Ano an Katotoohan Manungod sa mga Anghel?

Gusto ni Jehova na mabisto ta an saiyang pamilya sa langit. Parte kan pamilyang iyan an mga anghel, na inaapod na mga “aki nin Diyos.” (Job 38:7) Ano an sinasabi kan Bibliya manungod sa mga anghel? Paano sinda puwedeng makaimpluwensiya sa mga tawo? Gabos daw na anghel parte kan pamilya nin Diyos?

1. Siisay an mga anghel?

Linalang ni Jehova an mga anghel bago pa niya ginibo an daga. Arog niya, mga espiritu sinda na nakaistar sa langit. (Hebreo 1:14) Milyon-milyon an mga anghel, asin an kada saro sa sainda igwa nin kanya-kanyang personalidad. (Kapahayagan 5:11) Sinda “nag-uutob sa tataramon [ni Jehova], nagsusunod sa boses niya.” (Salmo 103:20) Kan suanoy na mga panahon, nagsusugo si Jehova kun minsan nin mga anghel para magpaabot nin mensahe asin para tabangan saka iligtas an mga lingkod niya. Sa ngunyan, ginigiyahan kan mga anghel an mga Kristiyano sa mga tawong gustong makanuod manungod sa Diyos.

2. Siisay si Satanas asin an saiyang mga demonyo?

May mga anghel na dai nagdanay na maimbod ki Jehova. An inot na anghel na nagrebelde iyo “an inaapod na Diyablo asin Satanas, na nanglalagalag sa bilog na daga.” (Kapahayagan 12:9) Gusto ni Satanas na mamahala sa iba, kaya inimpluwensiyahan niya an inot na mga tawo asin paghaloy-haloy pati an iba pang mga anghel na magrebelde man ki Jehova. An rebelyosong mga anghel na idto inaapod na mga demonyo. Pinalayas sinda ni Jehova sa langit dangan iinapon digdi sa daga, asin paparaon sinda pag-abot nin panahon.—Basahon an Kapahayagan 12:9, 12.

3. Paano hinihinguwa ni Satanas asin kan mga demonyo na dayaon kita?

Dinadaya ni Satanas asin kan mga demonyo an dakul na tawo paagi sa demonismo, o espiritismo—an pagpurbar na makikomunikar sa mga espiritu. Halimbawa, may mga tawo na nagkokonsulta sa mga astrologo, parahula, psychic, o albularyo. Pinupurbaran man kan iba an mga paagi nin pagbulong na may kaibang espiritismo. Napapatubod man an mga tawo na puwede nindang makaulay an mga gadan. Pero nagpapatanid sa sato si Jehova: “Dai kamo magpatabang sa mga espiritista, asin dai kamo magkonsulta sa mga parahula.” (Levitico 19:31) Pinapatanidan niya kita dahil gusto niya kitang protektaran laban ki Satanas asin sa mga demonyo. Mga kaiwal sinda nin Diyos, asin gusto ninda kitang gibuhan nin maraot.

ARAMON PA

4. Tinatabangan kan mga anghel an mga tawo na makanuod manungod ki Jehova

An mga anghel nin Diyos dai direktang naghuhulit sa mga tawo. Imbes, puwede nindang giyahan an mga lingkod nin Diyos na makaulay an mga tawo na gustong makanuod manungod sa Saiya. Basahon an Kapahayagan 14:6, 7, dangan pag-ulayan an mga hapot na ini:

• Sa paghuhulit, taano ta kaipuhan ta an tabang kan mga anghel?

• Nakakapakusog daw na maaraman na puwede kang giyahan kan mga anghel para makaulay an mga tawo na kaipuhan makadangog kan mensahe kan Bibliya? Taano?

5. Isikwal an espiritismo

Si Satanas asin an mga demonyo mga kaiwal ni Jehova. Kaiwal ta man sinda. Basahon an Lucas 9:38-42, dangan pag-ulayan an hapot na ini:

• Ano an ginigibo kan mga demonyo sa mga tawo?

Habo tang maimpluwensiyahan kan mga demonyo. Basahon an Deuteronomio 18:10-12, dangan pag-ulayan an mga hapot na ini:

• Ano an mga paagi na ginagamit kan mga demonyo para impluwensiyahan kita asin makikomunikar sa sato? Anong mga espiritistikong gibo an komun sa lugar nindo?

• Sa hiling mo, tama sana daw na ipagbawal sa sato ni Jehova an mga espiritistikong gibo na iyan? Taano?

I-play an VIDEO, dangan pag-ulayan an mga hapot na ini:

VIDEO: “Labanan Nindo an Diyablo” (5:02)

• Sa hiling mo, peligroso daw an anting-anting o pangontra na sulot kan aki ni Palesa? Taano?

• Ano an kaipuhan na gibuhon ni Palesa para maprotektaran an pamilya niya sa mga demonyo?

Kaidto pa, linalabanan na kan tunay na mga Kristiyano an mga demonyo. Basahon an Gibo 19:19 asin 1 Corinto 10:21, dangan pag-ulayan an hapot na ini:

• Taano ta importanteng halion an ano man na bagay na igwa ka na konektado sa espiritismo?

6. Ganahon an laban tumang ki Satanas asin sa saiyang mga demonyo

Si Satanas an tagapamahala kan mga demonyo. An nanginginot man sa maimbod na mga anghel iyo si Miguel na arkanghel, na saro pang pangaran ni Jesus. Gurano kamakapangyarihan si Miguel? Basahon an Kapahayagan 12:7-9, dangan pag-ulayan an mga hapot na ini:

• Siisay an mas makapangyarihan—si Miguel saka an saiyang mga anghel o si Satanas saka an saiyang mga demonyo?

• Sa hiling mo, dapat daw na matakot ki Satanas asin sa saiyang mga demonyo an mga parasunod ni Jesus?

Kaya mong manggana sa pakikipaglaban ki Satanas asin sa saiyang mga demonyo. Basahon an Santiago 4:7, dangan pag-ulayan an hapot na ini:

• Paano mo mapoprotektaran an saimong sadiri laban ki Satanas asin sa mga demonyo?

SUMARYO

Tinatabangan kita kan maimbod na mga anghel. Si Satanas asin an saiyang mga demonyo mga kaiwal ni Jehova, asin ginagamit ninda an espiritismo para dayaon an mga tawo.

Rebyu

• Paano an mga anghel ni Jehova nagtatabang sa mga tawo na makanuod manungod sa saiya?

• Siisay si Satanas asin an saiyang mga demonyo?

• Taano ta dapat mong isikwal an espiritismo?

HILINGON MAN

Aramon an mga patunay na si Jesus iyo si Miguel na arkanghel.

“Siisay si Miguel na Arkanghel?” (Artikulo sa jw.org/bcl)

Aramon an mga patunay na an Diyablo sarong tunay na persona.

“Totoo Daw an Diyablo?” (Artikulo sa jw.org/bcl)

Aramon kun paano nakabutas an sarong babayi sa impluwensiya kan mga demonyo.

“Nakanompong Sia nin Katuyohan sa Buhay” (An Torrengbantayan, Hulyo 1, 1993)

Aramon kun paano ginagamit ni Satanas an espiritismo para dayaon an mga tawo.

“The Truth About Magic, Sorcery, and Witchcraft” (The Road to Everlasting Life, part 5)