makakaibanan ni Jesus sa kaotoban kan bisyon na transpigurasyon? Ipaliwanag.

⁹ Dai nagsosolo si Jesus sa transpigurasyon. Si Moises asin Elias naheling na kaiba nia. (Mateo 17:​2, 3) Sinda daw literal na presente? Dai, huli ta an duwang lalaking ini haloy nang gadan asin natotorog sa kabokabo na naghahalat nin pagkabuhay liwat. (Eclesiastes 9:​5, 10; Hebreo 11:35) Maheheling daw sinda kaiba ni Jesus pagdatong nia na may langitnon na kamurawayan? Dai, huli ta si Moises asin Elias nabuhay bago nabuksan sa mga tawo an langitnon na paglaom. Sinda magigin kabtang kan daganon na ‘pagkabuhay liwat kan mga matanos.’ (Gibo 24:15) Kaya an saindang pagigin yaon sa bisyon na transpigurasyon simbolo. Nin ano?

10, 11. Kiisay naglaladawan si Elias asin Moises sa laen-laen na konteksto?

¹⁰ Sa ibang konteksto, si Moises asin Elias makahulang mga persona. Bilang parapangoltanan kan tipan nin Ley, ipinanganino ni Moises si Jesus, an Parapangoltanan kan bagong tipan. (Deuteronomio 18:18; Galacia 3:​19; Hebreo 8:6) Ipinanganino ni Elias si Juan Bautista, sarong patienot na parabareta kan Mesiyas. (Mateo 17:​11-13) Dugang pa, sa konteksto kan Kapahayagan kapitulo 11, ipinanganganino ni Moises asin Elias an linahidan na natatada sa panahon kan katapusan. Paano niato iyan naaaraman?

¹¹ Bueno, buksan nindo an Kapahayagan 11:​1-6. Sa bersikulo 3 satong mababasa: “Papangyayarihon kong humula an sakong duwang saksi sa laog nin sangribo may duwang gatos may anom na polong aldaw na naggugubing nin telang sako.” An hulang ini naotob sa natatada kan linahidan na mga Kristiano durante kan Guerra Mundial I.a Taano ta duwang saksi? Huli ta an linahidan na natatada may mga ginigibo na, sa espirituwal na paagi, kapareho kan ki Moises asin Elias. An bersikulo 5 asin 6 padagos na nagsasabi: “Kun an siisay man boot na kologan [an duwang saksi], an kalayo minaluwas sa saindang ngoso asin sinosolo an saindang mga kaiwal; asin kun an siisay man magmawot na kologan sinda, sa paaging ini sia kaipuhan na magadan. An mga ini may autoridad na pintoan an langit tanganing dai mag-oran sa mga aldaw kan saindang paghula, asin sinda may autoridad sa mga tubig tanganing gibohon iyan na dugo asin hampakon an daga nin gabos na klase nin damat minsan makapira na booton ninda.” Sa siring, ipinagigirumdom sa sato an mga milagrong ginibo ni Elias asin Moises.​—Bilang 16:​31-34; 1 Hade 17:1; 2 Hade 1:​9-12.

12. Sa konteksto kan transpigurasyon, kiisay naglaladawan si Moises asin Elias?

¹² Siisay, kun siring, an ipinanganganino ni Moises asin Elias sa konteksto kan transpigurasyon? Si Lucas nagsasabi na sinda naheling kaiba ni Jesus na “may kamurawayan.” (Lucas 9:31) Malinaw nanggad na ipinanganganino ninda an mga Kristiano na linahidan nin banal na espiritu bilang “kapwa mga paramana” ni Jesus asin sa siring nag-ako kan makangangalas na paglaom na “iribang mapamuraway” kaiba nia. (Roma 8:17) An binuhay liwat na mga linahidan kaiba ni Jesus pagdatong nia sa kamurawayan kan saiyang Ama tanganing ‘bayadan an lambang saro sono sa saiyang gawe-gawe.’​—Mateo 16:27.

Mga Saksi na Arog ki Moises Asin Elias

13. Anong mga bagay an nagpapamidbid ki Moises asin Elias bilang angay na makahulang mga ladawan kan linahidan na mga kapwa paramana ni Jesus na pinamuraway kaiba nia?

¹³ Igwa nin lataw na mga bagay na nagpapamidbid ki Moises asin Elias bilang angay na makahulang mga ladawan kan linahidan na mga kapwa paramana ni Jesus. Si Moises asin Elias pareho nagserbing parataram ni Jehova sa laog nin dakol na taon. Pareho ninda inatubang an kabangisan nin sarong namamahala. Sa panahon nin pangangaipo, an kada saro sinustentohan nin sarong pamilya na tagaibang daga. Pareho sinda mapusong naghula sa mga hade asin nanindogan nin marigon tumang sa falsong mga propeta. Si Moises asin Elias pareho nakaheling kan mga pagpaheling kan kapangyarihan ni Jehova sa Bukid nin Sinai (na inapod man na Horeb). Sinda pareho nagnombra nin mga kasalihid sa sirangan na kampi kan Jordan. Asin sa mga panahon kapwa ni Moises (kaiba si Josue) asin Elias (kaiba si Eliseo) nagkaigwa nin pinakadakol na milagro, apuera kaidtong mga nangyari kan nabubuhay si Jesus.b

14. Paano an mga linahidan nagserbing mga parataram ni Jehova, arog ki Moises asin Elias?

¹⁴ Bako daw na ipinagigirumdom kaiyan gabos sa sato an Israel nin Dios? Iyo nanggad. Sinabi ni Jesus sa saiyang fiel na mga parasunod: “Kun siring paduman kamo asin gumibo kamo nin mga disipulo sa mga tawo kan gabos na nasyon, na bautismohan nindo sinda sa ngaran kan Ama asin kan Aki patin kan banal na espiritu, na tokdoan nindo sinda na otobon an gabos na bagay na ipinagboot ko sa saindo. Asin, uya! ako danay na nasa saindo sagkod sa pagtatapos kan palakaw nin mga bagay.” (Mateo 28:​19, 20) Bilang pagkuyog sa mga tataramon na ini, an linahidan na mga Kristiano nagseserbing mga parataram ni Jehova poon kan Pentecostes 33 C.E. sagkod ngonyan. Arog ki Moises asin Elias, inatubang ninda an kabangisan nin mga namamahala asin pinatotoohan sinda. Sinabi ni Jesus sa saiyang 12 apostol: “Dadarahon kamo sa atubangan nin mga gobernador asin hade huli sa sako, sa pagpatotoo sa sainda asin sa mga nasyon.” (Mateo 10:18) An saiyang mga tataramon paorootrong naootob durante kan kasaysayan kan Kristianong kongregasyon.​—Gibo 25:​6, 11, 12, 24-27; 26:3.

15, 16. Ano an mga pagkakaagid kan mga linahidan sa sarong lado saka ni Moises asin Elias sa ibong na lado kun dapit sa saindang (a) daing takot na paninindogan para sa katotoohan? (b) pag-ako nin tabang gikan sa mga bakong Israelita?

¹⁵ Dugang pa, an linahidan na mga Kristiano daing takot kapareho ni Moises asin Elias sa paninindogan para sa katotoohan tumang sa relihiosong kaputikan. Girumdoma kun paano dinenunsiar ni Pablo an Judiong falsong propeta na si Bar-Jesus asin mataktika alagad marigon na ibinuyagyag an pagigin falso kan mga dios kan mga taga-Atenas. (Gibo 13:​6-12; 17:​16, 22-31) Girumdoma man na sa presenteng mga panahon an linahidan na natatada mapusong ibinubuyagyag an Kakristianohan asin an siring na pagpatotoo nagpasakit sa saiya.​—Kapahayagan 8:​7-12.c

¹⁶ Kan dumulag si Moises sa kabangisan ni Faraon, nagpaili sia sa harong nin sarong bakong Israelita, si Reuel, na inapod man na Jetro. Paghaloyhaloy, si Moises nag-ako nin mahalagang hatol manongod sa organisasyon gikan ki Reuel, na an aking lalaki na si Hobab iyo an naggiya sa Israel sa kaawagan.d (Exodo 2:​15-22; 18:​5-27; Bilang 10:29) An mga miembro daw kan Israel nin Dios natabangan man sa kaagid na paagi nin mga indibiduwal na bakong linahidan na mga miembro kan Israel nin Dios? Iyo, sinusuportaran sinda kan “dakulang kadaklan” nin “ibang karnero,” na naheling durante kaining huring mga aldaw. (Kapahayagan 7:9; Juan 10:16; Isaias 61:5) Ihinuhula an mainit, mamomoton na pagsuportar na itatao kan mga “karnerong” ini sa saiyang linahidan na mga tugang, si Jesus makahulang nagsabi sa sainda: “Ako nagutom asin pinakakan nindo ako; napaha ako asin pinainom nindo ako. Estranghero ako asin inistimar nindo ako; huba, asin ginubingan nindo ako. Naghelang ako asin inataman nindo ako. Nabilanggo ako asin dinumanan nindo ako. . . . Sa katotoohan sinasabi ko sa saindo, Kun paanong ginibo nindo iyan sa saro sa pinakasadangoton kaining sakong mga tugang, ginibo nindo iyan sa sako.”​—Mateo 25:​35-40.

17. Paanong an mga linahidan nakaeksperyensia nin kaagid kan ki Elias sa Bukid nin Horeb?

¹⁷ Dugang pa, an Israel nin Dios may naeksperyensiahan na ikakokomparar sa inagihan ni Elias sa Bukid nin Horeb.e Arog ki Elias kan panahon na sia nagdudulag ki Reyna Jezabel, an natatakot na linahidan na natatada naghona na tapos na an saindang gibohon kan matapos an Guerra Mundial I. Dangan, arog man ki Elias, nakaolay ninda si Jehova, na nagdatong tanganing hokoman an mga organisasyon na naghihingakong iyo an “harong nin Dios.” (1 Pedro 4:​17; Malaquias 3:​1-3) Mantang an Kakristianohan nanompongan na nagkulang, an linahidan na natatada minidbid bilang an “fiel asin maimbod na oripon” asin ninombrahan na mamahala sa gabos na rogaring ni Jesus digdi sa daga. (Mateo 24:​45-47) Sa Horeb, si Elias nakadangog nin “sarong kalmado, hababang tingog” na napatunayan na tingog ni Jehova, na tinatawan sia nin dakol pang gigibohon. Sa matoninong na peryodo kan mga taon pakatapos kan guerra, an fiel na linahidan na mga lingkod ni Jehova nadangog an saiyang tingog sa mga pahina kan Biblia. Namansayan man ninda na igwa nin sugo sa sainda na dapat otobon.​—1 Hade 19:​4, 9-18; Kapahayagan 11:​7-13.

18. Paano pinaagi sa Israel nin Dios an pambihirang mga pagpaheling kan kapangyarihan ni Jehova?

¹⁸ Sa katapustapusi, pinaagi daw sa Israel nin Dios an pambihirang mga pagpaheling kan kapangyarihan ni Jehova? Pagkagadan ni Jesus, an mga apostol naggibo nin dakol na milagro, alagad an mga ini luway-luway na nawara. (1 Corinto 13:​8-13) Sa ngonyan, dai kita nakaheheling nin mga milagro sa pisikal na sentido. Sa ibong na lado, si Jesus nagsabi sa saiyang mga parasunod: “Sa katotoohan sinasabi ko sa saindo, An minatubod sa sako, an saro man na iyan magibo kan mga gibo na ginigibo ko; asin magibo sia nin mga gibo na orog pa kaini.” (Juan 14:12) Ini enot na naotob mantang ihinuhulit kan mga disipulo ni Jesus an maogmang bareta sa bilog na Imperyo nin Roma kan enot na siglo. (Roma 10:18) Orog pa ngani an mga nagigibo ngonyan mantang pinangengenotan kan linahidan na natatada an paghuhulit kan maogmang bareta “sa bilog na ineerokan na daga para sa pagpatotoo sa gabos na nasyon.” (Mateo 24:14) An resulta? Nangyari sa ika-20 siglo an pagtipon sa pinakadakulang kabilangan nin nagdusay, fiel na mga lingkod ni Jehova sa kasaysayan. (Kapahayagan 5:​9, 10; 7:​9, 10) Kahangahanga nanggad na ebidensia kan kapangyarihan ni Jehova!​—Isaias 60:22.

An mga Tugang ni Jesus Minadatong na May Kamurawayan

19. Noarin an linahidan na mga tugang ni Jesus maheheling na may kamurawayan kaiba nia?

¹⁹ Mantang natatapos kan natatada sa linahidan na mga tugang ni Jesus an saindang daganon na buhay, sinda pinamumuraway sa kaibanan nia. (Roma 2:​6, 7; 1 Corinto 15:53; 1 Tesalonica 4:​14, 17) Sa siring sinda nagigin inmortal na mga hade asin saserdote sa langitnon na Kahadean. Kaiba ni Jesus, sa panahon na iyan “papastoran [ninda] an mga tawo paagi sa sogkod na batbat kaya sinda magkakaparasa siring sa mga lalagan na dalipay.” (Kapahayagan 2:27; 20:​4-6; Salmo 110:​2, 5, 6) Kaiba ni Jesus, sinda maturukaw sa trono na hinohokoman an “doseng tribo nin Israel.” (Mateo 19:28) An nag-aagrangay na mga linalang galagang naghalat sa mga pangyayaring ini, na kabtang kan “paghahayag kan mga aki nin Dios.”​—Roma 8:​19-21; 2 Tesalonica 1:​6-8.

20. (a) Mapadapit sa anong paglaom na pinakosog kan transpigurasyon an pagtubod ni Pedro? (b) Paano pinakokosog kan transpigurasyon an mga Kristiano ngonyan?

²⁰ Si Pablo nagtaram dapit sa paghahayag ki Jesus sa panahon kan “dakulang kahorasaan” kan sia sumurat: “Sia [minadatong] tanganing pamurawayon may labot sa saiyang mga banal asin tanganing paghelingon na may pagngalas sa aldaw na iyan may labot sa gabos na guminibo nin pagtubod.” (Mateo 24:21; 2 Tesalonica 1:10) Kahangahanga nanggad na paglaom iyan para ki Pedro, Santiago, Juan, asin sa gabos na Kristianong linahidan nin espiritu! Pinakosog kan transpigurasyon an pagtubod ni Pedro. Sierto nanggad, an pagbasa manongod kaiyan nagpapakosog man sa satong pagtubod asin nagpaparigon sa satong kompiansa na sa dai na mahahaloy “babayadan [ni Jesus] an lambang saro sono sa saiyang gawe-gawe.” Naheheling kan fiel na linahidan na mga Kristiano na buhay pa sagkod ngonyan na segurado an saindang pagkompiar na sinda pamumurawayon kaiba ni Jesus. Napakosog an pagtubod kan ibang karnero sa pakaaram na sinda ililigtas nia sa katapusan kan maraot na palakaw na ini nin mga bagay pasiring sa mamuraway na bagong kinaban. (Kapahayagan 7:14) Kanigoan na pamparigon sa boot na magin marigon sagkod sa katapusan! Asin dakol pa an itotokdo sa sato kan bisyon na ini, siring kan satong maheheling sa minasunod na artikulo.

[Mga nota sa ibaba]

Nagigirumdoman daw Nindo?

◻ Sairisay an naheling na kaiba ni Jesus sa transpigurasyon?

◻ Paano pinakosog kan transpigurasyon an pagtubod kan mga apostol?

◻ Kan si Moises asin Elias maheling “na may kamurawayan” kaiba ni Jesus sa transpigurasyon, kiisay sinda nagrepresentar?

◻ Ano an mga pagkakaagid ni Moises asin Elias sa sarong lado saka kan Israel nin Dios sa ibong na lado?

[Retrato sa pahina 10]

An transpigurasyon nakapakosog sa pagtubod nin mga Kristiano kaidto asin ngonyan

3