Sabuton an mga Propesiya ni Ezekiel

Sa Bibliya, an Hebreong pandiwa na na·vaʼʹ, na itrinadusir na “magpropesiya,” nanunungod panginot na sa pagpahayag nin ipinasabong na mensahe, paghukom, katukduan sa moral, o pagbuot hali sa Diyos. Puwede man iyan magpanungod sa pagpahayag nin sarong bagay na maabot. Kaiba sa mga propesiya ni Ezekiel an gabos na klaseng iyan nin kapahayagan hali sa Diyos.—Ezek. 3:10, 11; 11:4-8; 14:6, 7; 37:9, 10; 38:1-4.

• 

  BISYON

• 

  ILUSTRASYON

• 

  PAG-AKTO

An libro nin Ezekiel igwa nin mga bisyon, ilustrasyon, parabula, asin pag-akto nin propetikong mga mensahe.

Kun minsan, an mga propesiya ni Ezekiel bako lang saro an kautuban. Halimbawa, an mga propesiya manungod sa pagbabalik nagkaigwa nin sadit na kautuban kan an banwaan nin Diyos magbalik sa Dagang Panuga. Pero arog kan pag-uulayan sa Kapitulo 9 kan publikasyon na ini, an dakul sa mga propesiyang iyan manungod sa pagbabalik igwa man nin kautuban ngunyan dangan sa maabot na panahon.

Kaidto, sinasabi ta na an nagkapirang kabtang kan mga propesiya ni Ezekiel igwa nin tipiko asin antitipikong kautuban. Pero linikayan sa publikasyon na ini na iladawan an siisay man na tawo, o arin man na bagay, lugar, o pangyayari bilang propetikong tipiko na igwa nin antitipikong kautuban sa modernong panahon apuwera na sana kun igwa nin malinaw na basehan sa Bibliya.a Imbes, ipapahiling kaini an mas dakulang kautuban kan dakul sa mga propesiya ni Ezekiel. Sisiyasaton man digdi an mga leksiyon na manunudan ta sa mensahe ni Ezekiel, pati na sa mga tawo, lugar, asin pangyayari na sinambit niya.