• Kapahayagan—An Kahulugan Kaiyan Para sa mga Kaiwal nin Diyos
    An Torrengbantayan (Pag-aadalan)—2022 | Mayo

    • IHINAYAG KUN SAIRISAY AN MGA KAIWAL NIN DIYOS

      An mabangis na hayop na may pitong payo sa Kapahayagan, na nagbubutwa hali sa dagat nin katawuhan. Igwa iyan nin sampulong sungay asin sampulong diyadema sa mga payo kaiyan asin an itsura kaiyan kaagid nin leopardo, an bitis kaagid kan sa oso, asin an nguso kaiyan kaagid kan sa leon.

      AN MABANGIS NA HAYOP NA MAY PITONG PAYO

      “Nagbubutwa [iyan] sa dagat” asin igwa nin pitong payo, sampulong sungay, asin sampulong diyadema. (Kap. 13:1-4) Nagrerepresentar iyan sa gabos na pulitikal na kapangyarihan na namahala sa mga tawo sa bilog na kasaysayan. An pitong payo nagrerepresentar sa pitong pambilog na kinaban na kapangyarihan na nagkaigwa nin dakulang epekto sa mga lingkod nin Diyos (Hilingon an parapo 6-8)

      6. Sa ano nanunungod an mabangis na hayop na may pitong payo na sinambit sa Kapahayagan 13:1-4?

      6 Ano an mabangis na hayop na may pitong payo? (Basahon an Kapahayagan 13:1-4.) Maririsa niyato na an itsura kan hayop kaagid nin leopardo pero an mga bitis kaiyan kaagid kan sa oso saka an nguso kaagid kan sa leon, asin igwa iyan nin sampulong sungay. An gabos na karakteristikong iyan mahihiling man sa apat na hayop na sinambit sa Daniel kapitulo 7. Pero, sa libro nin Kapahayagan, an gabos na karakteristikong iyan yaon sa saro sanang hayop, bakong sa apat na magkakaibang hayop. An mabangis na hayop na iyan nagrerepresentar bako sa saro sanang gobyerno o pambilog na kinaban na imperyo. Sinambit na namamahala iyan sa “lambang tribo asin banwaan asin lengguwahe saka nasyon.” Kaya siguradong mas dakula iyan kisa sa ano man na partikular na gobyerno nin sarong nasyon. (Kap. 13:7) Kun siring, an mabangis na hayop na iyan siyertong nagrerepresentar sa gabos na pulitikal na kapangyarihan na namahala sa mga tawo sa bilog na kasaysayan.b—Ecl. 8:9.