Ukulingana na Baibolo

Umulandu Mulingile Ukutalukila ku fya Mipashi

MU CALO cimo ica mu Asia, abantu abengi basangilwe ku kusefya uko balecindika imipashi. Uku kusefya kwaishilekula ilyo basalile abanakashi babili ukuti na bo bene bali ne fimipashi. Aba banakashi batampile ukubilawila amenso, no kulatutuma kwati baikatwa ku malaiti.

Mu calo ca Puerto Rico, uumfwana ne mipashi (santero) alefwaya ukumfwana no mupashi beta ukuti Changó, lesa wa nkuba. Ilyo alelondolola ifyo alemona, bonse abali mu muputule batendeka ukututuma kwati bawilwa ne fiwa.

Mu fyalo ifingi abantu balisumina sana mu fya mipashi mipashi. Abengi balisumina sana mu finjelengwe (majiki), kabili balafitamba sana. Muno nshiku naciseeka sana ukusanga amalyashi pa fibanda, pa buloshi, e lyo na pa finjelengwe mu fitabo, mu fyangalo, pa TV na mu mafilimu.

Nangu cibe fyo, Baibolo isambilisha ukuti nga tulecita icili conse umuli ifya mipashi, ninshi tuleumfwana ne mipashi. Ukukonkelela ifya mipashi kubi, kuti kwatuletelela. Takwaba kufwaya fye ukwishiba ifyo mushaishiba, lelo kwaba kumfwana ne fibanda, bamalaika abapondokele Lesa.—Ukusokolola 12:9, 12.

Nga filya abalondo babomfya fimo pa kwikata isabi, e fyo ne fibanda fibomfya ifya mipashi mipashi mu kubeleleka abantu. Umulondo abomfya inshila ishalekanalekana isha kwikatilamo isabi ilya mitundu yalekanalekana. Ifibanda na fyo fine fibomfya inshila shalekanalekana pa kubeleleka abantu abengi ukukonka ifya mipashi. Intungulushi ya fibanda baita ukuti “lesa wa bwikashi buno [ubwabipa].” Alapofwisha amatontonkanyo ya bashatetekela pa kuti beishiba icine caba mu Cebo ca kwa Lesa no bufwayo bwakwe.—2 Abena Korinti 4:4.

Ifingafuma mu Kukonkelela Imipashi

Ifyo ifibanda fifwaya sana ni fi: Fifwaya ukuti tonaule bucibusa bwesu na Kabumba wesu. Filatunka abantu ukuti bakaane ukukonka amafunde yalungama aya kwa Lesa mu kukaanaishiba nelyo fye ku mufulo. E ico, kanshi ukukonkelela imipashi kuti kwaonaula bucibusa bwesu na Lesa, kuti kwalenga twaba no bulanda, kabili mukulekelesha kuti twaisaonaulwa.—Ukusokolola 21:8.

Luis umwina Puerto Rico atila: “Ukutula fye ilyo nali umwaice, ulupwa lwandi lwalitemenwe sana ifya mipashi. E fyo twalepepa kabili e fyo twalecita fye lyonse. Naletontonkanya ukuti mu cifyalilwa fye nali uwacenjela mu kusobela ifya ku ntanshi na mu kubelenga amakardi apaleba ifikope ifyalelanga abantu ifikabacitikila ku ntanshi. Ilingi line nalesala amakardi ya celamushuke apaleba amanambala ayalelenga abantu ukuwina indalama. Uku kucenjele nacenjele uko nalemona kwati bupe kwalencilikila fye ku kusambilila Baibolo no kuba cibusa wa kwa Lesa.”—Yohane 17:3.

Abantu abengi tabeshiba ukuti ukukonkelela imipashi kuti kwabaletelela, bamona kwati kuti kwabafwa. Batila kwaliba ne mipashi iisuma iingabafwa ukwishiba ifingi, ukuba abakankaala, nelyo ukuba ne nsansa. Kwena ico te cishinka. Luis atila: “Lyonse kulaba ifyabipa ificitika.”

Umulumendo we shina lya Chad atampile ukulamona ifintu ifyalemuletela umwenso sana kabili alecula nga nshi ubushiku pantu talelaala tulo. Atila: “Ifibanda fyatampile ukulancusha lyonse ubushiku.” Bushe kuti twacita shani pa kuti tuicingilile ku kucululusha kwa fibanda?

Ifyo Twingaicingila ku Mipashi

Pa kuti fwe bene tuicingilile, tufwile ukutaluka kuli fyonse ifingalenga twalakonkelela imipashi. (Abena Galatia 5:19-21) E mulandu wine Yehova ebela ababomfi bakwe ukutaluka ku fyakonkapo, atila: “Ekasangwa muli imwe onse . . . uubuka imbuko, uucita ifinjelengwe nelyo onse uusobela ifya ku ntanshi nelyo ing’anga, nelyo uulowa nelyo uwipusha ku umfwana ne mipashi nelyo ku waishibisha ifya kusobela nelyo onse uwipusha ku bafwa. Pantu onse uucita ifi fintu wa bunani kuli Yehova.”—Amalango 18:10-12.

Pa kulanga ukuti balekonka uku kufunda, abengi balipoosa ifitabo nelyo ifili fyonse ifyo balebomfya ku fya mipashi. Ken uwalekele ukukonkelela ifya mipashi atila, “Naceceetele fyonse ifyo nakwete no konaula ifyo namwene ukuti fyalikumine ku fya mipashi.”—Moneni Imilimo 19:19, 20.

Nga mulefwaya ukuti Lesa amucingilile ku fibanda, mulingile ukuba cibusa wa kwa Yehova, Lesa wa cine. Moneni ifyo tufwile ukucita nga fintu Yakobo 4:7, 8 yalanda, itila: “Nakileni Lesa; lelo kaaneni Satana Kaseebanya, na o akafulumuka kuli imwe. Palameni kuli Lesa, na o akapalama kuli imwe. Sangululeni iminwe yenu, mwe babembu, kabili sangululeni imitima yenu, mwe ba mitima ibili.”

Yehova Lesa alasambilisha no kucingilila bonse abapalama kuli ena. Abapalama kuli Lesa ‘balishiba amapange ya kwa Satana’ kabili te kuti Satana ababeleleke nangu engaifungushanya shani. (2 Abena Korinti 2:11; 11:14) E lyo kabili twilaba ukuti Yehova Wa Maka Yonse. Nga ca kuti abo balecusha ku fibanda bakwata icitetekelo ilyo balepepa kuli Yehova, kuti abapokolola. Chad uo tulandilepo kale, atila, “Icalengele ukuti ifibanda fileke ukuncusha, ni co naishileishiba kuti e filencusha kabili nalipepele kuli Yehova Lesa ukuti ancingilile.”—Amalumbo 91:1, 2.

Ukwabula no kutwishika, abalungama balingile ukuba ne nsansa pa kwishiba ukuti Lesa alabacingilila pali ino nshita na pa kwishiba ukutila nomba line ifibanda fili no konaulwa pamo na bonse abafinakila. Kuti mwaelenganya ifyo insansa no mutende fikafula pa calo ilyo abantu tabakalecushiwa ne fibanda!—Esaya 11:9; Ukusokolola 22:15.

BUSHE MWALIBALA AMUIPUSHAPO AMUTI?

◼ Fintu finshi ifyakuma ku mipashi ifyo Abena Kristu balingile ukutalukako?—Amalango 18:10-12; Ukusokolola 21:8.

◼ Ni nani uufwaya abantu ukuti balekonkelela imipashi?—2 Abena Korinti 2:11; 11:14; Ukusokolola 12:9, 12.

◼ Kuti twaicingilila shani ku fimipashi fyabipa?—Yakobo 4:7, 8.

[Icikope pe bula 10]

Nga filya abalondo babomfya fimo pa kwikata isabi, e fyo ne fibanda fibomfya ifya mipashi mipashi mu kubeleleka abantu