Ibuuku lya Bubili Ilya kwa Samwele

3 Inkondo ya baletungilila ulupwa lwa kwa Shauli na baletungilila Davidi yalikokwele ukupwa; kabili Davidi alekoselako fye,+ lelo abaletungilila ulupwa lwa kwa Shauli bena balenakilako fye.+

2 Pali ilya nshita, Davidi alifyele abana abaume mu Hebrone.+ Ibeli lyakwe ali ni Amnone+ uo afyele muli Ahinoamu+ umwina Yesreele. 3 Uwalenga bubili ali ni Kiliabu uo afyele muli Abigaili+ uwafwililwe umulume wakwe Nabali umwina Karmele. Uwalenga butatu ali ni Abishalomu+ uo afyele muli Maaka, umwana wa kwa Tolmai+ imfumu ya Geshuri. 4 Uwalenga 4 ali ni Adoniya+ uo afyele muli Hagiti, kabili uwalenga 5 ali ni Shefatia uo afyele muli Abitali. 5 Uwalenga 6 ali ni Itreamu uo afyele muli Egla. Aba e bana Davidi afyalile mu Hebrone.

6 Ilyo inkondo ya baletungilila ulupwa lwa kwa Shauli no lupwa lwa kwa Davidi yatwalilile, Abnere+ alekoselako fye pa ba mu lupwa lwa kwa Shauli. 7 Nomba ilyo Shauli ashilafwa alikwete Rispa+ kanakashi wakwe, umwana wa kwa Aya. Pa numa Ishiboshete+ aipwishe Abnere ati: “Cinshi walaalile na kanakashi wa kwa tata?”+ 8 Abnere alikalipe nga nshi pa fyo Ishiboshete amwebele kabili alandile ati: “Bushe ndi mbwa ya mu calo ca Yuda iyo basuula? Nalilanga ulupwa lwa kwa wiso Shauli, bamunyina ne fibusa fyakwe ukutemwa ukushipwa ukushinta na lelo kabili nshakufutuka pa kuti Davidi akwikate; e lyo lelo ulendubulwisha pa mwanakashi? 9 Lesa nakande Abnere kabili amukande sana nga nshakacitile Davidi ifyo Yehova alapile kuli ena.+ 10 Alapile kuli ena ukuti akakuusha ubufumu mu lupwa lwa kwa Shauli, kabili akapampamika icipuna ca bufumu ica kwa Davidi pa bena Israele na pa ba Yuda ukufuma ku Dani ukufika ku Beere-sheba.”+ 11 Ishiboshete ta-aswike Abnere pantu alemutiina.+

12 Ilyo line fye Abnere atumine aba kuyaeba Davidi ati: “Bushe ici calo tacaba mu minwe yandi?” Alandile no kuti: “Natupangane icipangano, kabili nkesha apapela amaka yandi* ukwalula abena Israele pa kuti bakabe ku lubali lwenu.”+ 13 Davidi amwaswike ati: “Cili fye bwino! Nkapangana icipangano na iwe. Nomba ico ndekulombako fye ca kuti taulingile ukwisa mu kumona ilyo ushilaleta Mikali,+ umwana mwanakashi wa kwa Shauli.” 14 Lyena Davidi atumine abakuyaeba Ishiboshete+ umwana wa kwa Shauli ati: “Mpeela umukashi wandi Mikali, uo nalipililepo inkanda 100 isha ku mpela ya bwaume isha baPelishiti pa kumukobekela.”+ 15 E ico Ishiboshete atumine abakuyamusenda ku mulume wakwe Paltiele+ umwana wa kwa Laishi. 16 Lelo umulume wakwe aile nankwe, aile alelila ukuyafika fye na ku Bahurimu.+ Lyena Abnere amwebele ati: “Kabiye, bwelelamo!” E lyo abwelelemo.

17 Abnere atumine amashiwi ku bakalamba ba mu Israele aya kuti: “Ni kale mwatampa ukufwaya ukuti Davidi abe imfumu yenu. 18 Nomba citenipo cimo, pantu Yehova aebele Davidi ati: ‘Ku kuboko kwa kwa Davidi+ umubomfi wandi e ko nkapusushisha abantu bandi abena Israele ku baPelishiti na ku balwani babo bonse.’” 19 Lyena Abnere alandile na bena Benjamini.+ Na kabili Abnere aile ku Hebrone pa kuti aye-eba Davidi mu bumfisolo fyonse ifyo abena Israele na bena Benjamini bapangene ukucita.

20 Ilyo Abnere na baume 20 abo ali nabo bafikile kuli Davidi ku Hebrone, Davidi alibapangiile umutebeto. 21 Lyena Abnere aebele Davidi ati: “Lekeni njelonganika abena Israele bonse kuli shikulu imfumu, pa kuti bapangane icipangano na imwe, kabili mukaba imfumu ya bena Israele bonse.”* E ico Davidi alekele Abnere aya umutende.

22 Ilyo line ababomfi ba kwa Davidi e lyo na Yoabu balibwelele uko baile mu kusansa, kabili baletele ifipe ifingi ifyo bapokele. Abnere tali na Davidi mu Hebrone, pantu alimulekele aya umutende. 23 Ilyo Yoabu+ na bashilika bonse abo ali nabo bafikile, kwali abaebele Yoabu abati: “Abnere+ umwana wa kwa Nere+ alishile ku mfumu, lelo yacimuleka aya umutende.” 24 E ico Yoabu aingile umwali imfumu kabili ayebele ati: “Cinshi mwacitila ifi? Moneni! Abnere alishile kuli imwe. Cinshi mwacimulekela aya umutende? 25 Mwalishiba ifyo Abnere umwana wa kwa Nere aba! Aishile fye mu kumubeleleka na mu kufwaya ukwishiba fyonse ifyo mucita na konse uko muya.”

26 E ico Yoabu afumine umwali Davidi kabili atumine inkombe sha kukonka Abnere, kabili shailemubwesesha pa cishima ca Sira; lelo Davidi taishibe fyonse ifi. 27 Ilyo Abnere abwelele ku Hebrone,+ Yoabu amusendele ku mbali mu mpongolo pa kuti alande nankwe mu bumfisolo. Lelo mulya mwine e mo amulashile ulupanga mu lufumo, ica kuti alifwile.+ Ico amwipaile ni co alipeye* Asaele munyina.+ 28 Ilyo Davidi aumfwile ifi, alandile ati: “Ine no bufumu bwandi, Yehova takatupeele umulandu wa kwipaya+ Abnere umwana wa kwa Nere. 29 Umulopa wa kwa Abnere naubwelele pa mutwe wa kwa Yoabu+ na pa ba mu ng’anda ya kwa wishi bonse. Mu ng’anda ya kwa Yoabu mwikatala amubulwa umwaume uuli ne filetona ku fya mfwalo,+ nelyo uwa fibashi+ nangu umwaume uwa kubombela ku mupeto wa kupombelako ubushishi* nelyo uwa kwipaiwa ku lupanga nangu uushikwete ifya kulya!”+ 30 E fyo Yoabu na Abishai+ munyina baipeye Abnere+ pa mulandu wa kuti aipeye Asaele munyinabo mu nkondo+ iyali mu Gibeone.

31 Lyena Davidi aebele Yoabu na bantu bonse abo ali nabo ati: “Lepauleni ifya kufwala fyenu mufwale ne nsamu* kabili loosheni Abnere.” Imfumu Davidi yaile ilekonka pa numa ya macila. 32 Bashiikile Abnere mu Hebrone; kabili imfumu yalilile umusowa pa nshiishi ya kwa Abnere, kabili abantu bonse balililile. 33 Imfumu yaimbile ulwimbo lwa kuloosha Abnere aiti:

“Cinshi Abnere afwila imfwa ya musaalula?

Wafwa ngo muntu uo baipaya ku fipondo.”*+

E lyo abantu bonse babwekeshepo ukumulila.

35 Pa numa muli bulya bwine bushiku abantu bonse baishile mu kupeela Davidi ifya kulya fya kumusansamusha,* lelo Davidi alilapile ati: “Lesa ankande kabili alundenapo, nga nalalyapo ifya kulya ilyo akasuba kashilawa!”+ 36 Abantu bonse balimwene ifyo acitile kabili balitemenwe. Nga filya fine abantu baletemwa pali fyonse ifyo imfumu yalecita, e fyo batemenwe na pali ifi fine. 37 E ico abantu bonse na bena Israele bonse muli bulya bushiku balishibe ukuti te mfumu yaebele Yoabu ukuti epaye Abnere umwana wa kwa Nere.+ 38 Lyena Imfumu yaebele ababomfi ba iko aiti: “Bushe tamwishibe ukuti intungulushi kabili umuntu uwacindama eufwile buno bushiku mu Israele?+ 39 Buno bushiku nshikwete amaka nangu ca kuti nalisubwa ukuba imfumu,+ kabili aba bantu, abana baume ba kwa Seruya+ bankalwe sana.+ Yehova engalandula uucita ifyabipa pa fyabipa ifyo acita.”+