“Malaad an Grabeng Kaanggutan Ko”

1-3. (a) Ano an magigin resulta kan “grabeng kaanggutan” ni Jehova? (Hilingon an ritrato sa kapinunan kan kapitulo.) (b) Ano an pag-uulayan ta ngunyan?

IRIBANG nakatindog an mga lalaki, babayi, saka mga aki na nagkakanta nin kantang pang-Kahadian. Dangan sarong elder an udok sa pusong namibi, na nakikimahirak ki Jehova para sa Saiyang proteksiyon. An gabos sa kongregasyon nagtitiwala na iingatan sinda ni Jehova, pero kaipuhan pa man giraray ninda nin pampakusog saka asigurasyon. Nadadangog ninda sa luwas an ribok nin ralaban. Nagpuon na an Armagedon!—Kap. 16:14, 16.

² Sa giyera nin Armagedon, malaad an “grabeng kaanggutan” ni Jehova pero pipilion niya kun siisay an mga lalaglagon niya. (Basahon an Ezekiel 38:18.) Ibabaling niya an saiyang grabeng kaanggutan, bako sa sarong hukbo o sa sarong nasyon, kundi sa dakulon na tawo sa bilog na daga. Sa aldaw na iyan, an magagadan ni Jehova magigin “puon sa sarong puro kan daga sagkod sa ibong na puro kan daga.”—Jer. 25:29, 33.

³ Taano ta malaad an “grabeng kaanggutan” ni Jehova, an Diyos nin pagkamuot, na ilinaladawan na “mahihirakon asin mapagmalasakit” saka “dai tulos naaanggot,” asin gigibuhon an arog kaiyan? (Exo. 34:6; 1 Juan 4:16) Hilingon ta kun paano an simbag sa hapot na iyan makakatao sato nin asigurasyon, makakapakusog sa sato, asin makakapahiro sato na magin maigot sa paghuhulit ngunyan.

4, 5. Ano an pagkakaiba kan kaanggutan nin Diyos sa kaanggutan nin bakong perpektong mga tawo?

⁴ Inot, kaipuhan tang tandaan na an kaanggutan ni Jehova bakong kapareho kan sa bakong perpektong mga tawo. Pag naaanggot nin grabe an sarong tawo, sa parati dai niya nakokontrol an saiyang ginigibo asin bakong magayon an nagigin resulta kaiyan. Halimbawa, si Cain, an inot na aki ni Adan, “naanggot na marhay” dahil dai nauyunan ni Jehova an saiyang atang pero an regalo na idinulot ni Abel iyo. Ano an resulta? Ginadan ni Cain an saiyang matanos na tugang. (Gen. 4:3-8; Heb. 11:4) Isipa man si David, na ilinadawan na lalaking nauyunan kan puso ni Jehova. (Gibo 13:22) Dawa an marahay na lalaking ini dikit-dikitan pang makagibo nin grabe karaot na bagay kan mabaretaan niya na pig-insulto siya saka an saiyang mga tawuhan kan mayaman na kagsadiri nin daga na si Nabal. Dahil sa grabeng kaanggutan, si David asin an saiyang mga suldados ‘nagsukbit nin espada,’ asin plano nindang gadanon bako lang an mayong utang na buot na si Nabal kundi pati man an gabos na lalaki sa harong niya. Marahay na sana ta an agom ni Nabal na si Abigail nakumbinsir si David saka an mga tawuhan kaini na dai magbalos. (1 Sam. 25:9-14, 32, 33) Kaya may marahay na dahilan kun taano ta pinasabngan ni Jehova si Santiago na isurat ini: “An kaanggutan nin sarong tawo dai minaresulta sa pagigin matanos sa paghiling nin Diyos.”—Sant. 1:20.

⁵ Kabaliktaran sa kaanggutan nin tawo, na sa parati dai kontrolado, an kaanggutan ni Jehova pirming kontrolado asin may malinaw na dahilan. Dawa pa grabe an kaanggutan ni Jehova, pirming matanos an ginigibo niya. Pag nakikipaglaban siya, dai niya pinapara “an mga matanos kasabay kan mga maraot.” (Gen. 18:22-25) Saro pa, may matanos na mga dahilan si Jehova pag naaanggot siya. Hilingon ta an duwang dahilan asin an mga manunudan ta diyan.

 6. Ano an nagigin reaksiyon ni Jehova pag linalapastangan an pangaran niya?

⁶ Dahilan: Linapastangan an pangaran ni Jehova. Dahil sa mga naghihingakong representante ni Jehova alagad naggigibo nin maraot, nararaot an reputasyon ni Jehova asin tama sanang ikaanggot niya iyan. (Ezek. 36:23) Arog kan pinag-ulayan sa sinundan na mga kapitulo, nagtao nin dakulang katuyawan sa pangaran ni Jehova an nasyon nin Israel. Natural sana na makapaanggot ki Jehova an sabuot saka gibo-gibo kan nasyon na iyan. Pero nungka siyang nawaran nin kontrol sa saiyang kaanggutan—pinadusahan niya an saiyang banwaan nin tama sana, dai lamang siya suminobra sa pagpadusa sainda. (Jer. 30:11) Asin pag nautob na an katuyuhan kan kaanggutan ni Jehova, mayo nang natatada saiyang raot nin buot.—Sal. 103:9.

7, 8. Ano an manunudan ta sa nagin pagtratar ni Jehova sa Israel?

⁷ Leksiyon: An pagtratar ni Jehova sa mga Israelita nagtatao sato nin seryosong patanid. Arog kan suanoy na mga Israelita, igwa kita nin pribilehiyo na magdara kan pangaran ni Jehova. Mga Saksi ni Jehova kita. (Isa. 43:10) An satong sinasabi asin ginigibo may direktang epekto sa kun ano an iisipon kan mga tawo manungod sa satong Diyos. Dai ta lamang gugustuhon na magin daing pakundangan sa paggibo nin sala asin magdara nin katuyawan sa pangaran ni Jehova. An arog kaiyan na mapagsagin-sagin na pamumuhay makakapaanggot ki Jehova, asin maabot an panahon, mahiro siya para idepensa an saiyang reputasyon.—Heb. 3:13, 15; 2 Ped. 2:1, 2.

⁸ An patanid daw na si Jehova puwedeng ‘maanggot nin grabe’ makakaulang sa sato sa pagrani saiya? Dai. Aram ta na si Jehova mapasensiya asin mapagpatawad. (Isa. 55:7; Roma 2:4) Pero aram ta man na nagdidisiplina siya pag kaipuhan. Sa katunayan, mas iginagalang ta siya sa pakaaram na maaanggot siya sa mga padagos na naggigibo nin kasalan asin na dai niya sinda tutugutan na magdanay sa saiyang banwaan. (1 Cor. 5:11-13) Malinaw na sinabi sato ni Jehova kun ano an mga ikinakaanggot niya. Nasa sato na kun lilikayan ta an mga sabuot asin gibo-gibo na makakapaanggot saiya.—Juan 3:36; Roma 1:26-32; Sant. 4:8.

9, 10. Ano an nagigin reaksiyon ni Jehova pag namemeligro an saiyang maimbod na mga lingkod? Magtao nin mga halimbawa.

⁹ Dahilan: Namemeligro an maimbod na mga lingkod ni Jehova. Naaanggot si Jehova pag inaatake kan mga kaiwal an mga maimbod na nagpapaili sa pangangataman niya. Halimbawa, pakaluwas kan mga Israelita sa Ehipto, linapag ni Faraon saka kan saiyang makusog na hukbo an garo daing kalaban-laban na banwaan na nasa baybayon kan Dagat na Pula. Pero kan linapag kan makusog na hukbong militar na iyan an mga Israelita sa marang daga sa tahaw kan dagat, tinarangkas ni Jehova an mga ruweda kan mga karwaheng panggiyera asin tinapring an mga Ehipsiyo pabalik sa dagat. “Mayo ni saro sa sainda an nakaligtas.” (Exo. 14:25-28) Naglaad an kaanggutan ni Jehova sa mga Ehipsiyo huli sa saiyang “maimbod na pagkamuot” para sa saiyang banwaan.—Basahon an Exodo 15:9-13.

¹⁰ Sa kaagid na paagi, an pagkamuot ni Jehova sa saiyang banwaan an nagpahiro saiya na iligtas sinda kan panahon ni Hading Hezekias. An siyudad nin Jerusalem andam nang salakayon kan mga Asiriano, an pinakamakusog asin pinakamaringis na hukbong militar kan panahon na idto. Dahil sa posibleng pagsalikop, namemeligro an maimbod na mga lingkod ni Jehova na makaeksperyensiya nin luway-luway asin makaturutristeng kagadanan. (2 Ha. 18:27) Huli kaiyan, nagsugo si Jehova nin saro sanang anghel; ginadan kaiyan an 185,000 na suldados kan kalaban sa saro sanang banggi! (2 Ha. 19:34, 35) Imahinara an eksena pagkaaga sa kampo kan mga Asiriano. An mga budyak, mga kalasag, asin mga espada dai lamang nahiro. Mayo nin tanog nin trumpeta na nagpukaw sa mga suldados. Mayo nin mga pagbuot para tiripunon an mga hukbo. Nakakapanggirabo an katuninungan sa kampo, asin nakawararak maski sain an mga bangkay.

11. Paano sato nagtatao nin kumpiyansa asin kusog nin buot an mga halimbawa sa Kasuratan sa kun paano si Jehova naghihiro pag namemeligro an saiyang mga lingkod?

¹¹ Leksiyon: An mga halimbawang iyan kun paano huminiro si Jehova kan namemeligro an saiyang banwaan nagtatao nin mapuwersang patanid sa satong mga kalaban: “Makatatakot nanggad an mahulog sa mga kamot kan buhay na Diyos” pag grabe an saiyang kaanggutan. (Heb. 10:31) Para sa sato, an mga halimbawang iyan nagtatao nin kumpiyansa asin kusog nin buot. Nagkakaigwa kita nin kumpiyansa huling aram ta na an satong panginot na kaiwal, si Satanas, dai manggagana. Dai na mahahaloy, an ‘halipot na panahon’ na pamamahala niya matatapos na! (Kap. 12:12) Mantang dai pa iyan nangyayari, makakapaglingkod kita ki Jehova na may kusog nin buot, na nagtitiwala na mayo nin indibidwal, organisasyon, o gobyerno an makakapapundo sa sato sa paggibo kan kabutan nin Diyos. (Basahon an Salmo 118:6-9.) Ipinahayag ni apostol Pablo an satong kumbiksiyon paagi sa ipinasabong na mga tataramon na ini: “Kun an Diyos nasa kampi niyato, siisay an makakalaban sa sato?”—Roma 8:31.

12. Sa dakulang kasakitan, taano ta malaad an kaanggutan ni Jehova?

¹² Sa nagdadangadang na dakulang kasakitan, mahiro si Jehova para protektaran kita, arog kan ginibo niya kan malaom kan mga Ehipsiyo an mga Israelita asin kan salikupan kan mga Asiriano an mga Judio sa Jerusalem. Pag pinurbaran kan satong mga kaiwal na puhuon kita, an hararom na pagkamuot sato ni Jehova an magigin dahilan na maglaad an saiyang kaanggutan. An mga maatake sa sato garo man sana dudutduton an alinawnaw kan mata ni Jehova. Magigin marikas asin daing pagduwa-duwa an paghiro niya. (Zac. 2:8, 9) An pagpuho na gigibuhon ni Jehova sa panahon na iyan magigin daing kaagid. Pero mayo nin dahilan an mga kaiwal nin Diyos na mabigla pag ilinuwas na ni Jehova an grabeng kaanggutan niya sa sainda. Taano?

13. Anong mga patanid an itinao ni Jehova?

¹³ Si Jehova “dai tulos naaanggot,” asin nagtatao siya nin dakul na patanid na lalaglagon niya an mga nagkakalaban saiya asin nagsasapeligro sa saiyang banwaan. (Exo. 34:6, 7) Ginamit ni Jehova an mga propetang si Jeremias, Ezekiel, Daniel, Cristo Jesus, asin an mga apostol na si Pedro, Pablo, asin Juan para magpatanid manungod sa dakula asin pangultimong ralaban.—Hilingon an kahon na “Nagpapatanid si Jehova sa Nagdadangadang na Dakulang Ralaban.”

14, 15. Ano an mga ginibo ni Jehova, asin taano?

¹⁴ Ipinasurat ni Jehova sa saiyang Tataramon an mga patanid na ini. Sinigurado man niya na an Bibliya maitradusir sa pinakadakul na lengguwahe asin magkaigwa nin pinakamahiwas na sirkulasyon sa kasaysayan. Sa bilog na daga, igwa siya nin dakul na boluntaryo na nagtatabang sa iba na makanuod na makipagkatuninungan sa Diyos asin nagpapatanid manungod sa nagdadangadang na “dakulang aldaw ni Jehova.” (Sof. 1:14; Sal. 2:10-12; 110:3) Pinahiro niya an saiyang mga lingkod na itradusir an mga pantabang sa pag-adal nin Bibliya sa ginatos na lengguwahe asin maggamit nin ginatos na milyon na oras kada taon para ipakipag-ulay sa iba an mga panuga asin an mga patanid na nasa saiyang Tataramon.

¹⁵ Ipinagibo ni Jehova an gabos na iyan “huling habo niyang malaglag an siisay man, imbes, gusto niya na an gabos makapagsulsol.” (2 Ped. 3:9) Dakulaon nanggad na pribilehiyo na irepresentar an satong mamumuton saka mapasensiyang Diyos asin magkaigwa nin sadit na kabtang sa pagpalakop kan saiyang mensahe! Pero, sa dai na mahahaloy, mauubos na an panahon para sa mga dai nagtataong atensiyon sa mga patanid na iyan.

16, 17. Igwa na daw nin itinalaan na aldaw si Jehova para sa pangultimong giyera? Ipaliwanag.

¹⁶ May itinalaan nang aldaw si Jehova para sa pangultimong giyera. Aram na niya kun nuarin aatakihon an banwaan niya. (Mat. 24:36) Paano naaraman ni Jehova kun nuarin maatake an saiyang mga kaiwal?

¹⁷ Arog kan nanudan ta sa sinundan na kapitulo, sinabi ni Jehova ki Gog: “Lalagan ko nin mga kawit an saimong mga panga.” Mamaniobrahon niya an mga bagay-bagay para magsalakay an mga nasyon. (Ezek. 38:4) Pero dai ini nangangahulugan na si Jehova an mapuon kan ralaban na ini; dai man ini nangangahulugan na hahalian niya nin katalingkasan na magdesisyon an mga nagkokontra sa saiya. Imbes, ipinaparisa kaiyan na kayang basahon ni Jehova an puso asin aram niya kun ano an gigibuhon kan saiyang mga kaiwal sa sarong espesipikong kamugtakan.—Sal. 94:11; Isa. 46:9, 10; Jer. 17:10.

18. Taano ta makikipaglaban an mga tawo sa Makakamhan sa Gabos?

¹⁸ Kun dai ni Jehova pupunan an ralaban o pipiriton an saiyang mga kaiwal na makipaglaban, taano man ta magibo an mga tawo nin bagay na magigin dahilan na magin kalaban sinda kan Makakamhan sa Gabos? An sarong dahilan iyo na sa panahon na iyan, posibleng marhay na kumbinsido sinda na mayong Diyos o na dai man siya makikiaram sa mga nangyayari sa mga tawo. Posibleng maisip ninda iyan huling linaglag pa sana ninda an gabos na palsong relihiyon sa daga. Kaya tibaad sabihon ninda na kun talagang may Diyos, siguradong idedepensa niya an mga institusyon na naghihingakong nagrerepresentar sa saiya. Dai ninda marerealisar na an Diyos mismo an naglaag kan kaisipan na iyan sa saindang puso para puhuon an mga relihiyon na ruminaot na marhay kan reputasyon niya.—Kap. 17:16, 17.

19. Ano an posibleng mangyari pagkatapos na bumagsak an palsong relihiyon?

¹⁹ Pagkatapos na bumagsak an palsong relihiyon, posibleng ipagbuot ni Jehova sa saiyang banwaan na maghulit nin mensahe nin paghukom, na iinagid kan libro nin Kapahayagan sa pag-uran nin yelo na an kada saro mga 20 kilos an gabat. (Kap. 16:21, nota sa ibaba) An mensaheng iyan, na posibleng deklarasyon na an pulitikal saka komersiyal na sistema madali nang matapos, magpapasakit na marhay sa mga makakadangog kaya lalanghadan ninda an Diyos. Posibleng marhay na an mensaheng ini an makakapaanggot sa mga nasyon kaya aatakihon ninda nin todo-todo an banwaan nin Diyos para permanente kitang pasilensiyuhon. Iisipon ninda na mayo kitang kalaban-laban asin madali sanang laglagon. Sala nanggad sinda diyan!

20, 21. Siisay si Gog, asin ano an mangyayari saiya?

²⁰ Arog kan nanudan ta sa Kapitulo 17, ginamit ni Ezekiel an propetikong titulo na “Gog kan daga nin Magog” para ipamidbid an koalisyon nin mga nasyon na maatake sato. (Ezek. 38:2) Pero an pagkasararo kan koalisyon na iyan kasingsarig sana nin torsido. Dawa garo nagtatarabangan sinda, padagos pa man giraray sindang magkukurumpetensiyahan, magigin mapalangkaw, asin magkakaigwa nin nasyonalistikong mga ambisyon. Magigin pasil sana para ki Jehova na ibaling an espada kan kada saro sainda “laban sa saiyang sadiring tugang.” (Ezek. 38:21) Pero an pagkalaglag kan mga nasyon na iyan bakong kagigibuhan nin tawo.

²¹ Bago sinda malaglag, mahihiling kan satong mga kaiwal an tanda kan Aki nin tawo, na posibleng milagrosong pagpahiling nin kapangyarihan ni Jehova asin ni Jesus. Mapupurisaw nin grabe an mga nagkokontra sato sa mahihiling ninda. Arog kan ihinula ni Jesus, “magkakadirismayo an mga tawo sa takot asin sa pagparaisip-isip kan mga bagay na mangyayari sa kinaban.” (Luc. 21:25-27) Mabibigla sinda asin maiisip ninda na napasala sinda sa pag-atake sa banwaan ni Jehova. Mapipiritan sindang midbidon na an Kaglalang sarong komandante militar, si Jehova na pamayo nin mga hukbo. (Sal. 46:6-11; Ezek. 38:23) Siguradong gagamiton ni Jehova an mga hukbo sa langit asin an mga puwersa nin naturalesa para protektaran an saiyang maimbod na mga lingkod asin para laglagon an saiyang mga kaiwal.—Basahon an 2 Pedro 2:9.

22, 23. Siisay an mga maprotektar sa banwaan nin Diyos, asin ano an mamamatian ninda sa saindang asignasyon?

²² Isipa kun gurano kagusto ni Jesus na panginutan an pagsalakay sa mga kaiwal nin Diyos asin na protektaran an mga namumuot asin naglilingkod sa saiyang Ama. Isipa man an mamamatian kan mga linahidan sa panahon na iyan. Bago magpuon an Armagedon, an mga natatada sa sainda digdi sa daga bubuhayon pasiring sa langit tanganing an gabos sa 144,000 makaibanan ni Jesus sa pakikipaglaban. (Kap. 17:12-14) Siguradong dakul sa mga linahidan an nagkaigwa nin dayupot na pakikipag-amigo sa mga kabilang sa ibang karnero mantang magkairibanan sindang naglilingkod sa huring mga aldaw. Sa panahon na iyan, magkakaigwa an mga linahidan nin awtoridad asin kapangyarihan na idepensa an mga maimbod na nagsuportar sa sainda sa panahon kan saindang mga kasakitan.—Mat. 25:31-40.

²³ An mga anghel magigin parte man kan hukbo ni Jesus sa langit. (2 Tes. 1:7; Kap. 19:14) Tinabangan na ninda siya na palayason sa langit si Satanas asin an mga demonyo. (Kap. 12:7-9) Asin nagtabang man sinda sa pagtipon digdi sa daga kan mga gustong magsamba ki Jehova. (Kap. 14:6, 7) Kaya angay nanggad na tugutan ni Jehova an mga anghel na protektaran an maimbod na mga lingkod niya! An pinakaimportante, an gabos sa hukbo ni Jehova makakamati nin onra sa pagpakangbanal asin pagbindikar kan saiyang pangaran, o reputasyon, paagi sa pagtabang na daugon an saiyang mga kaiwal.—Mat. 6:9, 10.

24. Ano an magigin reaksiyon kan mga kabilang sa dakulang kadaklan nin ibang mga karnero?

²⁴ Huli sa makapangyarihan asin maigot na hukbo na nagpoprotektar sainda, an dakulang kadaklan nin ibang mga karnero mayo nin dahilan na matakot. Sa katunayan, sinda ‘matindog nin tanos asin iiitaas an saindang payo, huli ta naghaharani na an pagliligtas sa sainda.’ (Luc. 21:28) Kaya mahalaga nanggad na bago mag-abot an aldaw ni Jehova, tabangan niyato an pinakadakul na posible na mamidbid saka mamutan an satong mahihirakon asin mapagprotektar na Ama!—Basahon an Sofonias 2:2, 3.

25. Ano an pag-uulayan sa masunod na kapitulo?

²⁵ Kariribukan asin grabeng pagsakit an pirming resulta kan mga giyera nin tawo. Sa kabaliktaran, an Armagedon maresulta sa katuninungan asin kaugmahan. Ano an magigin kamugtakan pag natapos na an kaanggutan ni Jehova, naisarong na kan saiyang mga parapakilaban an saindang mga espada, asin nawara na an ribok kan dakulang ralaban? Sa masunod na kapitulo, pag-uulayan ta an magayon na puturong iyan.