“Nakaoogmang Notisya” Hale sa Apocalipsis

“Naheling ko an saro pang anghel na naglalayog sa tahaw kan langit, asin igwa sia nin daing katapusan na maogmang bareta na ipahahayag bilang nakaoogmang notisya sa mga nag-eerok sa daga.”—KAPAHAYAGAN 14:6.

 1. Minsan ngani an Mga Saksi ni Jehova nagtutubod na ipinasabong an librong Apocalipsis, taano ta bako sindang “sektang apocaliptico”?

AL KONTRARYO sa mga akusasyon tumang sa sainda, an Mga Saksi ni Jehova bakong “sektang apocaliptico” o “kulto sa pagkatunaw kan kinaban.” Minsan siring, inaako ninda an Apocalipsis, o libro nin Kapahayagan, bilang kabtang kan ipinasabong na Tataramon nin Dios. Totoo, an Kapahayagan talagang may mga mensahe nin paghokom tumang sa mga maraot. Alagad sa saindang paghuhulit sa publiko, an mga lingkod nin Dios sa pangenot nagkokonsentrar sa marahayon na paglaom na sinasabi sa Biblia, pati an yaon sa Apocalipsis, o Kapahayagan. Sa siring, dai ninda dinadagdagan o iniinaan an makahulang mga tataramon na yaon dian.—Kapahayagan 22:18, 19.

Mga Parabareta nin Nakaoogmang Notisya

 2. Ano an nagkapirang teksto na parateng ginagamit nin Mga Saksi ni Jehova sa saindang paghuhulit?

² An parateng sitaron na basehan sa Kasuratan kan pampublikong ministeryo kan Mga Saksi ni Jehova iyo an sinabi ni Jesus: “An maogmang baretang ini kan kahadean ibabareta sa bilog na ineerokan na daga para sa pagpatotoo sa gabos na nasyon; dangan madatong an katapusan.” (Mateo 24:14, nota sa ibaba) Asin ano an “maogmang baretang ini kan kahadean”? An dakol na Saksi masimbag paagi sa pagkotar nin mga bersikulo sa Kapahayagan kapitulo 20 asin 21 na nagtataram manongod sa Sangribong Taon na Paghade ni Cristo asin sa saiyang gobyerno sa Kahadean patin sa sosyedad nin tawo, na dian “mawawara na” an kagadanan, pagmondo, asin kolog.—Kapahayagan 20:6; 21:1, 4.

 3. Anong misyon an katimbang kan pampublikong ministeryo kan Mga Saksi ni Jehova?

³ Bilang mga parabareta kan nakaoogmang notisyang ini, an Mga Saksi ni Jehova sa katotoohan iyo an representante sa pagtaram nin sarong simbolikong langitnon na mensahero na an misyon sinasabi man sa Kapahayagan. “Naheling ko an saro pang anghel na naglalayog sa tahaw kan langit, asin igwa sia nin daing katapusan na maogmang bareta na ipahahayag bilang nakaoogmang notisya sa mga nag-eerok sa daga, asin sa lambang nasyon asin tribo asin tataramon patin banwaan.” (Kapahayagan 14:6) Kaiba sa “daing katapusan na maogmang bareta” an paisi na “an kahadean [o, pamamahala] kan kinaban nagin nang kahadean kan satong Kagurangnan asin kan saiyang Cristo” asin na nag-abot na “an itinalaan na panahon” ni Jehova “sa paglaglag sa mga naglalaglag kan daga.” (Kapahayagan 11:15, 17, 18) Bako daw na iyan talagang maogmang bareta?

An Tagama Para sa Sato kan Kapahayagan

 4. (a) Anong pundamental na mga katotoohan an sinasabi sa kapitulo 1 kan Kapahayagan? (b) Ano an hinahagad sa mga boot na makinabang sa nakaoogmang notisya?

⁴ An enot na kapitulo kan libro nin Kapahayagan iiniintrodusir si Jehova bilang “an Alfa asin an Omega, . . . an Saro na iyo ngonyan asin iyo kaidto patin iyo an madatong, an Makakamhan sa gabos.” Asin iiniintrodusir kaiyan an saiyang Aki, si Jesu-Cristo, bilang “an Fiel na Saksi,” “an panganay sa mga gadan,” asin “an Namamahala sa mga hade kan daga.” Iyan nagtataram man manongod ki Jesus bilang “namomoot sa sato asin nagtao sa sato nin katalingkasan hale sa satong mga kasalan paagi sa saiyang sadiring dugo.” (Kapahayagan 1:5, 8) Sa siring, poon sa kapinonan, ipinaliliwanag nin detalyado kan Kapahayagan an pundamental na mga katotoohan na nagliligtas-buhay. An “mga nag-eerok sa daga” dai makikinabang sa nakaoogmang notisya na dinara sa sainda apuera sana kun midbidon ninda an soberaniya ni Jehova, magkaigwa sinda nin pagtubod sa pinabolos na dugo ni Jesus, asin tumubod na sia binuhay liwat ni Jehova asin na si Cristo an Namamahala ngonyan sa daga na nombrado nin Dios.—Salmo 2:6-8.

 5. Sa anong katongdan ilinaladawan si Cristo sa kapitulo 2 asin 3 kan Kapahayagan?

⁵ An sumunod na duwang kapitulo ilinaladawan si Cristo Jesus bilang an mamomoton na langitnon na Paraataman sa mga kongregasyon kan saiyang mga disipulo digdi sa daga. An balumbon na ipinadara sa piniling pitong kongregasyon na Kristiano na yaon sa Asia Minor kan enot na siglo C.E. may pagparigon sa boot asin marigon na hatol na aplikado pa sagkod ngonyan. An mga mensaheng ipinadara sa mga kongregasyon parateng minapoon sa mga tataramon na arog kan “aram ko an saimong mga gibo” o “aram ko an saimong kahorasaan.” (Kapahayagan 2:2, 9) Iyo, aram nin eksakto ni Cristo kun ano an nangyayari sa mga kongregasyon kan saiyang mga disipulo. Inomaw nia an nagkapira huli sa saindang pagkamoot, pagtubod, pagmamaigot sa ministeryo, pakatagal, asin pagigin fiel sa saiyang ngaran saka tataramon. An iba saiyang sinagwe ta pinabayaan nindang lumipot an saindang pagkamoot ki Jehova asin sa saiyang Aki, o naholog sinda sa seksuwal na inmoralidad, idolatriya, o apostatang sektaryanismo.

 6. An bisyon na nasusurat sa kapitulo 4 tinatabangan an mga tawo na masabotan an ano?

⁶ An kapitulo 4 nagtatao nin nakapupukaw nin hararom na paggalang na bisyon kan langitnon na trono ni Jehova Dios. Nagtatao iyan nin kadikit na ideya sa kamurawayan kan presensia ni Jehova asin sa langitnon na estruktura nin pamamahala na gagamiton nia. An nakokoronahan na mga namamahala, na an mga trono nakapalibot sa prinsipal na trono sa uniberso, naghuhuruhod ki Jehova asin nagsasabi: “Maninigo ka, Jehova, na samong Dios, na mag-ako kan kamurawayan asin kan onra patin kan kapangyarihan, huli ta linalang mo an gabos na bagay, asin huli sa saimong kabotan an mga iyan naglataw asin nalalang.”—Kapahayagan 4:11.

 7. (a) Inaapodan kan anghel an mga nag-eerok sa daga na gibohon an ano? (b) Ano an mahalagang kabtang kan satong gibong pagtotokdo?

⁷ Ini daw may kahulogan sa mga tawo ngonyan? Iyo nanggad. Kun gusto ninda nin buhay na sakop kan Milenyal na Kahadean, dapat na himateon ninda an idinedeklarar kan “anghel na naglalayog sa tahaw kan langit”: “Matakot kamo sa Dios asin pamurawayon sia, huli ta nag-abot na an oras kan saiyang paghokom.” (Kapahayagan 14:6, 7) An saro sa mayor na mga katuyohan kan gibong pagtotokdo kan Biblia na ginigibo kan Mga Saksi ni Jehova tabangan an “mga nag-eerok sa daga” na mamidbid saka sambahon si Jehova, rekonoseron an saiyang pagigin Kaglalang, asin boluntad na pumasakop sa saiyang matanos na soberaniya.

An Kordero na Maninigo sa Onra

 8. (a) Paano ilinaladawan si Cristo sa kapitulo 5 asin 6? (b) Ano an manonodan sa bisyon na ini nin gabos na naghihinanyog sa nakaoogmang notisya?

⁸ An kasunod na duwang kapitulo, an 5 asin 6, iiniintrodusir si Jesu-Cristo bilang Kordero na nanompongan na maninigong magbukas nin sarong balumbon na may pitong tatak, sa siring ihinahayag sa simbolikong pananaram an mga mangyayari sa satong kaaldawan. (Ikomparar an Juan 1:29.) Sa simbolikong Korderong ini sinasabi nin langitnon na mga tingog: “Maninigo ka na magkua kan balumbon asin magbukas kan mga tatak kaiyan, huli ta ika ginadan asin paagi kan saimong dugo binakal mo an mga tawo manongod sa Dios hale sa lambang tribo asin tataramon asin banwaan patin nasyon, asin ginibo mo sinda na mani kahadean asin mga saserdote kan satuyang Dios, asin sinda mamamahala bilang mga hade sa daga.” (Kapahayagan 5:9, 10) Itinotokdo kan bisyon na ini na basado sa pinabolos na dugo ni Cristo, an nagkapirang tawo na may gabos na klaseng pinaghalean inapod na makaibanan nia sa langit asin “mamamahala bilang mga hade sa daga.” (Ikomparar an Kapahayagan 1:5, 6.) An saindang limitadong kabilangan sa huri ihinahayag sa Kapahayagan.

 9. Paano iiniintrodusir si Cristo sa kapitulo 6?

⁹ Sa iyo man sanang bisyon, iiniintrodusir man si Cristo bilang an may koronang nangangabayo sa sarong maputing kabayo, na “nagluwas sa pandaog asin sa pagtapos kan saiyang pandadaog.” Makaoogma, dadaogon nia an maraot na mga epekto na isinisimbolisar kan tolo pang parakabayo sa Apocalipsis, na an kaskas na pangangabayo nagtao nin guerra, gutom, asin kagadanan sa katawohan poon kan importanteng-importanteng taon nin 1914. (Kapahayagan 6:1-8) An daing kaparehong katongdan ni Cristo, an Kordero nin Dios, sa pagliligtas sa katawohan asin sa pagkaotob kan marahayon na mga katuyohan ni Jehova mayor na tema kan pagtotokdo kan Biblia na ginigibo kan Mga Saksi ni Jehova.

10. (a) Anong mahalagang impormasyon an itinatao sa kapitulo 7? (b) Paano si Cristo nagtaram manongod sa mga mag-aako kan Kahadean?

¹⁰ An kapitulo 7 may nakaoogmang notisya nanggad. Solamente sa libro nin Kapahayagan niato manonompongan an kabilangan kan inapod ni Jesus na “sadangoton na aripompon” na tatawan kan Ama kan Kordero kan Kahadean. (Lucas 12:32; 22:28-30) An mga ini tatatakan ni Jehova Dios paagi sa saiyang espiritu. (2 Corinto 1:21, 22) Si apostol Juan, na nag-ako kan Kapahayagan, nagpapatotoo: “Nadangog ko an kabilangan kan mga tinatakan, sanggatos may apat na polo may apat na ribo.” (Kapahayagan 7:4) An eksaktong kabilangan na ini pinatutunayan na tama sa sarong nahuhuring kapitulo bilang an total kan mga “binakal hale sa katawohan” tanganing mamahala kaiba kan Kordero sa langitnon na Bukid nin Sion. (Kapahayagan 14:1-4) Minsan ngani an mga iglesia nin Kakristianohan malibog saka dai nakakokombensir an itinataong mga paliwanag manongod sa kabilangan na ini, interesante nanggad, an nag-espesyalisar sa Biblia na si E. W. Bullinger nagsasabi manongod dian: “Iyan an simpleng deklarasyon nin katotoohan: sarong depinidong kabilangan na kabaliktaran kan indepinidong kabilangan sa mismong kapitulong ini.”

11. (a) Anong nakaoogmang notisya an yaon sa kapitulo 7? (b) Anong mga oportunidad an nabubukasan para sa mga miembro kan “dakulang kadaklan”?

¹¹ Anong indepinidong kabilangan an sinasabi ni Bullinger? Sa bersikulo 9, nagsurat si apostol Juan: “Pakalihis kan mga bagay na ini ako nagheling, asin, uya! an sarong dakulang kadaklan, na dai nin siisay man na makabibilang, hale sa gabos na nasyon asin tribo asin banwaan patin tataramon.” (Kapahayagan 7:9) Siisay an minakompuesto sa dakulang kadaklan na ini, ano an kamugtakan ninda sa atubangan nin Dios sa presente, asin ano an itinatagama kan ngapit para sa sainda? An apocalipticong simbag maogmang bareta para sa mga nag-eerok sa daga. Mababasa niato: “An mga ini an nagluwas sa dakulang kahorasaan, asin hinugasan ninda an saindang mga gubing asin pinaputi iyan sa dugo kan Kordero.” Paagi sa pagtubod sa pinabolos na dugo ni Cristo, sinda poprotehiran durante kan “dakulang kahorasaan.” Si Cristo “gigiyahan sinda sa mga burabod kan tubig nin buhay. Asin papahidon nin Dios an gabos na luha sa saindang mga mata.” (Kapahayagan 7:14-17) Iyo, an minilyon na tawong nabubuhay ngonyan puedeng magin kabtang kan dai mabilang na kadaklan na makaliligtas sa katapusan kan presenteng maraot na sistema nin mga bagay. Bilang mga sakop ni Hadeng Jesu-Cristo durante kan saiyang Milenyal na Paghade, sinda gigiyahan nia pasiring sa buhay na daing katapusan digdi sa daga. Bako daw iyan na maogmang bareta?

“An Saiyang mga Paghokom Totoo Asin Matanos”

12, 13. (a) Ano an laog kan kapitulo 8 sagkod 19? (b) Taano an mga tawong sadiosan an puso ta dai maninigong mapurisaw sa siring na mga hula?

¹² An kapitulo 8 sagkod 19 iyo an sa pangenot responsable sa reputasyon kan librong Apocalipsis, o Kapahayagan, bilang libro na naghuhula nin nakasisindak na grabeng mga kapahamakan. An mga iyan may epektibong marhay na mga mensahe nin paghokom (na isinisimbolisar nin mga tanog nin trumpeta, damat, asin mangko kan kaanggotan nin Dios) na idinirekto tumang sa laen-laen na elemento kan sistema nin mga bagay ni Satanas. An mga paghokom na ini gigibohon, enot tumang sa falsong relihion (“Dakulang Babilonya”), dangan tumang sa maraot na sistema politikal, na isinisimbolisar nin mabangis na mga hayop.—Kapahayagan 13:1, 2; 17:5-7, 15, 16.a

¹³ An mga kapitulong ini naglaladawan kan paglinig sa kalangitan, na itinapok si Satanas asin an saiyang mga demonyo sa palibot kan daga. Ini an nagtatao kan solamenteng makatanosan na paliwanag sa dai pa nangyari kaidto na kapurisawan sa kinaban poon kan 1914. (Kapahayagan 12:7-12) Ilinaladawan man kaiyan, sa simbolikong pananaram, an paglaglag sa maraot na sistema nin mga bagay ni Satanas digdi sa daga. (Kapahayagan 19:19-21) Maninigo daw na makubhanan an mga tawong sadiosan an puso sa siring na pambihirang mga pangyayari? Dai, ta sa panahon kan mga paghokom nin Dios, may hukbo sa langit na nagkukurahaw: “Omawa nindo si Jah, banwaan! An kaligtasan asin an kamurawayan patin an kapangyarihan sadiri nin satong Dios, huli ta an saiyang mga paghokom totoo asin matanos.”—Kapahayagan 19:1, 2.

14, 15. (a) Paano papangyayarihon sa katanosan an katapusan kan presenteng maraot na sistema? (b) Taano an kabtang na ini kan Apocalipsis ta maninigo na magin dahelan nin paggayagaya para sa mga tawong sadiosan an puso?

¹⁴ Dai papangyayarihon ni Jehova an sarong matanos na sistema nin mga bagay na dai hinahale sa daga an mga naglalaglag kaiyan. (Kapahayagan 11:17, 18; 19:11-16; 20:1, 2) Minsan siring, mayo nin tawo o estado politikal na may autoridad o kapangyarihan na gibohon ini. Solamente si Jehova asin an saiyang nombradong Hade saka Hokom, si Cristo Jesus, an makagigibo kaini sa katanosan.—2 Tesalonica 1:6-9.

¹⁵ Siring kan malinaw nanggad na ipinaheheling kan Apocalipsis, katuyohan ni Jehova na taposon an presenteng maraot na sistema. An bagay na ini maninigo na magin dahelan nin paggayagaya para sa mga lalaki saka babae na “nag-aaragagha asin nag-aaragrangay huli sa gabos na makauuyam nin makuring bagay na ginigibo.” (Ezequiel 9:4) Maninigo na itudok kaini sa isip ninda an apretadong pangangaipo na himateon an pangapodan kan anghel na may nakaoogmang notisya, na nagsabi: “Matakot kamo sa Dios . . . huli ta nag-abot na an oras kan saiyang paghokom, asin kaya sambahon nindo an Saro na naggibo kan langit asin daga.” (Kapahayagan 14:7) Logod na an siring na mga tawo sumamba saka maglingkod ki Jehova kaiba kan saiyang mga Saksi, “na nagkukuyog sa mga togon nin Dios asin igwa kan gibohon nin pagpatotoo ki Jesus.”—Kapahayagan 12:17.

An Mamuraway na Milenyal na Paghade

16. (a) Taano ta hinaboan kan mga iglesia nin Kakristianohan an paglaom sa Milenyo? (b) Taano ta may pagtubod an Mga Saksi ni Jehova na sisimbagon an modelong pamibi?

¹⁶ Ankapitulo 20 sagkod 22 kan libro nin Kapahayagan igwa kan sono sa Kasuratan na basehan para sa paglaom sa Milenyo. Ini an solamenteng kabtang kan Biblia na aktuwal na nakasasambit sa sangribong taon na peryodo na magigin introduksion nin daing sagkod na panahon nin kaogmahan sa langit saka digdi sa daga. Hinaboan kan mga iglesia nin Kakristianohan an paglaom sa Milenyo. Mantang sinasabi kan opisyal na doktrina kan iglesia na an mga matanos minaduman sa langit asin an mga maraot sa impierno, mayo iyan nin lugar para sa sarong paraisong daga. An modelong pamibi, na naghahagad na “gibohon an boot [nin Dios] digdi sa daga nin siring sa langit,” nawaran na nin kahulogan para sa kadaklan na miembro kan mga iglesia nin Kakristianohan. (Mateo 6:10, New International Version) Alagad bako iyan na totoo sa Mga Saksi ni Jehova. Marigon an saindang pagtubod na an daga dai ginibo ni Jehova Dios “na dai nin kapakanan,” kundi “tanganing pag-istaran.” (Isaias 45:12, 18) Sa siring, an suanoy na hula, an modelong pamibi, asin an apocalipticong paglaom sa Milenyo gabos nagkakaoroyon. Sa panahon kan saiyang Sangribong Taon na Paghade, sisiertohon ni Cristo na an kabotan ni Jehova gibohon digdi sa daga, kun paanong iyan ginigibo sa langit.

17. Ano an nagpaparisa na an “sangribong taon” dapat na saboton nin literal?

¹⁷ An terminong “sangribong taon” minalataw nin anom na beses sa enot na pitong bersikulo kan Kapahayagan kapitulo 20. Mahalagang mangnohon an bagay na sa Ingles apat na beses na iyan ginamit kaiba kan artikulo depinidong “the” (sa Bicol, “an”), na nagpapaheling na iyan nanonongod sa sarong literal na milenyo, bako sanang sa bakong espesipiko na halawig na peryodo nin panahon, arog kan gusto nin dakol na komentarista nin Kakristianohan na paniwalaan niato. Ano an mangyayari durante kan Milenyo? Enot, si Satanas hahalean nin puersa sa laog kan bilog na panahon na iyan. (Kapahayagan 20:1-3; ikomparar an Hebreo 2:14.) Abaa kaogma kan baretang iyan!

18. (a) Taano ta maaapod na “aldaw” nin paghokom an Milenyo? (b) Ano an mangyayari sa katapusan kan sangribong taon?

¹⁸ Mantang tatawan nin “kapangyarihan nin paghokom” an mga “mamamahala bilang mga hade sa kaibanan [ni Cristo] sa laog kan sangribong taon,” an peryodong ini, sa katunayan, sangribong taon na “aldaw” nin paghokom. (Kapahayagan 20:4, 6; ikomparar an Gibo 17:31; 2 Pedro 3:8.) An mga gadan bubuhayon liwat asin, kaiba kan mga nakaligtas sa “dakulang kahorasaan,” hohokoman nin makatanosan segun sa saindang mga gibo, o gawe-gawe, durante kan panahon na iyan. (Kapahayagan 20:12, 13) Pagkatapos kan sangribong taon, si Satanas paluluwason sa halipot na panahon tangani na paagihon an katawohan sa sarong pangultimong pagbalo na pagkatapos kaiyan sia, an saiyang mga demonyo, asin an siisay man na mga rebelde digdi sa daga na masunod sa saiya lalaglagon sagkod lamang. (Kapahayagan 20:7-10) An mga tawo na makapapasar sa pagbalo isusurat nin dai mapapara an saindang ngaran sa “libro nin buhay” asin palalaogon sa daing sagkod na panahon nin maogmang buhay, na naglilingkod saka nagsasamba ki Jehova sa sarong paraisong daga.—Kapahayagan 20:14, 15; Salmo 37:9, 29; Isaias 66:22, 23.

19. (a) Taano ta makasisierto kita na an marahayon na mga panuga na sinasabi sa libro nin Kapahayagan daing saltong maootob? (b) Ano an eestudyaran sa kasunod na artikulo?

¹⁹ Iyan an nakaoogmang notisya na sinasabi sa Apocalipsis. An mga iyan bakong basang-basang sanang mga panuga na gibo nin tawo. Nagsurat si apostol Juan: “An Saro na nagtutukaw sa trono nagsabi: ‘Uya! ginigibo kong bago an gabos na bagay.’ Siring man, sia nagsasabi: ‘Isurat mo, huli ta an mga tataramon na ini fiel asin totoo.’” (Kapahayagan 21:5) Ano an dapat niatong gibohon tanganing makapakikabtang sa kaotoban kan nakaoogmang notisyang ini? An libro nin Kapahayagan kadakol kan hatol para sa mga gustong makapaogma sa Dios. An pagsunod sa hatol na iyan matao sa sato nin daing sagkod na kaogmahan, ngonyan asin sagkod lamang, arog kan ipaheheling kan kasunod na artikulo.

[Nota sa Ibaba]

Mga Punto Para sa Pagrepaso

◻ Anong pundamental na mga katotoohan na yaon sa Kapahayagan kapitulo 4 sagkod 6 an mahalagang kabtang kan nakaoogmang notisya?

◻ Anong nakaoogmang notisya an yaon sa Kapahayagan kapitulo 7?

◻ Taano an mga tawong sadiosan an puso ta dai maninigong mapurisaw sa mga mensahe nin paghokom na yaon sa Kapahayagan?

◻ Sa anong mga paagi na an Milenyo magigin “aldaw” nin paghokom?

[Retrato sa pahina 10]

Biyong hahaleon ni Hadeng Jesu-Cristo sa daga an guerra, gutom, asin kagadanan