An mga Hayop sa Apocalipsis—Ano Daw an Kahulogan kan mga Iyan?

KAN Sabado, Hunyo 15, 1985, maliwanag an sirang kan aldaw sa mga edipisyo kan Naciones Unidas sa Nueva York. Arog kan dati, dakol na mga bisita an yaon tanganing maheling an nakakaarang mga edipisyo, asin an dakol dai ikinatatago an saindang paghanga sa gabos na naheheling ninda.

Alagad ta sagkod ngonyan, garo baga harayoon pa na mapagsararo kan Naciones Unidas an mga nasyon. Arog kan isinabi nin sarong opisyal na giya kan hapon na idto: “Nagkaigwa nin 150 guerra poon kan Guerra Mundial II, na labing 20 milyones katawo an nagadan. Mayo pa nin pankinaban na gobyerno. Seguro ini an pinakaharani dian.” Kun siring, saro daw na pangatorogan na masakit makamtan an pankinaban na gobyerno? Maniwala man kamo o dai, an simbag makukua sa pagsiyasat sa mga hayop sa Apocalipsis.

An nagkapirang mga komentarista sa Biblia mayo nin naheheling na makahulang kahulogan sa mga hayop sa libro nin Kapahayagan. Imbes, an mga iyan iinaaplikar ninda sa mga pangyayari kaidtong buhay pa si apostol Juan. Halimbawa, an The Cath­olic Encyclopedia, sa paliwanag kaiyan manongod sa mga hayop sa Apocalipsis, nagsasabi: “Kaugalean kan mga parasurat apocaliptiko . . . na gibohon na garo mga hula an saindang mga bisyon asin palatawon na an mga iyan ginibo nin mas amay pa.”

Alagad ta si apostol Juan nagsabi: “Paagi sa pasabong ako napasa aldaw kan Kagurangnan.” (Kapahayagan 1:10) Iyo, an librong Kapahayagan nakasentro, bakong sa nakaaging kasaysayan, kundi sa sarong maabot pang “aldaw” na an Kagurangnan na Jesu-Cristo mapoon na maghade hale sa langit. Sono sa Kapahayagan kapitulo 6, an “aldaw kan Kagurangnan” tinatandaan nin guerra mundial, lakop na kakulangan sa kakanon, asin nakagagadan na helang. An mga pangyayari na naheling sa daga sa ika-20 siglong ini nakakokombensir na pruweba na kita nabubuhay na sa “aldaw kan Kagurangnan” poon 1914.—Kapahayagan 6:1-8.a

Sa makasaysayan na taon na idto, pinonan ni Jesu-Cristo an saiyang pamamahala sa Kahadean. (Kapahayagan 11:15, 18) Kaya an mga hayop sa Apocalipsis kaipuhan na magin lataw pakalihis kan petsang iyan. Totoo nanggad, an mga hayop na ini naglaladawan sa mga kaiwal nin Dios na minaolang sa mga tawo na maglaom sa Kahadean nin Dios bilang an solamenteng areglo na makapagpapanigo sa kamawotan nin katawohan para sa katoninongan. Kaiba sa mga kaiwal na ini an sarong dragon asin tolong mababangis na hayop. Siyasaton niato an mga iyan sono sa pagkasunodsunod kan saindang paglataw.

An Dakulang Dragon

“Uya!” an kagsing ni Juan, “sarong dakulang mapulang dragon, na igwa nin pitong payo asin sampulong sungay.” Ano an ilinaladawan kan dakulang dragon na ini? Si Juan mismo nagpapaliwanag na iyan nagrerepresentar daing iba kundi ki Satanas na Diablo. Sono sa bisyon ni Juan, an dragon na ini maisog na tinumang an pagkamundag kan langitnon na Kahadean nin Dios kan 1914. An resulta? “Kaya ihinolog an dakulang dragon, an enot na halas, an inaapod Diablo asin Satanas, na nagdadaya sa bilog na ineerokan na daga; ihinolog sia sa daga, asin an saiyang mga anghel ihinolog sa kaibanan nia.”—Kapahayagan 12:3, 7-9.

Ipinaheheling ni Juan na ini magkakaigwa nin masakit na mga epekto sa katawohan. “Herak man kan daga asin kan dagat, huli ta huminilig na dian saindo an Diablo, na may dakulang kaanggotan, sa pakaaram na halipot na sana an saiyang panahon.” (Kapahayagan 12:12) Dawa ngani digdi na sana sa palibot kan daga, si Satanas desidido pa man giraray na olangon an napatindog nang Kahadean nin Dios. Ginigibo nia ini paagi sa pandadaya sa katawohan, na ginagamit an tolong mababangis na hayop. Helinga an pagkaladawan ni Juan sa enot sa mga ini.

An Hayop Hale sa Dagat

“Naheling ko an sarong mabangis na hayop na minatunga sa dagat, na may sampulong sungay asin pitong payo . . . Ngonyan an mabangis na hayop na sakuyang naheling kaagid nin sarong leopardo, alagad an mga bitis kaiyan siring kan sa oso, asin an ngoso kaiyan siring sa ngoso nin leon. Asin an dragon nagtao sa hayop kan kapangyarihan kaiyan asin kan trono kaiyan patin nin dakulang autoridad.”—Kapahayagan 13:1, 2.

Ano an ilinaladawan kan makanuson na hayop na ini? Sa irarom nin pasabong, si Juan nagtatao nin mahalagang tanda: “Itinao dian an autoridad sa lambang tribo asin banwaan asin tataramon patin nasyon.” (Kapahayagan 13:7) Ano an may autoridad sa lambang tawong nabubuhay sa daga? Saro sana: an pankinaban na palakaw nin politikal na paghade. Talaga daw na an palakaw na ini minaako nin autoridad hale sa “dragon,” si Satanas? An Biblia minasimbag nin iyo. Halimbawa, si apostol Juan nagsabi: “An bilog na kinaban namumugtak sa kapangyarihan kan maraot.” Bakong makangangalas na si Satanas, mantang sinusugotan si Jesus sa kapatagan, nag-opresir sa saiya nin kapangyarihan sa “gabos na kahadean kan ineerokan na daga” asin naghingako: “[An autoridad na ini] itinao sako.”—1 Juan 5:19; Lucas 4:5, 6.

Alagad ta ano an ilinaladawan kan pitong payo? Ipinaheling ki Juan an saro pang makanuson na hayop na haros eksaktong kapareho kan sarong ini. Iyan igwa man nin pitong payo. An mga payo kan ladawan ipinaliwanag na nagrerepresentar sa “pitong hade,” o mga kapangyarihan pankinaban, na “an lima naholog na, an saro nagdadanay, asin an saro dai pa naabot.” (Kapahayagan 17:9, 10) Limang kapangyarihan pankinaban an naglataw sa kasaysayan kan Biblia bago kan kaaldawan ni Juan: Egipto, Asiria, Babilonya, Medo-Persia, asin Grecia. An Roma, an ikaanom, nasa kapangyarihan pa kan si Juan nabubuhay.

Ano an ikapitong payo? Mantang an bisyon may labot sa “aldaw kan Kagurangnan,” iyan seguradong nangangahulogan kan kapangyarihan pankinaban na nasa dating namumugtakan kan Roma kun dapit sa kapangyarihan sa huring mga aldaw na ini poon kan 1914. Ipinaheheling kan kasaysayan na ini magkasorog na kapangyarihan pankinaban na kompuwesto kan Britania asin kan Estados Unidos nin Amerika. Bago kan 1914, an Britania nakaestablisar kan kadarudakulaing imperyo na naheling kan kinaban. Kaidtong ika-19 siglo, iyan nakagibo man nin makosog na diplomatiko asin komersial na relasyon sa Estados Unidos. An duwang nasyon na ini magkasorog na nakipaglaban kaidtong Guerra Mundial I asin II, asin an saindang espesyal na relasyon nagpapadagos sagkod ngonyan. Kan 1982, si Presidente Rea­gan kan Estados Unidos nagpahayag sa parlamentong Britano manongod sa “pambihirang pagkakaamigo kan satong duwang nasyon.” Mas bago pa, kan Pebrero 1985, an primer ministro kan Britania nagdiskurso sa duwang kamara kan Kongreso kan Estados Unidos asin nagsabi: “Logod an duwang magparyente niatong mga nasyon umabante na magkaibanan . . . marigon sa katuyohan, may saro sanang pagtubod, . . . mantang kita nagdadangadang sa ikatolong milenyo kan Kristianong kapanahonan.”

Huli sa dakulang impluwensia kaiyan sa mga nangyayari sa kinaban, an magkasorog na kapangyarihan pankinaban na Anglo-Amerikano ilinaladawan nin separado sa libro nin Kapahayagan. Paano? Kan ikaduwa sa mga hayop sa Apocalipsis.

An Hayop Hale sa Daga

“Asin ako nakaheling nin saro pang mabangis na hayop,” an isinurat ni Juan, “na nagluluwas hale sa daga, asin ini igwa nin duwang sungay siring sa kordero, alagad ta iyan nagpoon na magtaram na siring sa dragon.” Sa paghihingako na iyan Kristiano asin dai nananalakay, an kapangyarihan pankinaban nin Anglo-Amerika nagsasagin kordero. Alagad ta sa katotoohan iyan naghiro na siring sa dragon. Paano? Paagi sa pagkolonisar sa dakol na nasyon asin paslong pag-aprobetsar sa mga kayamanan kan daga. Saro pa, “pinapangyayari kaiyan an daga asin an mga nag-eerok dian na sumamba sa enot na mabangis na hayop, na an lugad na nakagagadan naomayan. Asin iyan . . . nagsasabi sa mga nag-eerok sa daga na gumibo nin ladawan kan mabangis na hayop.” (Kapahayagan 13:3, 11-15) Paano ini naotob?

An pankinaban na politikal na sistema ni Satanas nagkaigwa nin “lugad na nakagagadan” kaidtong enot na guerra mundial. Tanganing maolang an pagkaotro sa siring na bagay, an Britania asin Amerika nagpalakop sa “pagsamba” sa politikal na palakaw. Ginibo ninda ini paagi sa pagkombensir sa mga nasyon na “gumibo nin ladawan kan mabangis na hayop.” Paano ini nangyari?

Sa paghinanapos kan enot na guerra mundial, si Presidente Wil­son kan Estados Unidos pinonan an sarong krusada apabor sa bagong proponidong Liga de Naciones. Sa katuyohan na ini, sinabihan nia an mga delegado sa Komperensia sa Pakikipagkatoninongan sa Paris kan 1919: “An mga representante kan Estados Unidos nagsusuportar sa dakulang proyektong ini na Liga de Naciones. Sa paghona mi dian nasasarig an bilog na programa na nagpahayag kan samong katuyohan . . . sa guerrang ini. . . . Sa halipot, yaon kami digdi tanganing siertohon na an mismong mga pasisikadan kan guerrang ini mahale.”

Kan matapos ni Presidente Wil­son an saiyang diskurso, an mismong primer ministro kan Britania, si ­Lloyd ­George, an nagpahayag: “Nagtindog ako tanganing segundahan an resolusyon na ini. Pakatapos kan nobleng pahayag kan Presidente kan Estados Unidos sa paghona ko dai na nin kaipuhan na mga komento tanganing irekomendar an resolusyon na ini sa Komperensia, asin ako . . . nagpapahayag kun gurano kakosog na nasa likod kan proposisyon na ini an mga siudadano kan Imperyo nin Britania.”

Pakaagi nin pirang bulan kan taon na idto, sa sarong miting sa Londres tanganing suportaran an pagratipikar sa Liga de Naciones, binasa an sarong surat hale sa Hade nin Gran Britania: “Nanggana kita sa guerra. Iyan dakulang bagay na nagibo. Alagad ta iyan bakong igo. Kita nakipaglaban tanganing kamtan an nagdadanay na katoninongan, asin obligasyon niato na gibohon an gabos na paagi na maseguro iyan. Sa katuyohan na iyan, mayo nin ibang mas mahalaga pa ki sa makosog asin nagdadanay na Liga de Naciones. . . . Irenerekomendar ko an mobimientong ini sa gabos na siudadano kan Imperyo, tangani na, sa tabang kan gabos na iba pang mga tawo na may marahay na boot, an sarong pantukod asin seguradong pandepensa nin katoninongan, sa ikamumuraway nin Dios . . . maestablisar.”

Kan Enero 16, 1920, an Liga de Naciones naestablisar na may miembrong 42 na nasyon. Pag-abot nin 1934 iyan igwa na nin 58 nasyon. Nahimo kan may duwang sungay na hayop hale sa daga na makombensir an kinaban na “gumibo nin ladawan kan mabangis na hayop.” An ladawan na ini, o representasyon kan pankinaban na politikal na palakaw ni Satanas, ilinaladawan kan ultimong hayop sa Apocalipsis.

An Mapulang Hayop

Uya an paglaladawan ni Juan sa ultimong hayop na ini: “Sarong mabangis na hayop na mapula na pano nin mga ngaran nin langhad asin igwa nin pitong payo asin sampulong sungay.” Mapadapit sa hayop na ini, si Juan sinabihan: “An mabangis na hayop na naheling mo iyo kaidto, alagad ngonyan bako na, pero madali nang lumuwas sa bungaw, asin iyan mapasiring sa kalaglagan. . . . Iyan man mismo ikawalong hade.” (Kapahayagan 17:3, 8, 11) Totoo sa paglaladawan na ini, an Liga de Naciones nagprobar na humiro siring sa kapangyarihan pankinaban. Minsan siring, dai kaiyan naolang an Guerra Mundial II, na nagpoon kan 1939. An hayop nawara, na garo nasa bungaw.

Kan Guerra Mundial II, an kapangyarihan pankinaban nin Anglo-Amerika nagmaigot na gayo na buhayon liwat an internasyonal na organisasyon na iyan. Kan 1941 an primer ministro nin Gran Britania, si Win­ston Chur­chill, nakipagmiting nin hilom ki Presidente Frank­lin Roo­se­velt kan Estados Unidos sakay sa sarong bapor sa Atlantiko. Sinda magkaibanan na guminibo nin deklarasyon manongod sa “saindang paglaom sa mas marahay na ngapit para sa kinaban” asin sa “pagkaestablisar nin mas mahiwas asin permanenteng sistema nin pankagabsan na seguridad.” Kan suminunod na taon sa Wash­ing­ton, D.C., 26 na nasyon an nagpirma sa Anglo-Amerikanong proposisyon na ini sa inapod kaidto na “Deklarasyon nin Naciones Unidas.” Ini nagbunga kan pagkaporma sa organisasyon nin Naciones Unidas kan Oktubre 24, 1945. An mapulang hayop tuminunga hale sa bungaw na may bagong ngaran. Sa presente, 159 nasyon an uminayon sa organisasyon na ini, na, linalaoman ninda, magpapadanay sa nag-eeksister ngonyan na palakaw nin politikal na paghade nin tawo.

Alagad ta ini gabos ipinupuwera an Mesiyanikong Kahadean nin Dios, na pinatindog sa langit kan 1914. An lambang tawo sa daga kaipuhan na pumili sa pag-oltanan kan paghade nin Dios asin paghade nin tawo. Sa dai na mahahaloy, an mapulang hayop, kaiba an gabos na gobyerno nin tawo, mapapalabot sa sarong pakikipaglaban sa pinatukaw na Hade nin Dios, si Jesu-Cristo. An resulta? “Huli ta sia Kagurangnan nin mga kagurangnan asin Hade nin mga hade, dadaogon sinda kan Kordero [Jesu-Cristo].” Iyo, an mapulang hayop kaiba an bilog na palakaw kan gobyerno nin tawo “mapasiring sa kalaglagan.”—Kapahayagan 17:11, 14; helingon man an Daniel 2:44.

Kanigoan na bendisyon nanggad na sa panahon na iyan dai na madaya kan dragon asin kan saiyang tolong hayop! An mga nagpatunay na sinda maimbod na mga sakop kan Kahadean nin Dios makaliligtas tanganing magin kabtang nin “sarong bagong daga.” An Dios “papahidon an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmondo ni pagtangis ni kolog. An enot na mga bagay nakalihis na.” (2 Pedro 3:13; Kapahayagan 21:3, 4) Kun siring, pumasakop kamo sa Kahadean nin Dios, an solamenteng epektibong pankinaban na gobyerno. Sa siring kamo man magkakaigwa kan paglaom na magkamit kan daing katapusan na mga bendisyon na ini.

[Mga Nota sa Ibaba]