Ukuponye Fumo

Ubulondoloshi: Ukuponye fumo kufumya akashimu nelyo akacece ako mu cifyalilwa kashingaba aka mweo ku nse ye fumo. Ukuifumina kwe fumo nelyo ukupulumuka kwe fumo kuti kwafuma ku kukanapwililika kwa buntunse nelyo ukufuma ku busanso. Ukuponye fumo ku mufulo pa mulandu fye wa kusengauka ukufyalwa kwa mwana uushilefwaikwa kwipaya ubumi bwa buntunse ku mufulo.

Ni shani fintu Intulo ya bumi bwa buntunse ilingile ukwambukila imimwene yesu iya uyu mulandu?

Imil. 17:28: “Muli wene [Lesa] e mo tumweno mweo, no kusunkana, no kuba.”

Amalu. 36:9: “Kuli imwe [Yehova Lesa] kwaba akamfukumfuku ka mweo.”

Rom. 14:12: “Ifwe bonse umo umo tukalubulula kuli Lesa.”

Bushe Yehova amona ubumi bwa mwana pano ngo bwacindama nelyo fye mu fipimo fya kubangilila nga nshi ifya kulunduluka pa numa ya kwimitwa?

Amalu. 139:13-16: “[Mwe Yehova] mwampikile mwi fumo lya kwa mayo. . . . Ilyo nali mu nda akashimu akashilakula, amenso yenu yalimwene, kabili mwi buku lyenu e mo shalembelwe.”

Bushe Lesa alibala alandapo ukuti umuntu akalubulula pa kucena umwana uushilafyalwa?

Ukufu. 21:22, 23: “Kabili nga baume bashashala, bapuma no mwanakashi uuli ne fumo, [na bana bakwe bafuma], lelo takuponene icabipa cimbi, ukufuta akalengwe ukufuta nge fyo umulume wa mwanakashi akamulingila; kabili nge fyo abapingushi bapingula. Lelo nge cabipa cimbi cakonkapo, e lyo mukapeele umweo pa mulandu wa mweo.” (Amabupilibulo yamo yacilenga ukumoneka ukuti muli ili funde kuli Israele umulandu wakakala wali cintu cacitike kuli nyina, te ku kacece. Icalembwa ca kubalilapo ica ciHebere, nangu cibe fyo, cilosha ku busanso bwabipisha atemwa kuli nyina nelyo ku mwana.)

Kwaba shani ukwakakala ukufumyapo kwa bumi bwa buntunse pa mulandu ushipeelwe nsambu na Lesa?

Ukute. 9:6: “Uwasumyo mulopa wa muntu, ku muntu e ko umulopa wakwe na wo ukasumiwa: pantu mu cata ca kwa Lesa e mo acitile umuntu.”

1 Yoh. 3:15: “Intalamisoka taikwete mweo wa muyayaya ukwikala muli yene.”

Ukufu. 20:13: “Wilatala misoka.”

Bushe imimwene ya kwa dokota iya kuti ukusuminisha ifumo ukukula mu kukumanina kuti kwabo kwa kucena ku butuntulu bwa kwa nyina cilapeele nsambu ku kuponye fumo?

Imimwene ya fya cipatala inshita shimo ilalubana. Bushe kuti cabe calungama ukwipaya umuntunse munobe pa mulandu wa kuti ulya pambi kuti acena umuntu munankwe? Nga ca kuti pa nshita ya kufyalwa ukusalapo kufwile ukucitwa pa kati ka bumi bwa kwa nyina no bwa mwana, cili ku bantu umo umo ababimbilwemo ukucita uko kusalapo. Nangu cibe fyo, ukulunduluka mu mibombele ya fya cipatala mu fyalo ifingi kwalilenga iyi mibele ukuba iya limo limo fye.

Nga Umo Asoso Kuti—

‘Lelo nalikwata insambu ya kupingula pa milandu yakuma ku mubili wandi.’

Pambi kuti wayasuko kuti: ‘Kuti naumfwikisha ifyo muleyumfwa. E co ilingi line nga nshi insambu shesu shilanyantaulwapo kuli bambi; abengi tabasakamana fye icicitika ku bantu bambi. Lelo Baibolo ipayanya ifya kutungulula ifingatucingilila. Pa kupokelela ukumwenamo, nangu ni fyo, tufwile na kabili ukupokelela ifishingamo.’ Lyene nakalimo lundako ukuti: (1) ‘Banyina abengi balilekeleshiwa ku baume abafyele abana babo. Lelo mu ŋanda umo umulume no mukashi bekalila ku fipimo fya Baibolo, umulume mu cituntulu akatemwa umukashi wakwe na bana kabili muli bucishinka ukwikala na bene no kubapayanishisha. (1 Tim. 5:8; Efes. 5:28-31) (2) Nga ca kuti pa lwesu tuli no kupokelela uyo musango wa kutemwa no mucinshi, na ifwe tufwile ukubomfya ifishinte fya mu Baibolo mu mimwene yesu ukulola ku filundwa fya lupwa lwesu. Ni shani fintu Baibolo isosa ifyo tulingile ukumona abana tufyala? (Amalu. 127:3; cilanya Esaya 49:15.)’