‘Pinapakakan sa mga Tataramon kan Pagtubod’

¹ An pagmamaigot na mamuhay na may diosnon na debosyon nagkakaipo nin maigot na paghihingoa. (1 Tim. 4:7-10) Sa satong sadiring kosog, madali kitang mapagal asin masingkog sa pagmamaigot na sumunod sa dalan na iyan. (Isa. 40:29-31) An sarong paagi na puede kitang mag-ako nin kosog hale ki Jehova iyo an ‘pagkakan sa mga tataramon kan pagtubod.’—1 Tim. 4:6.

² Nagsosopay na Espirituwal na Kakanon: Paagi sa saiyang Tataramon asin paagi sa “maimbod asin mapagmansay na oripon,” nagtatao si Jehova nin nagsosopay na espirituwal na kakanon. (Mat. 24:45) Ginigibo daw niato an satong kabtang tangani na makinabang dian? Binabasa daw niato an Biblia aroaldaw? Igwa daw kita nin nakatagamang mga oras para sa personal na pag-adal asin paghorophorop? (Sal. 1:2, 3) An siring na nakakapakosog na espirituwal na kakanon nagpapabagsik sa sato asin nagpoprotehir sa sato sa nakakapaluyang mga epekto kan kinaban ni Satanas. (1 Juan 5:19) Kun papanoon niato an satong isip nin kapakipakinabang na mga bagay asin iaaplikar iyan sa satong buhay, masasakaibanan niato si Jehova.—Fil. 4:8, 9.

³ Pinapakosog man kita ni Jehova paagi sa mga pagtiripon kan kongregasyon. (Heb. 10:24, 25) An espirituwal na pagtotokdo asin nakakapakosog na asosasyon na yaon sa mga pagtiripon na ini nagpapasarig sa sato na manindogan nin marigon kun napapaatubang sa mga pagbalo. (1 Ped. 5:9, 10) Nagsabi an sarong Kristianong hoben: “Yaon ako sa eskuelahan sa bilog na aldaw, asin nakakapagal iyan sa sako. Alagad an mga pagtiripon garo sarong oasis sa desierto, na dian nagiginhawahan ako tanganing makayang atubangon an masunod na aldaw sa eskuelahan.” Segurado nanggad na binebendisyonan kita sa satong paghihingoa na makaatender sa mga pagtiripon!

⁴ Pagbalangibog kan Katotoohan: An paghuhulit sa iba garo kakanon para ki Jesus. Pinapakosog sia kaiyan. (Juan 4:32-34) Kaagid kaiyan, kun kita nakikipag-olay sa iba manongod sa makangangalas na mga panuga nin Dios, kita nakakamate na makosog giraray. An pagigin sibot sa ministeryo pinapagdadanay man an puso asin isip niato na nakakonsentrar sa Kahadean asin sa mga bendisyon na maabot sa dai na mahahaloy. Iyan totoo nanggad na nakakaginhawa sa sato.—Mat. 11:28-30.

⁵ Kanigoan kapribilehiado niato na makinabang sa nagsosopay na espirituwal na kakanon na itinatao ni Jehova sa saiyang banwaan ngonyan! Logod na padagos kitang magkurahaw sa kagayagayahan para sa kaomawan nia.—Isa. 65:13, 14.

Kabtang 5—Pagkondukta nin Progresibong mga Pag-adal sa Biblia

Pagdeterminar Kun Gurano Kadakol an Pag-aadalan

¹ Kun nagtotokdo, kinokonsiderar ni Jesus kaidto an mga limitasyon kan saiyang mga disipulo, na nagtataram sa sainda “sagkod na kaya nindang maghinanyog.” (Mar. 4:33; Juan 16:12) Sa kaagid na paagi, kaipuhan na determinaran kan mga paratokdo kan Tataramon nin Dios ngonyan kun gurano kadakol an kokobrehan ninda sa sarong pag-adal sa Biblia. An kadakolan kan pag-aadalan na puedeng pag-olayan madepende sa abilidad asin mga kamugtakan kan paratokdo sagkod kan inaadalan sa Biblia.

² Pataluboon an Marigon na Pagtubod: An nagkapirang inaadalan sa Biblia tibaad nagkakaipo nin duwa o tolong sesyon tangani na masabotan an kayang masabotan tolos nin ibang inaadalan sa Biblia durante nin sarong sesyon. Habo niatong isakripisyo an pagkaigwa nin malinaw na pakasabot kan inaadalan sa Biblia huli sa rikas kan pag-adal. An lambang inaadalan sa Biblia nagkakaipo nin marigon na basehan para sa saiyang bago pa sanang makuang pagtubod sa Tataramon nin Dios.—Tal. 4:7; Roma 12:2.

³ Sa pagkondukta nindo kan pag-adal serosemana, gamiton an ano man na oras na kaipuhan tangani na tabangan an inaadalan sa Biblia na masabotan asin akoon an nanonodan nia hale sa Tataramon nin Dios. Likayan an paghidali na nakakabawas sa bilog na halaga kan mga katotoohan na itinotokdo. Magtao nin supisyenteng panahon na magkonsentrar sa prinsipal na mga punto asin pag-olayan an pangenot na mga teksto na basehan kan mga katokdoan.—2 Tim. 3:16, 17.

⁴ Magdanay sa Pinag-aadalan: Minsan ngani boot niatong likayan na maghidali sa pag-adal, boot man niatong likayan na maparayo sa pinag-aadalan. Kun an inaadalan sa Biblia may tendensia na magtaram nin halawig manongod sa personal na mga bagay, tibaad kaipuhan niatong iareglo na pag-olayan ini pagkatapos kan pag-adal.—Ecl. 3:1.

⁵ Sa ibong na lado, dahel sa sato mismong entusiasmo para sa katotoohan puedeng madepisilan kita na dai magparataram nin sobra durante kan pag-adal. (Sal. 145:6, 7) An paminsanminsan na dagdag na punto o eksperyensia puedeng makadugang sa kualidad kan pag-adal, alagad habo niato ining magin dakolon o halawigon na nakakaolang na sa inaadalan sa Biblia na makua an tamang kaaraman sa pundamental na mga katokdoan sa Biblia.

⁶ Paagi sa pagkobre nin rasonableng kadakolan nin pag-aadalan sa kada sesyon kan pag-adal, tinatabangan niato an mga inaadalan sa Biblia na ‘maglakaw sa liwanag ni Jehova.’—Isa. 2:5.