Si Jesus asin an saiyang kairiba namamahala hale sa sarong superyor na kamugtakan. Sa saiyang pangatorogan na bisyon, naheling man ni Daniel na “an kahadean asin an pamamahala . . . itinao sa banwaan na mga banal.” (Daniel 7:27) Si Jesus dai namamahala nin solo. May kairiba sia na mamamahala bilang mga hade asin maglilingkod bilang mga saserdote. (Kapahayagan 5:9, 10; 20:6) May labot sa sainda, si apostol Juan nagsurat: “Ako nagheling, asin, uya! an Kordero nagtitindog sa Bukid nin Sion, asin sa kaibanan nia an sanggatos may apat na polo may apat na ribo . . . na binakal hale sa daga.”—Kapahayagan 14:1-3.

An Kordero iyo si Jesu-Cristo na nasa saiyang katongdan sa Kahadean. (Juan 1:29; Kapahayagan 22:3) An Bukid nin Sion na ini nanonongod sa langit.a (Hebreo 12:22) Si Jesus asin an 144,000 na kairiba nia mamamahala hale sa langit. Kanigoan kalangkaw na kamugtakan kan pamamahala ninda! Huling yaon sa langit, mas mahiwas an naheheling ninda. Huling an langit an sentro kaiyan, an “kahadean nin Dios” inaapod man na “kahadean kan kalangitan.” (Lucas 8:10; Mateo 13:11) Mayo nin mga armas, dawa pa nuklear na mga pag-atake, an makakaabot asin makakapabagsak sa langitnon na gobyernong iyan. Dai iyan madadaog asin ootobon kaiyan an katuyohan ni Jehova para dian.—Hebreo 12:28.