Lesa Alinsansamusha mu Mafya Yonse ayo Napitamo

Abashimika ili lyashi ni ba Victoria Colloy

Dokota aebele bamayo ukuti: “Tapali nangu fimo ifyo twingacitila umwana wenu. Akulabomfya inkonto pa kwenda kabili akulafwala ifyela ku molu ubumi bwakwe bonse.” Ici calimponeshe pa musao! Bushe nali no kulaikala shani?

NAFYELWE pa 17 November, 1949, mwi tauni lya Tapachula, mu citungu ca Chiapas, ku Mexico. Twafyalwa abana 4 kabili nine ibeli, nali ne nsansa, kabili nali fye umutuntulu. Nomba ilyo nali ne myeshi 6, mukupumikisha fye nalekele ukwamfula kabili nangu kusela nalesela fye panono. Mu myeshi ibili iyakonkelepo nalilekelele fye no kusela. Badokota aba mwi tauni lyesu balipapile, pantu abana bambi mu Tapachula nabo bene balikwete ubwafya bumo bwine. E ico dokota uwasambilila pa mongololo ne mfyufyu, uwafumine ku musumba wa Mexico City alishile kabili alitupimine. Asangile ukuti twalilwele ubulwele ubo beta ati poliomyelitis, nelyo polio.

Ilyo nali ne myaka itatu, nalikwete amaopareshoni yatatu, mu lutungu, mu makufi, e lyo na mu nkolokoso. Mu kuya kwa nshita icipeya ca ku kuboko kwa kulyo calikwete ubwafya sana. Ilyo nali ne myaka 6, bantwele ku Mexico City pa kuti batwalilile ukung’undapa pa cipatala ca baice. Bamayo balebomba pa farmu mu citungu ca Chiapas, kanshi abalensunga ku Mexico City ni bamama abafyala bamayo. Lelo kwena inshita iikalamba naleba mu cipatala.

Ilyo nali ne myaka 8, nalitampile ukubako bwino. Lelo mu kuya kwa nshita, ifintu fyalitampile ukubipa, panono panono naile ndeleka ukwenda. Lyena badokota batile mfwile ukutendeka ukubomfya inkonto e lyo no kufwala ifyela ku molu ubumi bwandi bonse fye.

Ilyo nali ne myaka 15, ninshi nalikwatapo amaopareshoni 25. Bancitile opareshoni mu mongololo, mu molu, mu makufi, mu nkolokoso, na ku tukondo. Cila nshita nga ca kuti nafuma ku opareshoni balensambilisha ifya kucita pa kuti ndeikala bwino. Inshita imo ilyo nafumine ku opareshoni, balimfwikile fitute ku molu. Ilyo bafumisheko fitute, natampile ukulaolola amolu no mubili kabili ukucita ifi kwalelenga ndeumfwa ubukali sana.

Napokelela Icisansamushi Cine Cine

Ilyo nali ne myaka 11, bamayo balishile mu kumona ninshi e lyo fye nafumine ku opareshoni. Balisambilile ukuti Yesu alyundepe abalwele kabili alengele uwa bulebe ukwenda. Basambilile fyonse ifi muli magazini ya Ulupungu lwa kwa Kalinda, iilembwa ne Nte sha kwa Yehova, kabili balimpeele ilya magazini. Nali-ifishile pe samba lya pilo, lelo bushiku bumo magazini yandi yalilubile. Banasi balisangile magazini kabili bali-isendele e lyo balinkalipiile sana pa mulandu wa kuti naleibelenga.

Pa numa ya mwaka umo, bamayo balishile mu kumpempula na kabili ukufuma ku Chiapas. Apa ninshi balitendeka ukusambilila Baibolo na baNte. Bandetele icitabo citila Ukufuma Kuli Paradaise Waluba Ukuya Kuli Paradaise Wanonkwa.a Bamayo batile, “Nga ca kuti ulefwaya ukwikala mu calo cipya ico batulaya kabili umo Yesu akakundapa, ulingile ukusambilila Baibolo.” E ico te mulandu ne fyo bamama balenkanya, natendeke ukusambilila na baNte ilyo nali ne myaka 14. Umwaka wakonkelepo banjebele ukufuma pa cipatala pantu cali ca bana abanono.

Ifyo Nacimfishe Amafya

Nalipopomenwe sana. Pa mulandu wa kuti bamama balenkanya ukupepa, nalibwelelemo ku Chiapas no kulaikala na bafyashi bandi. Na lyo line, na pa ng’anda pene pali amafya pantu batata balenwa sana ubwalwa. Inshita imo naishilemona kwati no kufwa kuti kwawama. Nalefwaya ukunwa sumu pa kuti mfwe fye. Nomba lintu natwalilile ukusambilila Baibolo, nalilekele ukutontonkanya pa kuipaya. Ubulayo bwaba mu Baibolo ubwa kuti icalo cikaba paradaise bwalinsansamwishe.

Natendeke ukwebako bambi pa fintu fisuma ifyaba mu Baibolo ifyo nasambilile. (Esaya 2:4; 9:6, 7; 11:6-9; Ukusokolola 21:3, 4) Mukwai mu kuya kwa nshita, pa 8 May, 1968, ilyo nali ne myaka 18, nalibatishiwe ukuba Inte ya kwa Yehova. Ukutula mu 1974, ndabomba ama-awala ukucila pali 70 cila mweshi ukulashimikila bambi pa fintu nacetekela kabili ifinenga ukuti ntwalilile ukuba no mweo.

Naliba ne Nsansa

Mu kuya kwa nshita, ine na bamayo twasukile twakuukila ku musumba wa Tijuana, uwabela ku mupaka wa calo ca Mexico na United States. Ine na bamayo twikala mu ng’anda iisuma ukulingana ne fyo tukabila. Nga ndi mu ng’anda ndenda ukubomfya inkonto e lyo ne fyela ifyo mfwala ku molu, kabili ndabomfya incinga ya balemana ukwendelapo nga ndefwaya ukwipika nelyo ukucapa no kuciisa ifya kufwala. Pa kuti ndebomba bwino umulimo wa kushimikila, ndensha kamotoka akanono akabomfya amalaiti.

Ndashimikila abantu abo nkumanya mu musebo e lyo nabo nsanga pa mayanda, kabili cila nshita ndaya na pa cipatala icabela mupepi no kulanshanya na bantu ifyaba mu Baibolo ilyo balelolela ukuti babatangate ku ba pa cipatala. Nga napwisha ukulanshanya nabo, ndensha kamotoka kandi aka malaiti no kuya ku maliketi ku kushita ifyo tulekabila lyena ndabwelela ku ng’anda ukwafwako bamayo ukwipika no kubomba imilimo imbi iya pa ng’anda.

Pa kusanga indalama sha kubomfya mu mikalile, ndashitisha salaula. Bamayo nomba bali ne myaka 78 kabili tabacita ifintu ifingi pantu balilwelepo ubulwele bwa ku mutima imiku itatu. E ico ndabashitila imiti bakabila no kubapeela ifya kulya ifisuma ifyo balingile ukulya. Nangu ca kuti bonse babili tulalwalilila, tulabombesha ukulasangwa ku kulongana. Ukucila pa bantu 30 abo nalesambilila nabo Baibolo pa myaka yonse iyi na bo pali ino nshita balabombako umulimo wa kubila imbila nsuma.

Nalicetekela ukuti kasuba kamo ubulayo bwaba mu Baibolo ubwa kuti: “Pali iyo nshita [mu calo cipya ica kwa Lesa] uwalemana amolu akacilauka nge nsebula,” bukafikilishiwa. Pali ino nshita, amashiwi ya kwa Lesa yalansansamusha. Yatila: “Witiina, pantu ndi na iwe. Wilasakamana, pantu nine Lesa obe. Nkakukosha. Nkakwafwa. Nkakutungilila no kuboko kwandi ukwa ku kulyo ukwa bulungami.”—Esaya 35:6; 41:10.b

[Amafutunoti]

[Icikope pe bula 31]

Natendeke ukufwala ifyela ku molu ilyo nali ne myaka 7

[Icikope pe bula 32]

Nga ndeshimikila njensha kamotoka akanono aka malaiti akapangwa ukungafwako ukwenda bwino