Amashiwi ya Kutendekelako mu Cipande 8

Yehova alipaalile Solomone ica kuti ali sana na mano kabili alimupeele no mulimo wa kukuula itempele, lelo mu kupita kwa nshita alishiile Yehova. Nga muli bafyashi, londolweleni umwana wenu ifyo abalepepa balesa ba bufi balengele Solomone aleka ukupepa Lesa. Ubufumu balibwakenye, kabili imfumu ishalecita ifyabipa shalengele abena Israele baba abasangu kabili batendeka no kupepa utulubi. Pali ilya nshita, bakasesema abali ne cishinka kuli Yehova balebacusha kabili balebepaya. Namfumu Yesebele alengele abali mu Bufumu bwa ku kapinda ka ku kuso ukuba sana abasangu. Iyi yali ni nshita ya mfifi ku bena Israele. Na lyo line mu bena Israele mwali ababomfi ba kwa Yehova abengi abali ne cishinka pamo nga Imfumu Yehoshafati e lyo na kasesema Eliya.