Ibuuku lya Bubili Ilya Ishamfumu

4 Nomba umwanakashi umo uwali umukashi wa umo pa bana ba bakasesema+ aliliile kuli Elisha ati: “Umubomfi wenu, uwali umulume wandi alifwa, kabili mwalishiba ukuti umubomfi wenu lyonse aletiina Yehova.+ Nomba uwa nkongole naisa mu kusenda abana bandi babili pa kuti babe abasha bakwe.” 2 E lyo Elisha amwipwishe ati: “Cinshi ulefwaya nkucitile? Njeba, finshi ukwete mu ng’anda?” Na o amwaswike ati: “Ne mubomfi wenu nshikwete nangu cimo, nkwete fye umutondo wa mafuta.”+ 3 Lyena amwebele ati: “Kabiye ku bena mupalamano bobe bonse washimeko imitondo umushili nangu cimo. Washime iingi. 4 Pa numa wingile na bana bobe mu ng’anda wisaleko ne ciibi. Witulwile amafuta mu mitondo yonse, kabili imitondo iyalaisula, uibike yeka.” 5 E ico alifumine apaali Elisha.

Ilyo aingile mu ng’anda pamo na bana bakwe aisalako ne ciibi, abana balemupalamikila imitondo, e lyo ena aleitulwilamo amafuta.+ 6 Ilyo imitondo yaiswile, aebele umwana wakwe ati: “Palamika umutondo na umbi.”+ Lelo umwana atile: “Imitondo yapwa.” Lyena amafuta yalilekele ukufuma.+ 7 E ico aile-eba umuntu wa kwa Lesa wa cine icacitike. Na o amwebele ati: “Kabiye, kashitishe amafuta e lyo ubweseshe uwa nkongole, kabili ishileshalapo uleliilamo pamo na bana bobe.”

8 Bushiku bumo Elisha aile ku Shunemu,+ ukwali umwanakashi uwali uwalumbuka, kabili alimwitile pa kuti alye ifya kulya.+ Lyonse ilyo alepita, aleshokelapo mu kulya ifya kulya. 9 E ico aebele umulume wakwe ati: “Nalishiba ukuti uyu muntu uupita pano lyonse mubomfi waibela uwa kwa Lesa. 10 Natumupangile umuputule uunono pa mutenge,+ tubikemo ubusanshi, itebulo, icipuna na pa kuteka inyali. Lyonse nga aisa kuno, e mo aleikala.”+

11 Bushiku bumo Elisha alishile kabili aile mu muputule wa pa mutenge pa kuti asendameko. 12 Lyena aebele Gehasi+ umubomfi wakwe ati: “Ita umwanakashi umwina Shunemu+ umwine wa ino ng’anda.” E ico alimwitile, kabili aishileiminina pa ntanshi yakwe. 13 E lyo Elisha aebele Gehasi ati: “Mwebe auti, ‘Mona, wali-ipeelesha ukutusakamana.+ Cinshi ningakucitila?+ Bushe kuti nakulandilako ku mfumu+ nelyo ku mukalamba wa bashilika?’” Lelo ayaswike ati: “Ine njikala na bantu bandi.” 14 E ico Elisha alandile ati: “Nomba cinshi ningamucitila?” Gehasi amwaswike ati: “Kwena takwatapo umwana,+ e lyo umulume wakwe na o nakota.” 15 Ilyo line amwebele ati: “Mwite na kabili.” E ico alimwitile, kabili umwanakashi aishileiminina pa mwinshi. 16 Lyena amwebele ati: “Uyu mwaka uleisa nga ino ine nshita ukemita kabili ukakwata umwana umwaume.”+ Lelo alandile ati: “Awe shikulu, mwe mubomfi wa kwa Lesa wa cine! Mwilabepa ne mubomfi wenu.”

17 Lelo umwaka wakonkelepo, pa nshita nga ilya ine Elisha aebeelepo umwanakashi, uyu mwanakashi alimite, afyala no mwana umwaume, nga filya fine Elisha amwebele. 18 Umwana alikulile, kabili bushiku bumo, aile kuli wishi uwali pamo na balesombola. 19 Lyena atampile ukweba wishi ati: “Nafwa umutwe, iye umutwe!” E lyo wishi aebele umubomfi wakwe ati: “Mutwale kuli nyina.” 20 E ico alimusendele amutwala kuli nyina, kabili aileikala pa molu ya kwa nyina ukufika akasuba pa kati, lyena alifwile.+ 21 Lyena umwanakashi alininine ayalaalika umwana pa busanshi bwa muntu wa kwa Lesa wa cine,+ e lyo afuma, aisalako ne ciibi. 22 Nomba aitile umulume wakwe no kumweba ati: “Ntumineniko umubomfi umo ne mpunda imo, kabili lekeni mbutukile ku muntu wa kwa Lesa wa cine, nalabwela.” 23 Lelo amwebele ati: “Apo lelo te mweshi upya+ kabili te sabata, cinshi ulefwaila ukuyamumwena?” Na o atile: “Mwisakamana, fyonse fili fye bwino.” 24 E ico aninine pa mpunda, aeba no mubomfi wakwe ati: “Natuleya bwangu bwangu. Uleke fye impunda ilebutuka kano fye nga nakweba nati inasheko ukubutuka.”

25 E ico umwanakashi alile ku muntu wa kwa Lesa wa cine pa Lupili lwa Karmele. Ilyo umuntu wa kwa Lesa wa cine amumwene fye akatalamukila, ilyo line aebele Gehasi umubomfi wakwe ati: “Mona! Umwanakashi umwina Shunemu uyo. 26 Nomba butuka kakumane nankwe kabili uye umwipushe auti, ‘Bushe uli fye bwino? Bushe umulume obe ali fye bwino? Bushe umwana obe ali fye bwino?’” Na o atile: “Bonse tuli fye bwino.” 27 Ilyo umwanakashi afikile ku muntu wa kwa Lesa wa cine pa lupili, ilyo line fye amwikete ku makasa.+ E lyo Gehasi apaleme pa kuti amufumyeko, lelo umuntu wa kwa Lesa wa cine amwebele ati: “Muleke, pantu ali no bulanda sana.* Nshishibe icilengele pantu Yehova tanjebele.” 28 Lyena umwanakashi amwebele ati: “Mwe shikulu, bushe nalimulombele umwana umwaume? Bushe nshamwebele nati, ‘Mwileka ncetekele ifya bufi’?”+

29 Ilyo line Elisha aebele Gehasi ati: “Ipekanye,*+ kabili senda inkonto yandi uleya. Nga wakumanya umuntu, wimuposha; kabili umuntu nga akuposha, wimwasuka. Uyebika inkonto yandi pa menso ya mulumendo.” 30 E lyo nyina wa mwana alandile ati: “Na pali fye Yehova na imwe bene,* nga tamwaye na ine nshaye.”+ E ico alimine aya nankwe. 31 Gehasi alibatangilile, kabili ailebika inkonto pa menso ya mulumendo, lelo takwali ishiwi nelyo icishibilo ca kuti umulumendo ali uwa mweo.+ E ico abweleele mu kukumanya Elisha, kabili amwebele ati: “Umwana tabuukile.”

32 Ilyo Elisha aingile mu ng’anda, amwene umulumendo nalaala pa busanshi bwakwe ninshi nafwa.+ 33 Aingile mu muputule wakwe aisalako ne ciibi, e lyo atendeka ukupepa kuli Yehova.+ 34 Lyena aile pa busanshi, acita kwati alambalele pa mulumendo, e lyo abika akanwa kakwe pa kanwa ka mulumendo, amenso yakwe pa menso ya mulumendo ne ndupi shakwe pa ndupi sha mulumendo, kabili atwalilile ukucita kwati alambalele pa mulumendo, mpaka umubili wa mulumendo watampa ukukaba.+ 35 Atendeke ukwenda mu ng’anda, aleti aya uku kabili abwelela uku. Lyena abweleele pa busanshi na kabili acita kwati alambalele pa mulumendo. Umulumendo alitesemwine imiku 7, e lyo alolesha.+ 36 Elisha nomba aitile Gehasi, e lyo amweba ati: “Ita umwanakashi umwina Shunemu umwine wa ino ng’anda.” E ico alimwitile, kabili ilyo aingile, amwebele ati: “Senda umwana obe.”+ 37 Kabili umwanakashi awile pa makasa yakwe amufukamina. Pa numa asendele umwana wakwe, afuma no kufuma.

38 Ilyo Elisha abweleele ku Gilgali, mu calo mwali icipowe.+ Abana ba bakasesema+ baikele pa ntanshi yakwe, kabili aebele umubomfi wakwe+ ati: “Tekapo impoto iikalamba wipikile abana ba bakasesema ifya kulya.” 39 E ico umo pali bena aile mu mpanga mu kusaba umusalu, kabili asangile umwangashi wa mu mpanga, aswako ifyapala ifitanga menshi e lyo afibika mu ca kufwala cakwe. Lyena ilyo abwelele, afiputawilile mu mpoto nangu ca kuti tafishibe. 40 Pa numa balipekanishishe abantu pa kuti balye. Nomba ilyo baliilepo fye, bapundile abati: “Muli sumu mu mpoto, we muntu wa kwa Lesa wa cine.” Kabili balifililwe ukulya. 41 E ico abebele ati: “Leteni ubuunga.” Ilyo apoosele ubuunga mu mpoto, alandile ati: “Peeleni abantu balye.” Lyena sumu yalipwile mu mpoto.+

42 Umwaume uwafumine ku Baali-shalisha,+ aleteele umuntu wa kwa Lesa wa cine imikate ya barle 20+ iyo bapangiile ne fisabo fyabalilepo ukupya, pamo no mufuko wa ngano ishipya.+ Lyena Elisha aebele umubomfi wakwe ati: “Peela abantu balye.” 43 Lelo umubomfi wakwe atile: “Ifi ifya kulya fyacepa, te kuti fikumane abaume 100.”+ E lyo amwebele ati: “Bapeele balye, pantu Yehova atila, ‘Balelya bashepo na fimo.’”+ 44 Lyena alibapeele, kabili ilyo baliile balishilepo na fimo+ nga filya fine Yehova alandile.