1 Imilandu

28 Kabili Davidi alonganike bacilolo+ ba bena Israele bonse, bacilolo+ ba mikowa na bacilolo+ ba mabumba yalebombela imfumu na bacilolo ba pa bantu amakana+ na bacilolo ba pa bantu imyanda+ na balesakamana ifipe+ fyonse ne fitekwa+ fyonse ifya mfumu ne fya bana+ ba iko, pamo na bacilolo ba kwi sano+ e lyo na baume impalume bonse, aba maka,+ ku Yerusalemu. 2 E lyo Davidi imfumu aimine no kutila:

“Ng’umfweni, bamunyinane na mwe bantu bandi. Ine, mu mutima+ wandi nafwaile ukukuula ing’anda apa kutuushisha icipao ca cipangano ica kwa Yehova kabili icipuna ca kunyantapo amakasa+ ya kwa Lesa wesu, kabili nalipekenye ifya kukuulila.+ 3 E lyo Lesa wa cine umwine asosele kuli ine, ati ‘Tawakakuulile ishina lyandi ing’anda;+ pantu uli muntu wa nkondo, kabili walisuumya umulopa uwingi.’+ 4 Awe Yehova Lesa wa kwa Israele ansalile mu ng’anda yonse iya kwa tata+ pa kuti mbe imfumu+ ya bena Israele umuyayaya; pantu Yuda e o asalile ukuba intungulushi,+ kabili mu ng’anda ya kwa Yuda asalile ing’anda ya kwa tata,+ kabili pa bana+ ba kwa tata, nine asalile,+ pa kuti akambike ukuba imfumu ya bena Israele bonse; 5 kabili pa bana bandi bonse (pantu Yehova ampeela abana abengi)+ asalile Solomone+ umwana wandi ukwikala pa cipuna+ ca bufumu bwa kwa Yehova ukuteka Israele.

6 “Kabili, asosele kuli ine, ati, ‘Solomone umwana obe e ukakuula ing’anda+ yandi ne mansa shandi; pantu nimusala ukuba umwana+ wandi, na ine nkaba wishi.+ 7 Kabili nkapampamika ubufumu+ bwakwe umuyayaya nga akatwalilila ukulakonka amafunde+ yandi no bupingushi bwandi,+ nge fyo alecita buno bushiku.’ 8 E ico nomba, pa menso ya bena Israele bonse, ulukuta+ lwa kwa Yehova, kabili mu matwi ya kwa Lesa wesu,+ bikeniko amano no kufwaya amafunde yonse aya kwa Yehova Lesa wenu, pa kuti mukwate icalo+ icisuma no kucishila abana benu abakamukonkapo pa kuti cikabe ubupyani bwabo umuyayaya.

9 “Kabili iwe, Solomone mwana wandi, ishiba+ Yehova Lesa wa kwa wiso no kumubombela+ no mutima onse+ no mweo wa nsansa;+ pantu Yehova alafwaya+ mu mitima yonse, kabili aleluka+ na matontonkanyo yonse. Nga wamufwaya, akaleka ukamusange;+ lelo nga wamusha,+ akakukaana umuyayaya.+ 10 E ico ubikeko amano, pantu Yehova nakusala ukukuula ing’anda iikaba icifulo ca mushilo. Shipa kabili bomba.”+

11 Kabili Davidi apeele Solomone umwana wakwe apo balembele ifya kukonka pa kukuula+ umuputule wa kwingililapo+ e lyo ne miputule ya mu ng’anda ne miputule ya kusungilamo ifintu+ iya mu nganda ne miputule ya pa muulu+ iya mu ng’anda ne miputule ya mu kati na nkati aka ng’anda e lyo no muputule umwali inkupiko ya cifuta mulandu;+ 12 bamulangile ne fyo engakuula fyonse ukulingana ne fyo umupashi wamulangile,+ imansa+ sha ng’anda ya kwa Yehova ne miputule ya kuliilamo+ yonse ukushinguluka, iya kututilamo icuma ca ng’anda ya kwa Lesa wa cine ne ya mo balesungila fyonse ifya mushilo;+ 13 ne fya kwakanya+ bashimapepo na bena Lebi ne fya kubomba umulimo onse uwa mu ng’anda ya kwa Yehova ne fipe fyonse ifya kubomfya ku mulimo wa ng’anda ya kwa Yehova; 14 amulangile na pali golde ukulingana no kufina kwa iko, golde ya fipe fyonse ifya milimo yalekanalekana, e lyo ne fipe fyonse ifya silfere ukulingana no kufina kwa iko, ifipe+ fyonse ifya milimo yalekanalekana; 15 kabili ukufina kwa fya kutekapo inyali+ ifya golde ne nyali sha fiko isha golde, ukulingana no kufina kwa fya kutekapo inyali ifyalekanalekana ne nyali sha fiko, e lyo ne fya kutekapo inyali ifya silfere ukulingana ne fya kutekapo inyali ne nyali sha fiko ukulingana ne milimo ya fya kutekapo inyali ifyalekanalekana; 16 kabili golde ukulingana no kufina kwa matebulo ya mukate wa kutuntikanya,+ uwa pa matebulo yalekanalekana, na silfere iya kupangila amatebulo ya silfere; 17 ne fya kutunkwilako ne mbale shafonka+ ne mitondo ya golde iisuma, ne mbale shafonka+ ishinono isha golde ukulingana no kufina kwa mbale shafonka ishinono ishalekanalekana, ne mbale shafonka ishinono isha silfere ukulingana no kufina kwa mbale shafonka ishinono ishalekanalekana; 18 na golde iisuma iya pa ciipailo+ ca fyanunkila ukulingana no kufina ne fimpashanya fye celeta,+ e kutila, bakerubi+ ba golde abafungulula amapindo yabo no kufimba pa cipao ca cipangano ica kwa Yehova. 19 “Fyonse fyalilembelwe+ pantu ukuboko kwa kwa Yehova kwali pali ine, kabili anengele ukwishiba fyonse ifya mulimo wa fya kukuula.”+

20 Kabili Davidi asosele ku mwana wakwe Solomone ati: “Shipa+ kabili kosa no kubomba. Witiina+ kabili witutuma,+ pantu Yehova Lesa, Lesa wandi, ali na iwe.+ Takakulekeleshe+ nelyo ukukusha mpaka umulimo onse uwa ng’anda ya kwa Yehova ukapwe. 21 Kabili kuli amabumba ya bashimapepo+ na bena Lebi+ aba kubomba imilimo yonse pa ng’anda ya kwa Lesa wa cine; kabili naukwata bonse abaitemenwa+ abaishiba ukubomba umulimo onse,+ na bacilolo+ na bantu bonse, aba kucita fyonse ifyo wasosa aba kubomba na iwe mu mulimo onse.”