Ibuuku lya Bubili Ilya kwa Samwele

14 Nomba Yoabu umwana wa kwa Seruya+ alishibe ukuti imfumu yalefuluka Abishalomu.+ 2 E ico Yoabu atumine abakuyaita umwanakashi uwacenjela ku Tekoa+ kabili aishilemweba ati: “Ucite kwati uleloosha, ufwale ne fya kufwala fya kulooseshamo, kabili wisuba amafuta.+ Ucite kwati mwanakashi uwaloosha umuntu pa nshiku ishingi. 3 Lyena uye wingile umuli imfumu kabili uyebe auti.” E lyo Yoabu amwebele ifya kuyalanda.

4 Awe umwanakashi umwina Tekoa aile ku mfumu, awile ubukupeme, e lyo ayeba ati: “Mwe mfumu, ngafweni!” 5 Imfumu yamwipwishe aiti: “Bwafya nshi ukwete?” Na o atile: “Nine mukamfwilwa; umulume wandi alifwa. 6 Kabili ne mubomfi wenu nakwete abana abaume babili. Ilyo batampile ukulwa mu mpanga, takwali uwa kubalamununa. E ico umo aumine umunankwe amwipaya no kumwipaya. 7 Nomba ulupwa lonse nalwimina ne mubomfi wenu kabili luleti, ‘Leta uwaipeye munyina pa kuti tumwipaile pa mulandu wa mweo wa kwa munyina uo aipeye, nangu abe ni mpyani!’ Balefwaya ukwipaya umwana wandi+ uo nashala fye na o, pa kuti ishina lya mulume wandi lilobe kabili pano isonde peba* umwana wandi nangu umo.”

8 Lyena imfumu yaebele umwanakashi aiti: “Bwelelamo ku ng’anda, nalabombelapo pa mulandu obe.” 9 E lyo umwanakashi umwina Tekoa aebele imfumu ati: “Shikulu mwe mfumu, lekeni umulandu ube pali ine na pa ba mu ng’anda ya kwa tata, lelo imwe no bufumu bwenu muli ba kaele.” 10 Lyena imfumu yamwebele aiti: “Nga ca kuti kuleba uulelandapo na kabili pali ili lyashi, umulete kuli ine, kabili takabwekeshepo ukukupamfya.” 11 Lelo atile: “Shi lekeni imfumu ibukishe Yehova Lesa wa iko, pa kuti uwa kulandula pa mulopa+ elofya umwana wandi.” E lyo imfumu yamwebele aiti: “Na pali Yehova,+ pa mushishi wa mwana obe tapakaponepo nangu umo.” 12 Nomba umwanakashi atile: “Shi lekeni umubomfi wenu ebeko shikulu imfumu na fimbi.” E ico yamwebele aiti: “Landa!”

13 Umwanakashi alandile ati: “Cinshi mulefwaila ukucitila ifishingawamina abantu ba kwa Lesa?+ Ifi mulelanda filelanga ukuti muli no mulandu pantu mwe mfumu tamufwaya ukubwesha umwana wenu.+ 14 Nangu cibe shani tukafwa kabili tukaba nga menshi ayo betiile panshi ayo bashingakusa. Lelo Lesa te kuti epaye umuntu,* kabili alitontonkanya na pa fyo uo batamfya ashilingile ukwikalilila uko kwine bamutamfisha. 15 Ico naishila ni pa kuti nande na shikulu imfumu, pantu abantu balintiinya. E ico ne mubomfi wenu natile, ‘Lekeni nje nande ne mfumu. Nalimo imfumu ikacita ico umusha wa iko alefwaya. 16 Nalimo imfumu kuti yaumfwa kabili kuti yampokololako ne musha wa iko ku muntu uulefwaya ukunjipaya no kwipaya umwana wandi umo fye pa kuti atufumye pa mpanga ya bupyani iyo Lesa atupeela.’+ 17 Lyena umubomfi wenu atile, ‘Lekeni amashiwi ya kwa shikulu imfumu yantekeko umutima,’ pantu shikulu imfumu alalekanya ubusuma no bubi nga filya fine fye malaika wa kwa Lesa wa cine acita. Yehova Lesa wenu engaba na imwe.”

18 Nomba imfumu yaebele umwanakashi aiti: “Wimfisa nangu cimo pa fyo nalakwipusha.” Na o umwanakashi atile: “Mukwai landeni shikulu mwe mfumu.” 19 Lyena imfumu yamwipwishe aiti: “Bushe ni Yoabu akutumine ukwisalanda fyonse ifi walanda?”+ Umwanakashi ayaswike ati: “Na pali imwe* shikulu mwe mfumu, ifyo fine mwalanda e fyo cili, ni Yoabu umubomfi wenu e wantumine ukwisalanda ifi fyonse ne mubomfi wenu nalanda. 20 Yoabu umubomfi wenu e ucitile ifi pa kuti ifintu fyaluke, lelo shikulu wa mano nga malaika wa kwa Lesa wa cine kabili aleshiba fyonse ifilecitika mu calo.”

21 Lyena imfumu yaebele Yoabu aiti: “Cisuma nalacita ifyo ulefwaya.+ Kabiye, kabweshe umulumendo Abishalomu.”+ 22 E lyo Yoabu awile ubukupeme, kabili alumbenye imfumu. Yoabu atile: “Buno bushiku umubomfi wenu aishiba ukuti mwalimutemwa, shikulu mwe mfumu, pantu imfumu yacita ico umubomfi wa iko alefwaya.” 23 Lyena Yoabu aile ku Geshuri+ kabili abweseshe Abishalomu ku Yerusalemu. 24 Lelo imfumu yatile: “Mulekeni abwelele ku ng’anda ku mwakwe, nshilefwaya ukumumona.” E ico Abishalomu abweleele ku ng’anda ku mwakwe, kabili tamonene ne mfumu.

25 Nomba mu Israele monse tamwali umuntu na umbi uo baletasha pa busuma bwakwe nga filya baletasha Abishalomu. Ukufuma ku mutwe ukufika ku makasa, takwete akalema nangu kamo. 26 Nga abeya umushishi walefina amashekele 200* ukulingana ne libwe lya mfumu ilya kupiminako.* Alebeya pa mpela ya mwaka pantu walefina sana ku mutwe wakwe. 27 Abishalomu afyele abana abaume batatu+ no mwana umwanakashi umo, ishina lyakwe ali ni Tamari. Ali umwanakashi uwayemba nga nshi.

28 Kabili Abishalomu aikele mu Yerusalemu imyaka ibili iituntulu, lelo tamwenepo imfumu.+ 29 E ico Abishalomu atumine abakuyaita Yoabu pa kuti amutume ku mfumu, lelo alikeene ukuyako. Lyena alitumine abakuyamwita na kabili, na lyo line alikeene ukuyako. 30 Asukile aeba ababomfi bakwe ati: “Ibala lya kwa Yoabu lyaba mupepi ne bala lyandi kabili mwaliba barle. Kabiyeni mulyoce.” E ico ababomfi ba kwa Abishalomu baileoca ibala lya kwa Yoabu. 31 E lyo Yoabu aile ku ng’anda kuli Abishalomu kabili amwipwishe ati: “Cinshi ababomfi bobe baocela ibala lyandi?” 32 Abishalomu aebele Yoabu ati: “Mona! Nakutumiine amashiwi ya kuti ‘Isa kuno nkutume uyenjipushishako imfumu auti: “Cinshi nafumiine ku Geshuri?+ Nga caliwemepo naikala fye kulya kwine. Nomba leka monane ne mfumu, kabili nga ca kuti nalikwata umulandu, injipaye.”’”

33 E ico Yoabu aingile umwali imfumu e lyo ayeba ifyo Abishalomu alefwaya. Lyena imfumu yaitile Abishalomu, na o alingile umwali imfumu, awa no bukupeme pa ntanshi ya mfumu. Lyena imfumu yalimutomwene.+