Mga Hapot Hale sa mga Parabasa

◼ Ano an pagkakasala ni Moises na an karibay iyo an pagkawara kan pribilehiyo nia na lumaog sa Dagang Panuga? Iyan daw an bagay na saiyang pinukpuk an gapo imbes na taraman sana iyan o na dai nia napamuraway si Jehova Dios?

Minalataw na an kasalan ni Moises bako sanang an bagay na pinukpuk nia an gapo imbes na taraman iyan, siring sa instruksion nin Dios.

Naghihinanapos na an 40 taon na pagbaklay, an mga Israelitas nagkampo sa Cades-barnea sa kapatagan nin Zin (o, Paran). Nagkampo sinda duman kaidtong pirang dekada na an nakaagi, na posibleng huli ta an tolong burabod sa lugar na iyan nagpatubo nin berdeng oasis. Alagad sa okasyon na ini, kadikit an tubig, na tibaad nangahulogan na daing nakukuang dakol na kakanon an banwaan. Kaya iniwal ninda si Moises, an representante ni Jehova, na an sabi: ’Taano ta ilinuwas mo kami sa Egipto asin dinara mo kami sa maraot na lugar na ini? Iyan bakong lugar nin banhi asin higos asin ubas patin granada, saka mayo nin tubig na inomon.”—Bilang 20:5.

Dangan sinabihan nin Dios si Moises asin Aaron: “Kuana an sogkod asin tipona an kasararoan, . asin taraman nindo an gapo sa atubangan kan saindang mga mata tangani na itao kaiyan an tubig kaiyan; asin paluwason mo an tubig para sa sainda gikan sa gapo asin painomon mo an kasararoan asin an saindang mga hayop.” (Bilang 20:8) Ano an sumunod na nangyari?

Tinipon ni Moises asin Aaron an kasararoan sa atubangan kan gapo, sia nagsabi sa sainda: ‘Pagdangog kamo, ngonyan, mga sumbikalan! Sa gapo daw na ini na kami mapaluwas nin tubig para sa saindo?” Dangan iinitaas ni Moises an saiyang kamot asin pinukpuk nia nin makaduwa an gapo kan saiyang sogkod; asin luminuwas an kadakol na tubig.”—Bilang 20:10, 11.

An iba nagsabi na sinabihan nin Dios si Moises asin Aaron na “taraman nindo an gapo,” alagad ta saindang ‘pinukpuk an gapo.’ Ikinaanggot daw na gayo ni Jehova an pagkakalaen na ini kaya sinabihan nia si Moises asin Aaron na dai Nia sinda totogotan na iyo an mangenot sa Israel sa paglaog sa Dagang Panuga?

Garo dai man. An totoo iyo na mga pirang bulan sana pakalihis kan Exodo, an banwaan nagreklamo sa kakulangan nin tubig sa enot na pangyayari. Ini harani sa Bukid nin Sinai (Horeb), sa lugar na inapod Meriba. Helinga an sinabi nin Dios ki Moises sa okasyon na idto: “Nagtitindog ako sa atubangan mo sa ibabaw kan gapo sa Horeb. Asin pukpukon mo an gapo, asin maluwas dian an tubig, asin inomon iyan kan banwaan.” (Exodo 17:2-7; 33:6) Kaya kaidtong, sa Cades, si Moises sabihan na taraman an gapo, tibaad nagkaigwa sia kan tendensia na gibohon an ginibo nia kan enot sa pagdirehir nin Dios, dawa kun an boot sabihon nin Dios igo nang taraman sana an gapo.

Minalataw na labi pa dian an nagbunga kan paghokom nin Dios ki Moises asin Aaron. Ano daw iyan? Sinabihan ni Moises an makiiwalon na banwaan: “Sa gapo daw na ini na kami mapaluwas nin tubig para sa saindo?” An Salmo 106:33 nagtatao sato nin pagmansay digdi, huli ta ipinaheheling kaiyan na si Moises naghiro gikan sa mapait na espiritu asin na sia “nagtaram nin daing pagmamaan sa saiyang mga ngabil.” Sa anggot na pagtaram, inapod nia an atension sa saiya man sana asin ki Aaron imbes na sa Saro na talagang milagrosong makatatao nin tubig. Kaya, bago si Moises nagadan sa may gilid kan Dagang Panuga, nasabihan nin Dios an pangyayari sa Cades-barnea asin ipinarisa na an kasalan ni Moises iyo na sia nagkulang sa ‘pagpakangbanal sa Dios sa atubangan kan saindang mga mata.’—Bilang 27:12-14.

May manonodan kitang leksion digdi. Minsan ngani tunay na mahalaga na pogolan niato an satong sadiri sa anggot na mga akto, arog man kaiyan kahalaga an pagpogol sa satong espiritu, nangorogna kun nagkukulang an iba. Kun pababayaan niato na kita maribok na gayo, tibaad magpoon kitang paghelingon an mga lingkod nin Dios sa punto-de-vista nin tawo, imbes na midbidon na sinda “karnero” pa man giraray nin Dios. Totoo, sinda bakong sangkap asin tibaad gumibo nin nakauuyam na mga bagay, alagad ta sinda “saiyang banwaan asin an mga karnero kan saiyang pasabsaban.“ (Salmo 100:3) Itinogot nin Dios na magadan an saiyang Aki para sa mga ini, kaya dai daw kita maninigong maghingoa na magin mapagpasensia sa sainda, na daing gayo iniintindi an satong pagmate o an epekto sa sato asin orog na tinatawan nin atension an saindang kamugtakan sa atubangan nin Dios?