Siisay an Diyos?

1, 2. Ano an parating ihinahapot nin mga tawo?

KADAKUL nin ihinahapot an mga aki. Pag may ipinapaliwanag ka sa sainda, sa parati mahapot sinda, ‘Ta’no po?’ Tapos pag nasimbag mo na, mahapot man giraray sinda, ‘Pero ta’no po?’

² Hoben man kita o may edad na, gabos kita may mga hapot. Tibaad ihinahapot ta kun ano an satong kakakanon, susuluton, o babakalon. O tibaad may importanteng mga hapot kita manungod sa buhay asin sa mangyayari sa maabot na panahon. Kaya lang, pag dai kita kontento sa nakukua tang simbag, tibaad magpundo na kita sa paghapot.

3. Taano ta iniisip kan dakul na tawo na dai ninda makukua an simbag sa importanteng mga hapot ninda?

³ Nasa Bibliya daw an simbag sa importanteng mga hapot niyato? May mga nagsasabing iyo, pero dipisilon daang intindihon an Bibliya. Tibaad iniisip ninda na mga paratukdo o mga padi sana an makakasimbag kaiyan. An iba man nasusupog akuon na dai ninda aram an simbag. Ano sa hiling mo?

4, 5. Anong importanteng mga hapot an naiisip mo? Taano ta dapat na padagos mong hanapon an mga simbag?

⁴ Tibaad gusto mong maaraman an simbag sa mga hapot na, Taano ta yaon ako sa kinaban na ini? Ano an mangyayari sako pag nagadan ako? Igwa daw talaga nin Diyos? An bantog na Paratukdo na si Jesus nagsabi: “Padagos na maghagad, asin itatao iyan sa saindo; padagos na maghanap, asin makakakua kamo; padagos na magtuktok, asin bubuksan iyan sa saindo.” (Mateo 7:7) Dai magpundo sagkod na makua mo an mapagtitiwalaan na mga simbag.

⁵ Iyo, kun ‘padagos kang mahanap,’ makukua mo sa Bibliya an mga simbag. (Talinhaga 2:1-5) Bako man dipisilon intindihon an mga simbag. An mga manunudan mo makakatao saimo nin mas maugmang buhay ngunyan asin magayon na paglaom sa maabot na panahon. Pag-ulayan ta an sarong hapot na nakakaribong sa dakul na tawo.

6. Taano ta may mga nag-iisip na an Diyos daing pagmakulog sa mga tawo?

⁶ Iniisip nin dakul na tawo na an Diyos daing pagmakulog sa sato. Para sa sainda, kun may pagmakulog talaga an Diyos, ibang-iba kutana an kamugtakan sa kinaban. Maski sain may mga giyera, iriwal, asin grabeng pagsakit. Nagkakahilang an mga tawo, nagsasakit, asin nagagadan. Kaya iniisip kan iba, ‘Kun an Diyos may pagmakulog sa sato, ta’no ta dai niya hinahali an gabos na pagsakit na ini?’

7. (a) Paano napapaniwala kan mga lider nin relihiyon an mga tawo na maisog an Diyos? (b) Taano ta nakakasigurado kita na bako an Diyos an dapat basulon sa maraot na mga nangyayari?

⁷ Kun minsan, huli sa tukdo kan mga lider nin relihiyon, napapaniwala an mga tawo na an Diyos maisog. Pag may nangyaring maraot, sinasabi ninda na kabutan iyan nin Diyos. Kagustuhan daa nin Diyos na mangyari iyan. Sa pagsabi ninda kaiyan, an Diyos talaga an binabasol ninda. Pero itinutukdo kan Bibliya na an Diyos dai nuarin man magibo nin maraot na bagay. Sinasabi sa sato kan Santiago 1:13 na dai pigbabalo, o pigpupurbaran, nin Diyos paagi sa maraot na mga bagay an siisay man. Mababasa ta diyan: “Pag an siisay man [nag-aagi] nin pagbalo, dai niya pagsabihon: ‘Pigbabalo ako nin Diyos.’ Huli ta an Diyos dai puwedeng baluon [paagi sa maraot na mga bagay], asin siya mismo, dai niya binabalo [paagi sa maraot na mga bagay] an siisay man.” Nangangahulugan ini na dawa ngani dai pinupugulan nin Diyos na mangyari an maraot na mga bagay, bako nanggad siya an may kagigibuhan kaiyan. (Basahon an Job 34:10-12.) Gumamit kita nin halimbawa.

8, 9. Taano ta bako nanggad tama na ibasol sa Diyos an satong mga problema? Magtao nin halimbawa.

⁸ Isipon an sarong hoben na lalaki na nakaistar sa harong kan saiyang mga magurang. Padabaon siya kan saiyang ama asin tinukduan siya kaini na gumibo nin marahay na mga desisyon. Pero pag-abot nin panahon, nagrebelde siya sa saiyang ama tapos naglayas. Naggibo siya nin daing datang mga bagay asin naparaot. Babasulon mo daw an ama sa nangyari huling dai niya pinugulan na maglayas an saiyang aki? Siyempre dai! (Lucas 15:11-13) Arog kan ama na iyan, dai man pinupugulan nin Diyos an mga tawo kun pilion nindang magrebelde asin maggibo nin maraot. Kaya pag may nangyayaring maraot, dapat niyatong tandaan na bako an Diyos an may kagigibuhan kaiyan. Bako nanggad tama na basulon an Diyos.

⁹ May marahayon na dahilan kun taano ta dai pa hinahali nin Diyos an mga nangyayaring maraot. Sa Kapitulo 11, maaaraman mo an sinasabi kan Bibliya manungod diyan. Pero makakasiyerto ka na namumutan kita nin Diyos asin bako nanggad siya an dapat basulon sa satong mga problema. An totoo, Siya sana an may kakayahan na solusyunan an mga iyan.—Isaias 33:2.

10. Taano ta makakasigurado kita na papakarhayon nin Diyos an gabos na danyos na ginibo kan maraot na mga tawo?

¹⁰ An Diyos banal. (Isaias 6:3) An gabos na ginigibo niya dalisay, malinig, asin marahay. Kaya makakapagtiwala kita sa saiya. Bakong arog kaiyan an mga tawo. Kun minsan naggigibo sinda nin maraot. Asin maski an pinakaonestong tagapamahala mayo nin kapangyarihan na pakarhayon an gabos na danyos na ginigibo kan maraot na mga tawo. Dai nin siisay man na makakapantay sa kapangyarihan nin Diyos. Kaya nin Diyos asin talagang papakarhayon niya an gabos na danyos na ginibo kan maraot na mga tawo. Lubos na niyang hahalion an gabos na karatan.—Basahon an Salmo 37:9-11.

11. Ano an namamatian nin Diyos sa inaagihan mong kasakitan?

¹¹ Ano an namamatian nin Diyos pag nahihiling niya an mga nangyayari sa kinaban asin an problemang inaagihan mo? Itinutukdo kan Bibliya na an Diyos “mamumuton sa hustisya.” (Salmo 37:28, NW) Kaya importanteng marhay saiya kun ano an tama asin sala. Habo nanggad niyang nagsasakit an mga tawo. Sinasabi kan Bibliya na ‘nakulgan an saiyang puso’ kan mahiling niya na napano nin maraot an kinaban kaidto. (Genesis 6:5, 6) Dai nagbago an Diyos. (Malaquias 3:6) Sinasabi kan Bibliya na an Diyos talagang may pagmakulog sa saimo.—Basahon an 1 Pedro 5:7.

12, 13. (a) Taano ta namumutan asin pinagmamakulgan ta an satong kapwa, asin ano an namamatian ta sa pagsakit sa kinaban? (b) Taano ta makakasigurado kita na hahalion nin Diyos an gabos na pagsakit asin inhustisya?

¹² Sinasabi man kan Bibliya na linalang kita nin Diyos uyon sa saiyang ladawan. (Genesis 1:26) An buot sabihon, ginibo kita nin Diyos na igwa man kan marahay na mga karakteristiko niya. Kaya kun nahihirak ka pag nakakahiling nin nagsasakit na mga tawong daing sala, siguradong labi pa diyan an namamatian nin Diyos! Paano ta iyan naaraman?

¹³ Itinutukdo sa sato kan Bibliya na “an Diyos pagkamuot.” (1 Juan 4:8) An gabos na ginigibo nin Diyos ginigibo niya huli sa pagkamuot. Kaya kita namumuot ta namumuot an Diyos. Pag-isipan ini: Kun may kapangyarihan ka, bako daw na hahalion mo an gabos na pagsakit asin inhustisya sa kinaban? Siyempre, dahil namumutan mo an saimong kapwa. Kumusta man an Diyos? Igwa siya nin kapangyarihan na gibuhon iyan, asin dahil namumutan niya kita, hahalion niya an gabos na pagsakit asin inhustisya. Makakasigurado ka na an gabos na ipinanuga nin Diyos na nasambit sa kapinunan kan librong ini magkakatotoo! Pero tanganing maniwala ka sa mga panugang iyan, kaipuhan mong mas mamidbid pa an Diyos.

14. Ano an pangaran nin Diyos, asin taano ta masasabi niyato na dapat tang gamiton iyan?

¹⁴ Kun gusto mong magin amigo ka nin sarong tawo, ano sa parati an inot mong sasabihon sa saiya? An pangaran mo. May pangaran daw an Diyos? Sinasabi kan dakul na relihiyon na an pangaran niya Diyos o Kagurangnan, pero bako man iyan mga pangaran. Mga titulo lang iyan, kapareho kan “hadi” o “presidente.” Sinasabi sa sato nin Diyos na an pangaran niya Jehova. An Salmo 83:18 nagsasabi: “Lugod na maaraman kan mga tawo na ika, na an pangaran Jehova, ika sana an Kahuruhalangkawi sa bilog na daga.” (NW) Ginamit kan mga kagsurat kan Bibliya an pangaran nin Diyos nin dakul na beses. Gusto ni Jehova na maaraman mo an pangaran niya asin gamiton mo iyan. Sinasabi niya saimo an saiyang pangaran tanganing magin amigo ka niya.

15. Ano an kahulugan kan pangaran ni Jehova?

¹⁵ An pangaran ni Jehova igwa nin hararom na kahulugan. Nangangahulugan iyan na kaya nin Diyos na utubon an ano man na ipinanuga niya saka gibuhon an saiyang katuyuhan. Mayo nin makakaulang sa saiya. Si Jehova sana an puwedeng magkaigwa kan pangaran na ini.a

16, 17. Ano an kahulugan kan pagigin (a) “Makakamhan sa Gabos”? (b) “Hading daing sagkod”? (c) “Kaglalang”?

¹⁶ Arog kan nabasa ta kasubago, sinabi sa Salmo 83:18 mapadapit ki Jehova: “Ika sana an Kahuruhalangkawi.” (NW) Sinasabi man sa Kapahayagan 15:3: “Dakula asin makangangalas an saimong mga gibo, Diyos na Jehova, an Makakamhan sa Gabos. Matanos asin masasarigan an saimong mga dalan, Hading daing sagkod.” Ano an kahulugan kan pagigin “Makakamhan sa Gabos”? Nangangahulugan iyan na mas makapangyarihan si Jehova kisa sa siisay man sa uniberso. An “Hading daing sagkod” man nangangahulugan na siya pirming nag-eeksister. Ipinapaliwanag kan Salmo 90:2 na siya mayong kapinunan asin mayong katapusan. Makangangalas talaga iyan!

¹⁷ Si Jehova sana an Kaglalang. Sinasabi kan Kapahayagan 4:11: “Angay ka, Jehova na samuyang Diyos, na mag-ako kan kamurawayan asin kan onra asin kan kapangyarihan, huli ta linalang mo an gabos na bagay, asin huli sa saimong kabutan, sinda nag-eksister asin nalalang.” Si Jehova an naggibo kan gabos—puon sa mga anghel sa langit sagkod sa mga bituon sa kalangitan, sa mga prutas sa mga kahoy, asin sa mga sira sa dagat—iyo, gabos na bagay na maiisip mo!

18. Taano ta tibaad may mga nag-iisip na dai sinda nuarin man puwedeng magin amigo nin Diyos? Ano an sinasabi kan Bibliya mapadapit diyan?

¹⁸ May mga tawo na natatakot pag nababasa an manungod sa pambihirang mga karakteristiko ni Jehova asin iniisip ninda, ‘Makapangyarihan siyang marhay, pinakahalangkaw sa gabos, saka harayuon, kaya siisay man ako para tawan niya nin atensiyon?’ Pero iyan daw an gusto nin Diyos na mamatian ta? Bako! Gusto ni Jehova na magin harani sa sato. Sinasabi kan Bibliya na an Diyos “bako man . . . harayo sa lambang saro sa sato.” (Gibo 17:27) Gusto nin Diyos na rumani ka sa saiya, asin nangangako man siya na ‘marani siya sa saimo.’—Santiago 4:8.

19. (a) Paano ka magigin amigo nin Diyos? (b) Anong karakteristiko ni Jehova an pinakagusto mo?

¹⁹ Paano ka magigin amigo nin Diyos? Sinabi ni Jesus: “Ini nangangahulugan nin buhay na daing katapusan, na mamidbid ninda ika, an iyo sanang tunay na Diyos, asin an saro na saimong isinugo, si Jesu-Cristo.” (Juan 17:3) Padagos na mag-adal para mamidbid mo si Jehova saka si Jesus. Paagi kaiyan, puwede kang mabuhay nin daing katapusan. Halimbawa, nanudan na niyato na “an Diyos pagkamuot.” (1 Juan 4:16) Pero dakul pa siyang magagayon na karakteristiko. Sinasabi sa sato kan Bibliya na si Jehova “mahihirakon asin mapagmalasakit, dai tulos naaanggot asin abunda sa maimbod na pagkamuot saka katotoohan.” (Exodo 34:6, NW) Si Jehova ‘marahayon asin [andam na] magpatawad.’ (Salmo 86:5) An Diyos mapasensiya asin maimbod. (2 Pedro 3:9; Kapahayagan 15:4) Dakulon pa an manunudan mo manungod sa saiyang magagayon na karakteristiko mantang nababasa mo sa Bibliya an mapadapit sa saiya.

20-22. (a) Paano kita mapaparani sa Diyos dawa dai ta siya nahihiling? (b) Ano an dapat mong gibuhon kun papunduhon ka kan iba sa pag-adal nin Bibliya?

²⁰ Paano ka mapaparani sa Diyos dawa dai mo siya nahihiling? (Juan 1:18; 4:24; 1 Timoteo 1:17) Pag nababasa mo sa Bibliya an manungod ki Jehova, mamimidbid mo siya bilang totoong Persona na may magagayon na karakteristiko. (Salmo 27:4; Roma 1:20) Mantang nagdadakul an naaaraman mo manungod ki Jehova, lalo mo siyang mamumutan asin lalo kang mapaparani saiya.

²¹ Masasabutan mo na si Jehova an satuyang Ama. (Mateo 6:9) Tinawan niya kita nin buhay, asin gusto niyang magkaigwa kita kan pinakamarahay na buhay. Iyan an gugustuhon nin sarong mapagpadaba na ama para sa saiyang mga aki. (Salmo 36:9) Iyo, itinutukdo kan Bibliya na puwede kang magin amigo ni Jehova. (Santiago 2:23) Isipon mo, si Jehova na Kaglalang kan uniberso, gusto kang magin amigo!

²² May mga tawo na tibaad papunduhon ka sa pag-adal nin Bibliya. Tibaad natatakot sinda na magbago ka nin relihiyon. Pero dai pagtugutan an siisay man na papunduhon ka na magin amigo ni Jehova. Siya an puwede mong magin pinakamarahay na Amigo.

23, 24. (a) Taano ta dapat na padagos kang maghapot? (b) Ano an pag-uulayan ta sa sunod na kapitulo?

²³ Sa pag-adal mo nin Bibliya, may mga bagay na tibaad dai mo masabutan. Dai masupog na maghapot o magpatabang. Sinabi ni Jesus na dapat kitang magin mapakumbaba, arog kan mga aki. (Mateo 18:2-4) Asin kadakul nin ihinahapot an mga aki. Gusto nin Diyos na maaraman mo an mga simbag. Kaya pag-adalan na marhay an Bibliya tanganing masigurado mo na an nanunudan mo iyo an katotoohan.—Basahon an Gibo 17:11.

²⁴ An pag-adal nin Bibliya an pinakamarahay na paagi tanganing mamidbid mo si Jehova. Sa sunod na kapitulo, maaaraman ta kun taano ta napapalain an Bibliya sa ibang mga libro.