Esaya
22 Ubu e bukombe bwa bupingushi pa Mupokapoka wa Cimonwa:*+
Cinshi cicitike pa kuti bonse munine pa mitenge?
2 Waiswilemo icimfulumfulu,
We musumba uuitakisha kabili uwa cilumba.
Abantu bobe abafwile, tabafwile ku lupanga,
Nangu mu nkondo.+
3 Bakateka bobe bonse abankalwe bafulumukiile pamo.+
Babekete ukwabula ukubomfya amata, babasenda na bunkole.
Bonse abo basangile ba basendele bunkole,+
Nangu ca kuti babutukile ukutali sana.
5 Pantu bushiku bwa cimfulunganya, ubwa kucimfya kabili ubwa kusakamikwa sana,+
Ubo Shikulu Mulopwe, Yehova wa mabumba aletele,
Mu Mupokapoka wa Cimonwa.
Kuli ukubongolola icibumba+
Kabili ukulila kwa bantu kuleumfwika na mu lupili.
7 Mu mipokapoka* yobe iisuma nga nshi
Mukesula amaceleta ya nkondo,
Kabili bakabalwe* bakeminina pa mpongolo,
8 Kabili ica kucingilila abaYuda bakacifumyapo.
“Muli bulya bushiku, mukalolesha pa fyanso fya nkondo ifya mu Ng’anda ya mu Mutengo,+ 9 kabili mukamona ifipunda ifingi mu fibumba fya Musumba wa kwa Davidi.+ Mukasungila amenshi mu cishiba+ ca mwi samba. 10 Mukapenda amayanda ya mu Yerusalemu, kabili mukabongolola amayanda pa kuti mukakoshe icibumba. 11 Mukapanga pa kati ka fibumba fibili ica kusungilamo amenshi ayakalafuma mu cishiba ca kale, lelo tamwakacetekele Uwacipangile, kabili tamwakamone Uwacipangile kale sana.
12 Muli bulya bushiku, Shikulu Mulopwe, Yehova wa mabumba,
Akamweba ukuti mulile no kuloosha,+
Kabili mubeye amapala no kufwala insamu.
13 Lelo imwe mukalasefya no kusekelela,
Mukepaya ing’ombe ne mpaanga,
Mukalya inama no kunwa umwangashi.+
Mukalatila, ‘Natulye no kunwa, pantu mailo tukafwa.’”+
14 Lyena amatwi yandi yaumfwile ishiwi lya kwa Yehova wa mabumba lileti: “‘Takwakabe icifuta mulandu pali ici cilubo mucitile mpaka mukafwe,’+ e fyo Shikulu Mulopwe, Yehova wa mabumba alanda.”
15 Shikulu Mulopwe, Yehova wa mabumba atila: “Kabiye kuli uyu mubomfi Shebna,+ uwangalila ing’anda,* kabili uye mweba ati, 16 ‘Bushe kuno kwaliba ifintu fyobe, kabili nani uukupeele insambu sha kuipangila inshiishi kuno?’ Aleipangila inshiishi pa muulu; aleipangila icifulo ca kutuushishamo* mu cilibwe. 17 ‘Mona! Yehova akakupoosa panshi na maka, we muntu, kabili akakwikatisha. 18 Akakupomba nga nshi kabili akakupoosa ngo mupila mu calo icikalamba. Mulya e mo ukafwila, kabili e mo amaceleta ya bucindami bobe yakaba ica kuseebanya ing’anda ya kwa sokulu. 19 Kabili nkakufumya pa cifulo cobe; nkakupoka umulimo ubomba.
20 “‘Muli bulya bushiku nketa umubomfi wandi Eliakimu+ umwana wa kwa Hilkia, 21 kabili nkamufwika umwingila obe, no mushipi obe uwa nsalu uukalamba nkaukakisha mu musana wakwe,+ kabili nkamupeela umulimo ubomba. Kabili akaba wishi wa bekala mu Yerusalemu na ba mu ng’anda ya kwa Yuda. 22 Kabili nkabika amakii ya ng’anda ya kwa Davidi+ pa kubeya kwakwe. Akesulako kabili takwakabe nangu umo uukesala; akesalako, lelo takwakabe nangu umo uukesulako. 23 Nkamupampamina ngo lupoopo mu ncende ya muyayaya, kabili akaba icipuna ca bucindami ku ba mu ng’anda ya kwa wishi. 24 Kabili bakakobeka kuli ena ubucindami bonse* ubwa ng’anda ya kwa wishi, abatuntuka mu ng’anda ya kwa wishi na bana,* ifipe fyonse ifinono, imbale shafonka e lyo ne mitondo iikalamba.
25 “‘Muli bulya bushiku,’ e fyo Yehova wa mabumba alanda, ‘ulupoopo ulwapampamikwa mu ncende ya muyayaya bakalufumya,+ no kuluputula kabili lukapona, na conse icafina ico bakobekako cikapona no konaika, pantu Yehova umwine nalanda.’”