Kun Taano ta Bakong Madaling Mamidbid an Dios sa Ngaran

IGWA nin saro na gusto kamong olangon na mamidbid an ngaran ni Jehova asin na magkaigwa nin dayupot na relasyon sa Saiya. Siisay an maraot na kaiwal na ini? Nagpapaliwanag an Biblia: “Binuta kan dios kan sistemang ini nin mga bagay an isip kan mga dai nagtutubod.” An dios kan presenteng bakong diosnon na kinaban na ini iyo si Satanas na Diablo. Gusto niang magdanay kamo sa kadikloman tanganing an saindong puso dai maliwanagan kan “mamuraway na kaaraman dapit sa Dios.” Habo ni Satanas na mamidbid nindo si Jehova sa ngaran. Pero, paano binubuta ni Satanas an isip kan mga tawo?—2 Corinto 4:4-6.

Ginagamit ni Satanas an falsong relihion tanganing olangon an mga tawo na mamidbid an Dios sa ngaran. Halimbawa, kan suanoy na mga panahon binaliwala nin nagkapirang Judio an ipinasabong na Kasuratan apabor sa tradisyon na nagboboot na dai paggamiton an ngaran nin Dios. Pag-abot kan enot na mga siglo kan satong Komun na Kapanahonan, minalataw na an Judiong mga parabasa sa publiko pinagbotan na dai pagbasahon an ngaran nin Dios kun iyan minalataw sa saindang Banal na Kasuratan, kundi salidahan iyan kan terminong Adho·naiʹ, na nangangahulogan “Kagurangnan.” Daing duda, iyan nagin dahelan nin makamomondong pagruro nin espirituwalidad. Dakol an dai nakinabang sa pagkaigwa nin dayupot na personal na relasyon sa Dios. Pero, kumusta si Jesus? Ano an saboot nia dapit sa ngaran ni Jehova?

Ipinahayag ni Jesus kan sia mamibi sa saiyang Ama: “Ipinamidbid ko . . . an saimong ngaran asin ipapamidbid ko pa iyan.” (Juan 17:26) Daing duda na dakol na beses na sinambit ni Jesus an ngaran nin Dios kan basahon, kotaron, o ipaliwanag nia an mga kabtang kan Hebreong Kasuratan na yaon an mahalagang ngaran na iyan. Sa siring, pirmeng ginagamit ni Jesus an ngaran nin Dios arog kan ginibo kan gabos na propetang naenot sa saiya. Kun may mga Judiong dai na naggagamit kan ngaran nin Dios sa panahon kan ministeryo ni Jesus, siertong dai sinunod ni Jesus an saindang tradisyon. Marigon niang krinitikar an mga namomoon sa relihion kan sabihon nia sa sainda: “Hinalean nindo nin halaga an tataramon nin Dios huli sa saindong tradisyon.”—Mateo 15:6.

Padagos na ipinamidbid kan maimbod na mga parasunod ni Jesus an ngaran nin Dios pakalihis na magadan asin buhayon liwat si Jesus. (Helingon an kahon na “Ginamit daw kan Enot na mga Kristiano an Ngaran nin Dios?”) Kan Pentecostes 33 C.E., an mismong aldaw na naestablisar an Kristianong kongregasyon, si apostol Pedro nagkotar sa sarong hula ni Joel asin nagsabi sa sarong dakulang grupo nin mga Judio asin proselito: “An lambang nag-aapod sa ngaran ni Jehova maliligtas.” (Gibo 2:21; Joel 2:32) Tinabangan kan enot na mga Kristiano an mga tawo hale sa dakol na nasyon na mamidbid si Jehova sa ngaran. Sa siring, sa sarong pagtiripon kan mga apostol asin kamagurangan na lalaki sa Jerusalem, an disipulong si Santiago nagsabi: “An Dios . . . nagtao kan saiyang atension sa mga nasyon tanganing kumua hale sa sainda nin sarong banwaan para sa saiyang ngaran.”—Gibo 15:14.

Minsan siring, an kaiwal kan ngaran nin Dios dai puminondo. Kan gadan na an mga apostol, dai nagsayang nin panahon si Satanas sa pagpalakop nin apostasiya. (Mateo 13:38, 39; 2 Pedro 2:1) Halimbawa, an Kristiano daang parasurat na si Justin Martyr namundag kan panahon man na nagadan si Juan, an pinakahuri sa mga apostol. Pero, paorootrong iininsistir ni Justin sa saiyang mga isinurat na an Paratao kan gabos na bagay “sarong Dios na dai inaapod sa personal na ngaran.”

Kan an apostatang mga Kristiano guminibo nin mga kopya kan Kristianong Griegong Kasuratan, minalataw na hinale ninda an personal na ngaran ni Jehova sa teksto asin isinalida an Kyʹri·os, an Griegong termino para sa “Kagurangnan.” Arog man kaiyan an nangyari sa Hebreong Kasuratan. Huling an ngaran nin Dios dai na binabasa nin makosog, an banal na ngaran sinalidahan kan apostatang Judiong mga eskriba nin ʼAdho·naiʹ nin labing 130 beses sa Kasuratan ninda. An maimpluwensiang traduksion kan Biblia sa Latin na nakompleto ni Jerome kan 405 C.E. asin inapod na Vulgate hinale man an personal na ngaran nin Dios.

Ngonyan, aram nin mga iskolar sa Biblia na an personal na ngaran ni Jehova minalataw nin mga 7,000 na beses sa Biblia. Huli kaini, an nagkapirang traduksion na ginagamit nin dakol, siring kan Katolikong Jerusalem Bible, Katolikong La Biblia Latinoamerica sa Kastila, asin kan popular na bersion na Reina-Valera na sa Kastila man, pirmeng ginagamit an personal na ngaran nin Dios. Itrinadusir nin nagkapirang traduksion an ngaran nin Dios na “Yahweh.”

Makamomondo, an dakol na relihion na nag-iisponsor sa pagtradusir nin Biblia ginigipit an mga iskolar na haleon an ngaran nin Dios sa saindang mga traduksion kan Biblia. Halimbawa, sa surat na may petsang Hunyo 29, 2008, para sa mga presidente nin mga komperensia nin mga obispong Katoliko, an Batikano nagsabi: “Sa nakaagi pa sanang mga taon, luway-luway na ikinaintrodusir an pagsambit sa ngaran kan Dios nin Israel.” An surat nagtao nin arog kaining direktang instruksion: “An ngaran nin Dios . . . dai dapat gamiton ni sambiton.” Dugang pa, “sa pagtradusir kan Biblia sa presenteng mga lenguahe, . . . an dapat na gamiton na traduksion kan banal na tetragrammaton iyo an katimbang kan Adonai/Kyrios: ‘Kagurangnan.’” Malinaw nanggad, an direktibang ini kan Batikano may katuyohan na papondohon an paggamit sa ngaran nin Dios.

An mga Protestante nagin daing galang man sa ngaran ni Jehova. Sarong representante sa pagtaram para sa New International Version na inisponsor nin mga Protestante asin ipinublikar sa Ingles kan 1978, an nagsurat: “An Jehova sarong nagpapamidbid na ngaran para sa Dios asin pinakamarahay kutana na ginamit mi iyan. Alagad naggastos kami nin 2.25 milyones na dolyar sa traduksion na ini asin seguradong masasayang gabos iyan kun itatradusir mi, halimbawa, an Salmo 23 na, ‘Si Yahweh an sakuyang Pastor.’”

Dugang pa, inoolang man nin mga relihion an mga taga Latin Amerika na mamidbid an Dios sa ngaran. Si Steven Voth, na kinokonsulta sa pagtradusir para sa United Bible Societies (UBS), nagsurat: “An saro sa nagpapadagos na mga debate sa tahaw kan mga Protestante sa Latin Amerika nakasentro sa paggamit kan ngaran na Jehova . . . Interesante nanggad, sarong dakulaon asin nagdadakula pa na modernong iglesiang pentecostal . . . an nagsabi na gusto ninda nin edisyon na 1960 kan Reina-Valera, alagad mayo kan ngaran na Jehova. Imbes, gusto ninda an terminong Señor [Kagurangnan].” Segun ki Voth, kan enot sinayumahan kan UBS an kahagadan na ini alagad kan huri nagtogot iyan asin nagpublikar nin edisyon kan Bibliang Reina-Valera na “mayo kan terminong Jehova.”

An paghale sa ngaran nin Dios sa saiyang nasusurat na Tataramon asin an pagsalida kaiyan nin “Kagurangnan” nakakaolang sa mga nagbabasa na talagang mamidbid kun siisay an Dios. An siring na pagsalida nagbubunga nin karibarawan. Halimbawa, tibaad dai marisa nin nagbabasa kun baga an terminong “Kagurangnan” nanonongod ki Jehova o sa saiyang Aki, si Jesus. Huli kaini, sa teksto na dian kinotar ni apostol Pedro si David na nagsasabi: “Si Jehova nagsabi sa sakong Kagurangnan [an binuhay liwat na si Jesus]: ‘Tumukaw ka sa sakong too,’” dakol na traduksion kan Biblia an nagsasabi: “An Kagurangnan nagsabi sa sakong Kagurangnan.” (Gibo 2:34, Marahay na Bareta Biblia) Dugang pa, si David Clines, sa saiyang komposisyon na “Yahweh and the God of Christian Theology,” (“Si Yahweh Asin an Dios kan Kristianong Teolohiya”) nagsabi: “An sarong resulta kan pagkawara ni Yahweh sa kaisipan nin mga Kristiano iyo an tendensiang magpokus na sana ki Cristo.” Huli kaini, dakol na parasimba an haros dai nakakaaram na an tunay na Dios na sa Saiya namibi si Jesus sarong Persona na igwa nin ngaran na Jehova.

Grabe an paghihingoa ni Satanas na butahon an isip nin mga tawo manongod sa Dios. Dawa siring, puede nindong mamidbid nin dayupot si Jehova.

Daing duwa-duwa, nakikipaglaban si Satanas tumang sa ngaran nin Dios, asin may katusohan niang ginagamit an falsong relihion. Minsan siring, an totoo iyo na mayong kapangyarihan sa langit o sa daga na makakapapondo sa Soberanong Kagurangnan na Jehova sa pagpamidbid kan saiyang ngaran sa mga gustong makaaram kan katotoohan manongod sa saiya asin sa mamuraway niang katuyohan para sa maimbod na mga tawo.

Maoogma an mga Saksi ni Jehova na tabangan kamo na manodan kun paano madayupot sa Dios paagi sa pag-adal kan Biblia. Sinusunod ninda an halimbawa ni Jesus, na nagsabi sa Dios: “Ipinamidbid ko sa sainda an saimong ngaran.” (Juan 17:26) Mantang hinohorophorop nindo an mga teksto na naghahayag kan manlaenlaen na nagin papel ni Jehova tanganing bendisyonan an katawohan, maaaraman nindo an dakol na magagayon na aspekto kan saiyang mamuraway na personalidad.

An maimbod na patriarkang si Job nagin ‘dayupot sa Dios,’ asin puede man nindong maeksperyensiahan iyan. (Job 29:4) Paagi sa kaaraman dapit sa Tataramon nin Dios, puede nindong mamidbid si Jehova sa ngaran. An siring na kaaraman magtatao sa saindo nin kompiansa na si Jehova mahiro kaoyon kan sinabi niang kahulogan kan saiyang ngaran—‘Ako Magigin siring sa ano man na boot ko.’ (Exodo 3:14, nota sa ibaba) Sa siring, seguradong ootobon nia an gabos niang marahay na panuga sa katawohan.