Amasakamika—“Monse Monse Balatutitikisha”

ABANTU abengi balasakamikwa sana, ukubikako fye na bakapepa ba kwa Lesa. Kemba wa malumbo atile: ‘Amatontonkanyo ya kusakamika yalifulile.’ (Amalumbo 94:19) Yesu na o atile mu nshita ya mpela, “amasakamika ya mikalile” yakalenga cileyafya abantu ukubombela Yehova. (Luka 21:34) Bushe na imwe mulasakamikwa sana pa mulandu wa kukanakwata indalama, amafya ya mu lupwa, nelyo pa bumi bwenu? Bushe Yehova kuti amwafwa shani ukushipikisha?

Te kuti tupwishe amasakamika fwe bene. Umutumwa Paulo atile: “Monse monse balatutitikisha . . . Tulapeshiwa amano . . . nangu batupoosa pa nshi.” Alandile no kuti “tabatufyenenkesha ica kuti twafilwa na pa kusunkanina,” lelo “te kupeshiwa amano ica kuti twafilwa no mwa kulosha” kabili “tatonaika.” Cinshi cilenga tuleshipikisha? Icitwafwa “maka yacila aya bantunse,” e kutila amaka ayafuma kuli Lesa wa maka yonse, Yehova.—2 Abena Korinti 4:7-9.

Tontonkanyeni pa nshita ilyo Lesa amupeele “amaka yacila aya bantunse.” Bushe muleibukisha ilyo mwaumfwilepo ilyashi ilyalengele mwashininkisha ukuti Yehova ni Lesa wa cikuuku? Bushe icitetekelo cenu tacalekoselako ilyo mwaleebako abantu pali Paradaise iyo Yehova akaleta? Nga tulesangwa mu kulongana kabili tuleshimikilako na bambi ifyo twasumina, tulakwata amaka ayatwafwa ukukanasakamikwa kabili tulaba no mutende uulenga tulebombela Yehova ne nsansa.

Inshita shimo cilafya ukubombela Yehova takwanguka pa mulandu wa mafya. Ku ca kumwenako, Yehova atweba ukufwaya Ubufumu intanshi kabili afwaya twatwalilila ukubomba ne milimo yakwe. (Mateo 6:33; Luka 13:24) Kuti mwacita shani nga ca kuti kwaliba abamukaanya ukupepa Lesa, nga mulalwalilila, nelyo nga mulakwata amafya mu lupwa ayamusakamika sana? Inga ca kuti incito mubomba ilalenga mwilakwata amaka nelyo inshita iya kuba mu kulongana? Nga ca kuti ifya kucita filamufulila ica kuti mulafilwa no kukwata inshita na maka ya kubomba imilimo yonse, kuti mulesakamikwa. Nalimo kuti mwalatontonkanya no kuti ifyo Yehova amweba ukucita fingi sana.

Yehova alitwishiba bwino sana, kanshi tatwenekela ukucita ifyo tushingacita. Yehova alishiba no kuti tulakabila inshita iya kutuusha nga twanaka nangu nga twasakamikwa.—Amalumbo 103:13, 14.

Natulande pa fyo Yehova ayafwile kasesema Eliya. Pa nshita imo, kasesema Eliya alifuupwilwe kabili alyumfwile umwenso ica kuti afulumukila na mu matololo. Nomba bushe Yehova alimukalipiile no kumweba ukuyabomba umulimo uo amupeele? Iyo. Yehova atumine malaika imiku ibili ku kumubusha no kumupeela ifya kulya. Nangu ca kuti malaika alimupeele ifya kulya, ilyo papitile inshiku 40, Eliya atwalilile fye ukusakamikwa no kuba no mwenso. Finshi fimbi ifyo Yehova acitile pa kuti amwafwe? Ica kubalilapo ca kuti, Yehova alimulangile ukutila kuti amucingilila. Yehova na kabili alimusansamwishe ne “shiwi ilyanakilila, kabili ilyafuuka.” Na mu kulekelesha, Yehova aebele Eliya ukuti kwali abantu na bambi abengi aba citetekelo, abalebombela Lesa. Eliya alitendeke ukubomba umulimo wa bukasesema na kabili. (1 Ishamfumu 19:1-19) Cinshi twingasambililako kuli Eliya. Ilyo Eliya asakamikwe, Yehova alimutekanishishe kabili alimulangulukileko. Yehova tayaluka. Alatusakamana sana nga filya fine alesakamana Eliya.

Tamufwile ukulasakamikwa pa milimo mubombela Yehova kabili tamulingile ukulalinganya ifyo mwalebomba kale ku fyo mulebomba pali ino nshita. Ku ca kumwenako: Nga ca kuti umuntu uubutuka ulubilo aleka ukulabutuka pa myeshi iingi nelyo pa myaka iingi, nga atendeka ukubutuka na kabili te kuti alebutuka nge fyo alebutuka kale. Alacita ifingamwafwa ukuba na maka pa kuti elanaka sana pa kubutuka. Abena Kristu baba kwati bantu ababutuka ulubilo. Balabombesha pantu balishiba ukuti bakalambulwa. (1 Abena Korinti 9:24-27) Bushe te kuti musalepo cimo ica kucita mu mulimo wa kwa Lesa ico mwingaba na maka ya kucita pali ino ine nshita? Nalimo kuti mwasalapo ukulalongana lyonse. Mulepepa kuli Yehova lyonse pa kuti alemwafwa ukucita ifyo mwapanga. Nga mwakosa mu kupepa, e lyo ‘mukasonda no kumona ukuti Yehova musuma.’ (Amalumbo 34:8) Muleibukisha ukuti pa milimo yonse iyo mubomba mu mulimo wa kwa Lesa, nangu ikalamba nelyo nga inono, Yehova alatasha kabili alamumona ukuti mwalicindama.—Luka 21:1-4.

Finshi ifyo Yehova acitile pa kwafwa ba June ukutendeka ukulongana na kabili? Ba June batile: “Nalepepa lyonse kuli Yehova ukuti angafwe. Bushiku bumo umupongoshi wandi anjebele ukuti kukaba ukulongana kukalamba ku ncende uko naleikalila. Nasalilepo ukulonganako ubushiku bumo. Ala nalitemenwe ukuba na bantu ba kwa Lesa na kabili! Uku ukulongana kwalingafwile sana. Pali ino nshita, ndabombela Yehova ne nsansa kabili naliba ne nsansa icine cine! Nalishiba ukuti mfwile ukulaba na bamunyinane pa kuti balenkoselesha. Ndatasha Lesa pa kungafwa ukutendeka ukumupepa na kabili ilyo kucili inshita.”