Kapangyarihan na Magprotektar—“An Diyos Iyo an Satong Pailihan”

1, 2. Nasa anong peligro an mga Israelita paglaog ninda sa rehiyon nin Sinai kan 1513 B.C.E., asin paano pinakusog ni Jehova an saindang buot?

NASA peligro an mga Israelita paglaog ninda sa rehiyon nin Sinai sa kapinunan nin 1513 B.C.E. Kaipuhan nindang magbaklay sa “mahiwason asin teribleng kaawagan na igwang makamandag na mga halas asin mga eskorpiyon.” (Deuteronomio 8:15, The New English Bible) Napapaatubang man sinda sa peligrong salakayon nin kalaban na mga nasyon. Dinara ni Jehova an saiyang banwaan sa sitwasyon na ini. Bilang saindang Diyos, magigibo niya daw na protektaran sinda?

² Nakakapakusog na marhay sa buot an mga tataramon ni Jehova: “Nahiling mismo nindo kun ano an ginibo ko sa mga Ehipsiyo. Ginibo ko idto tanganing madara ko kamo sa sako siring kan pagdara nin agila sa saiyang mga siwo sa ibabaw kan mga pakpak kaini.” (Exodo 19:4) Ipinagirumdom ni Jehova sa saiyang banwaan na ilinigtas niya sinda sa mga Ehipsiyo; dinara niya sinda sa lugar na harayo sa peligro na garo baga siring sa pagdara nin mga agila. Pero may iba pang dahilan kun taano ta an ‘mga pakpak nin mga agila’ tamang-tama para iilustrar an pagprotektar nin Diyos.

3. Taano ta an ‘mga pakpak nin mga agila’ tamang-tama para iilustrar an pagprotektar nin Diyos?

³ Bako sana sa paglayog ginagamit kan agila an halakbang asin masarig na mga pakpak kaiyan. Sa kainitan nin aldaw, ibinubuka nin pakurba kan inang agila an mga pakpak kaiyan—na puwedeng labing duwang metro an lakbang—tangani na magin siring sa nagpoprotektar na payong, na iniingatan sa nakakapasong init kan saldang an saradit pa niyang mga siwo. Sa iba man na panahon, pinapatos niya kan saiyang mga pakpak an saiyang mga siwo tanganing protektaran sinda sa malipot na duros. Kun paanong pinoprotektaran kan agila an saiyang mga siwo, iningatan man asin prinotektaran ni Jehova an bago pa sanang nasyon nin Israel. Ngunyan na nasa kaawagan na an saiyang banwaan, padagos sindang makakapaili sa lindong kan makusog niyang mga pakpak sagkod na sinda nagdadanay na maimbod. (Deuteronomio 32:9-11; Salmo 36:7) Makakaasa man daw kita ngunyan sa pagprotektar nin Diyos?

4, 5. Taano ta lubos kitang makakapagtiwala sa panuga nin Diyos na proteksiyon?

⁴ Siguradong kayang-kaya ni Jehova na protektaran an saiyang mga lingkod. Siya “Diyos na Makakamhan sa Gabos”—sarong titulo na nagpaparisa na igwa siya nin dai malalabanan na kapangyarihan. (Genesis 17:1) Siring sa alon na mayo nin makakapapundo, mayo man nin makakaulang sa kapangyarihan ni Jehova. Mantang kaya niyang gibuhon an ano man na kabutan niya, puwedeng maihapot ta, ‘Kabutan daw ni Jehova na gamiton an saiyang kapangyarihan para protektaran an saiyang banwaan?’

⁵ An simbag, iyo! Inaasigurar kita ni Jehova na poprotektaran niya an saiyang banwaan. “An Diyos iyo an satong pailihan asin kakusugan, sarong tabang na makukua tulos sa mga panahon nin kasakitan,” an sabi kan Salmo 46:1. Mantang an Diyos “dai makakapagputik,” lubos kitang makakapagtiwala sa ipinanuga niyang proteksiyon. (Tito 1:2) Hilingon ta an nagkapira sa buhay na buhay na mga paglaladawan para iilustrar kun paano si Jehova nagpoprotektar.

6, 7. (a) Anong pagprotektar an itinatao kan pastor kan mga panahon kan Bibliya sa saiyang mga karnero? (b) Paano iinilustrar kan Bibliya an udok sa pusong pagmawot ni Jehova na protektaran asin atamanon an saiyang mga karnero?

⁶ Si Jehova an satuyang Pastor, asin “kita an saiyang banwaan asin an mga karnero sa saiyang pasabsaban.” (Salmo 23:1; 100:3) Dikit sanang hayop an arog nin magarong karnero na daing kalaban-laban. An pastor kan mga panahon kan Bibliya kinaipuhan na magin makusog an buot tangani na maprotektaran an saiyang mga karnero sa mga leon, lobo, asin oso, saka sa mga parahabon. (1 Samuel 17:34, 35; Juan 10:12, 13) Pero may mga panahon na kinakaipuhan an mapagpadangat na pagprotektar sa karnero. Pag an sarong karnero nag-ugbon harayo sa turil, an ina binabantayan kan may pagmakulog na pastor mantang maluya pa ini, dangan inaalsa kan pastor saka dinadara sa turil an korderong daing kalaban-laban.

⁷ Paagi sa pagkumparar kan saiyang sadiri sa sarong pastor, inaasigurar kita ni Jehova na igwa siya nin udok sa pusong pagmawot na protektaran kita. (Ezekiel 34:11-16) Girumduma an paglaladawan ki Jehova sa Isaias 40:11, na tinukar sa Kapitulo 2 kan librong ini: “Siring sa sarong pastor aatamanon niya an saiyang aripumpon. Titipunon niya an mga kordero paagi kan saiyang takyag, asin kakargahon niya sinda sa saiyang daghan.” Paano napapaduman an sadit na kordero sa “daghan” kan pastor—an katiklupan kan pang-itaas niyang gubing? Tibaad rumani sa pastor an kordero, na nagsusurusaghid pa ngani sa saiyang tabay. Minsan siring, an pastor an kaipuhan na dumuko para alsahon an kordero asin may kabuutan na ibugtak sa may daghan niya. Sarong mapagpadangat nanggad na paglaladawan kan pagigin andam kan satong Dakulang Pastor na ingatan asin protektaran kita!

8. (a) Siisay an pinapanugaan nin Diyos na poprotektaran, asin paano ini ipinaparisa kan Talinhaga 18:10? (b) Ano an kalabot sa pagpaili sa pangaran nin Diyos?

⁸ An ipinanuga nin Diyos na proteksiyon kondisyonal—para sana iyan sa mga minarani sa saiya. Sinasabi kan Talinhaga 18:10: “An pangaran ni Jehova sarong masarig na tore. Diyan minadalagan an matanos asin nag-aako nin proteksiyon.” Kaidtong mga panahon kan Bibliya, an mga tore kun beses itinutugdok sa kaawagan bilang ligtas na mga pailihan. Alagad, paninimbagan na kan saro na namemeligro an buhay kun mapaili siya sa toreng iyan. Kaagid man kaiyan an pagpaili sa pangaran nin Diyos. Bako sana iyan basta pagsambit kan pangaran nin Diyos; an pangaran nin Diyos bakong anting-anting. Imbes, kaipuhan tang mamidbid asin pagtiwalaan an Nagdadara kan pangaran na iyan asin mamuhay kauyon kan saiyang matanos na mga pamantayan. Mabuuton nanggad si Jehova sa pag-asigurar sa sato na kun madulok kita sa saiya na may pagtubod, magigin siyang tore na nagpoprotektar sa sato!

9. Paano masasabi na dai sana nanuga si Jehova nin proteksiyon?

⁹ Dai sana nanuga si Jehova nin proteksiyon. Kaidtong mga panahon kan Bibliya, ipinahiling niya sa milagrosong mga paagi na kaya niyang protektaran an saiyang banwaan. Durante kan kasaysayan nin Israel, parating ginagamit ni Jehova an saiyang makapangyarihan na “kamot” para protektaran an Israel sa mga kalaban. (Exodo 7:4) Minsan siring, ginamit man ni Jehova an saiyang kapangyarihan para protektaran an mga indibidwal.

10, 11. Anong mga halimbawa sa Bibliya an nagpapahiling kun paano ginamit ni Jehova an saiyang kapangyarihan na magprotektar para sa mga indibidwal?

¹⁰ Kan an tulong hoben na Hebreo—na midbid sa apod na Sadrac, Mesac, asin Abednego—nagsayumang dumuko sa imahen na bulawan na pinatindog ni Hading Nabucodonosor, an angguton na hadi naghuma na iaapon sinda sa hurnong pinainit na marhay. “Siisay na diyos an makakapagligtas saindo sa mga kamot ko?” an pagtuya ni Nabucodonosor, an pinakamakapangyarihan na tagapamahala sa daga. (Daniel 3:15) Lubos an pagtitiwala kan tulong hoben na lalaki sa kapangyarihan kan saindang Diyos na protektaran sinda, alagad dai ninda inisip na gigibuhon niya iyan. Huli kaiyan, nagsimbag sinda: “Kun iaapon man kami sa nagkakalayong hurno, . . . kaya kaming iligtas kan Diyos na samuyang pinaglilingkudan.” (Daniel 3:17) Tunay nanggad, an nagkakalayong hurnong idto, dawa pa pinainit nin pitong doble kisa dati, dai nagin problema sa saindang Diyos na makapangyarihan sa gabos. Talagang prinotektaran Niya sinda, asin napiritan an hadi na admitiron: “Mayong ibang diyos na kayang magligtas na arog kan sarong ini.”—Daniel 3:29.

¹¹ Ipinahiling man ni Jehova sa pambihirang paagi an saiyang kapangyarihan na magprotektar kan ibalyo niya an buhay kan saiyang bugtong na Aki pasiring sa matris kan Judiong birhen na si Maria. Sinabi nin sarong anghel ki Maria na “magbabados [siya] saka mangangaki nin sarong aking lalaki.” Ipinaliwanag kan anghel: “An banal na espiritu maabot sa saimo, asin lilindungan ka kan kapangyarihan kan Kahuruhalangkawi.” (Lucas 1:31, 35) Sa panahon na iyan, kaipuhan nanggad kan Aki nin Diyos nin proteksiyon. Maaapektaran daw kan kasalan asin kan pagigin bakong perpekto kan ina an dai pa namumundag na aki na nasa saiyang matris? Magigibo daw ni Satanas na lugadon o gadanon an Aking iyan bago siya mamundag? Imposible! Garo man sana pinalibutan ni Jehova si Maria nin nagpoprotektar na lanob tanganing mayo nin ano man na bagay—pagigin bakong perpekto, nakakadanyar na puwersa, tawong may intensiyon na gumadan, o demonyo—na makadanyar sa nagdadakulang embrayo, puon kan iyan ipangidam. Padagos na prinotektaran ni Jehova si Jesus sa panahon kan pagkahoben kaini. (Mateo 2:1-15) Sagkod na dai pa nag-aabot an itinalaan na panahon nin Diyos, lubos niyang prinotektaran an saiyang namumutan na Aki.

12. Taano ta milagrosong prinotektaran ni Jehova an nagkapirang indibidwal kaidtong mga panahon kan Bibliya?

¹² Taano ta prinotektaran ni Jehova an nagkapirang indibidwal sa arog kaiyan kamilagrosong mga paagi? Sa dakul na kamugtakan, prinotektaran ni Jehova an mga indibidwal tanganing maprotektaran an sarong bagay na mas mahalagang marhay: an mautob an saiyang katuyuhan. Halimbawa, kaipuhan na maingatan na buhay an umboy na si Jesus para mautob an katuyuhan nin Diyos, na sa katapos-tapusi matao nin pakinabang sa bilog na katawuhan. An rekord kan dakul na pagpahiling kan kapangyarihan nin Diyos na magprotektar kabtang kan ipinasabong na Kasuratan, na “isinurat para sa pagtukdo sa sato, tanganing paagi sa satuyang pakatagal asin paagi sa karangahan hali sa Kasuratan magkaigwa kita nin paglaom.” (Roma 15:4) Iyo, an mga halimbawang iyan nagpapakusog kan satong pagtubod sa satong makapangyarihan sa gabos na Diyos. Pero anong proteksiyon an maaasahan ta ngunyan sa Diyos?

13. Obligado daw si Jehova na magmilagro para sa sato? Ipaliwanag.

¹³ An ipinanugang pagprotektar nin Diyos dai nangangahulugan na obligado si Jehova na gumibo nin mga milagro para sa sato. An satong Diyos dai nanunuga sa sato nin buhay na daing problema sa lumang sistemang ini. Dakul na maimbod na lingkod ni Jehova an napapaatubang sa grabeng mga kasakitan, kaiba na an pagtios, giyera, hilang, asin kagadanan. Malinaw na sinabi ni Jesus sa saiyang mga disipulo na bilang mga indibidwal tibaad gadanon sinda huli sa saindang pagtubod. Iyan an dahilan kaya idinuon ni Jesus an pangangaipong magtagal sagkod sa katapusan. (Mateo 24:9, 13) Kun gagamiton ni Jehova an saiyang kapangyarihan tanganing milagrosong magligtas sa gabos na kamugtakan, siguradong magkakaigwa nin basehan si Satanas na tuyaon si Jehova asin kuwestiyunon an pagigin tunay kan satong debosyon sa satong Diyos.—Job 1:9, 10.

14. Anong mga halimbawa an nagpapahiling na dai pirming pinoprotektaran ni Jehova an gabos niyang lingkod sa pararehong paagi?

¹⁴ Dawa kaidtong mga panahon kan Bibliya, dai ginamit ni Jehova an saiyang kapangyarihan na magprotektar tanganing ilikay an lambang lingkod niya sa amay na kagadanan. Halimbawa, kaidtong mga 44 C.E. ginadan ni Herodes si apostol Santiago; pero, dai nahaloy pagkatapos kaiyan, ilinigtas si Pedro “sa kamot ni Herodes.” (Gibo 12:1-11) Asin si Juan, na tugang ni Santiago, mas halawig na nabuhay kisa ki Pedro saka Santiago. Malinaw nanggad, dai niyato puwedeng asahan na poprotektaran kan satong Diyos an gabos niyang lingkod sa pararehong paagi. Apuwera kaiyan, “an panahon asin an dai linalauman na mga pangyayari” minaabot sa sato gabos. (Eclesiastes 9:11) Kun siring, paano kita pinoprotektaran ni Jehova ngunyan?

15, 16. (a) Ano an ebidensiya na pinoprotektaran ni Jehova sa pisikal an saiyang mga parasamba bilang sarong grupo? (b) Taano ta makakapagtiwala kita na poprotektaran ni Jehova an saiyang mga lingkod ngunyan asin sa panahon kan “dakulang kasakitan”?

¹⁵ Aramon ta nguna an manungod sa pisikal na pagprotektar. Bilang mga parasamba ni Jehova, maaasahan ta na poprotektaran niya kita bilang sarong grupo. Ta kun dai, madali sana kitang mabibiktima ni Satanas. Isip-isipa ini: Si Satanas, “an tagapamahala kan kinaban na ini,” mayo nin ibang gusto kundi an paraon an tunay na pagsamba. (Juan 12:31; Kapahayagan 12:17) An nagkapira sa pinakamakapangyarihan na mga gobyerno sa daga ipinagbawal an satong gibuhon na paghuhulit asin pinurbaran na lubos kitang paraon. Pero, an banwaan ni Jehova nagdanay na marigon asin nagpadagos nin daing pundo sa paghuhulit! Taano ta dai nagibo kan makapangyarihan na mga nasyon na papunduhon an aktibidad kan sadit sana asin garo baga daing kalaban-laban na grupong ini nin mga Kristiyano? Huling pinoprotektaran kita ni Jehova paagi kan saiyang makapangyarihan na mga pakpak!—Salmo 17:7, 8.

¹⁶ Poprotektaran man daw kita sa pisikal sa maabot na “dakulang kasakitan”? Dai ta kaipuhan na ikatakot an gigibuhon na paghukom nin Diyos. Tutal, “aram ni Jehova kun paano iligtas sa kasakitan an mga tawong may debosyon sa Diyos asin itagama sa kalaglagan an maraot na mga tawo sa aldaw nin paghukom.” (Kapahayagan 7:14; 2 Pedro 2:9) Miyentras tanto, pirmi kitang makakasiyerto sa duwang bagay. Inot, nungkang itutugot ni Jehova na mapara sa daga an maimbod na mga lingkod niya. Ikaduwa, an mga nagdadanay na may integridad babalusan niya nin buhay na daing katapusan sa saiyang matanos na bagong kinaban—kun kaipuhan, paagi sa pagkabuhay liwat. Para sa mga nagadan, mayo na nin mas ligtas na lugar kisa sa pagigin nasa memorya nin Diyos.—Juan 5:28, 29.

17. Paano kita pinoprotektaran ni Jehova paagi sa saiyang Tataramon?

¹⁷ Dawa ngunyan, pinoprotektaran kita ni Jehova paagi sa saiyang buhay na “tataramon,” na igwa nin puwersa na magpaumay nin mga puso asin magpabago sa buhay nin mga tawo. (Hebreo 4:12) Paagi sa pag-aplikar kan mga prinsipyo kaiyan, puwede kitang maprotektaran sa nagkapirang paagi sa pisikal na peligro. “Ako, si Jehova, . . . nagtutukdo sa saimo tanganing makinabang ka,” an sabi kan Isaias 48:17. Daing duda, an pamumuhay kauyon kan Tataramon nin Diyos makakatabang sa sato na magkaigwa nin mas marahay na salud asin maglawig an satong buhay. Halimbawa, huli ta inaaplikar ta an sadol kan Bibliya na lumikay sa seksuwal na imoralidad asin linigon an satuyang sadiri sa bagay na nakakaramog, nalilikayan niyato an maating mga gibo asin mga bisyo na nakakaraot sa buhay nin dakul na tawo na habong magsunod sa Diyos. (Gibo 15:29; 2 Corinto 7:1) Nagpapasalamat nanggad kita sa proteksiyon na itinatao kan Tataramon nin Diyos!

18. Anong espirituwal na proteksiyon an itinatao sa sato ni Jehova?

¹⁸ An pinakamahalaga, pinoprotektaran kita ni Jehova sa espirituwal. Pinoprotektaran kita kan satong mamumuton na Diyos sa espirituwal na kapahamakan paagi sa pagtao sa sato kan gabos tang kinakaipuhan para makatagal sa mga pagbalo asin para maingatan an satong relasyon sa saiya. Sa siring, naghihiro si Jehova tanganing maingatan an satong buhay, bako sanang sa laog nin pirang haralipot na taon kundi sagkod sa panahon na daing sagkod. Hilingon ta an nagkapirang probisyon nin Diyos na makakaprotektar sa sato sa espirituwal.

19. Paano kita matatabangan kan espiritu ni Jehova na makayanan an ano man na pagbalo na tibaad atubangon ta?

¹⁹ Si Jehova an “Paradangog nin pamibi.” (Salmo 65:2) Kun pagmati ta dai na niyato makakayanan an satong mga problema, an biyong pagpahayag ta sa saiya kan nasa laog kan satong puso makakatao sa sato nin dakulang kaginhawahan. (Filipos 4:6, 7) Tibaad dai man niya milagrosong halion an mga pagbalo sa sato, alagad bilang simbag sa satong udok sa pusong mga pamibi, puwede niya kitang tawan nin kadunungan para maatubang an mga iyan. (Santiago 1:5, 6) Urog pa diyan, nagtatao si Jehova nin banal na espiritu sa mga naghahagad sa saiya. (Lucas 11:13) An mapuwersang espiritung iyan makakatabang sa sato na makayanan an ano man na pagbalo o problema na tibaad atubangon ta. Matatawan kita kaiyan nin “puwersa na urog kisa sa ordinaryo” tangani na makatagal sagkod na halion na ni Jehova an gabos na problema sa haranihon nang bagong kinaban.—2 Corinto 4:7.

20. Paano puwedeng ipahiling an kapangyarihan ni Jehova na magprotektar paagi sa satong mga kapwa parasamba?

²⁰ Kun beses, an kapangyarihan ni Jehova na magprotektar puwedeng ipahiling paagi sa satong mga kapwa parasamba. Dinara kita ni Jehova sa sarong pambilog na kinaban na “kasararuan nin magturugang.” (1 Pedro 2:17; Juan 6:44) Pag namamatian ta an pagkamuot na sa magturugang, nahihiling niyato kun paano an puwersa kan banal na espiritu nin Diyos dinadagka an mga tawo na gumibo nin marahay. An espiritung iyan nakakatabang sa sato para makapaluwas nin bunga—magagayon saka mahahalagang marhay na kuwalidad kaiba an pagkamuot, kabuutan, asin karahayan. (Galacia 5:22, 23) Huli kaini, pag nasasakitan kita tapos sarong kapagtubod an napahiro na magtao nin nakakatabang na sadol o magsabi nin kaipuhan na marhay na pagparigon sa buot, makakapagpasalamat kita ki Jehova para sa siring na mga kapahayagan kan saiyang mapagprotektar na pag-asikaso.

21. (a) Anong napapanahon na espirituwal na kakanon an itinatao ni Jehova paagi sa “maimbod asin mapagmansay na uripon”? (b) Paano ka personal na nakinabang sa mga probisyon ni Jehova sa pagprotektar sa sato sa espirituwal?

²¹ May saro pang itinatao si Jehova para protektaran kita: napapanahon na espirituwal na kakanon. Tanganing tabangan kita na makakua nin kusog sa saiyang Tataramon, ninombrahan ni Jehova “an maimbod asin mapagmansay na uripon” para magtao nin espirituwal na kakanon. Ginagamit kan maimbod na uripon na iyan an imprentadong mga publikasyon, kaiba an mga magasin na An Torrengbantayan asin Awake! pati man an satong website na jw.org, mga pagtiripon, mga asembleya, asin mga kumbensiyon sa pagtao sa sato kan “kakanon sa tamang panahon”—mga kaipuhan ta sa tamang panahon. (Mateo 24:45) May nadangog ka na daw sa sarong Kristiyanong pagtiripon—sa sarong komento, sa sarong pahayag, o dawa sa sarong pamibi—na nagtao kan eksaktong kusog asin pamparigon sa buot na kaipuhan mo? Nagkaigwa na daw nin epekto sa buhay mo an sarong espesipikong artikulo na ipinublikar sa saro sa satong mga magasin? Girumdumon na itinatao ni Jehova an gabos na probisyon na iyan tanganing maprotektaran kita sa espirituwal.

22. Sa anong paagi pirming ginagamit ni Jehova an saiyang kapangyarihan, asin taano ta an paggibo niya kaiyan para sa pinakaikakarahay niyato?

²² Si Jehova talagang sarong kalasag sa “gabos na nagpapaili sa saiya.” (Salmo 18:30) Nasasabutan ta na dai niya ginagamit an saiyang kapangyarihan tanganing protektaran kita sa gabos na kapahamakan ngunyan. Minsan siring, talagang pirmi niyang ginagamit an saiyang kapangyarihan na magprotektar tanganing masigurado an kautuban kan saiyang katuyuhan. Sa katapos-tapusi, ginigibo niya iyan para sa pinakaikakarahay kan saiyang banwaan. Kun kita marani sa saiya asin magdadanay sa saiyang pagkamuot, itatao sa sato ni Jehova an sarong perpektong buhay sa panahon na daing sagkod. Nasa isip an paglaom na iyan, mamansayon niyato na an ano man na pagsakit sa sistemang ini, iyan “minaagi sana asin magian.”—2 Corinto 4:17.