Icipandwa 10
Ubufumu “Ubushakonaulwe Umuyayaya”
1. Cintu nshi cashininkishiwa ku ficitika mu calo ukutula apo umuntu abelako?
IFILECITIKA mu calo cila bushiku filelangilila ukuti abantunse tabaasanga umutende pa kusuula bumulopwe bwa kwa Yehova no kwesha ukulaiteka. Takuli umusango wa buteko bwa bantunse nangu umo uwaletela abantu ifintu ifisuma ukwabulo muncishanya. Nangu ca kuti abantu balilunduluka sana mu kwishiba ifya sayansi ifyo cishatalile aciba ku numa, balifilwa ukufumyapo amalwele nelyo ukupwisha imfwa, bafilwa ukucite fyo nangu fye ni ku muntu umo. Ukuteka kwa muntu takwafumyapo inkondo, ulukaakala, bumpulamafunde, amafisakanwa, nelyo ubupiina. Amabuteko ya lucu yacili yalacusha abantu mu fyalo ifingi. (Lukala Milandu 8:9) Ifya kupangapanga, ubufunushi, no kukanaishiba, fyonse ifi fyalenga ukukowesha umushili, amenshi, no mwela. Abalashi ukwibe cuma ca calo kwalenga abengi ukukanakwata ifyo bakabila mu bumi. Iyi myaka ishaifulila iya kuteka kwa bantunse yalenga aya mashiwi ukushininkishiwa, aya kuti “te kwa muntunse ukwenda kwakwe; te kwa muntu uuleya ukushikimika amatampulo yakwe.”—Yeremia 10:23.
2. Cintu nshi fye ceka icikapwisha amafya ya bantu?
2 Cinshi cingapwisha amafya? Bufumu bwa kwa Lesa, ubo Yesu asambilishe abakonshi bakwe ukupepela ati: “Ubufumu bwenu bwise. Ukufwaya kwenu kucitwe pano nse nga mu muulu.” (Mateo 6:9, 10) Ubufumu bwa kwa Lesa ubwa mu muulu bwalondololwa pali 2 Petro 3:13 ukuti “imyulu ipya,” iikateka “isonde lipya,” e kutila, ubwikashi bwa bantunse abalungama. Ubu Bufumu bwa kwa Lesa ubwa mu muulu bwalicindama nga nshi ica kuti e bo Yesu alelandapo sana mu kushimikila kwakwe. (Mateo 4:17) Atulangile ifyo tufwile ukubukatamika mu mikalile yesu, kabili atucincishe ati: “Lelo mubale mufwaye ubufumu bwa kwa Lesa no bulungami bwakwe.”—Mateo 6:33.
3. Mulandu nshi tufwile ukwangufyanishisha nga nshi ukusambilila pa Bufumu bwa kwa Lesa nomba?
3 Tufwile ukwangufyanya nga nshi ukusambilila pa Bufumu bwa kwa Lesa pali nomba, pantu nomba line bulya Bufumu buli no kucitapo cimo ku kwalule mitekele ya lino isonde umupwilapo. Daniele 2:44 asobele ati: “Mu nshiku sha shamfumu ishi [amabuteko ayaleteka pali nomba] Lesa wa mu muulu akemyo bufumu [mu muulu] ubushakonaulwe umuyayaya, no bufumu bwa buko tabwakashiilwe ku bantu bambi [abantunse tabakatale kabili abateka isonde]; bukashonaula no kupesha aya mabufumu yonse [ayalipo], kabili bukeminina umuyayaya.” E co ubu Bufumu bukapwisha shino nshiku sha kulekelesha pa konaula buno bwikashi bubifi bonse. E co, pali iyo nshita ukutekwa kwe sonde ku Bufumu bwa mu muulu kukashininkishiwa. Ifyo tufwile ukutasha ukuti ukutaulukwa uko ici cikaleta nomba kuli fye mupepi!
4. Ukukuma ku Bufumu, cinshi cacitike mu muulu mu 1914, kabili mulandu nshi ico cacindamina kuli ifwe?
4 Mu 1914, Kristu Yesu alicitilwe ukube Mfumu kabili alisuminishiwe ‘ukuba no bufumu mu kati ka balwani [bakwe].’ (Amalumbo 110:1, 2) Kabili muli ulya mwaka, “inshiku sha kulekelesha” isha buno bwikashi bubifi ubulipo shalitendeke. (2 Timote 3:1-5, 13) Pa nshita imo ine, ifyo Daniele amwene mu cimonwa ca mu kusesema fyalicitike ica cine cine mu muulu. “Umukote wa nshiku ne nshiku,” Yehova Lesa, apeele Umwana wa muntu, Yesu Kristu, “ukuteka, no bukata, no bufumu, ukuti abantu na bantu bonse, na bantu ba nko, ne ndimi, bamupyungile.” Pa kushimika pa lwa ici cimonwa, Daniele alembele ati: “Ukuteka kwakwe kuteka kwa muyayaya, ukushakapite, no bufumu bwakwe tabwakonaulwe.” (Daniele 7:13, 14) Kupitila muli ubu Bufumu bwa mu muulu ubutekwa na Kristu Yesu e mo Lesa akalengela abatemwa ubulungami ukuipakisha ifintu ifisuma ifishingapendwa ifyo afwaile pa kubala ilyo abikile abafyashi besu abantunse ba kubalilapo mu Paradise.
5. Fintu nshi twingatemwa nga nshi ukwishiba pa lwa ubu Bufumu, kabili mulandu nshi?
5 Bushe mulafwaisha ukuba abatekwa ba ubu Bufumu? Nga mulafwaisha, mwalatemwa nga nshi ukwishiba ifyo ubu buteko bwa mu muulu bwateyanishiwa ne fyo bubomba. Kuti mwafwaya ukwishiba ico bulecita pali nomba, ico bukacita ku ntanshi, ne co bufwaya kuli imwe. Ilyo mulebebeta bwino bwino ubu Bufumu, ukutasha kwenu pali bwene kulingile ukukula. Nga mwayankula bwino ku mitekele ya buko, mukaba abaipangasha bwino ukwebako bambi pa lwa fintu fyawamisha ifyo Ubufumu bwa kwa Lesa bukacitila abantu aba cumfwila.—Amalumbo 48:12, 13.
Bakateka ba Bufumu bwa kwa Lesa
6. (a) Bushe Amalembo yalanga ukuti ni bumulopwe bwa kwa nani ubumonekela mu Bufumu bwa kwa Mesia? (b) Bushe ifyo tusambilila pali ubu Bufumu fifwile ukutukuma shani?
6 Ica ntanshi pa fintu ifyo ukuceeceeta kwa musango yo kusokolola ca kuti ubu Bufumu bwa kwa Mesia e mo Yehova alangishisha bumulopwe bwakwe. Ni Yehova e wapeele “ukuteka, no bukata, no bufumu” ku Mwana wakwe. Pa numa Umwana wa kwa Lesa apeelwe amaka ya kutendeka ukuteka, ukube Mfumu, e lyo mu muulu mwaumfwikike amashiwi yaleti: “Ubufumu bwa pe sonde bwaisabo bwa kwa Shikulwifwe [Yehova Lesa], no bwa kwa Kristu wakwe, na o [Yehova] akulabe Mfumu umuyayaya umuyayaya.” (Ukusokolola 11:15) Kanshi fyonse ifyo tumona pali ubu Bufumu ne fyo bulecita kuti fyatupalamika sana kuli Yehova umwine. Ifyo tusambilila filingile ukutulenga ukufwaisha ukunakila kuli bumulopwe bwakwe umuyayaya.
7. Mulandu nshi ukwishiba ukuti Yesu Kristu ni Kateka Inkonkani ya kwa Yehova kubelele ukwakatama kuli ifwe?
7 Tontonkanyeni na pali ici cishinka, ica kuti Yehova alibika Yesu Kristu pa cipuna ca bufumu ku kuba Inkonkani yakwe. Apo ni Cibinda wa Mulimo uo Lesa abomfeshe ku kubumba isonde na bantunse, Yesu alishiba bwino ifyo tukabila ukucila ifyo ifwe bonse twaishiba. Kabinge, ukutula fye apo umuntu abelako, Yesu alilanga ifyo ‘apekelwa abana ba bantu.’ (Amapinda 8:30, 31; Abena Kolose 1:15-17) Alitemwa abantunse icine cine ica kuti aishile na pe sonde umwine no kupeelo bumi bwakwe ku kube cilubula cesu. (Yohane 3:16) Kanshi atupekanishishe umwa kulubukila ku lubembu ne mfwa no kuti tube ne shuko lya kwisakwata ubumi bwa muyayaya.—Mateo 20:28.
8. (a) Ukupusanako ne mitekele ya bantunse, mulandu nshi ubuteko bwa kwa Lesa bukatwalilila ukubako? (b) Kwampana nshi kwaba pa “umusha wa cishinka kabili uwashilimuka” no buteko bwa mu muulu?
8 Ubufumu bwa kwa Lesa buteko ubushalukaaluka, ubukatwalilila ukubako. Icishininkisha ukuti bukatwalilila ukubako mulandu wa kuti Yehova umwine tafwa. Yesu Kristu wena, uo Lesa apeela ubufumu, na o tafwa nge mfumu sha buntunse. (Abena Roma 6:9; 1 Timote 6:15, 16) Bambi abakaba na Kristu pa fipuna fya bufumu ifya ku muulu ni ba 144,000, ababomfi ba kwa Lesa aba bucishinka abafuma mu “mikowa yonse na ba ndimi, na bantu na bantu, na ba nko.” Aba na bo balapeelwa ubumi bwa kukanafwa. (Ukusokolola 5:9, 10; 14:1-4; 1 Abena Korinti 15:42-44, 53) Abengi nga nshi pali aba baliya kale ku muulu, kabili abashalapo pali aba abacili pe sonde e bapanga “umusha wa cishinka kabili uwashilimuka” uwa muno nshiku, uubombela pa fikumine bulya Bufumu pano isonde.—Mateo 24:45-47.
9, 10. (a) Mibele nshi iyabipa kabili iilenga amalekano iyo ubu Bufumu bukafumyapo? (b) Nga tatulefwaya ukuba abalwani ba Bufumu bwa kwa Lesa, fintu nshi tushilekabila kuyobekamo?
9 Nomba line fye, ilyo inshita ateyanya ikafika, Yehova akatuma ifita fyakwe ifya kuleta ubonaushi ku kucitapo cimo ku kuwamya isonde. Fikonaula abantunse abasalapo fye abene ukukanaishiba bumulopwe bwakwe kabili abasaalula imitantikile iyo Lesa, pa mulandu wa kutemwa ateyanya ukupitila muli Yesu Kristu. (2 Abena Tesalonika 1:6-9) Ubo bukaba bushiku bwa kwa Yehova, ubwapembelelwa pa nshita ntali ilyo akebelwa ukuti e Mulopwe wa Kubumbwa Konse. “Moneni, ubushiku bwa kwa Yehova bwaisa, ubunkalwe no kububuka ne cifukushi ca bukali, . . . no kufita ababembu ba ciko ukubafumyamo.” (Esaya 13:9) “Ubo bushiku bushiku bwa kububuka, bushiku bwa kumanama kabili ubwa mpatapata, bushiku bwa kusampanya kabili ubwa cimfulumfulu, bushiku bwa mfifi kabili ubwa mfifi iyatoola, bushiku bwa makumbi kabili ubwa makumbi ayafiitula.”—Sefania 1:15.
10 Ukupepa konse ukwa bufi na mabuteko yonse aya bantunse ne milalo ya yako, ifitungululwa no mubifi uushimoneka kateka wa cino calo, fikonaulwa umuyayaya. Bonse abaicita ukubo lubali lwa cino calo pa kukonkelela imikalile ya bukaitemwe, ukubulwo bufumacumi, na bucisenene bakonaulwa. Satana ne fibanda fyakwe tabakapalame ku bekashi ba pe sonde, pantu bakakakwa icine cine pa myaka ikana limo [1,000]. Lyene Ubufumu bwa kwa Lesa e bukalatungulula ifintu fye fyonse pe sonde. Ala kwena uko kukaba kutaulukwa kuli bonse abatemwa ubulungami!—Ukusokolola 18:21, 24; 19:11-16, 19-21; 20:1, 2.
Ifyo Ubufumu Bufwaya—Ne Fyo Fikafishiwapo
11. (a) Bushe Ubufumu bwa kwa Mesia bukafishapo shani ubufwayo bwa kwa Yehova kwi sonde? (b) Cinshi ukuteka kwa Bufumu kukacitila abantu abakaba aba mweo pali iyo nshita?
11 Ubufumu bwa kwa Mesia bukafishapo ubufwayo bwa kwa Lesa bonse kwi sonde ubwa pa kabala ntanshi. (Ukutendeka 1:28; 2:8, 9, 15) Ukufika na kuli buno bushiku, abantu balifilwa ukutungilila ubo bufwayo. Lelo, “ubwikalo ubukesa” bukalamba ku Mwana wa muntu, Yesu Kristu. Bonse abakapusuka ubonaushi Yehova akaleta pali buno bwikashi bukote bakalabombela pamo kabili bakalatungululwa na Kristu Imfumu, bakaba ne nsansa ukulacita fyonse ifyo abeba ukucita, pa kuti isonde lyonse likasanguke paradise. (AbaHebere 2:5-9) Abantu bonse bakaipakisha umulimo wa minwe yabo kabili bakamwenamo nga nshi mu fikafuma mu mushili ifyapaka.—Amalumbo 72:1, 7, 8, 16-19; Esaya 65:21, 22.
12. Bushe abatekwa ba ubu Bufumu bakafika shani ku kupwililika mu mubili na mu matontonkanyo?
12 Ilyo Adamu na Efa babumbilwe, bali abapwililika, kabili cali bufwayo bwa kwa Lesa ukuti isonde likesulemo na bana babo, no kuti bonse bakaleipakisha ukupwililika kwa mubili na matontonkanyo. Ubo bufwayo bukafishiwapo mu nshila yawamisha mu kuteka kwa Bufumu. Pa kuti ico cikabe fyo, fyonse ifyo ulubembu lwaleta fifwile ukufumishiwapo, kabili uyo e mulandu wine Kristu abela Imfumu kabili Shimapepo Mukalamba. Akabo watekanya pa kwafwa abatekwa bakwe aba cumfwila ukuti bakamwenemo mwi lambo lyakwe ilya bumi bwa buntunse ilyaba na maka ya kukonsolwela imembu.
13. Mu kuteka kwa Bufumu kundapwa nshi abantu bakondapwa lwa ku mubili?
13 Mu kuteka kwa Bufumu, abekashi ba pe sonde bakondapwa ukundapwa kwa ku mubili ukwa kusungusha. “E lyo yakashibulwa amenso ya mpofu, na matwi ya bankomamatwi yakakomonwa; e lyo uwalemana amolu akacilauka nge nsebula, no lulimi lwa kwa cibulu lukaula.” (Esaya 35:5, 6) Umubili uwali uwafunyanya pa mulandu wa bukote nelyo ubulwele ukalelemo kucilo wa mwaice na paali ukunakuka kwa mubili ukwa mutatakuya pakabo bumi bwacincila. “E lyo umubili wakwe walelemo kucilo wa mwaice, abwelela ku nshiku sha bulumendo bwakwe.” (Yobo 33:25) Buleiso bushiku ilyo tapakabe ica kulengo muntu nangu umo ukusosa ati, “Nindwala.” Mulandu nshi? Pantu icisendo ca lubembu no bulanda lwaleta fikafumishiwa pa bantunse abatiina Lesa. (Esaya 33:24; Luka 13:11-13) Cine cine, Lesa “akafuute filamba fyonse ku menso yabo, ne mfwa tayakabeko kabili iyo; takwakabe kabili ukuloosha nangu kukuuta nangu kucululuka; pa kuti ifya ntanshi nafiya.”—Ukusokolola 21:4.
14. Bushe mu kupwililika kwa bantunse finshi fyasanshiwamo?
14 Lelo, mu kupwililika mwabe fingi te kupwililika fye mu mubili na mu matontonkanyo. Mwaba ukupashanya imibele ya kwa Yehova bwino, pantu twapangwa ‘mu cata ca kwa Lesa, umwabele cipasho cakwe.’ (Ukutendeka 1:26) Pa kuti cikabe fyo, ukusambilishiwa kwine kwine kukakabilwa. Mu calo cipya, e mo ‘ubulungami bukekala.’ E co, nga filya Esaya asobele, ‘abekashi ba pano nse bakasambililo bulungami.’ (2 Petro 3:13; Esaya 26:9) Ubulungami butungulula ku mutende—umutende pa kati ka bantu ba mishobo yonse, pa fibusa fya pa mutima, mu lupwa lwa muntu, e lyo, maka maka, umutende na Lesa wine. (Amalumbo 85:10-13; Esaya 32:17) Abasambilila ubulungami panono panono bakasambilishiwa ico Lesa afwaya ukubacitila. Ilyo ukutemwa Yehova kwafika pa nshi ya mitima yabo, bakalakonka inshila shakwe mu mikalile yabo yonse. Bakasosa nge fyasosele Yesu ati, ‘Ine ncita pe ifya kutemuna Tata.’ (Yohane 8:29) Cine cine kukabo kuipakisha ubumi ilyo abantu bonse bakalacite co!
Ifyabombwa Kale Ifyo Twamona
15. Ipusheni amepusho yali muli uno paragrafu no kukomaila pa fyo Ubufumu bwabomba kabili langilileni ico tufwile ukulacita pali nomba.
15 Ifikalamba ifyo Ubufumu bwa kwa Lesa bwabomba ne fyo abatekwa ba buko babomba filamonwa. Amepusho yakonkapo na malembo fyalamucinkulako pali fimo ifyabombwa, ne fyo abatekwa bonse aba ubu Bufumu bengacita kabili ifyo bafwile ukulacita pali nomba.
Ni bani abo Ubufumu bwalwishishe pa kabala ntanshi, kabili cinshi catumbwikemo? (Ukusokolola 12:7-10, 12)
Ukutula apo Kristu abikiilwe pa cipuna ca bufumu, bashalapo ba mwi bumba nshi abalelonganikwa? (Ukusokolola 14:1-3)
Mulimo nshi Yesu asobele ukuti e o akacita pa numa ya kubalamuka kwa bucushi bukalamba, nga filya calembwa pali Mateo 25:31-33?
Mulimo nshi uwa kutendekelako uulebombwa pali lelo? Ni bani balebombako uyu mulimo? (Amalumbo 110:3; Mateo 24:14; Ukusokolola 14:6, 7)
Mulandu nshi bakateka na bashimapepo abatulwisha bafililwa ukulesho mulimo wa kushimikila? (Sekaria 4:6; Imilimo 5:38, 39)
Kwaluka nshi kwacitika mu mikalile ya bantu abainashisha ku kuteka kwa Bufumu? (Esaya 2:4; 1 Abena Korinti 6:9-11)
Ubufumu bwa Myaka Ikana Limo [1,000]
16. (a) Myaka inga Kristu akateka? (b) Fintu nshi ifya kusungusha ifikacitwa pali ilya nshita na pa numa?
16 Pa numa ya kukaka Satana ne fibanda fyakwe ku cilindi, Yesu Kristu na bakateka banankwe ba 144,000 bakabe shamfumu kabili bashimapepo pa myaka ikana limo [1,000]. (Ukusokolola 20:6) Pali iyo nshita, abantu bakapwililika, apo ulubembu ne mfwa tufwa pa mulandu wa kwa Adamu fikafumishiwapo umuyayaya. Pa mpela ya Kuteka kwa Myaka Ikana Limo, pa numa ya kubomba bwino umulimo wakwe uwa kuba Mesia Imfumu kabili Shimapepo, Yesu “akalubwilo bufumu” kuli Wishi, “ukuti Lesa akabe fyonse muli fyonse.” (1 Abena Korinti 15:24-28) Pali iyo nshita, Satana akakakulwa pa nshita inono ku kwesha abantu abalubulwa ukumona nga kuti batungilila bumulopwe bwa kwa Yehova ubwa mu kubumbwa konse. Ilyo uko kweshiwa kwa kupelako kukapwa, Yehova akonaula Satana na bacipondoka abalemutungilila. (Ukusokolola 20:7-10) Abatungilile bumulopwe bwa kwa Yehova—ukuti e walinga ukuteka—bakaba nabalanga umupwilapo bucishinka bwabo ubushalukaaluka. E lyo bakaba na bucibusa bwine bwine na Yehova, pantu akabacita ukuba abana bakwe abaume kabili abana bakwe abanakashi, abasuminishiwa na Lesa ukupokelela umweo wa muyayaya.—Abena Roma 8:21.
17. (a) Cinshi cikacitika ku Bufumu pa numa ya myaka ikana limo? (b) Ni mwi calola ukuti Ubufumu “tabwakonaulwe”?
17 E co, umulimo wa kwa Yesu no wa ba 144,000 ukulosha kwi sonde ukaaluka. Mulimo nshi bakalabomba ku ntanshi? Baibolo tayalanda. Lelo nga twatungilila bumulopwe bwa kwa Yehova muli bucishinka, tukaba aba mweo pa mpela ya Kuteka kwa Myaka Ikana Limo pa kuti tukaimwene icaba ubufwayo bwa kwa Yehova kuli bene na ku bubumbo bwakwe bonse ubushaiwamina. Lelo, ukuteka kwa myaka ikana limo ukwa kwa Kristu kukaba kwa “muyayaya” no Bufumu bwakwe “tabwakonaulwe.” (Daniele 7:14) Mu nshila nshi? Cimo icikalenga ca kuti, amaka ya kuteka tayakashiilwe kuli bambi ababa na mabuyo yambi, pantu Yehova e ukaba Kateka. Kabili, Ubufumu ‘tabwakonaulwe’ pantu ifyo bukabomba fikabako umuyayaya. (Daniele 2:44) Na Mesia Imfumu kabili Shimapepo ne mfumu shinankwe kabili bashimapepo bakacindamikwa umuyayaya pa mulandu wa kubombela Yehova muli bucishinka.
Ukulanshanya kwa Kupitulukamo
• Mulandu Ubufumu bwa kwa Lesa bweka fye e bukapwisha amafya ya bantu? Ni lilali Imfumu ya Bufumu bwa kwa Lesa yatendeke ukuteka?
• Cinshi maka maka mwatemwako pa Bufumu bwa kwa Lesa na pa co bukabomba?
• Fintu nshi Ubufumu bwabomba kale ifyo tulemona, kabili cinshi ifwe tufwile ukucita pali fyene?
[Icikope pe bula 92, 93]
Mu Bufumu bwa kwa Lesa, abantu bonse bakasambililo bulungami