Ukulingana Na Baibolo

Bushe Lesa Aba Shani?

BAIBOLO yalondolola ukuti: “Lesa Mupashi, na bamupepa bali no kupepela mu mupashi na mu cine.” Aya mashiwi yalondolola icine cacindama pa fyo Lesa aba ukutila, mupashi! (Yohane 4:19-24) Na lyo line, Baibolo imulondolola fye kwati muntu. Ishina lyakwe ni Yehova.—Amalumbo 83:18.

Bamo ababelenga Baibolo balanda ukuti tabaishiba bwino bwino ifyo Lesa aba. Apo Lesa mupashi, tamoneka, kabili takwata umubili nga fwe bantu, nomba mulandu nshi uo amalembo ayengi aya mu Baibolo yalandila ukuti Lesa alikwata amenso, amatwi, umona, amaboko, ifisansa, iminwe, na makasa?a Bamo kuti balanda ukuti nalimo Lesa alikwata umubili ngo wa muntu pantu Baibolo ilanda ukuti umuntu abumbilwe mu cipasho cakwe. Nga twabebeta bwino ifyo Baibolo isosa kuti twaishiba bwino bwino umulandu uo Baibolo ilandila pali Lesa kwati ni pa muntu ilelanda.—Ukutendeka 1:26.

Mulandu Nshi Balondolwela Lesa Kwati Muntu?

Pa kwafwa abantu ukumfwikisha ifyo Lesa aba, umupashi wa mushilo uwa kwa Lesa wa-afwile abalelemba Baibolo ukulondolola Uwa Maka Yonse kwati muntu. Ukulondolola Lesa muli uyu musango cilangililo ca kuti abantu balafilwa ukulondolola ifyo Lesa wa cine, Yehova aba. Icacindama icalengele abalelemba Baibolo ukulondolola Lesa kwati muntu, ni co balefwaya ukulanda ifyo Lesa aba ne mibele iyo akwata kabili no kulemba mu musango uo abantu bengomfwa. Lelo ici tacilepilibula ukuti ifi fine e fyo tufwile ukulatontonkanya ukutila e fyo Lesa aba, nga filya fine fye tushingalanda ukuti filya Baibolo yalanda pali Lesa ukuti “Cilibwe,” “kasuba,” nelyo ukuti “ni nkwela,” ninshi ifyo fine e fyo aba.—Amalango 32:4; Amalumbo 84:11.

E ico, pa kulanga ukuti umuntu alikwatako imibele iyo Yehova akwata, Baibolo itila umuntu abumbilwe mu cipasho ca kwa Lesa. Lelo, ici tacipilibula ukuti abantu mipashi nelyo ukuti Lesa amoneka ngo muntu.

Bushe Lesa Mwaume Nelyo Mwanakashi?

Nga filya fine tushilingile ukulamona kwati Lesa aba ngo muntu pa mulandu wa kuti bamulondolola ngo wakwata ifilundwa ifyaba ku mubili wa muntu, e fyo tushilingile ukulamona na lintu Baibolo yalanda pali Lesa kwati mwaume, pantu tacilipilibula ukuti e fyo aba. Ukulanda ukuti uyu mwaume nelyo mwanakashi kubomba fye ku fibumbwa ifyakwata umubili no mulopa, kanshi ukulondolola Lesa muli uyu musango kulanga fye ifyo abantu bafilwa ukulondolola bwino ifyo Lesa Wa Maka Yonse, Yehova aba.

Baibolo yabomfya ishiwi lya kuti “Shifwe” ukutwafwa ukwishiba ukuti Kabumba kuti apashanishiwa kuli wishi uwatemwa abana bakwe, kabili uubacingilila no kubasakamana. (Mateo 6:9) Ici tacilepilibula ukuti e fyo tufwile ukulamona Lesa, nelyo ukulamona ifibumbwa fimbi ifya mupashi ifyaba mu muulu ukuti fyaume nelyo fyanakashi. Ku fibumbwa fya mupashi takwaba ukuti ici caume nelyo canakashi. Na kuba, Baibolo itila bonse abakaya ku kuteka na Kristu mu Bufumu bwa ku muulu tabenekela ukuyatwalilila ukuba abaume nelyo abanakashi ilyo bakapeelwa ubukata bwa kuba abana ba kwa Lesa aba ku mupashi. Umutumwa Paulo abebele ukutila ilyo bacindikwa ukuba abana ba ku mupashi aba kwa Lesa mu fifulo bakapeelwa “takwaba umwaume nangu umwanakashi.” Na kabili mu mampalanya balondololwa ukuti ni “banabwinga” ba Mwana wa mpaanga, Yesu Kristu. Ifi fyonse twalandapo fyalanga fye ukuti kanshi ifilundwa ifyakwata abantu ifyo balondolola ukuti e filundwa ifyo Lesa na Yesu, Umwana wakwe uwafyalwa fye eka, e lyo ne fibumbwa fimbi ifya ku mupashi bakwata, te kutila ninshi ifyo fine e fyo baba iyo, fya mampalanya fye.—Abena Galatia 3:26, 28; Ukusokolola 21:9; 1 Yohane 3:1, 2.

Pa mulandu wa kuti abalelemba Baibolo balishibe bwino bwino imilimo iyo umwaume abomba, e calengele ukuti pa kulanda pali Lesa balelanda kwati mwaume balelandapo. Balimwene ifyo umwaume aba, ne fyo abomba imilimo yakwe mu lupwa, e calengele ukuti abalelemba Baibolo bamone ukuti kanshi nacilinga ukulumbula umwaume ilyo balelanda pa fyo Yehova atemwa ne fyo asakamana abana bakwe pe sonde kwati ni filya fine wishi acita.—Malaki 3:17; Mateo 5:45; Luka 11:11-13.

Imibele Iyapulamo iya kwa Lesa

Nangu ca kuti mupashi, Kateka wapulamo taba na cilumba, taifisa, e lyo kabili taifinya, alafwaya aba kulanda bankwe. Pa mulandu wa kutila mupashi, tacilepilibula ukuti ninshi abantu abalungama, abalefwaya ukusambilila, kuti bafilwa ukusambilila pa kutemwa kwakwe, pa maka yakwe, pa mano yakwe, na pa bulungami bwakwe, imibele iimwishibisha ifyo aba kabili iimoneka na mu fyo abumba.—Abena Roma 1:19-21.

Nangu cibe fyo, ifyo Lesa aba fyalondololwa fye mu mibele yakwe imo iyapulamo, iya kutemwa. Ukutemwa kwakwe kwali-ibela ica kuti alanda ukuti umwine wine e kutemwa. (1 Yohane 4:8) Mukutemwa mwine mwaba ne mibele yakwe imbi, pamo nga uluse, ukwelela, e lyo no kutekanya. (Ukufuma 34:6; Amalumbo 103:8-14; Esaya 55:7; Abena Roma 5:8) Ukwabula no kutwishika, Yehova ni Lesa wa kutemwa uwita abantu ukuti balepalama kuli ena.—Yohane 4:23.

[Futunoti]

KUTI MWA-ASUKA SHANI?

◼ Bushe Lesa nani ishina?—Amalumbo 83:18.

◼ Ni muli finshi umo twingamona imibele ya kwa Lesa?—Abena Roma 1:19-21.

◼ Mibele nshi iya kwa Lesa iyapulamo?—1 Yohane 4:8.