Yeremia

43 Ilyo Yeremia apwishishe ukweba abantu bonse amashiwi yonse aya kwa Yehova Lesa wabo, amashiwi yonse ayo Yehova Lesa wabo amutumine ukuyabeba, 2 Asaria umwana wa kwa Hoshaya, Yohanani+ umwana wa kwa Karea na baume bonse abaituntumbile baebele Yeremia abati: “Ifyo ulelanda bufi! Yehova Lesa wesu takutumine ukwisatweba ati, ‘Mwiya mu kwikala ku Egupti.’ 3 Lelo Baruki+ umwana wa kwa Neria e ulekweba ukulanda aya mashiwi pa kuti tuwile mu minwe ya bena Kaldi, abakatwipaya nelyo abakatutwala ku Babiloni uko tukayaba bankole.”+

4 E ico Yohanani umwana wa kwa Karea, abakalamba bonse aba bashilika na bantu bonse tabakonkele ifyo Yehova abebele ukuti batwalilile ukwikala mu Yuda. 5 Lelo Yohanani umwana wa kwa Karea na bakalamba bonse aba bashilika basendele abaYuda bonse abashelepo ababwelele mu Yuda ukufuma mu nko shonse umo basalanganine.+ 6 Basendele abaume, abanakashi, abana, abana abanakashi aba mfumu na bonse* abo Nebusaradani+ umukalamba wa balelonda aebele Gedalia+ umwana wa kwa Ahikamu,+ umwana wa kwa Shafani+ ukuti alebateka. Basendele na kasesema Yeremia na Baruki umwana wa kwa Neria. 7 Kabili baile mu calo ca Egupti, pantu tabaumfwilile ishiwi lya kwa Yehova, bafikile na ku Tafne.+

8 Lyena Yehova alilandile na Yeremia mu Tafne, amwebele ati: 9 “Senda amabwe ayakalamba mu minwe yobe, kayafise mu ndaka mu lubansa ulo babikapo injelwa, ulwaba pa mwinshi wa ng’anda ya kwa Farao mu Tafne, ninshi abaume abaYuda balemonako. 10 Lyena ubebe auti, ‘Yehova wa mabumba, Lesa wa kwa Israele alanda ati: “Moneni, ndeita Nebukadnesari* imfumu ya ku Babiloni umubomfi wandi,+ kabili nkabika icipuna cakwe ica bufumu pa muulu wa aya mabwe ayo mfishile, kabili akatanikapo itenti lyakwe ilya bufumu.+ 11 Kabili akesasansa icalo ca Egupti.+ Onse uufwile ukufwa ku cikuko icipaya akafwa ku cikuko icipaya, onse uo bafwile ukusenda ku calo cimbi pa kuti akayeba nkole, bakamusenda ku calo cimbi uko akayaba nkole, na onse uufwile ukufwa ku lupanga akafwa ku lupanga.+ 12 Kabili nkasonteka amayanda* ya balesa ba mu Egupti,+ kabili akaboca no kubasenda pa kuti bakayeba bankole. Akaifimba icalo ca Egupti nga filya kacema aifimba ica kufwala cakwe, kabili akafumamo umutende.* 13 Kabili akatobaula inceshi sha mu Bete-shemeshe,* mu calo ca Egupti, kabili akoca mayanda* ya balesa ba mu Egupti.”’”