Bushe Lesa Alatusakamana?

ULUCELO pa 1 November, mu 1755, icinkukuma icacitike pali bemba catesenshe umusumba wa Lisbon, ku Portugal. Abantu abengi nga nshi balifwile ne fikuulwa ifingi fyalyonaike pa mulandu wa mulilo wa-ambwike e lyo na menshi icinkukuma capoosele ku mulundu.

Ilyo icinkukuma cacitike mu Haiti mu 2010, inyunshipepala ya ku Canada iya National Post yatile: “Nge fyo cali ku cinkukuma cacitike ku Lisbon, ifinkukuma, pamo nga cilya cacitike ku Haiti nomba line, fileesha sana icitetekelo ca bantu ukucila amafya yambi.” Iyi nyushipepala yalekeleshe na mashiwi ya kuti: “Lesa afwile alileka ukusakamana abena Haiti.”

Apo Yehova ni Lesa “Wa Maka Yonse” takuli icingamwansha, kabili kuti afumyapo na macushi yene. (Amalumbo 91:1) E lyo kabili te kuti tutwishike ukuti alatusakamana. Cinshi twalandila ifyo?

Ifyo Twaishiba Pali Lesa

Lesa alomfwila uluse abantu abalecula. Ilyo abena Israele balebacusha ku bena Egupti ilyo bali mu busha, Lesa aebele Mose ati: “Nimona ukucula kwa bantu bandi abali mu Egupti, kabili ning’umfwa ukulilishika kwabo pa mulandu wa babapatikisha ukubomba; pantu ninjishiba ukukalipwa balekalipwa.” (Ukufuma 3:7) Bushe aya mashiwi yalola mwi? Yalola mu kuti Lesa tomfwa bwino abantunse nga balecula. Na kuba, ilyo papitile imyaka iingi kasesema Esaya alembele pa lwa bena Israele ukuti: “Ilyo balecula, na o alecula.”—Esaya 63:9.

“Inshila shakwe shonse mulinganya.” (Amalango 32:4) Lesa wa mulinganya kabili taba na kapaatulula. ‘Alalinda umwenda aba cishinka bakwe’ kabili ‘akabwesesha ubucushi ku bacusha’ abalungama. (Amapinda 2:8; 2 Abena Tesalonika 1:6, 7) Lesa ‘taaba na kapaatulula kuli bacilolo kabili tasalapo umukankaala no kusha umulanda, pantu bonse fye e wababumbile.’ (Yobo 34:19) Lesa e wingapwisha fye amacushi abantu bapitamo. Ifyo abantunse bacita pa kwesha ukupwisha amacushi kuti twafilinganya ku kukakilila pa cilonda ca muntu uo bapikile imfuti. Ukukakilila pa cilonda kulacingilila icilonda, lelo takuposha icilonda kabili takupwisha ubukali umuntu aleumfwa.

Lesa wa ‘luse kabili wa mutembo . . . kabili alifulisha icikuuku.’ (Ukufuma 34:6) Mu Baibolo ishiwi lya kuti “uluse” lipilibula ukuba ne nkumbu ne cililishi ica kuti wacitapo na cimo kukwafwa uulecula. Ishiwi lya ciHebere ukwafuma ishiwi lya “umutembo” lipilibula “ukwafwilisha umuntu uuli no bwafya.” Ukulingana ne citabo citila Theological Dictionary of the Old Testament, ishiwi lyapilibulwa ukuti “icikuuku” lisanshamo no “kwafwa umuntu uulecula pa kuti elacula.” Yehova Lesa tomfwa fye ububi nga amona abantunse balecula, lelo uluse lwakwe, umutembo, ne cikuuku filalenga ukuti abafwe. E mulandu wine tushitwishikila ukuti akapwisha amacushi.

Icipande cifumineko ca cilanda pa fintu fitatu ifilenga sana ukuti abantu balecula pali lelo, lelo pali ifyo fitatu tapali icilelangilila ukuti Lesa e ulenga abantu ukucula. Nomba natulande pa filenga ifi fintu.

Ifyo Umuntu Asalapo Ukucita

Pa kubala, Adamu aletungululwa na Lesa. Lelo pa numa, asalilepo ukukaana imitekele ya kwa Lesa, ne cafuminemo ca kuti atendeke ukulacula. Alisuulile ukusoka kwa kwa Yehova ukwaba pa Ukutendeka 2:17 apatila: “Ukufwa ukafwa.” Ilyo akeene ukumfwila imitekele iisuma iya kwa Lesa, aishileba umubembu kabili uushapwililika. Baibolo itila: “Ulubembu lwaingilile mu muntu umo pano calo ne mfwa yaingilile mu lubembu, e fyo ne mfwa yasalanganine ku bantu bonse pantu bonse balibembwike.” (Abena Roma 5:12) Lelo Lesa ali no kufumyapo ukucula konse.

Ificitika Ukwabula Ukwenekela

Nga fintu tulandilepo kale, umuntu wa ntanshi Adamu alikeene ubutungulushi bwa kwa Lesa ubwingalenga na bantunse ukucingililwa ku finkunka. Ifyo Adamu asalilepo ukucita kuti twafilinganya ku mulwele uwakaana ukundapwa na dokota uwacenjela sana. Nga ca kuti umulwele teshibe amafya yengafumamo ayo dokota ena engeshiba, kuti ailetelela. E fyo caba na ku bantunse, ukonaula icalo, ukukuula ifikuulwa ifishakosa, no kukanaumfwila ukusoka ilingi line e kulenga sana abantu ukufwa nga kwacitika icinkunka. Lelo Lesa takaleke ifi fintu ukutwalilila fye ukulacitika.

“Kateka wa Pano Calo”

Ilyo Satana apondweke, mulandu nshi Lesa amulekele ukulateka icalo? Icitabo cimo catila, “ubuteko nga e lyo bwatendeka fye bulapeela ubuteko ubwalipo imilandu pa mafya ayalipo.” Yehova nga talekele “kateka wa pano calo” ukulateka, Satana nga alepeela Lesa imilandu. (Yohane 12:31) Nomba ukusuminisha Satana ukuteka icalo kwalenga camoneka fye apabuuta ukutila te kuti ateke icalo. Lelo bushe kuti twashininkisha shani ukuti ukucula konse kukapwa?

[Icikope pe bula 6]

Umuntu nga bamupike mfuti, bushe dokota kuti akaka fye pa cilonda icilesuuma umulopa ukwabula ukubikapo umuti?